Filipenses
Mapabaxutoje Apóstolnë Pablo toyaquina Jesús peliwaisi pejumexaniataewi, Filipos tomarata pejinawanapaewijawabelia
Pablo pebajacobiliwaisi Jesús pijajiwijawabelia, Filipos tomarata pejinawanapaewi
1
Xanë Pablonë, Timoteobeje, Jesucristo papijajiwitonënëbeje, pacabajacobatsibeje paxamë, Filipos tomarata panejinawanapaewi, Dioso papeca-itapetsiwia papijajiwinexamë Cristo Jesús pejamatabëcueneta. Pabajacobajëbejenua ancianowi, diáconowi-ata.
2 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pablo towajëta Diosojawabelia Jesús pijajiwi yabara
3 Pexaniajamatabëcuene rajutabiabajë Diosojawabelia tawajëtsijawata paxamë yabara patacanajamatabënapitatsijawata.
4 Patacatowajëtsijawata Diosojawabelia, jamatabëcuenebarëyaya wajëtabiabajë paxamë yabara,
5 tsipaji caejamabëcuene paxainame pataneyawenonabiabinexamë tanamatawenonaejawanë yabara. Nexata, xua namatawenonajë tatsipaebanajetarucaejawata Jesús peliwaisi, panerajutabiabame panejumexaniataecujinae bajarapaliwaisi, mapamatacabijawaberena-ataje.
6 Jamatabëcuenebarëyaya pacatowajëtabiabatsinua, tsipaji yapëtaniji baja cajena, pepacuene panexainaejawanexa papexaniacueneb Dioso taxuxuaba paxamëjawata. Nexata yapëtaniji bajaraPonë pewajënaeyabelia papecajamatabëcuenexanepanaeya-exanaponaenexa, pexaniajamatabëcuene panexainawanapaenexa, Jesucristo icatsia pepatsimatacabitsicajawabelia.
7 Netoxanepana bajarapacuenia patacasiwanajamatabëxainaejawa, tsipaji bitso paca-asiwatsi. Paxamë caejamatabëcuene paxainame asiwaya pataneyawenonaejawamë, Jesús peliwaisi tapaebanajetarucaenexa, naneconitsia taponaponae-epatotanua penaneconitsiwi pejebabiabibota. Orijibia, panejamatabëcueneyawenoname, paepatota nenuta nacua pewetsiwi pitabarata, tanayajiwicuaicuaijainexa Jesús peliwaisi yabara, tayapëtaeya-exanaenexa pexaniajailiwaisicuene tatsipaebaponaejawa.
8 Dioso cajena nejamatabëcueneyapëtane ayaicuenia pataca-itaxanaejawa, pataca-asiwajamatabëcuene-ata. Pacuenia Jesucristo naca-asiwa, bajarapacuenia nejamatabëcuenecaëjëpaeya-exana pataca-asiwanexa.
9 Pacatowajëtabiabatsi Diosojawabelia papecajamatabëcuenewënëtsinexa namata-enetsia panena-asiwajawa panewajënaeyabelia panecatsitecawanapaenexa. Pacatowajëtabiabatsinua papecarajutaponaenexa paneyapëtaejamatabëcuene, panecanaëjëtsijamatabëcuene-ata, xaniawaetsia pane-exanawanapaenexa pane-asiwajawata Dioso papecatojitsipaecuenia.
10 Bajarapacuenia payapëtaename pane-itapetsijawa pitsicuene Dioso tsitapexaniacuenetsi pane-exanaejawanexa. Nexata, pepocuene aneconijibia pajinawanapaename, Cristo icatsia pepatsimatacabitsicajawabelia.
11 Nexata, Jesucristo papecajamatabëcueneyawenonaexae, nawitsia pexaniacuenejawanë panacuenecapitsapaponaename pane-exanawanapaejawata. Nexata, itsamonae papecacuenetaejawata, yaiyataeya Dioso pexaniacuenia wënëxaniatsiana.
Pablo tsitapexaniacuenetsi bitso, pe-exanaponaponaejawa Cristo pijacuene
12 Tajamonae, pacatojitsipatsi paneyapëtaejawa papibisiacuenejawanë netocopiapatapona, tanecuenecaranatsijawanënexa, Jesús peliwaisi tapaebaponaeyaniwa. Biji rajane caranata, bajaraxua nejamatabëcueneyawenona tawajënaeyabelia tapaebinexa bajarapapexanialiwaisi itsamonaejawabelia.
13 Tane-etsixae nacua-ewetsinë pijabota penaneconitsiwi pejinawanapaeya-exanaetaxunaejawata, nexata bajarajota pejinawanapaewi, nacua-ewetsinë pijabopijiwi, wajabitsaë-ata, neyapëtane majotaje naneconitsiataponaponaejawaje, Jesucristo pijajiwitonëxaenë.
14 Ayaibitsaëtoxaneto, Jesús peliwaisi pejumexaniataewi, itsa newënëtane naneconitsia taponaponaejawa mapatomarataje, najamatabëcuenesaëya-exana ajumejunawijibia Dioso pejumeliwaisi pepaebaponaenexa itsamonaejawabelia. Orijibia, pewajënaeyabelia itaxutuajamatejema tsawanapae Dioso.
15 Xaniajai rabaja, bajarapacuenia itsamonae exana. Nexata, bajarapamonaeyajuwënëwi, Dioso pejumeliwaisi tsipaebapona, tanecuenecaëbixae, liwaisi tanetsi-exanaenexa. Itsamonae pijinia tsipaebapona Cristo peliwaisi pexaniajaijamatabëcueneta.
16 Nexata, bajarapamonae tsipaebapona Cristo peliwaisi tane-asiwaxae, tsipaji yapëtane Dioso tane-etsijawa penaneconitsiwi pejebabiabibota, Jesús peliwaisi yabara tayapijiwicuaicuaijainexa.
17 Itsamonae pijinia tsipaebapona Jesús peliwaisi, penatojitsipaexae pejumetaewitsi peyaiyataenexatsi, peliwaisipënaponaenexatsinua. Saya jema Cristo peliwaisi tsipaebapona, tsipaji tawënëtaejawata pepaebijawa jitsipa tanenajamatabëxainaeya-exanaejawa, itsa jume, bitso liwaisi tanetsi-exanaenexa.
18 Itsiata, apo-itsacuene bajarapacuenia pexanaejawa. Pexaniajamatabëcuenecuenia paebi-ata, itsa jume, tanecuenecaëbicuenia paebi-atanua, najëpaeya Jesús peliwaisi paeba. Bajaraxuata, siwajamatabëcuenebarëyanë tsabiabi itsawënëtaniji itsamonae Jesús peliwaisi pepaebaponaejawa yabara. Bitso orijibia tawajënaeyabelia bajaraxua yabara jamatabëcuenebarëyanë tsaponae tsane.
19 Barëyanënua, tsipaji yapëtaniji tapitsapaejawanexa penaneconitsibowecua, patanetowajëtaponaexaemë Diosojawabelia, taneyawenonaponaexaenua Espíritu Santo-ata, Ponë Jesucristo itorobica.
20 Bitso apojitsipaenë ta-exanaejawa itsacuenejawayo-ata, xua wemaxë-auranë tsipae. Biji rajane, itaxutuajamatejemanë Dioso taneyawenonaenexa, ajunawijibia ta-exanaponaenexa Cristo pejitsipaecuenia daxitamatacabijawabelia. Nexata, ta-asaëtsaponaponae-epato, itsa jume, tatëpaejawata-ata mapanacuataje, daxitajiwi tanecuenetaewi yaiyataena Cristo, ayaijamatabëcuenenë yabara.
21 Bajarapacuenebeje xanënexa bitso netsitanamatamota, ta-asaëtsaponaponae-epato mapanacuataje, jitsipabiabajë yaiyataeya ta-exanaponaponaejawa Cristo pejitsipaecuenia. Itsiata, matatoxenetsia bitso netsita pexaniacuene tatëpaejawa, Cristo tayajawaponaponaenexa athëbëtatsia.
22 Apoyapëtaenë picani xua netoxanepanaejitsipa, tsipaji itsa asaënë tsaponaponae abaxë mapanacuataje, necaëjëpa matatoxenetsia tato-exanaponaponaenexa Cristo tanetojitsipaecuenia. Nexata, xanë apoyapëtaenë xua pepacuene nato-itapetsijitsianë.
23 Neto-ayapëbeje cajena tanato-itapetsijawa anijajamatabëcuenebeje. Itsajawata, bitso jitsipabiabajë tatëpaejawa, taponaenexa Cristo pijanacuayabetsia. Bajaraxua bitso netoxanepanaejitsipa.
24 Itsiata, paxamë panenamatawenoname abaxë taponaponaenexa mapanacuataje, patacayawenonaponaponaenexa.
25 Xanë baja cajena, yapëtaniji paxamë abaxë patanenamatawenonaejawamë, taponaponaenexa mapanacuataje, patacayawenonaenexa, pane-ajamatabëcuenesaënexa panewajënaeyabelia, panejamatabëcuenebarëyanexanua, panejumexaniataejawa Cristo peliwaisi.
26 Nexata jane baja, icatsia itsa patsianajë paxamëjawata, Cristo Jesús taneyawenonaecujinae penaneconitsiwi pejebabiabibowecua tapitsapaenexa, paxainaename xua yabara matatoxenetsia pexaniacuenia pawënëxaniatsijitsiamë Cristo Jesús.
27 Daxitawecua caejawa pacawajëtatsi. ¡Xaniawaetsia pajinawanapare, papeca-itorobicuenia pexanialiwaisi, Cristo peliwaisi! Nexata, ponae-atanë tsipae paxamëjawabelia patacataenexa, itsa jume, apoponae-atanë tsipae, jitsipajë caeliwaisi patacawënëtaeponaejawa najamatabëcuenejëpaeya panecasaëtsawanapaejawa Cristo peliwaisi. Jitsipajënua patacawënëliwaisitaejawa asaëyata najamatabëjëpaeya jiwi panetsipaebawanapaejawa Cristo peliwaisi, jiwi pecapanepaeliwaisinexatsi.
28 ¡Papecacuene-itoyawi pacabejiobia-exanae-ata, pëtsa pacujunawame! Bajarapacuenia panejamatabëcuene-aitatsacajawata, bajarapamonae natoyapëtaena Dioso pewerebiabijawanexatsi. Paxamë pijinia panatoyapëtaename Dioso papecacapanepaejawanexa.
29 Dioso, Ponë pexaniacuenia pacatocopata panesiwanajamatabëcuenecopabinexa Cristojawabelia, bajaraPonë pacacopatanua itsamonae papecabejiobia-exanaenexa Cristo papijajiwixaemë.
30 Pacuenia Cristo pijajiwitonëxaenë nebejiobia-exanapona, bajarapijinia pacuenia paxamë-ata, itsamonae pacabejiobia-exanaena. Pacuenia baja imata panetaneme tanebejiobia-exanaejawa, bajarapacuenia abaxë tsiteca nebejiobia-exanapona.