Beweliajamatabëcuene nataeya pajinawanapare Cristo papecatojitsipaecuenia
2
¡Paxamë rabaja paneyapëtaneme Cristo wajaca-asiwajawa, wajanacajamatabëcueneyawenonaejawa, cae-Espíritu Santo wajanacatsijamatabë-ecaejawa-ata, itsa Cristo papeca-asiwajamatabëcuene pacanamatacaitoroba itsamonae panebejiobiataejawa, pexaniacuene pato-exanare!
2 Ayaicuenia pacasiwajamatabëcuenebarëyatsi tsane, najamatabëcuenejëpaeya panenajuajinawanapaejawata, namata-enetsia panena-asiwatsawanapaejawata, caejamatabëcuene panesiwanajamatabëxainaejawatanua, xua pa-exanaejitsiamë Dioso pejamatabëcueneta.
3 ¡Pëtsa patsita-exaname itsacuenejawa papecacuenecujuanixae xua yabara itsamonae pacataejitsia bepa-ayaijamatabëcuenejiwimë! Biji rajane, beweliajamatabëcuenewi panataename. Itsamonae pacueneyaiyataeyabiabianame pecuenecujuanijawatsi yabara.
4 ¡Pëtsa ëpaxamënexa panasiwanajamatabëxainabiabame xua pacatoxanepanaejitsia! Biji rajane, xanepana itsamonae-ata panesiwanajamatabëxainaejawa.
5 ¡Pacuenia Cristo Jesús pacasiwanajamatabëxaina, bajarapijinia pacuenia, paxamë-ata itsamonae yabara pasiwanajamatabëxainare!
6 «Cristo ayaijamatabëcuenenë-ata Diosonëxae,a aponato-asiwa pijaDiosojamatabëcuene.
7 Biji rajane, pijacuata nawecuacopatab ayaijamatabëcuene pexainaejawami, juya penacopatsinexa Dioso pijajiwitonëcuenia.c Bajaraxuata, naexana mapanacuataje, pacuenia waxaitsi banaexanatsi.
8 Jiwitonëcuenia penaitajëtsixae mapanacuataje, pijacuata naexana beweliajamatabëcuenenë.d Nexata, Paxa Dioso petonajumecopatsicueniatsi jumecowënëtsiaponaponae pebeyaxuabijawabelianexatsi, pecobematabibarutsinexatsi cruzata, bitso bepijaneconi pexanaenë.
9 Jumecowënëtsiaya peponaponaexae beweliajamatabëcuenenëcuenia, Dioso juya ayaijamatabëcuenenë exanatsi daxitawecua. Tocopatatsinua matatoxenetsia peyaiyataenexatsi daxitawiriawi.
10 Bajaraxuata, Cristo pitabarata, daxitajiwi pematabacabëta yaiyataeya tonubenaenatsi, athëbëtatsia pejinawanapaewi, mapanacuataje pejinawanapaewi, petëpaewimi-ata.
11 Bajarapijinia pacuenia, daxitawiriajumewi natoyapëtaena Jesucristo pepopetuxanenëcuene. Bajarapacuenia pexanaejawata, daxitajiwi pexaniacuenia Dioso wënëxaniatsiana, bitso ayaijamatabëcuenenë yabara».
Pacuenia Jesús pijawi bepecotia pexainaewi tsawanapae mapanacuapijiwituatuajëta
12 Tajamonae bitso pataca-asiwawi, patacayajawaponaponaejawata pajumecowënëtabiabame Dioso peliwaisi papeca-itorobicuenia. ¡Matatoxenetsia Dioso pajumecowënëtawanapare, tajë pacawecuaponaponae-atatsi! Nexata, pacaejiwimë canacujitsia, yaiyataeya pa-exanawanapaename Dioso papecatojitsipaecuenia, papecacapanepaexae papijawinexamë.
13 Pacacuenecaëjëpa bajarapacuenia pane-exanaejawa, tsipaji raja Dioso pacajitsipaeya-exana, pacajamatabëcuenecaëjëpaeya-exananua papecatojitsipaecuenia pane-exanaenexa.
14 ¡Daxita Dioso papecatojitsipaecuenia pa-exanawanapare, pibisiacuenia panabaracuaicuaijainejewamë, anaeyanua panajumenotsinejewamë!
15 Bajarapacuenia pajinawanapaename, itsaneconi panatsi-exanaenejewamë, panetsitajinawanapaexae Dioso papeximëcuene. Nexata, mapanacuapijiwije, pibisiacuene pexanaewituatuajëta pajinawanapae-atamë tsane, itsajiwi-ata acuenebi pibisiacuenia papecabaracuaicuaijainexa. Pacuenia pitaquirijawata, pecotia pejamatabëcuene jiwi xaniawaetsia natsiwajënaetane xua tsiayaitsi, bajarapijinia pacuenia, paxamë-ata pexaniacuene panetsita-exanawanapaejawata payapëtaeya-exanaename mapanacuapijiwije xua pibisiacuene pexanaeyaniwa. Nexata, paxamë bajarapamonaenexa bepapecotiamë tsane.
16 ¡Pëtsa baja pacopabame panejumexaniataejawa, Jesús peliwaisi, papecajamatabëcuene-aitawaya-exanaeliwaisi! Nexata, pamatacabi Cristo icatsia patsianica, ayaicuenia pacasiwabarëyatsi tsane. Bajarapaepatota yapëtaenajë apotanacueratsijawa asaëya tanacuenebijawa paxamëjawata.
17 Itsamonae nebeyaxuabijitsia-ata tsipae Cristo peliwaisi patacatsipaebixae, xanë itsiata nasiwajamatabëcuenebarëyanë tsipae. Aponasiwabëjanë, tsipaji pasiwanajamatabëcuenecopabame Cristojawabelia, pexaniajailiwaisi patacatsipaebixae. Tanebeyaxuabijawa natotaniji tajanarunaejawata be-ofrendacueniaf tarajutsijawa Diosojawabelia, xaniawaetsia panejinawanapaenexa bajaraPonë pitabarata. Nexata, daxita paxamë ayaicuenia pacayajawajamatabëcuenebarëyatsi tsane.
18 ¡Bajaraxua yabara pajamatabëcuenebarëyamëre tsawanapae! Xanë-ata pacayajawabarëyatsi tsane.
Timoteo, Epafroditobeje, yabara peliwaisi
19 Itsa wajatuxanenë Jesús netojitsipa, bepijiayo itorobianajë Timoteo, papecataenexalia. Pepatsicujinaerena, itsa pacawënëliwaisitaenatsi pacuenia pajinawanapame nejamatabëcuenebarëyaya-exanaena.
20 Bajaraponë, caenë, xainajë tanejamatabëcuenejëpaenë. Bitso pacasiwajamatabëcuenebëjai panejinawanapaecuene yabara,
21 tsipaji itsamonae ëpijacuene yabara bitso nasiwajamatabëcuenebëjai tsabiabi, saya penatojitsipaecuenia pexanaenexa. Cristo Jesús pijacuene aposiwanajamatabëcuenebëjai petonacuenebinexa.
22 Paxamë baja pacueneyapëtaneme Timoteo, pexaniacuenia papecatsitaponaponaejawa. Pacuenia pexënato bacueneyawenona paxa penacuenebijawa, bajarapijinia pacuenia Timoteo necueneyawenona, jiwi tatsipaebaponaejawa pexanialiwaisi, Jesucristo peliwaisi.
23 Tayapëtaecujinae xaniawaetsia taponaponaejawa yabara penaneconitsiwi pejebabiabibota, bajaraxuacujinae jane baja jamatabë-itorobajë Timoteo paxamëjawabelia, papecataenexalia.
24 Itsiata, xanë itaxutuajamatejemanë Dioso bepijiayo tapitsapaenexa, jamatejema tajacujaya taponaenexa paxamëjawabelia.
25 Imata rabaja, paneto-itorobaremena wajabananë Epafrodito, bajarapacuenia pataneyawenonaenexamë tanamatawenonae-epatota. Nexata, bajaraponëbeje xaniawaetsia panajuaponaponajëbeje. Neyawenonaponaponanua. Asaëyata panajuanacuenebajëbeje patapaebaponaponaejawatabeje Jesús peliwaisi, itsamonae panenajuabejiobia-exanae-atabeje. Itsiata, aeconoxae, netsitaxanepana caewëalia bajaraponë patacato-itorobinexalia.
26 Majotaje Epafrodito jamatejema baja piawitanecujinae. Bajaraxuata, bitso pacajamatabënajina. Orijibia, jamatabëcuenebëjai peyapëtaexae panewënëliwaisitaejawa piawitanejawa. Bajaraxuata, jamatabëpona paxamëjawabelia papecataenexa.
27 ¡Xaniajai rabaja cajena! Bitso awitane. Imoxoyo baja cajena petëpae. Itsiata baitsi jane, Dioso pitaxutotsoniataexaetsi, apotocopatsitsi petëpaenexa. Xanë-ata nitaxutotsoniatane, tsipaji itsa newecuatëpaejitsipa, bitso najamatabëxainaejitsipajë, tanajamatabëxainaejawawecua, penaneconitsiwi pejebabiabibota taponaponaexae.
28 Bajaraxuata, bepijiayo patacato-itorobaliatsi bajaraponë. Nexata, itsa patsialia panetaejawata pajamatabëcuenebarëyamë tsane. Nexata, xanë juya bewelia pacasiwanajamatabëcuenebëjai tsanetsi.
29 Pacopiapitsianame wajabananë bitso jamatabëcuenebarëyaya, Dioso pejamatabëcueneta. Payaiyataenamenua pamonae jamatabëcuenejëpa, pacuenia bajaraponë jamatabëcuene-itsi.
30 Bajaraponë imoxo picani petëpae, Cristo pijacuene patanajuanacuenebaponaponaejawatabeje. Paxamë apopapatsi-atamërena maberenaje, pataneyawenonaenexamë, itsiata, panejamatabëcueneta bajaraponë neyawenonabiaba, Cristo pijacuene tatonacuenebijawa.