Colosenses
Mapabaxutoje Apóstolnë Pablo toyaquina Jesús peliwaisi pejumexaniataewi, Colosas tomarata pejinawanapaewijawabelia
Pablo pebajacobiliwaisi Jesús pijajiwijawabelia, Colosas tomarata pejinawanapaewi
1
Xanë Pablonë, Dioso tanetojitsipaexae, nitapeta Jesucristo pija-apóstol-nënexanë. Nexata, Jesucristo nitoroba tatsipaebaponaenexa pexanialiwaisi jiwijawabelia.
2 Xanë pacatoyaquinatsi mapabaxutoje, paxamë Dioso papeca-itapetsiwi papijajiwinexamë, Colosas tomarata panejinawanapaewi. Paxanëbeje, Timoteobeje, pexaniacuenia pacabajacobatsibeje, nacaemonaetsi wajanaca-exanaewi Cristo pejamatabëcueneta. Pexaniacuenia pacatojitsipatsi, waxa Dioso, wajatuxanenë Jesucristobeje, p papecajamatabëwënëtsinexa piasiwajamatabëcuene, pebarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pacuenia Pablo wajëtabiaba Diosojawabelia Jesús pijajiwi yabara, Colosas tomarata pejinawanapaewi
3 Paxanëbeje, Timoteobeje, pacatowajëtabiabatsibeje wajatuxanenë Jesucristo paxa Diosojawabelia. Patawajëtsijawatabeje, pexaniajamatabëcuene parajutajëbeje, tsipaji pexaniacuenia pacayawenonabiaba paColosas-tomarapijiwimë.
4 Bajarapacuenia pawajëtabiabajëbeje, tsipaji pajumetanijibeje xaniawaetsia panejumexaniataewanapaejawa Jesús peliwaisi, itsamonae-ata pane-asiwatsawanapaejawa Dioso pitapetsiwi pijajiwinexa.
5 Bajarapajamatabëcuenebeje panexainaexae, xaniawaetsia payapëtaneme xua Dioso pacatoxaniawaeta athëbëtatsia, papecarajutsinexa panejumexaniataexae Jesús peliwaisi. Paxamë baja cajena pajumetaneme bajaraxua yabara, pamatacabi a̱jena̱ pacatsipaeba Jesús peliwaisi, papecacapanepaeliwaisinexa.
6 Papexanialiwaisi Epafras copiaya pacatsipaeba, aeconoxae baja daxitanacuanëjawa yacaëjëpapona. Nexata, daxitanacuanëjawa pamonae jumexaniataepona bajarapaliwaisi, copatapona baja perujujamatabëcuenemi, juya pexainaenexa pejanajamatabëcuene. Bajarapacuenia paxamë-ata pacatocopiapata, pamatacabita a̱jena̱ pajumetaneme Jesús peliwaisi. Payapëtaeponamenua pepacuene Dioso papeca-itaxutotsoniataejawa.
7 Bajarapacuene payapëtaneme, waja-asiwanë Epafras papecatsipaebijawata. Bajaraponë paxanëbeje patayajawanacuenebinëbeje, xaniawaetsia Cristo pijacuene petonacuenebinë. Paxamë tuatuajëta bajaraponë pacayawenonaponapona.
8 Nexata, pamatacabi Epafras pata paxanëbejejawaberena, panetsipaebabeje xaniawaetsia panejinawanapaejawa, Espíritu Santo papecayawenonaejawa namata-enetsia panena-asiwanexa.
9 Nexata, paxanëbeje patacawënëliwaisitaecujinaebeje paxamë yabara, pacatowajëtabiabatsibeje Diosojawabelia, papecayapëtaeya-exanaponaenexa xaniawaetsia xua pacatojitsipa pane-exanawanapaenexa panewajënaeyabelia. Pacatowajëtabiabatsibejenua Espíritu Santo papecajamatabëcuenewënëtsinexa pecanaëjëtsijamatabëcuene, peyapëtaejamatabëcuene-ata.
10 Bajarapacuenia nexata, Dioso papijajiwimë pacacuenecaëjëpaena xaniawaetsia jiwi panetsitajinawanapaejawa. Bajaraxua jiwi pacacueneyapëtaena pexaniacuenejawanë pane-exanawanapaejawata, xuanë Dioso siwajamatabëcuenebarëya, panewajënaeyabelia Dioso pecuene payapëtaeponaenamenua.
11 Pacatowajëtabiabatsibejenua Dioso daxita pesaëta papecajamatabëcuene-asaëya-exanaenexa, papecajamatabëcuenecaëjëpaenexa pane-ajamatabëcuenesaëtsawanapaejawa, bajayajebi piayapëbejecuenejawanë pacatocopiapataponae-ata tsane.
12 Bajarapasaëta jamatabëcuenebarëyaya pexaniajamatabëcuene parajutabiabianame waxa Diosojawabelia, tsipaji bajaraPonë papecawecua-ajibia-exanaejawata panijaneconimi, pacacuenecaëjëpaeya-exana panepitsinexa xua Dioso rajutsiapaeba daxita pijajiwi pijapeniweniwenaenacuatatsia.
13 Waxaitsi bajayata jinawanapatsi bepitaquirinacuata, dowathi wajanacanamatacaitorobisaëta. Itsiata baja, aeconoxae Dioso nacacapanepa bajarapasaëwecua. Xuacujinae, bajaraPonë nacanuba baja Pexënato, piasiwanë, wajanacayanacua-ewetsiliwaisita, juya Pexënato wajanacanamatacaitorobabiabinexa.
14 Dioso nacacapanepa dowathi wajanacanamatacaitorobisaëwecua, tsipaji Cristo nacatomatamota wajaneconimi wajanacasiwatëpaejawata, Dioso aneconijibia wajanacataenexa.
Cristo ayaijamatabëcuenenë daxitawecua
15 Dioso apowajataecapanepaenë-ata, itsiata Cristo, itsa naexana mapanacuataje, nacayapëtaeya-exana pacuenia paxa cuene-itsi. Cristo, paxa Diosobeje najëpabeje. BajaraPonë baja cajena ponapona athëbëtatsia, Dioso daxitacuene mapanacuaje pexanaewajënaeya. Bajaraxuata, yapëtanetsi ayaijamatabëcuenenë daxita Dioso pecobecowëwecua.
16 Baitsi, najua-exanabeje daxitacuene mapanacuataje, athëbëtatsia-ata. Nexata, Cristo baja cajena pexanaenë daxita xuanë tanetsi, xuanë-ata apotaecapanepaetsi, pecanacopatsinexa daxita pecobecowë pewetsinënexa. Bajaraxuata, waja-itaxutota apowajataecapanepaewi, bajarapamonae tuatuajëta tocopata itsamonae ayaijamatabëcuenewinexa, itsamonae pewetsiwinexa, itsamonae-ata penamatacaitorobisaë pexainaewinexa. Bajarapacuenia Cristo daxitacuene pexanaenëxae, nexata yapëtanetsi ayaijamatabëcuenenë daxitawecua, pecuenecaëjëpaejawatsinua pejitsipaecuenia pexanaenexa pecobecowëjawabelia.
17 Cristo baja cajena athëbëtatsia ponapona, daxitacuene pexanaewajënaeya. Pesaëtanua daxitacuene pexanaecuenejawanë mapamatacabijawaberena-ataje apowerewerecae. Abaxë pewajënaeyabelia tsitecanajetaruca.
18 Dioso copata Cristo pijajiwi bepematabocotonë, panamatacaitorobinexa, daxita caeperabëto pexanaewitsi. Cristo pejamatabëcueneta, daxita pijajiwi jamatabëcuene-aitawa tsawanapae Diosojawabelia. BajaraPonë copiaya namatacota petëpaejawawecua. Daxita bajarapacuenejawanë yabara, matatoxenetsia ayaijamatabëcuenenë, daxitacuene pecuenenamataxainaexae.
19 Bajarapacuenia Dioso tocopata Cristo ayaijamatabëcuenenënexa, pejamatabëcuenejëpaenexatsia daxitacuenejawabelia.
20 Nexata, daxita xuanë abeje Adán pejamatabëcueneta, mapanacuapijicuene, athëbëpijicuene-ata, caewëalia pejanacuenia peliwaisixanebinexa. Nexata, Dioso itorobica Cristo mapanacuayabetsicaje, cruzata janarunaeya pesiwatëpaenexa daxita pijaneconi pexainaewi, icatsia pebarajamatabëcuenexanepanaenexa, caewëalia aneconijibia petaenexatsi Cristo pejamatabëcueneta.
21 Bajarapacuenia pijinia, paxamë-ata picani abaxë bajayata Diosowecua naxuabiaya pajinawanapame. Dioso-ata papijawajabitsaëmë tsawanapae, tsipaji panajamatabëxainabiabame ëpibisiacuene pane-exanawanapaenexa.
22 Itsiata baitsi jane, Cristo pejamatabëcueneta aeconoxae baja Dioso pacabarajamatabëcuenexanepana. BajaraPonë bejiobia-exanatsi cruzata papecasiwatëpaenexa, Dioso pacawecua-ajibia-exana pibisiacuene pane-exanaeneconimi. Athëbëtatsianua Cristo pacanubiana Dioso pitabarata pepopane-aneconijibiwi.
23 Bajarapacuenia Dioso pacato-exanaena, panewajënaeyabelia itsa pajumexaniataewanapaename Cristo peliwaisi, papecasiwatëpaejawa panijaneconi yabara. Asaëyata pajumexaniataename daxita pacuenia pacacujaruba bajarapaliwaisi, panecopia-ewetawanapaenexa panepitsijawanexa daxita xua Dioso najumecapanepaeya pacarajutsiapaeba. ¡Pëtsa pacopabame panejumexaniataejawa paliwaisi pajumetaneme, tsipaji yacaëjëpapona daxitanacuanëjawa petsipaebaponaejawa! Xanë-ata, Pablonë, tsipaebaponajë bajarapaliwaisi.
Pablo pacuenejawanë exanapona Cristo pijajiwijawa
24 Xanë, Pablonë, jamatabëcuenebarëyaya ponaponajë nabejiobitsia ponaponae-atanë majotaje penaneconitsiwi pejebabiabibota paxamë yabara, Cristo papijajiwimë.b Pacuenia Cristo bejiobia-exanatsi paxamë papecacapanepaenexa panijaneconiwecua, becaeperabëto papeca-exanaenexa bajaraPonëta, bajarapijinia pacuenia Cristo peliwaisi pitoyawi tanebejiobia-exananaejawata, paxamë pajumetaneme Cristo peliwaisi, papecacapanepaeliwaisinexa. Panesiwanajamatabëcuenecopabixae Cristojawabelia, jamatabëcuenebarëyaya ponaponajë itsamonae nebejiobia-exanae-ata.
25 Dioso necopata Cristo pijajiwi tajamatabëcueneyawenonaenënexa, xaniawaetsia daxitajiwijawabelia tatsipaebaponaenexa pexanialiwaisi, Cristo peliwaisi, jiwi pecapanepaeliwaisinexatsi. Bajaraxuata, paxamë-ata pacajamatabëcueneyawenonatsi patacatsipaebijawata Dioso peliwaisi.
26 Nexata, pacatsipaebatsi paliwaisi Dioso bajayatami apoyapëtaeya-exanae itsajiwijawabelia-ata. Itsiata baitsi jane, Dioso nacayapëtaeya-exana waxaitsi wajanaca-itapetsijawa pijajiwinexatsi.
27 Bajarapaliwaisita, nacayapëtaeya-exana Cristo pejamatabëcueneta Dioso pexaniacuenia peyawenonaenexa pamonae apojudíowi-ata. Bajarapaliwaisi ma-itsije: Cristo cajena pacatsijamatabë-eca papecayajawaponaponaenexa. Bajaraxuata nexata, paxamë-ata pacopia-ewetawanapame itsamatacabi Cristo paneyajawajinawanapaejawanexa Dioso pijapeniweniwenaenacuatatsia.
28 Bajarapacuenia Dioso pataneyapëtaeya-exanaexae Cristo yabara, daxitajiwi xaniawaetsia patsipaebaponajë, pamuxujiobaponajënua canaëjëtsiaya xaniawaetsia pejumexaniataenexa Cristo peliwaisi. Bajarapacuenia payapëtaeya-exanaponajë, pamonae pejumexaniataewi bajarapaliwaisi, pewajënaeyabelia pejamatabëcuenejëpaenexa Cristo Jesús pejamatabëcuenejëpaejawabelia.
29 Bajarapajamatabëcuene yabara, xanë, Pablonë, asaëyata tonacuenebaponajë daxita pasaëta Cristo nerajutapona.