2
Xanë pacatojitsipatsi paneyapëtaenexa bitso patacasiwajamatabëcuenebëjaitsabiabijawa, patacatsipaebinexa Cristo peliwaisi, itsamonae nebejiobia-exanabiabi-ata bajarapaliwaisi yabara. Nexata, asaëyata tonacuenebanajetarucajë Dioso, paneyapëtaenexa bajarapaliwaisi, paxamë, panejinawanapaewi Colosas tomarata, Laodicea tomarata, pamonae-ata aponetae pijacuajaya.
2 Bajarapacuenia nebejiobia-exanae-ata, itsiata asaëyata tsipaebaponajë Dioso peliwaisi, papecajamatabëcuene-asaëya-exanaenexa, najamatabëcuenejëpaeya namata-enetsia na-asiwaya panenajuajinawanapaejawata, panenajuajumeyapëtaenexa paliwaisi picani Dioso apoyapëtaeya-exanae itsajiwijawabelia-ata, Cristo yabara.a
3 Dioso muetsia papexaniacuenejawanë xaina Cristo pejamatabëcueneta, pacajumeyapëtaeya-exanaena, pacacanaëjëtsia-exanaenanua, xaniawaetsia paneyapëtaenexa.
4 Bajarapacuenia pacatsipaebatsi, itsajiwi-ata papecayamaxë-itojorobiyaniwa papecatsimuxuxanepanaexae penajumetsënëtsiliwaisi, Cristo panejumexaniataejawawecua.
5 Apopacayajawaponaponae-atatsi, itsiata nataniji tajajamatabëcuene patacayajawaponaponaejawa paxamëjawata. Nexata, jamatabëcuenebarëyanë itsa pacawënëliwaisitanetsi najamatabëcuenejëpaeya panejinawanapaejawa, panewajënaeyabelia-ata pane-ajamatabëcuenesaëtsawanapaejawa panejumexaniataejawa Cristo peliwaisi.
6 Paxamë panesiwanajamatabëcuenecopabixae Jesucristojawabelia, nexata panato-itapetame panijatuxanenënexa. Bajaraxuata, pajinawanapaename bajaraPonë papecatojitsipaecuenia daxita pane-asaëtsawanapae-epatota, papecasiwajamatabëcuenebarëyanexa.
7 ¡Paliwaisi copiaya Epafra pacacujaruba Jesucristo yabara, tsiteca pajumexaniataewanapare! Nexata, pane-itaxutuajamatejemaxae Jesucristo papecayawenonaenexa, pacajamatabëcuene-asaëya-exanaena. Pexaniajamatabëcuenenua parajutabiabianame Diosojawabelia.
Pacuenia Cristo pijajiwi pejanajamatabëcuene xainawanapa, yabara peliwaisi
8 ¡Xania! Nayajiwitaeya pajinawanapaename. ¡Pëtsa panacopatame itsamonae papecayamaxë-itojorobinexa Cristo peliwaisiwecua! Bajarapamonae pacatsipaebiana mapanacuapijiwi penajamatabëxainaeliwaisi, penajumetsënëtsiliwaisi, saya natsiquejemaliwaisi. Bajarapaliwaisianëta pacayamaxë-itojorobiana, tsipaji apoliwaisijëpae Cristo,b peliwaisi.
9 Waxaitsi itsiata yapëtanetsi Cristo peperabëto xainae-ata yajawaponapona daxita Dioso pijacuene, tsipaji jamatabëcuene-itajëtaponapona pacuenia Dioso jamatabëcuene-itsi. Caejawayo-ata apotsisajinaetsi Dioso pijacuene pexanaponaponaenexa.
10 Bajarapacuenia pijinia, paxamë-ata apopacatsisajinae caejawayo-ata Dioso pijacuene, pane-exanawanapaenexa bajaraPonë papecatojitsipaecuenia, caeperabëto papeca-exanaexae Cristota. Bajaraxuata, Dioso tocopata Cristo paxamëtuatuajëta bepanematabocotocuenia papeca-itorobaponaponaenexa. BajaraPonë raja bitso ayaijamatabëcuenenë daxitawecua. Jamatabëcuene matatoxenetanua daxitanacuanë pewetsiwi-ata, pitorobabiabinexa pejitsipaecuenia.
11 Pacuenia judíowi nabo-upiperabëcaucubabiaba penacuene-itajëtsinexa Dioso pijajiwicuene, bajarapijinia pacuenia Cristojawabelia panesiwanajamatabëcuenecopabixae, Dioso bepapecabo-upiperabëcaucubiwi paca-exana. Nexata, Dioso pacawecua-ajibia-exana pibisiacuene pane-exanaeneconimi, pacawecuatëpaeya-exananua panijaperujujamatabëcuenemi. Bajaraxuata, apopanamatawenonaemë itsajiwi papecabo-upiperabëcaucubinexa, Dioso papijajiwinexamë.
12 Panenabautizabijawata merata, papecabubutsijawatareca panajamatabëcuene-itajëtame Cristo bepapecayajawamëthëtsiwi. Papecajutsijawatatsina menewetsina pijinia, panajamatabëcuene-itajëtame icatsia Cristo bepapecayajawanamatacotsiwi petëpaecujinae. Nexata, pajamatabëcuene-aitawamë tsawanapae, panejumexaniataexae Dioso pesaëta penamatacotsia-exanaejawa Cristo petëpaejawawecua.
13 Paxamë picani abaxë bajayata pajamatabëcuenetëpawanapame pibisiacuene pane-exanawanapaexae, naxuabiaya-ata pajinawanapame Diosowecua, apopajudíowixaemë. Itsiata baitsi jane, aeconoxae baja, pajamatabëcuene-aitawamë tsawanapae, tsipaji baja, Dioso pacawecua-ajibia-exana bajarapatëpaejamatabëcuenemi, Cristo pejamatabëcueneta.
14 Cristo wajanacasiwatëpaejawata cruzata pecobematabiabijawatatsi, peyaquinaetablapayo ruta pematatsënëyo, xua itajëtaruca paneconi yabara tëpaejitsia. Nexata, bajarapatablapayota bepeyaquinarutsijawa Dioso, caejiwi canacujitsia pijaneconi. Itsiata baitsi jane, Cristo itsa cobematabiabarutatsi cruzata wajanacasiwatëpaejawata, Dioso baja nacawecua-ajibia-exana daxita bajarapaneconimi.
15 Cristo itsa rutatsi cruzata, bajarapaepatota Dioso pesaëta cuene-amoneyaba, asaëjibia-exananua dowathimonae, pamonae-ata ayaijamatabëcuenewi bajarapadowathimonae tuatuajëta, petsitanacuene-itajëtsijawata daxitajiwijawabelia pecuene-amoneyabijawa dowathi, pijajiwi yajawa.
16 ¡Bajarapacuenia Cristo ayaijamatabëcuenenëxae daxitawecua, pëtsa panacopatame itsajiwi-ata papecananeconitsia-exanaenexa panexaejawa yabara, panematawëjëa-apaejawa yabara, paneyaiyataematacabianë yabara-ata! Itsamonae abaxë tsiteca jumecowënëtawanapa Dioso penajumecopatsiliwaisi Moisés-pijinëta, aneconijibia pejinawanapaenexa Dioso pitabarata. Nexata, bajarapaliwaisi pitorobicueniatsi, fiestanë exanabiaba caewai canacujitsia, caepejanajuameto canacujitsia, caepenacuera-ewetsimatacabianë canacujitsia-ata.
17 ¡Pëtsa pasiwabëjamë bajarapaliwaisianë panejumecowënëtsinexa, tsipaji saya pecuene-itajëtsijawanënexac xua nacato-exanaejitsia Cristo itsa patsica mapanacuayabetsicaje! Cristo pepatsixaetsica mapanacuayabetsicaje, nacawecuacopiarucaeya-exana bajarapacuenemi, aneconijibia wajajinawanapaenexa Dioso pitabarata.
18 ¡Nexata, pëtsa patonacopatame itsamonae, beweliajamatabëcuenewi nataeya papecayamaxë-itojorobiyaniwa panejumexaniataejawawecua pexaniajailiwaisi! Bajarapamonae, Diosowecua, pacamuxubijiapenetsiana, panenawajëcabiabinexa ángelewijawabelia. Itsajawata pijinia, be-ayaijamatabëcuene nataeya paxamëwecua paca-urabiana, pane-exanaenexa papecacujarubicuenia, tsipaji tsitatsi bajarapaliwaisi Dioso peyapëtaeya-exanaejawatsi majitsinaebota. Itsiata, pijacuata saya pecapitsapaeliwaisianë. ¡Bajaraxuata, xania baja panayajiwitaema, papecayamaxë-itojorobiyaniwa!
19 Bajarapamonae jumexaniataeyabiaba ëpetsimuxuxanepanaeliwaisianëtsi, tsipaji apojamatabëcuene-ewetawanapae Cristo penamatacaitorobinexatsi pejitsipaecuenia, ponë bepematabocotonë Jesús pijajiwinexa. Cristojawabelia wajasiwanajamatabëcuenecopabixae, nacatonaexana bewajamatabocotonë, tsipaji Dioso naca-exana becaeperabëto bajaraPonëjawabelia. Nexata, peliwaisita nacajamatabëcuene-abatapona, wajanacajamatabëcueneliwaisiwitsabia-exanaponaenexa Dioso pijacuenejawata. Orijibia, pacuenia jiwi peperabëtota pawi rubena nacueneyawenona, bajarapacuenia peperabëtota nacarubapona itsajota tsitaxanepanatsi, xaniawaetsia pijajiwitsi namata-enetsia wajanacueneyawenonaenexa.
20-21 Paxamë rabaja bepapecayajawatëpaewi Cristo. Nexata, pawecuatëpame baja panejumecowënëtsijawami bajarapaperujuliwaisianë, Dioso aneconijibia papecataenexa. ¿Detsa xuajitsia itsiata abaxë pajumecowënëtawanapame papecacuene-itawetsiliwaisianë? Paliwaisianë paca-itaweta itsacuenejawa panejayatsiyaniwa, panexaeyaniwa, panepitsiyaniwa-ata panecobeta, Dioso pitabarata panenajamatabëcuenebijianaeyaniwa.
22 Daxita bajarapaliwaisianë pewerewerecaejawanënexa, tsipaji saya jiwi pejamatabëcuenepijiliwaisianë. Naca-itawetanua xuanë pewerewerecaejawanë yabara.
23 Bajarapamonae papeca-itawetsicuene pacatsita meta itajara bepexanialiwaisi. Pacatsitanua bitso liwaisi bepeyapëtaewi, tsipaji paca-itorobapona panijacuata panenaperabëbejiobia-exanaenexa, Dioso papeca-asiwanexa matatoxenetsia. Itsiata, bajarapacuenia pane-exanaejawata apopacajamatabëcueneyawenonae caejawayo-ata, pibisiacuene pane-exanaeyaniwa. Biji rajane, bajarapacuenia pexanaewi apocuenenamatamotsi, saya nasiwajamatabëcuenebarëya pijacuata pexanaejawa yabara.