3
Paxamë baja cajena Cristo bepapecayajawamatacotsiwi. Bajaraxuata, Dioso pacajamatabëcuene-aitawaya-exana. ¡Nexata, panatojaire panepitsinexa athëbëpijicuene itsajotatsia Cristo eca, Dioso pemuxuneneta, pecujuanenia, peyanacua-ewetsinexa daxitacuene!
2 ¡Pasiwanajamatabëxainabiabare athëbëpijicuene! ¡Pëtsa pasiwanajamatabëxainabiabame mapanacuapijicueneje!
3 Cristo tsipaji bepaneyajawatëpaewi mapanacuapijicuenewecuaje, nexata Dioso pitawajamatabëcuene pacarajuta, Cristo pejamatabëcueneta. Bajarapa-aitawajamatabëcuene mapanacuapijiwije apotae. Apoyapëtaenua.
4 Paxamë Cristo papecajamatabëcuene-aitawaya-exanaexae, pamatacabi Cristo icatsia patsianica athëbëwetsica pijapeniweniwenaecotia yajawa, paxamë-ata paxainaename peniweniwenaecotia, Cristo papijajiwixaemë.
Cristo pejamatabëcuene-aitawaya-exanaewi pejinawanapaecuene
5 ¡Cristo papecajamatabëcuene-aitawaya-exanaexae, panawecuacopabare baja daxita panijaperujujamatabëcuene papecajitsipaeya-exanaejawanëmi! ¡Pacopare, pibisiacuene panewitota panenawecua-exanaejawabeje panenapitsijiwibeje! ¡Pacopare itsacuenejawanë pia-uracuenejawanë pane-exanaeyaniwa! ¡Pacopare bitso panenajamatabëcuene-enaeyabijawa pibisiacuene panewitota pane-exanaeyaniwa! ¡Pacopare panejitsipaejawa pibisiajamatabëcuene! ¡Pacoparenua ayaijawa panejitsipabiabijawa panenaxainaeyabijawa, tsipaji belia, panecobecowëjawabelia pa-itaxutuajamatejemamë tsipae panena-ewetsinexa Diosonejewa!
6 ¡Daxita bajarapacuenejawanë pacopabare, tsipaji bajaraxuanë pexanaewi, Dioso ayaicuenia naneconitsia-exanaenatsi!
7 Paxamë-ata picani daxita bajarapitsicuenejawanëmi pa-exanawanapame, Cristojawabelia panesiwanajamatabëcuenecopabiwajënaeya.
8 ¡Bajaraxuata aeconoxae baja, pacopabare daxita mapajamatabëcuenejawanëje! Pane-anaepanabiabijawa itsamonaejawabelia, piabejecuene pane-exanaejawa itsamonaejawabelia, pibisiacuenia itsamonae panebaracuaicuaijaijawa, pia-urajumenë panecuaicuaijaijawa-ata.
9 ¡Pëtsa namata-enetsia panatsipaebame penajumetsënëtsiliwaisianë! ¡Daxita bajaraxuanë pacopabare, pematatsënëa pane-exanaeyaniwa, tsipaji baja, panawecuaxuabame panijaperujujamatabëcuenemi papeca-exanaeya-exanaejawami!
10 Paxamë pajamatabëcuenejëpawanapame, Ponë pacarajuta pejanajamatabëcuene. Nexata bajaraPonë pacajamatabëcuenexanetapona panejamatabëcuenejëpaejawabelia, papecacuenecaëjëpaenexa xaniawaetsia paneyapëtaejawa Dioso.
11 Bajarapapejanajamatabëcuene panexainaexae, pacato-amatamobi apojudíowicuene, judíowicuene-ata, penabo-upiperabëcaucubicuene, apopenabo-upiperabëcaucubicuene-ata. Pacato-amatamobinua pexaniacuenia penacuene-ewetsiwicuene, bijiayacuenia panecuene-ewetsiwicuene-ata, amoneya itsamonae petonacuenebicuene, pijacuata penatonacuenebicuene-ata. Bajaraxuanë daxita pacato-amatamobi, tsipaji daxita bajarapamonae Dioso najëpaeya tane Cristo pejamatabëcueneta. Nexata, Cristo pijajiwi petsijamatabë-ecaexae, najëpaeya namatamota, tsipaji caenë, Cristo, namatamota Dioso pitabarata.
12 ¡Dioso bitso papeca-asiwaxae, papeca-itapetsixaenua papijajiwinexamë, namata-enetsia pana-itaxutotsoniataewanapare! ¡Ëpexaniajamatabëcueneta pajinawanapare! ¡Beweliajamatabëcuenewi nataeya pajinawanapare! ¡Namata-enetsia na-asiwaya pajinawanapare! ¡Panajamatabëcuenesaëtawanapare, bajayajebi paca-itsacueniababiabi-ata!
13 ¡Liwaisi namata-enetsia panenatoxainaejawata, pëtsa bepijiayo panabara-anaepaname! ¡Biji rajane, panasiwajamatabëcuenecaeware, pacuenia Cristo pacasiwajamatabëcuenecaewa pibisiacuene pane-exanaeneconimi!
14 ¡Daxitajamatabëcuenewecua, panajamatabëcuenexatare namata-enetsia bitso panena-asiwajamatabëcueneta, najamatabëcuenejëpaeya panejinawanapaenexa!
15 ¡Panajamatabëcuenecaeware! ¡Pacopare Dioso pijapebarajamatabëcuenexanepanaejawa papecajamatabëcuenenamatacaitorobinexa, jamatabëcuenexanepanaeya panenajuajinawanapaenexa! Bajaraxua yabara Dioso pacajunata, papeca-exanaenexa caeperabëto Cristojawabelia. ¡Nexata, bajarapajamatabëcuene yabara, pexaniajamatabëcuene parajutabiabare Diosojawabelia!
16 Bitso pacatojitsipatsi Cristo peliwaisi papecatsijamatabë-ecaenexa, papecajamatabëcuenenamatacaponaenexanua daxitacuenejawalia. Bajarapaliwaisi cajena bitso pexanialiwaisi. ¡Nexata, bajarapaliwaisi namata-enetsia canaëjëtsiaya panacujarubabiabare! ¡Najamatabëcueneyawenonaeya namata-enetsia panamuxujiobabiabare panenacuenexanetsinexa bajarapaliwaisita! ¡Daxita panejamatabëcuenewetsina pexaniajamatabëcuene rajutsiaya Diosojawabelia panaxëanabiabare pawajianë rubena Salmos-baxutota, pawajianë rubena wajibaxutonëtanua, pawajianë-ata Espíritu Santo pejamatabëcueneta pacanaxëanaeya-exana!
17 ¡Daxita xua pa-exanawanapame, paliwaisianë-ata pacuaicuaijamë tsabiabi, pa-exanawanapare pejitsipaecuenia wajatuxanenë Jesucristo papijajiwixaemë! ¡Bajarapacuenia pane-exanawanapaexae, pexaniajamatabëcuene parajutabiabare waxa Diosojawabelia, wajatuxanenë Jesucristo papecajamatabëcueneyawenonaejawata!
Pablo muxujioba pacuenia naewetsijitsia caebopijiwi, Cristo pijajiwi
18 ¡Paxamë papetiriawimë, panenacojiobiwi, jamatabëcuene-ewetsiaya pajinawanapare pane-amonajiwi, tsipaji wajatuxanenë bajarapacuenia tsitaxanepanatsi pane-exanawanapaejawa!
19 ¡Paxamë pijinia papebijiwimë, pa-asiwamëre panijawajiwi! ¡Pëtsa pa-itorobabiabame anaeya papeca-amuxujitsibiyaniwa.!
20 ¡Paxamë pijinia papeximë, pane-axajiwi, pane-enajiwi-ata daxita xua paca-itoroba pane-exanaenexa, pajumecowënëtabiabare, tsipaji bajarapacuenia wajatuxanenë siwajamatabëcuenebarëya!
21 ¡Paxamë pijinia panexi panexainaewi, pëtsa pa-anaeya-exaname panexi bijiaya pane-ewetsijawata! Belia bajarapajiwi jamatabëcuenefaefaenaejitsipa papecajumecowënëtsijawami
22 ¡Paxamë pijinia itsamonae amoneya panetonacuenebawanapaewi, pajumecowënëtabiabare panijatuxanewi papeca-itorobicuenia! ¡Pëtsa xaniawaetsia patonacuenebawanapame paepatota saya pacana-itaxutocaeweta panijatuxanewi, pacuenia mapanacuapijiwije exanabiaba pijatuxanewi pesiwabarëyanexatsi! ¡Biji rajane, daxitamatacabi panejamatabëcuenewetsina cuenejitsipaeya panijatuxanewi patonacuenebabiabare, apopacana-itaxutocaewetsi-ata! ¡Bajarapacuenia patonacuenebabiabare wajatuxanenë Jesucristo paneyaiyataexae!
23 ¡Daxita xua patonacuenebabiabame, jamatabëcuenebarëyaya patonacuenebabiabare! ¡Nexata, asaëyata patonacuenebabiabare panijatuxanewi, pacuenia patonacuenebijitsipame wajatuxanenë Cristo! ¡Pëtsa panacuenebawanapame, panewënajiwi panetonacuenebicuenia!
24 Paxamë rabaja payapëtaneme wajatuxanenë papecamatamotsijawanexa, bitso papexaniajawa pacarajutsiapaeba, Dioso pijanacuatatsia. Bajarapacuenia pacarajutsiana, tsipaji panenacuenebijawa pacatotane Cristo bepanetonacuenebijawa, ponë pepacuene panijatuxanenë.
25 Itsiata, pajiwi pibisiacuene exana, bajarapajiwi itsamatacabi Dioso naneconitsia-exanaenatsi, pibisiacuene pexanaeneconi yabara. Itsajiwi-ata, pijaneconi pexainaejiwi, apopanepae tsane Dioso penaneconitsia-exanaejawawecua, tsipaji bajaraPonë najëpaeya naneconitsia-exanaena daxita pijaneconi pexainaewi.