4
¡Paxamë papetuxanewimë, panijajiwi, amoneya papecatonacuenebabiabiwi xaniawaetsia pa-ewere, Dioso papecatocaëjëtsicuenia! ¡Paxamë-ata Panajamatabënapitabiabare, panexainaejawa panijatuxanenë, athëbëtatsia pe-ecaenë!
2 ¡Daxita paxamë, Cristo peliwaisi panejumexaniataewi, paca-asaëmëre tsawanapae Diosojawabelia panewajëcabiabijawa, ajamatabëcuene-itatsacaya pacopatsinejewamë! Orijibia, panewajëtsijawata Diosojawabelia, pexaniajamatabëcuene parajutabiabianame.
3 Paxanë yabara-ata panetowajëtabiabianame Diosojawabelia, pataneyawenonaenexa, nacuanë pewetsiwi patane-itawetsiyaniwa jiwi patatsipaebaponaejawa Cristo peliwaisi. Aliwaisijibia jiwi patatsipaebinexanua paliwaisi Dioso bajayatami apoyapëtaeya-exanae itsajiwijawabelia-ata; pacuenia Cristo pesiwatëpaejawanexa apojudíowi-ata, pibisiacuene pexanaeneconi yabara. Bajarapaliwaisi jiwi tatsipaebaponaexae, aeconoxae ne-eta penaneconitsiwi pejebabiabibota.
4 Panetowajëtabiabarenua, Cristo peliwaisi jumenapebetsiaya tatsipaebabiabinexa, tanejumetaewi xaniawaetsia pejumeyapëtaenexa.
5 ¡Xaniawaetsia patsitajinawanapare pamonae Cristo peliwaisi apopejumexaniataewi, tsipaji rabaja imoxoyo pewajënae Cristo icatsia pepatsijawanexatsica! ¡Nexata, paepatota pacatoyapëxanepana, bajarapamonaejawabelia patsipaebare pexanialiwaisi, Cristo peliwaisi!
6 ¡Daxita paliwaisianë pacuaicuaijamë, xaniawaetsia pacuaicuaijamëre tsabiabi bajarapamonaejawabelia, papecamuxujitsipaenexa panetsipaebiliwaisi! ¡Panajamatabëcuenewererenua, xaniawaetsia panejumecanawiatsinexa caejiwi canacujitsia xua pacayanijobapona Dioso pejumeliwaisi yabara!
Pablo penapëjiobiliwaisianë
7 Wajabananë Tíquico, bitso waja-asiwanë, daxita pacatsipaebiana pacuenia xanë ponaponajë. Bajaraponëbeje xaniawaetsia patanajuanacuenebinëbeje, xaniawaetsia petonacuenebinë wajatuxanenë pijacuene.
8 Bajaraxuata, pacato-itorobaliatsi, papecatsipaebinexa pacuenia pajinawanapajë, papecajamatabëcuene-asaëya-exanaenexanua.
9 Bajaraponë paxamëjawabelia yajawaponaejitsia wajabananë Onésimo, panijatomarapijinë. Bajaraponë-ata xaniawaetsia tonacuenebabiaba wajatuxanenë. Bajaraponëbeje pacatsipaebiana daxita pacuenia pataewanapajë majotaje.
10 Aristarcobeje naneconitsia panajuaponaponajëbeje Penaneconitsiwi pejebabiabibota. Bajaraponë-ata pacabajacobalia. Marcos-ata, Bernabé pejuyapijinë, pacabajacobalia. Paxamë rabaja payapëtaneme pacuenia pacopiapitsijitsiamë Marcos, itsa patsialia paxamëjawabelia. Nexata, xaniawaetsia pacopiapitsianame.
11 Jesús-ata, ponë itsawënë, Justo, pacabajacobalia. Bajara-ëpamatabëxëyo judíowiyajuwënëwi, neyawenonabiaba wajatuxanenë pijacuene tatonacuenebijawa. Bitso nejamatabëcueneyawenona patanajuanacuenebijawata Dioso pijacuene.
12 Epafras-ata, Cristo pijajiwitonë, panijatomarapijinë, pacabajacobalia. Bajaraponë bitso pacatowajëtabiaba panecatsitecawanapaenexa panejumexaniataejawa Cristo peliwaisi, panejamatabëcuenenaweretaponaenexanua Dioso pijacuenejawabelia. Pacatowajëtabiabanua xaniawaetsia pane-exanabiabinexa pacuene Dioso pacatojitsipa.
13 Bajaraponë yabara xaniawaetsia pacatsipaebatsi. Bitso papecajamatabënajinaexae, pacatowajëtabiaba Diosojawabelia. Bajarapacuenia pijinia, bitso towajëtabiaba Jesús peliwaisi pejumexaniataewi, Laodicea tomarata pejinawanapaewi, Hierápolis tomarata pejinawanapaewi-ata.
14 Waja-asiwanë Lucas-ata, ponë jiwi waëbabiaba, pacabajacobalia. Demas-wënënë-ata pacabajacobalia.
15 Nebajacobi wajamonae, daxita Jesús peliwaisi pejumexaniataewi, Laodicea tomarata pejinawanapaewi. Nebajacobi Ninfas-ata, pamonae-ata Jesús pijajiwi, nacaetuatabiaba bajaraponë pijabota.
16 Itsa baja paweretame panelebijawa mapabaxutoje, pato-itorobianame Jesús pijajiwijawabelia, Laodicea tomarata pejinawanapaewi penalebinexa. Bajarapamonae-ata tatoyaquinaebaxuto, juya pacato-itorobiana panenalebinexa paxamë-ata.
17 Arquipojawabelia pajumaitsimë tsane mapacueniaje: «¡Dioso netonacuenebinexa pecatocopatsijawa, xaniawaetsia tonacuenebare, neweretsijawabelia!», pajamë tsane.
18 Xanë Pablonë, pacatoyaquinatsi baja cajena tacobeta mapaliwaisiyoje patanebajacobinexamë. ¡Panenajamatabënapitabiabare penaneconitsiwi pejebabiabibota taponaponaejawa! Pacatojitsipatsi Dioso asiwaya papecayawenonabiabinexa. Bajara-itsi tsane.