1 Tesalonicenses
Mapabaxutoje Apóstolnë Pablo copiaya toyaquina Jesús peliwaisi pejumexaniataewi, Tesalónica tomarata pejinawanapaewijawabelia
Pablo pebajacobiliwaisi
1
Xanë, Pablonë, Silvano, Timoteobeje, yajawa pacabajacobaliatsi, paxamë Jesús papijajiwimë, Tesalónica tomarata panejinawanapaewi. Paxamë raja waxa Dioso, wajatuxanenë Jesucristo-ata, papijajiwimë. Pexaniacuenia pacatojitsipatsi bajaraPonëbeje papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Tesalónica tomarata pejinawanapaewi, Jesús pijajiwi, xaniawaetsia Dioso itaxutuajamatejemaya jinawanapa
2 Pacopatsinejewanë pacatowajëtabiabatsi Diosojawabelia. Pexaniajamatabëcuenenua parajutabiabajë paxamë yabara. Patawajëtabiabijawata pacanajamatabënapitabiabatsi pane-exanawanapaecuenejawanë yabara.
3 Pexaniajamatabëcuene parajutaponajë paxamë yabara waxa Diosojawabelia, pinijicuenia Dioso panetonacuenebawanapaejawa yabara. Asiwaya panetonacuenebawanapaejawa itsamonae. Pane-ajamatabëcuenesaëtsawanapaexae-ata panecopia-ewetawanapae-epato wajatuxanenë Jesucristo icatsia pepatsimatacabijawabelia. Bajarapacuenia pane-exanaejawata, panajamatabëcuene-itajëtaponame pepacuene panesiwanajamatabëcuenecopabijawa Jesucristojawabelia.
4 Tajamonae, Dioso papeca-asiwawi, pexaniajamatabëcuenenua parajutajë Diosojawabelia, tsipaji baja cajena payapëtaniji Dioso papeca-itapetsijawa papijajiwinexamë.
5 Pamatacabi pacatsipaebatsi Jesús peliwaisi, pexaniajailiwaisi, saya ëpatajumeta apopapaebinë. Biji rajane, Espíritu Santo pesaë yajawa pacatsipaebatsi. Bajaraponë pacayapëtaeya-exananua pexaniajaijawa patacatsipaebiliwaisi. Nexata, pajumexaniataneme. Paxamë payapëtaneme xaniawaetsia Dioso pesaëta patanacuenebijawa, patacatsitajinawanapaejawa-ata pamatacabi pajinawanapajë paxamëjawata, patacajamatabëcueneyawenonaenexa xua pacatoxanepanaejitsia.
6 Paxamë panecuenepitame patajinawanapaecuene paxanë, Jesús pecuene-ata, pamatacabi patacatsipaebiliwaisi barëyaya pajumexaniataneme, Espíritu Santo pejamatabëcueneta, itsamonae bitso pacabejiobia-exanabiabi-ata bajarapaliwaisi yabara. Bajarapacuenia barëyaya panejumexaniataewanapaexae bajarapaliwaisi, panecuenejëpame paxanë. Pacuenejëpamenua wajatuxanenë Jesús.
7 Nexata, papecawënëliwaisitaejawata,a daxita Jesús peliwaisi pejumexaniataewi, Macedonia nacuajawa, Acaya nacuajawa-ata pejinawanapaewi panetsitanacuene-itajëtsixae, bajarapamonae pacacuenepita piajamatabëcuenesaëtsawanapaenexa itsamonae bejiobia-exanae-atatsi, Jesús peliwaisi yabara.
8 Orijibia, paxamë patsipaebawanapame Jesús peliwaisi apoëMacedonia, ëAcaya nacuapijiwibeje, itsanacuanëpijiwijawabelia-ata. Biji rajane, tajë nacuapijiwijawa-ata patsipaebame wajatuxanenë peliwaisi. Nexata, daxitanacuanëpijiwi pacawënëliwaisitane panesiwanajamatabëcuenecopabijawa Diosojawabelia. Yapëtanenua baja Jesús peliwaisi pexaniajailiwaisicuene. Bajaraxuata, paxanë pacawajunupaebinejewatsi, daxita bajarapamonae yapëtane baja.
9 Biji rajane, bajarapamonae pijacuata panetsipaeba paxamë xaniawaetsia patanecopiapitsijawamë pamatacabi pacasiwaxainatsi. Panetsipaebanua pacuenia paxamë pawecuanajamatabëcuenepënëyorotame panenawajëcabiabijawami jumapecataeya pexanaenëanëjawabelia, juya itaxutuajamatejemaya panenawajëcabiabinexa pepopiasaënë Diosojawabelia, asiwaya pane-exanawanapaenexanua pejitsipaecuenia. Nexata, patonacuenebawanapame pepoDioso, ponë piasaëtsaponaponaenë daxitamatacabijawabelianexa.
10 Panetsipaebanua panecopia-ewetawanapaejawa Jesús, Dioso pexënato, athëbëwetsica icatsia pepatsijawanexatsica, ponë Dioso baja cajena asaëya-exanatsi petëpaecujinae. Jesús raja wajanacacapanepaenë Dioso wajanacananeconitsia-exanaejawaminexawecua pibisiacuene waja-exanaeneconi yabara. Nexata, Dioso aponacayajawananeconitsia-exanae tsane, pamatacabi naneconitsia-exanaena daxita pamonae apopesiwanajamatabëcuenecopabiwi Jesucristojawabelia.