Pablo Dioso pijacuene penacuenebijawa Tesalónica tomarata
2
Tajamonae, paxamë baja payapëtaneme apopatanacueratsijawabejea pamatacabi pacasiwaxainatsibeje, tsipaji baja bajarapamatacabijawa pajumexaniataneme Jesús peliwaisi, papecacapanepaeliwaisinexa.
2 Paxamëjawabelia patanajetarucaenëbeje, Filipos tomarapijiwib bitso pibisiajumenëta panejumaitsibeje, panebejiobia-exanabejenua Jesús peliwaisi yabara. Bajarapacuenia paneto-exanae-atabeje, Dioso panejamatabëcueneyawenonabeje. Bajaraxuata, patapatsijawatabeje paxamëjawabelia, ajume-urajibia pacatsipaebatsibeje Jesús peliwaisi, patane-itoyawi panecuenecaranatsi-atabejec picani patacatsipaebiyaniwa.
3 Paliwaisi pacatsipaebatsibeje, pexaniajailiwaisi cajena. Apopenajumetsënëtsiliwaisi. Itsajamatabëcueneliwaisi yajawa apopacatsipaebitsibeje patacayamaxë-itojorobinexa.
4 Biji rajane, Dioso patanecueneyapëtaexaebeje, xaniawaetsia patatsipaebijawanexa, pane-itorobabeje jiwi patatsipaebinexabeje Jesús peliwaisi, pecapanepaeliwaisinexatsi. Bajaraxuata, patatsipaebanajetarucaejawatabeje bajarapaliwaisi, apopapaebaponaenëbeje saya jiwi patanesiwajamatabëcuenebarëyanexabeje. Biji rajane, bajarapaliwaisi jiwi patsipaebaponajëbeje Dioso patanesiwanajamatabëcuenebarëyanexabeje, tsipaji Dioso wajanacajamatabëcueneyapëtaenë xua najamatabëxainatsi.
5 Caeto-ata liwaisi patacatsipaebijawatabeje, pexaniacuenia apopacawënëxaniatsitsibeje, patanebarëyataenexamëbeje, panejumexaniataenexanua patacatsipaebiliwaisibeje. Yamaxë-itojorobiaya liwaisi apopacatsipaebitsibeje, palata patacawecuapitsinexa. Dioso baja cajena daxita bajarapacuene panejamatabëcueneyapëtanebeje.
6 Apopajaitsinëbeje itsajiwi-ata be-ayaijamatabëcuenenënë patanetaenexabeje, Jesús peliwaisi patatsipaebijamatabëcuene. Apopajaitsinëbeje bajaraxua paxamëjawata, itsamonaejawa-ata.
7 Paxanëbeje Cristo papija-apóstolenëxaenëbeje, pacatoxanepana picani palata patanerajutsinexamëbeje, pataneyaiyataejamatabëcuenemë. Itsiata, bajarapacuenia apopa-exanaenëbeje. Biji rajane, asiwaya paca-ewetatsibeje. Pacuenia petiriwa asiwaya xaniawaetsia ba-ewetaponapona pexi, bajarapijinia paxanë-atabeje pa-itsinëbeje.
8 Bitso pataca-asiwajamatabëcuene, pacatsipaebatsibeje Dioso pejumeliwaisi. Orijibia, panejumexaniataenexa Jesús peliwaisi, panacopatsipajëbeje itsamonae patanebeyaxuabinexabeje, ayaicuenia pataca-asiwajamatabëcuene.
9 Tajamonae, panecuenenajamatabënapitsianame pamatacabi paxamëjawata paponaponajëbeje. Pinijicuenia panacuenebabiabajëbeje, patajacuata patana-ewetsinexabeje. Pacatsipaebaponatsibejenua pexanialiwaisi, paliwaisi Dioso paneyapëtaeya-exanabeje. Nexata, paepatota pacuenesajinajëbeje, panatonacuenebabiabajëbeje matacabita, merawi-ata, itsanë-ata paxamëyajuwënënë peto-ayapëbejeyaniwatsi patane-ewetsijawabeje yabara.
10 Panecueneyapëtanemebeje baja cajena paxamë. Dioso-ata panecuenetanebeje, xaniawaetsia pataponaponaejawabeje, Jesús peliwaisi panejumexaniataewi tuatuajëta. Bajarapamatacabijawa, pibisiacuene apopacatsita-exanaetsibeje. Pexaniajamatabëcuenetanua paponaponajëbeje. Nexata, itsacueneneconiyo-ata paxamëjawabelia apopaxainaenëbeje.
11 Paxamë baja cajena payapëtaneme pata-exanaecuenebeje. Pacuenia pexi pexainaenë nacoximuxujioba xaniawaetsia pejinawanapaenexa, bajarapijinia pacuenia pacamuxujiobaponatsibeje, pacaenëmë canacujitsia, pane-ajamatabëcuenesaënexa Diosojawabelia.
12 Asaëyata pacamuxujiobatsi Dioso papeximëcuenia panenacuene-itajëtsinexa, xaniawaetsia panejinawanapaejawata. Bajarapacuenia pacamuxujiobatsi, tsipaji bajaraPonë pacajunata papijajiwinexamë, bitso pexaniacuenia papeca-ewetsinexa.
13 Bitso pexaniajamatabëcuene parajutaponajë Diosojawabelia paxamë yabara, tsipaji pajumexaniataneme patacatsipaebiliwaisibeje, Jesús peliwaisi. Bajarapaliwaisi panejumetaejawata, bejiwitonë apopepaebiliwaisi. Biji rajane, pacatsita pepopexaniajailiwaisi, panejumexaniataenexa. Bajaraxuata, bajarapaliwaisi nacuenebapona panejamatabëcuenejawata, xaniawaetsia panejinawanapaenexa Dioso pejitsipaecuenia.
14 Tajamonae, panijanacuapijiwi itsa pacabejiobia-exanapona, Jesús papijajiwixaemë, pacuenejëpame Judea nacuata pejinawanapaewi, pacuenia bejiobia-exanatsi pewënajudíowi.
15 Bajarapajudíowi pijasalinaiwimi bajayata baja cajena beyejebapona profetawimi. Bajara-icatsia pacuenia bajarapamonaemi pemomoxi beyaxuaba pepopetuxanenë Jesús. Orijibia mapamatacabitaje, Jesús papijajiwixaenë, paxanë-ata panecapitsapa judíowi pijasinagogabonëwecua.d Bajarapamonae Dioso apopejitsipaecuene exanapona. Daxitajiwinua bajarapaliwaisi nawecua-itoya tsabiabi.
16 Bajaraxuata, paxanë panecuenecaranababiaba patatsipaebabiabiyaniwa Jesús peliwaisi apojudíowijawabelia, pecapanepaeyaniwatsi Diosojawabelia. Bajarapacuenia pexanaexae, ayaineconi pewajënaeyabelia natsi-exanapona Diosojawabelia. Nexata, baja, aeconoxae bajarapamonae tocopiapatatsi ayaicuenia Dioso penaneconitsia-exanaematacabinexatsi.
Pablo yapëtaeya-exana pejitsipaejawa icatsia petaejawanexa Jesús pijajiwi, Tesalónica tomarata pejinawanapaewi
17 Tajamonae, paxanëbeje patacawecuaponaecujinaebeje, caematacabibeje apopacatae-atatsi, itsiata pacajamatabënaponaponatsibeje. Bitso picani icatsia jamatabëpaponajëbeje paxamëjawabelia patacataenexa.
18 Xaniajanë, jamatabëpaponajë picani paxamëjawabelia. Xanë Pablonë, napënajaitaponajë picani taponaejawanexa. Itsiata, Satanás necuenecaranatabiaba taponaeyaniwa.
19 Bitso pajitsipajë patacataejawa, tsipaji pacasiwajamatabëcuenebarëyatsi. Pamatacabi wajatuxanenë Jesucristo icatsia itsa patsianica, paxanë baja pawajënae-ewetawanapajë pexaniawiriacoronajawa patanerajutsijawanexa. Bajarapacoronajawa panerajutsiana, tsipaji itsamonae patacujarubiwiwecua paxamë xaniawaetsia pajinawanapame Dioso pejitsipaecuenia.
20 Xaniajai. Paxamë rabaja cajena panejamatabëcuene itsamonae newënëliwaisiyaiyatane, panajamatabëcuenebarëyaya-exanamenua. Bajaraxuata, paxamë yabara pexaniajamatabëcuene parajutabiabajë Diosojawabelia.