2 Tesalonicenses
Mapabaxutoje Apóstolnë Pablo cotocaewi toyaquina Jesús peliwaisi pejumexaniataewi, Tesalónica tomarata pejinawanapaewijawabelia
Pablo pebajacobiliwaisi
1
Xanë, Pablonë, Silvano, Timoteobeje, yajawa pacabajacobaliatsi, paxamë Jesús papijajiwimë Tesalónica tomarata panejinawanapaewi. Paxamë raja waxa Dioso, wajatuxanenë Jesucristo-ata papijajiwimë.
2 Pexaniacuenia pacatojitsipatsi, waxa Dioso, wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Dioso naneconitsia-exanaena pibisiacuene pexanaewi pamatacabi Cristo icatsia patsianica
3 Tajamonae, caematacabi canacujitsia pexaniajamatabëcuene parajutaponajë paxamë yabara Diosojawabelia, panewajënaeyabelia bitso pane-itaxutuajamatejematsaponaexae Dioso, panejamatabëcuenewitsabaponaexaenua namata-enetsia panena-asiwajawa.
4 Bajarapacuenia panejamatabëcuenewitsabaponaexae, paxanë barëyaya pacawënëliwaisipaebaponatsi itsatomaranëjawa, Jesús pijajiwijawa. Payapëtaeya-exanaponajë pacuenia pajamatabëcuenesaëmë tsaponae Diosojawabelia, itsamonae pinijicuenia pacabijataeyabiabi-ata, pacabejiobia-exanabiabi-atanua.
5 Bajarapacuenia papecabejiobia-exanaponaejawata, Jesús papijajiwixaemë, Dioso apopacatocopatsi papecananeconitsia-exanaecuenia. Biji rajane, Dioso penajamatabëcuene-itajëtsinexa xaniawaetsia pesiwacanaëjëtsinëcuene jiwi pexanaecuene yabara. Bajarapacuenia payapëtaneme Dioso papecatocopatsijawa panejonejawanexa pijanacuayabetsia papeca-ewetsinexa.
6 Dioso xaniawaetsia pesiwacanaëjëtsinëxae, bejiobia-exanaena pamonae pacabejiobia-exanapona maparucaeje.
7 Paxamë pijinia papecabejiobia-exanaponaewi, paxanë-ata patanebejiobia-exanaponaewi, Dioso nacayawenonaena bajarapacuenewecua, pamatacabi pepopetuxanenë Jesús icatsia patsianica piasaë-ángelewi, pitarunutsicotia-ata yajawa.
8 Bajarapamatacabi, Jesús jane baja naneconitsia-exanaena pamonae apopejitsipaewi peyapëtaejawa Dioso, pamonae-ata apopejumecowënëtsiwia wajatuxanenë Jesucristo peliwaisi.
9 Nexata, Jesús naneconitsia-exanaena bajarapamonae pijaneconi pexainaexae, daxitamatacabijawabelianexa. Tajënua nawecuaxuabianatsi. Nexata, bajarapamonae apotae tsane ayaijamatabëcuenenëcuene, pajamatabëcuenesaë-ata xaina.
10 Bajarapamatacabitanua, wajatuxanenë pijajiwi pitapetsiwi, yaiyataeya wënëxaniatsianatsi. Pamonae-ata, pesiwanajamatabëcuenecopabiwi bajaraPonëjawabelia, pinijicuenia siwajamatabëcuenenabenajacaena, bitso pexaniacuenia peyawenonaexae pijajiwi. Bajarapacuenia paxamë-ata pa-exanaename patanejumexaniataexaemë patacatsipaebiliwaisi Jesús yabara.
11 Panewënëxaniatsijawanexa yabara Jesús, pacatowajëtabiabatsi wajaDiosojawabelia, papecajamatabëcuenexaniataponaenexa, xaniawaetsia panenajamatabëcuene-itajëbabiabinexa Jesús papijajiwimëcuene. Bajaraxua yabara, pacajunata Jesús papijajiwinexamë. Pacatowajëtabiabatsinua bajaraPonëjawabelia pesaëta papecajamatabëcuenecaëjëpaeya-exanaenexa, pane-exanawanapaenexa daxita papexaniacuene pasiwacanaëjëtame, daxita panacuenebicuenenua jamatabëpa-exaname panesiwanajamatabëcuenecopabixae Jesucristojawabelia.
12 Bajaraxuanë xaniawaetsia pane-exanawanapaexae, wajatuxanenë Jesucristo daxitajiwi yaiyataeya wënëcacuaicuaijai tsanetsi. Paxamë-ata bajaraPonë pacayaiyataeya-exanaena daxitajiwi, papeca-itaxutotsoniataexae wajaDioso, wajatuxanenë Jesucristobeje.