Bitso pepopiacuenebejenë, pibisiacuene pexanaejawanexa, yabara peliwaisi
2
Tajamonae, pacatsipaebatsi baja cajena, paneyapëtaenexa pacuenia wajatuxanenë Jesucristo patsijitsiatsica. Pacuenia-ata waxaitsi nacaetuatsijitsiatsi bajaraPonë yajawa pepatsimatacabitsica.
2 ¡Bajarapaliwaisi paneyapëtaecujinae, pëtsa panacopabame, itsamonae papecayamaxë-itojorobinexa patacatsipaebiliwaisiwecua! ¡Pëtsa pajamatabëcuene najunawiacame, itsaliwaisicuenia pacatsipaebi-ata Espíritu Santo bepeyapëtaeya-exanaecueniatsi, itsa jume, Pablonë saicaya betatoyaquinaeliwaisicuenia! ¡Bajarapacuenia pacajumaitsi-ata, pëtsa baja pajumexaniataneme!
3 ¡Pëtsa panacopabame papecayamaxë-itojorobinexa Jesucristo pepatsijawa yabara! Matapania jiwi ayaibitsaëtonë itsa nawecuacopabiana pejumexaniataejawa Dioso pejumeliwaisi, patsianica jane baja. Bajarapaepatota pijinia, naitajëtsiana ponë bitso pepopiacuenebejenë,a pibisiacuene pexanabiabinexa. Bajaraponë Dioso tocaëjëta penaneconitsia-exanaenexa, pexuabijawata isotuabelia daxitamatacabijawabelianexa.
4 Bajaraponë cuene-itoya tsane Dioso pijacuene. Cuene-itoyanua tsane daxita xua jiwi tane bediosocuenia,b pesiwanajamatabëcopatabiabinexa bajaraxuajawabelia peyawenonaenexatsi. Nexata, itawetsiana jiwi penawajëcabiabiyaniwa itsacuenejawabelia bajaraponëwecua. Belia ecaena Dioso pijatemplobota-ata, bepepodiosonë jiwi petaenexatsi. Naitajëtsiana Diosonëcuene petaenexatsi.
5 Pamatacabi abaxë paxamëjawata naponaponajë, tajëwelia pacatsipaebatsi baja picani bajarapaliwaisi. ¿Panejumenacofënëtame tsabaja?
6 Payapëtaneme rabaja xuac abaxë cuenecaranata bitso pepopiacuenebejenë, pibisiacuene pexanabiabinexa penaitajëtsiyaniwa, Dioso petocaëjëtsimatacabiwajënaeya.
7 Xaniajai. Mapamatacabita-ataje bajarapapiacuenebejenë pecanaëjëtsijawa pexanaenexa exanaponad pewajënaeyabelia, mapanacuapijiwi pibisiacuene pexanawanapaenexa. Caejawa sajina, Dioso pewecuapitsijawa jiwituatuajëta ponë, pecuenecaranatsinë. Matapania jane baja, naitajëtsiana bajarapapiacuenebejenë, pibisiacuene pexanabiabinexa.
8 Bajarapamatacabi jane baja, daxitajiwi yapëtaena penaitajëtsijawa pepopiacuenebejenë. Itsiata, wajatuxanenë Jesús belia bajaraponëmi beyaxuabiana pijumalisaëta. Pijapeniweniwenaecotiata pepatsijawatatsica mapanacuayabetsicaje, towerewerecaeya-exanaenanua bajaraponëmi daxita penamatacaitorobisaëmi.
9 Bajarapapiacuenebejenë patsiana dowathi pejamatabëcueneta. Nexata, dowathi pesaëta pinijicuene pexanaejawa exanaponaena, jiwi peyamaxë-itojorobinexa, be-ayaijamatabëcuenenë petaenexatsi.
10 Bajaraponë exanaena daxita xua pibisiacuene, jiwi peyamaxë-itojorobinexa. Bajarapamonae Diosowecua naxuabiana, apopejitsipaexae pejumexaniataejawa pexaniajailiwaisi, pecapanepaeliwaisinexatsi Diosojawabelia.
11 Bajaraxuata, Dioso tocopatsiana bajarapamonae peyamaxë-itojorobinexatsi ayaicuenia, bajaraponë penajumetsënëtsiliwaisita. Nexata, bajarapamonae jumexaniataena bajarapanajumetsënëtsiliwaisi.
12 Bajaraxuata, daxita bajarapamonae Dioso naneconitsia-exanaenatsi, apopejumexaniataexae pexaniajailiwaisi, caranata saya, pesiwabarëyatsabiabixae ëpibisiacuene pexanabiabinexa.
Dioso papeca-itapetsixae papijajiwinexamë, ajamatabëcuenesaëya pajinawanapaename Dioso pejitsipaecuenia
13 Tajamonae, Dioso papeca-asiwawi, pexaniajamatabëcuene parajutabiabajë Diosojawabelia paxamë yabara, tsipaji paca-itapeta tajëjawawelia, nacua pexanaewajënaeya, papecacapanepaenexa panejumexaniataejawata pexaniajailiwaisi, Jesús peliwaisi, Espíritu Santo pesaëta papecajamatabëcuenexaniawaetsixae.
14 Patacatsipaebiliwaisi, Jesús peliwaisi, pejamatabëcueneta, Dioso pacajunata papecacapanepaenexa. Nexata, panejumexaniataexae bajarapaliwaisi, Dioso pacatocopata payaiyataejamatabëcuene rajuta wajatuxanenë Jesucristo, paxamë-ata panexainaenexa.
15 ¡Tajamonae, bajaraxuata, panewajënaeyabelia paca-asaëmëre tsawanapae pane-itaxutuajamatejemajawa Dioso! ¡Pëtsa panacofënëtame patacatsipaebiliwaisi, patacatoyaquinaeliwaisi-ata! ¡Biji rajane, pajumexaniataewanapare!
16 Wajatuxanenë Jesucristo, waxa Dioso-ata, naca-asiwa. Wajanaca-itaxutotsoniataexae, nacajamatabëcuene-asaëya-exanapona daxitamatacabijawabelianexa. Nacatocopatanua wajacopia-ewetawanapaenexa pepopetuxanenë Jesucristo icatsia pepatsijawanexatsica.
17 Nexata, pacatowajëtatsi bajaraPonëbeje, papecajamatabëcuene-asaëya-exanaenexa, papecayawenonabiabinexanua, pexaniacuene pane-exanawanapaenexa, panecuaicuaijaitsabiabinexanua pexaniajumenë.