1 Timoteo
Mapabaxutoje Apóstolnë Pablo copiaya toyaquina Timoteojawabelia
Pablo pebajacobiliwaisi Timoteojawabelia
1
Xanë raja Pablonë Jesucristo pija-apóstol-nënë, Dioso wajanacacapanepaenë, wajatuxanenë Jesucristo-ata, pejitsipaecuenia tane-itorobixae pijacuene tatonacuenebinexa. Ponë wajënae-ewetawanapatsi icatsia pepatsijawanexatsica mapanacuayabetsicaje.
2 Timoteo, bepepotaxënatomë tacataenë, xanë Pablonë, catoyaquinatsi mapabaxutoje xamë-ata nejumexaniataexae Jesucristo peliwaisi, tacatsipaebijamatabëcuene. Catojitsipatsi waxa Dioso, wajatuxanenë Jesucristobeje, pecajamatabëcuenewënëtsinexa peca-itaxutotsoniataejamatabëcuene peca-asiwajamatabëcuene, pecabarajamatabëxanepanaejamatabëcuene-ata, jamatabëcuenexanepanaeya neponaponaenexa.
Pablo itoroba Timoteo pejume-itawetsinexa pamonae bepexaniajailiwaisi itajara petsipaebaponaewi
3 Pamatacabi baja ponajë Macedonia nacuayabelia, capuenetatsi neponaponaenexa Éfeso tomarata, tsipaji bajarajota itsamonae tsipaebawanapa saicayacuenia Dioso pejumeliwaisiwecua. Nexata, ca-itorobatsi nejume-itawetsinexa bajarapamonae, matawëjëa baja petsipaebaponaeyaniwa bajarapanajumetsënëtsiliwaisi.
4 Ca-itorobatsinua necuene-itawetsinexa penamuxuna-ewetsiyaniwaa perujuwënëxi yabara itsa cuaicuaijai, judíowi pijasalinaiwimi pewënëxi, perujuliwaisiximi-ata, tsipaji bajarapaliwaisixi ajumematamobi cajena peyabaracuaicuaijaijawa. Aponacajamatabëcueneyawenonae waja-itaxutuajamatejemajawanexa Diosojawabelia. Biji rajane, bajarapaliwaisianë pejamatabëcueneta jiwi najume-anaenotabiaba.
5 Bajaraxuata, ca-itorobatsi necujarubinexa, daxita Jesús pijajiwi pejamatabë-ëthëtojawawetsina xaniawaetsia namata-enetsia pena-asiwanexa. Bajarapa-asiwajamatabëcuene pitsapa pamonae baja Dioso wecua-ajibia-exanatsi pijaneconi, pebarajamatabëcuenexanepanaewitsi, pexaniajaijamatabëcueneta pesiwanajamatabëcuenecopabiwi Diosojawabelia.
6 Bajarapamonae pexaniajailiwaisiwecua jamatabëcuenemuxufetabiaba. Jamatabëcuene-enaeyababiabanua piamatamobiliwaisianë pecuaicuaijaitsabiabinexa.
7 Bajarapamonae natane bitso bepeyapëtaewi itajara Dioso penajumecopatsiliwaisi Moisés-pijinëta. Asaëyata cujarubabiabi-ata, itsiata xaniawaetsia apojumeyapëtae xua yabara cujaruba, pajamatabëcueneliwaisi-ata xaina bajarapaliwaisi.
8 Waxaitsi baja cajena yapëtanetsi pexanepanaecuene paliwaisi Dioso najumecopata Moisés-pijinëta, itsa canacuenebatsi xaniawaetsia Dioso pejitsipaecuenia.
9 Dioso aponajumecopatsi bajarapaliwaisi, penaneconitsia-exanaenexa pamonae Dioso aneconijibia petaewi, pesiwanajamatabëcuenecopabiwi Jesucristojawabelia. Biji rajane, tonajumecopata penaneconitsia-exanaenexa pamonae apopejumecowënëtsiwi, apopeyaiyataewi itsacuenejawayo-ata Dioso pijacuene, pamonae najamatabëcuenebijiana Dioso pijacuenewecua, pamonae-ata jiwibewi, paxa-ata, pena-ata, pebewi.
10 Tonajumecopatanua penaneconitsia-exanaenexa pamonae pewitota pibisiacuene exanawanapa nacojiobinejewa, pamonae-ata penacojiobiwi nawecua-exanawanapa pibisiacuene pewitota, pamonae-ata nacaewënapebijiwi, nacaewënapetiriawi pewitota pibisiacuene naexana. Tonajumecopatanua penaneconitsia-exanaenexa pamonae jiwi petaicaewi pematamowajëcaenexa palata, pamonae-ata itsamonae yabara najumetsënëtsiaya baracuaicuaijai tsabiabi bepexaniajaicuenia itajara. Baitsi, bajarapaliwaisi tonajumecopata Moisés-pijinëta, penaneconitsia-exanaenexa Dioso peliwaisiwecua aitothia pexanawanapaewi.
11 Bajarapapexanialiwaisi Cristo yabara, Dioso, pexaniajamatabëcuenenë, netocopata jiwi tatsipaebaponaenexa.
Pablo pexaniajamatabëcuene rajuta Jesucristojawabelia
12 Pexaniajamatabëcuene rajutajë wajatuxanenë Jesucristojawabelia, tsipaji caejamatabëcuene netoxaina. Nexata, nerajuta pesaë xaniawaetsia tatonacuenebinexa.
13 Copiata abaxë itsa aposiwanajamatabëcuenecopatsinë Jesucristojawabelia, pibisiacuenia tabaracuaicuaijainëmi tsabiabi. Jesucristo pijajiwi tobarajinabiabajë tabejiobia-exanaenexa. Pibisiacuenia tobijataeyabiabajë. Jesucristo itsiata nebejiobiatane bajarapacuenia ta-exanabiabinë-ata, tsipaji jamatabëcuenenawëxaniabiaya bajarapacuene exanabiabajë. Aponacueneyapëtaenë xua exanaponajë, tsipaji abaxë apojumexaniataenë Jesucristo peliwaisi.
14 Itsiata baitsi jane, wajatuxanenë Jesucristo pinijicuenia nitaxutotsoniatane. Nejamatabëcuenecaëjëpaeya-exana tasiwanajamatabëcuenecopatsinexa bajaraponëjawabelia. Nejamatabëcuenecaëjëpaeya-exananua pijajiwitonëxaenë ta-asiwanexa itsamonae-ata. Bajaraxuata, pexaniajamatabëcuene rajutabiabajë Jesucristojawabelia.
15 Paliwaisi ajena pacatsipaebianatsi, pexaniajailiwaisi cajena. Nexata, daxitajiwi xaniawaetsia bajarapaliwaisi bejumexaniatane: «Jesucristo baja cajena patsica mapanacuayabetsicaje pecapanepaenexa pibisiacuene pexanaewimi, Dioso penaneconitsia-exanaejawaminexa», pejailiwaisi bejumexaniatane. Xanë baja cajena, pibisiacuene pexanawanapaewituatuajëta bitso pibisiacuene ta-exanaenëmi daxitajiwi matatoxenetsia.
16 Bajarapacuenia tacuene-itsinëmi-ata, itsiata tanebejiobiataexae, Jesucristo necapanepa baja, bitso pibisiacuene ta-exanaponaponaenë-ata daxitajiwiwecua, penajamatabëcuene-itajëtsinexa bitso tanesiwa-ajamatabëcuenesaëtsaponaponaejawa. Bajarapacuenia neto-exana, daxita pibisiacuene pexanawanapaewi peyapëtaenexa tanecuenetaejawata, bajarapamonae-ata Dioso pecapanaepaejawanexatsi itsa siwanajamatabëcuenecopaba Jesucristojawabelia, bajarapacuenia perajutsinexatsi matacabi apopewerewerecaejawa.
17 Bajaraxuata, nacatoxanepana pexaniacuenia wajawënëxaniatsijawa caenë pepoDioso, Ponë daxitanacuanëpijiwi peyanacua-ewetsinë daxitamatacabijawabelia. Wënëxaniatsianatsi Dioso, Ponë piasaëtsaponaponaenë daxitamatacabijawabelia, Ponë apowajataecapanepaenë, Ponë daxitacuene peyapëtaenë, Ponë bitso ayaijamatabëcuenenë, Ponë bitso ayaicuene pexanaenë-ata. Bajaraxuanë yabara Dioso bewënëxaniataponatsi daxitamatacabijawabelianexa. Bajara-itsi tsane.
18 Timoteo, betaxënatomë tacataenë, bajarapacuenia ca-itorobatsi nexanaenexa, tsipaji bajaraxua yabara bajayata baja cajena itsamonae Dioso pejamatabëcueneta tajëwelia cawajunupaeba ne-exanaejawanexa.b ¡Nexata, Dioso asaëyata tocanacuenebaponare mapaliwaisije, jamatabëcuenefaefaenaenejewamë cato-ayapëbeje-ata!
19 ¡Ca-asaëmëre nitaxutuajamatejemajawa Dioso! ¡Najamatabëcuene-ewere xaniawaetsia nenajamatabëcuenebijianaeyaniwa Diosowecua! Itsamonae baja yapëtae-ata pacuenia Dioso jamatabëcuene-itorobatsi, apopexanaexae najamatabëcuenebijiana. Nexata, nawecuacopaba pitaxutuajamatejemajawa Dioso.
20 Bajarapamonaeyajuwënënëbeje, Himeneo, Alejandrobeje, Dioso pibisiacuenia baracuaicuaijaibeje tsabiabi. Nexata, xanë bajaraponëbeje capitsapajë Jesús pijajiwiwecua, penajoneyabiabijawamibeje. Bajarapacuenia to-exanajëbeje, penatoyapëtaenexabeje apopexanepanaejawa Dioso pibisiacuenia pebaracuaicuaijaijawabeje. Bajaraxuata, xanë copatajëbeje dowathijawabelia, xua jitsipa pexanaenexatsibeje.