Pablo yapëtaeya-exana xua yabara Jesús pijajiwi betowajëta itsamonae Diosojawabelia
2
Timoteo, daxitacuenewecua copiaya ca-itorobatsi nitorobinexa Jesús pijajiwi petowajëcabiabinexa daxitajiwi Diosojawabelia. Bewajëtapona peyawenonaenexatsi. Pexaniajamatabëcuene berajutaponanua bajaraPonëjawabelia daxita jiwi yabara.
2 Bajarapacuenia Diosojawabelia betowajëtaponatsinua daxita wajanacayanacua-ewetsiwi, pamonae-ata peyajawanacuenebiwi, peyawenonaenexatsi, xaniawaetsia wajanacayanacua-ewetsinexa. Nexata, peyawenonaecueniatsi itsa nacayanacua-eweta, jamatabëcuenexanepanaeya, aliwaisijibianua, najuajinawanapaenatsi. Nexata, liwaisi natsixainaenejewatsi Dioso pejitsipaecuenia exanawanapaenatsi ëpexaniacuene.
3 Bajarapacuenia wajatowajëtsijawa itsamonae yabara Diosojawabelia, bitso xanepana. Dioso, wajanacacapanepaenë, nacasiwajamatabëcuenebarëya.
4 BajaraPonë jamatabëcapanepa daxitajiwi pijaneconiwecua. Tojitsipanua daxitajiwi xaniawaetsia peyapëtaenexa pexaniajailiwaisi, Jesucristo peliwaisi.
5 Bajarapapexaniajailiwaisi pejamatabëcueneta, jiwi yapëtaena caenë Dioso peponaponaejawa. Yapëtaenanua, daxitajiwi petocuaicuaijainënexa Diosojawabelia, caenë Jesucristo, jiwiyajuwënënë,
6 tsipaji bajaraPonë nacaeweta pebeyaxuabinexatsi, pesiwatëpaejawata daxitajiwi pijaneconimi petomatamotsinexa. Bajarapacuenia Jesucristo exana Dioso pecaëjëtsimatacabita, jiwi peyapëtaenexa Dioso pejitsipaejawa daxitajiwi pecapanepaenexa.
7 Bajarapapexaniajailiwaisi Dioso nitoroba tatsipaebinexa apojudíowijawabelia, bajarapamonae-ata pejumexaniataenexa bajarapaliwaisi, pesiwanajamatabëcuenecopabinexa Diosojawabelia. ¡Xaniajanë cajena! Aponajumetsënëtsinë Dioso tane-itorobijawa yabara apojudíowijawabelia.
8 Bajaraxuata, pacatojitsipatsi panenacaetuatabiabitaxunaenëjawa, pebijiwi pewajëtsijawata Diosojawabelia, nacobeyotsiaya bewajëta,a pamonae baja Dioso pitabarata aneconijibia jinawanapa. Bewajëta anaepanaenejewa, jume-anaenotsinejewanua itsajiwiyojawabelia.
9 Jitsipajë pijinia petiriawi xanepanaeya penaxatabawanapaenexa. Apobenasiwabëjai penamata-itabëtsinexa pexaniacuenia penamatatiatsijawata, penamata-itabëtsinexanua oronanitota pexanaejawanëta, penamatamotsiwiria ibotoxita, penaxatabinexanua bitso penamatamotsinaxatabijawanë, pexaniawacuenia petaenexatsi.
10 Biji rajane, pexaniawacuenia petaenexatsi, besiwabëjai penacuene-itabëtsinexa pexaniacuenejawanë pexanaejawata, pacuenia tsicarucatsi pexanawanapaenexa papetiriawi Dioso yaiyatane.
11 Petiriawi benacuenecujaruba ajumejibia penamuxuna-ewetenaejawa Dioso peliwaisi Jesús pijajiwi penacaetuatsijawata. Bajarapacuenia be-exana penajamatabëcuene-itajëtsinexa peyaiyataejawa Dioso jumeliwaisipaebinë.
12 Petiriawi apotocopatsinë ayaibitsaëto penacaetuatsiwituatuajëta pecujarubinexa. Apotocopatsinënua be-ayaijamatabëcuenewi nataeya pitorobabiabinexa pebijiwijawabelia. Biji rajane, petiriawi beweliajamatabëcuenewi nataeya ajumejibia benamuxuna-ewetena.
13 Bajarapacuenia itorobajë, tsipaji copiaya Dioso exana pebi. Bajaraponë pewënë Adán. Bajaraxuacujinae, cotocaewi exana petiriwa. Bajarapowa pewënë Eva.
14 Adán cajena picani dowathi apoyamaxë-itojorobitsi.b Biji rajane, copiaya petiriwa dowathi yamaxë-itojorobatsi. Nexata, copiaya pibisiacuene exana.
15 Itsiata, petiriawi aponaxuabi tsanec daxita pecujarubicuene. Tsiteca Dioso tocopatatsi pecujarubabiabinexa pexijawabelia, pamonae xainaponaejitsia, pewitsatsinexa Dioso pejitsipaecuenia. Toxanepanatsinua pitaxutuajamatejematsawanapaenexa Diosojawabelia, piasiwatsawanapaenexa itsamonae, Dioso-ata, xaniawaetsia pejinawanapaenexa nacuene-ewetsiaya Dioso pejitsipaecuenia.