Pitsijamatabëcuene pebijiwi bexainawanapa ancianowinexa
3
Mapaliwaisije pexaniajaijawa cajena. Ponë jitsipa penacuenebijawa ancianonëcuenia, peto-ewetsinexa Jesús pijajiwi, pexanianacuenebijawa natojitsipa.
2 Ancianonënexa,a xanepana ponë apoxainae paliwaisi yabara jiwi neconitsijitsiatsi. Caewayo pepitsinë. Penajamatabëcuenerewiabinë. Xaniawaetsia penajamatabëxainaenë. Peyaiyataenëtsi. Xaniawaetsia pecopiapitabiabinë pijaboyaberena pesiwaxainaewitsi. Pecaëjëpaenëtsinua xaniawaetsia jiwi pecujarubinexa Dioso pejumeliwaisi.
3 Xanepananua ponë apopejitsipaenë piapaejawa piataneranë pia-itajibinexa. Apopejitsipaenë pebejawa pewënajiwi. Apopejitsipaenënua itsajiwi-ata yamaxë-itojorobiaya pewecuanacobetoxotsinexa palata. Biji rajane, ancianonënexa xanepana ponë pexaniajamatabëcuenenë. Anaeya itsajiwi-ata apopejumepitsinë, pebarënajume-anaenotsinexa. Apopenajamatabëxainaenë bitso pexainaenexa-ata pexainaejawa.
4 Xaniawaetsia pewetsinë pexi, pijawa-ata. Pexi pejumecowënëtsinëtsi. Pejumeyaiyataenëtsinua.
5 Baitsi, itsa apocaëjëpaetsi xaniawaetsia pewetsinexa pexi, pijawa-ata, nexata apocaëjëpae tsipaetsi pewetsinexa Jesús pijajiwi.
6 Apoxanepanae ancianonënexa ponë abaxë pejanasiwanajamatabëcuenecopatsinë Jesucristojawabelia, tsipaji belia be-ayaijamatabëcuenenë nataejitsipa. Nexata, naneconitsipa Diosojawabelia, pacuenia bajayata dowathi naneconita, be-ayaijamatabëcuenenë penataexae Diosowecua.
7 Xanepana ponë pexaniacuenia pebaracuaicuaijainëtsi, peyaiyataenëtsinua pamonae Jesús peliwaisi pejume-aebiwi. Bajarapitsinë xanepana, tsipaji ancianonë pexanaecujinaetsi, jiwi ya-itacania pibisiacuenia pebaracuaicuaijaiyaniwatsi, dowathi-ata peyamaxë-itojorobiyaniwatsi.
Diáconowinexa pitsijamatabëcuene bexainawanapa
8 Diáconowinexa pijinia, xanepana pitapetsinexa pamonae penajamatabëcuenerewiabiwi, pexaniajaitsabiabiwi, apopiapaewinua piataneranë pia-itajibinexa. Apopejitsipaewi itsajiwi-ata yamaxë-itojorobiaya pewecuanacobetoxotsinexa palata.
9 Xanepana pamonae caejamatabëcuene xaina pejumexaniataenexa patacatsipaebiliwaisi, Dioso pataneyapëtaeya-exanaecuenia, aneconijibia pejinawanapaenexa Dioso pitabarata.
10 Pitapetsiwajënaeya itsanë diácononënexa, copiaya becuenecanaëjëta pexanaecuenemi,b pecueneyapëtaenexa pecuenecaëjëpaejawatsi pewetsijawa xua ewetsia-exanatsi. Xaniawaetsianua itsa ponapona Dioso pitabarata. Nexata, xaniawaetsia itsa ewetsicapanepa, xanepana jane baja wajawënërubinexa diácononë, penacuenebinexa xua diáconowi banacueneba.
11 Diáconowi pijinia pijawajiwic xanepana peyaiyataewitsi, penajamatabëcuenerewiabiwi, apopebaracuaicuaijaiwinua najumetsënëtsiaya itsamonae. Daxitaxua exana, xaniawaetsia be-exanabiaba, itsajamatabëcuene xainaenejewa.
12 Diácononënexa, xanepana ponë caewa pepitsicujinae pebarëponaponaenë. Pecaëjëpaenëtsinua xaniawaetsia pewetsinexa pexi, pijawa yajawa.
13 Bajaraponë xaniawaetsia itsa eweta penacuenebijawa, nexata diácononë xaniawaetsia wënëliwaisiyaiyataenatsi daxitajiwi. Ajume-urajibianua jiwijawabelia nawajunupaebiana Jesucristojawabelia pesiwanajamatabëcuenecopatsijawa yabara.
Pablo yapëtaeya-exana Timoteojawabelia pacuenia Jesús pijajiwi be-exanawanapa
14 Timoteo, bepijiacuenia jamatabëponajë xamëjawabelia, tacataenexa. Itsiata, tawajënaeyabelia daxita mapacuene yabaraje catoyaquinatsi.
15 Itsa abaxë cuenenajematsianajë tapatsijawa xamëjawabelia, catoyaquinatsi tacayapëtaeya-exanaenexa pacuenia Jesús peliwaisi pejumexaniataewi namata-enetsia nacuene-ewetawanapaejitsia Dioso pexixae. Jesús pijajiwi raja Dioso piasaënë pijajiwibitsaëto. Bajarapamonae raja peliwaisi-ewetsiwi, itsamonae piajibia-exanaeyaniwa pexaniajailiwaisi pejumexaniataejawa. Apotocopatsinua itsajiwi-ata pexaniajailiwaisiwecua saicayaliwaisi pepaebiyaniwa.
16 Xaniajai, paliwaisi Dioso nacayapëtaeya-exana maparucaeje, bitso pexaniajailiwaisi cajena itsaliwaisianëwecua, tsipaji nacayapëtaeya-exana pacuenia jinawanapaejitsiatsi Dioso pejitsipaecuenia. Bajarapaliwaisi Dioso apoyapëtaeya-exanae bajayatami itsajiwijawabelia. Bajarapapexaniajailiwaisi Cristo yabara nacayapëtaeya-exana mapacueniaje:
BajaraPonë naexana jiwitonëcuenia. Espíritu Santo yapëtaeya-exana daxitajiwi Cristo pianeconijibinëcuene. Ángelewi-ata cuenetanetsi. Cristo pijajiwi wënëliwaisipaebaponatsi daxitanacuanëpijiwijawa. Nexata, daxitanacuanëjawa jiwi siwanajamatabëcuenecopabapona Cristojawabelia. Dioso pijanacuatatsia-ata Cristo copiapitatsi ayaijamatabëcuenenëcuenia.