Pacuenia cujarubijitsia itsamonae bepexaniajailiwaisi itajara pepaebiwiyajuwënëwi
4
Espíritu Santo baja cajena tajëwelia nacayapëtaeya-exana pacuenia bexëajawabelia itsamonae nawecuacopabijitsia pexaniajailiwaisi, pejumexaniataenexa saicayaliwaisi Dioso peliwaisiwecua. Nexata, namuxuna-ewetsiana dowathiwia peyapëtaeya-exanaeliwaisianëtsi, pejumexaniataenexa saya penajumetsënëtsiliwaisianë.
2 Bajarapapenajumetsënëtsiliwaisianë capitsapa pamonae bepexaniajailiwaisi itajara pepaebiwi. Bajarapamonae raja penajumetsënëtsiwi, bepejamatabëcuenetëpawanapaewinua Dioso pitabarata. Nexata, apo-acuene-ura cajena tsane pepaebicuene.
3 Nexata, itawetsiana penacojiobicuene. Itawetsiananua itsacuenejawanë jiwi pexaeyaniwa, xuanë picani Dioso nacato-exana wajaxaenexa. Waxaitsi itsiata, pexaniajailiwaisi wajajumexaniataewi, yapëtanetsi Dioso wajanacarajutsijawa wajaxaejawanënexa. Bajaraxuata, pexaniacuene rajutabiabatsi bajaraPonëjawabelia wajaxaejawa yabara.
4 Daxitacuene, xua Dioso exana wajaxaejawanexa, pexaniacuene bitso. Nexata, apobiatsobitsi itsacuenejawayo-ata papexaejawa Dioso nacarajuta. Biji rajane, itsa pitatsi bajaraxua, «Xanepana rabaja», bejai tsabiabitsi Diosojawabelia, wajanacarajutsixae wajaxaejawanexa.
5 Bajarapacuenia Dioso pexanaejawa yabara: «tsitapexaniacuenetsi»,b pejaixae pejumeliwaisibaxutota, pexaniajamatabëcuene wajarajutsixaenua waxaejawa yabara bajaraPonëjawabelia, ajibi xua yabara bewajanaxuirabiwicuenia nacopatsijitsiatsi wajaxaejawa pejamatabëcuene.
Pablo muxujioba Timoteo xaniawaetsia peponaponaenexa, xaniawaetsia pecujarubinexanua Dioso pejumeliwaisi
6 Xaniawaetsia Jesucristo netonacuenebinë tsane, Jesús pijajiwijawabelia itsa tsipaebianame pexaniajailiwaisi, bajarapamonae pejumexaniataeyaniwa penajumetsënëtsiliwaisi petsipaebaponaewi. Najamatabëcuene-itajëtsianamenua xamë xaniawaetsia Dioso peliwaisita nenajamatabëcuene-abatsijawa, neca-asaëjawanua nejumexaniataeliwaisi.
7 ¡Bajaraxuata, nawecuatsare pamonae mapanacuapijiliwaisianëje, natsiquejemaliwaisianë-ata pecuaicuaijaitsabiabiwi! ¡Biji rajane, daxita nesaëta nacujarubare, Jesús pijajiwitonëmëcuenia xaniawaetsia neponaponaenexa Dioso pejitsipaecuenia!
8 Xaniajai, mapanacuataje waja-aperabësaënexa nacatoxanepana wajacujinaejinaejawa wajajumalixanepanaenexa. Itsiata baitsi jane, daxitacuenewecua xanepana wajajinawanapaenexa daxita wajasaëta Dioso pejitsipaecuenia. Bajarapacuene nacajamatabëcueneyawenona wajajinawanapae-epato mapanacuataje, wajapatsicujinae-ata Dioso pijanacuayabetsia, wajanamatacotsicujinae wajatëpaejawawecua.
9 Bajarapaliwaisi pexaniajailiwaisi cajena. Nexata, bajarapaliwaisi daxitajiwi bejumexaniatane.
10 Bajaraxuata, Dioso asaëyata tonacuenebaponaponatsibeje nacato-ayapëbeje-ata, tsipaji itaxutuajamatejemaya copia-ewetaponaponatsibeje, piasaënë Dioso wajanacato-exanaenexabeje najumecapanepaeya pejumaitsicuenia. Xaniajai, Dioso pecapanepaenë jiwi pijaneconiwecua, daxita pamonae pepocuene siwanajamatabëcuenecopaba bajaraPonëjawabelia.
11 ¡Bajarapaliwaisi cujarubaponare! Itorobaponarenua bajarapacuenia pexanaenexa.
12 ¡Pewëjëatoxaemë, pëtsa nacopatame itsajiwi-ata beya-itacania pecajumaitsijawa nexanaecuene yabara! ¡Biji rajane, xaniawaetsia tsitanacuene-itajëtaponaponare, Dioso pijacuene necuaicuaijaijawata, nexanaecuenejawata, itsajiwi niasiwajawata, nitaxutuajamatejemajawata Dioso pecayawenonaenexa, ëpexaniacuene ne-exanaponaejawatanua! Bajarapacuenia itsa tsita-exanaponaponaename, nexata Jesús pijajiwi pecacuenetaejawata cacuenejëpaeya jinawanapaena.
13 ¡Xanë tapatsiwajënaelia Jesús pijajiwi penacaetuatsijawata, Dioso pejumeliwaisibaxuto tsimuxulebabiabare! ¡Ajamatabëcuenesaëya-exanaponare! ¡Cujarubaponarenua!
14 ¡Pëtsa bijiayataneme xua Dioso cajamatabëcaëjëpaeya-exana Espíritu Santo pejamatabëcueneta! Bajaraxua yabara catowajunupaeba ancianowi, pamatacabi catsimatanacobebuata pecatowajëtsijawata Diosojawabelia, pecayawenonaenexa netonacuenebaponaponaejawata.
15 ¡Daxita nesaëta nacuene-enaeyabare pacuenejawanë catsicaruca nexanaenexa! Nexata, daxitajiwi cayapëtaena xaniawaetsia nenacuenebijawa pewajënaeyabelia pecatoxanepanaponaejawa.
16 ¡Nayajiwitaeyaponaponare pibisiacuenewecua, netsipaebiliwaisi-ata yabara, saicayacuenia nepaebiyaniwa Dioso peliwaisiwecua! ¡Bajarapacuenia nexanaejawa casaëmëre tsaponaponae, tsipaji bajarapaliwaisita Dioso cacapanepaena. Capanepaenatsinua pamonae-ata xaniawaetsia canamuxuna-ewetsiana netsipaebiliwaisi!