2 Timoteo
Mapabaxutoje Apóstolnë Pablo cotocaewi toyaquina Timoteojawabelia
Pablo pebajacobiliwaisi Timoteojawabelia
1
Xanë, Pablonë, Jesucristo nitapeta pija-apóstol-nënexanë, Dioso pejitsipaecuenia tatonacuenebinexa. Nexata, nitorobanua daxitanacuanëjawa jiwi tatsipaebinexa pacuenia Dioso najumecapanepaeya jumaitsi perajutsijawanexa matacabi apopewerewerecaejawa, pamonae siwanajamatabëcuenecopaba Jesucristojawabelia.
2 Timoteo, betaxënatomë bitso taca-asiwanë, catoyaquinatsi mapabaxutoje. Catojitsipatsi waxa Dioso, wajatuxanenë Jesucristobeje, pecajamatabëcuenewënëtsinexa peca-itaxutotsoniataejamatabëcuene, peca-asiwajamatabëcuene, pecabarajamatabëxanepanaejamatabëcuene-ata jamatabëcuenexanepanaeya neponaponaenexa.
Pablo ajamatabëcuenesaëya-exana Timoteojawabelia, pexanaponaponaenexa Dioso pejamatabëcuenecaëjëpaeya-exanaecueniatsi
3 Tawajëtsijawata Diosojawabelia, merawi, matacabita-ata, pexaniajamatabëcuene rajutabiabajë, tacanajamatabënapitsijawata xamë yabara. Dioso tonacuenebabiabajë itsajamatabëcuene xainaenejewanë, pacuenia bajayata tajasalinaiwimi-ata tonacuenebawanapa.
4 Najamatabënapitabiabajë tanepënueyabaxuabijawamë pamatacabi nawecuanatsatatsibeje. Bajaraxuata, bitso icatsia jitsipajë tacataejawa, tajamatabëcuenebarëyanexa.
5 Najamatabënapitabiabajënua xaniawaetsia nesiwanajamatabëcuenecopatsijawa Jesucristojawabelia. Copiaya pajamatabëcuenexainabeje acue Loida, ena Eunicebeje, bajarapacuenia xamë-ata siwanajamatabëcuenecopatame Jesucristojawabelia.
6 Bajaraxuata, ca-itorobatsi icatsia nexanaponaponaenexa Dioso pecacaëjëpaeya-exanaejamatabëcueneta, xua carajuta pamatacabi catsimatanacobebuatatsi Diosojawabelia tacatowajëtsijawata.
7 Dioso baja cajena aponacatsijamatabë-ecaeya-exanae pitejepaebijamatabëcuene pexainae-Espíritu Santo. Biji rajane, nacatsijamatabë-ecaeya-exana, pesaë pexainae-Espíritu Santo. Bajarapasaëta nacajamatabëcuenecaëjëpaeya-exana, waja-asiwanexa itsamonae, wajanajamatabëcuenecataitsinexanua pibisiacuene waja-exanaeyaniwa.
8 ¡Nexata, pëtsa auramë newajunupaebaponaejawa wajatuxanenë Jesús peliwaisi! ¡Pëtsa ajume-uramë xanë yabara-ata, taponaponaexae majotaje, penaneconitsiwi pejebabiabibota, Jesucristo peliwaisi tatsipaebaponaponaexae! ¡Biji rajane, Dioso pecajamatabëcuenecaëjëpaeya-exanaesaëta, xamë-ata nacopare itsamonae pecabejiobia-exanaenexa, Jesús peliwaisi netsipaebijamatabëcuene!
9 Dioso baja cajena nacacapanepa wajanacananeconitsia-exanaejawaminexa, pibisiacuene waja-exanaejamatabëcuene. Nacajunatanua pijajiwinexatsi, pejitsipaecuenia wajatojinawanapaenexa. Bajarapacuenia nacato-exana itsacuenejawa pexaniacuene to-exanaenejewatsi. Biji rajane, Dioso tajëwelia nacua pexanaewajënaeya najamatabëcuenewereta wajanaca-itaxutotsoniataenexa Jesucristo pejamatabëcueneta.
10 Dioso cajena nacatsitanajamatabëcuene-itajëta wajanaca-asiwajawa, wajanacacapanepaenënexa Jesucristo pitorobijawatatsica. Nexata, wajanacasiwatëpaejawata, nacawecua-ajibia-exana naxuabiaya Diosowecua wajatëpaejawaminexa.a Orijibia, wajajumexaniataejawata Jesús peliwaisi, xainaenatsi matacabi apopewerewerecaejawa.
11 Dioso cajena nitapeta apóstol-nënexanë, jiwi tatsipaebaponaenexa, tacujarubaponaenexanua, Jesús peliwaisi.
12 Bajarapaliwaisi jiwi tatsipaebaponaexae, itsamonae nebejiobia-exanapona penaneconitsiwi pejebabiabibota. Itsiata baitsi jane, apo-auranë tanebejiobia-exanaejawa Jesús peliwaisi yabara, tsipaji yapëtaniji pecuenecaëjëpaenëtsicuene Ponëjawabelia siwanajamatabëcuenecopatajë. Xanë Ponë necopata pexaniajailiwaisi jiwi tatsipaebaponaenexa, cuenecaëjëpatsi penaliwaisi-ewetsinexa, itsamonae piajibia-exanaeyaniwa. Nexata, pewajënaeyabelia jiwi tsipaebaponaena bajarapapexaniajailiwaisi, icatsia Cristo pepatsimatacabitsicajawabelianexa.
13 Timoteo, papexaniajailiwaisi yapëtaneme xanëjawata, ¡casaëmëre tsaponaponae bajarapacuene ne-exanaponaponaenexa! Pacuenia baja catsipaebatsi, juya itsamonaejawabelia tsipaebabiabianame. ¡Bajarapacuenia exanaponaponare, nitaxutuajamatejemaxae, niasiwaxaenua Cristo Jesús!
14 Espíritu Santo, ponë nacatsijamatabëcuene-eca, pesaëta xaniawaetsia ewetsianame papexaniajailiwaisi nacatocopata wajapaebinexa. ¡Nexata, xaniawaetsia tsipaebaponaponare, saicayaliwaisicuenia tsipaebinejewamë bajarapaliwaisiwecua!
15 Xamë baja cajena yapëtaneme pacuenia daxita Jesús pijajiwi, Asia nacuata pejinawanapaewi, nexuabarëcëpeca. Bajarapamonaeyajuwënënëbeje Figelo, Hermógenes-beje.
16 Bitso jitsipajë Dioso pexaniacuenia peyawenonaenexatsi Onesíforo, pijamonae yajawa, tsipaji bajaraponë ayaicuenia nejamatabëcuenebabatabiaba. Bajaraponë nesiwaxainabiaba, penaneconitsiwi pejebabiabibota ecae-atanë, apotaneyapijiwi-auraxae.
17 Biji rajane, bajaraponë nejaitaruta pacujinae patajopa Roma tomarata. Apocopatsi cajena tanejaitarutsijawa, tanecaxitajarabijawabelia penaneconitsiwi pejebabiabibota.
18 Bajaraxuata, ayaicuenia jitsipajë Dioso bitso pexaniacuene peto-exanaenexa Onesíforojawabelia, pamatacabi icatsia Cristo patsianica. Xamë baja cajena yapëtaneme pacuenia Onesíforo xaniawaetsia nacayawenonabeje, pamatacabi ponaponatsibeje Éfeso tomarata.