Jesús pijajiwitonë be-ajamatabësaë Dioso pijacuene pexanaejawa, itsamonae bejiobia-exanae-atatsi
2
¡Timoteo, xamë betaxënatomë tacataenë, ajamatabëcuenesaëmëre Dioso pecajamatabëcueneyawenonabiabixae, Cristo Jesús pejamatabëcueneta!
2 ¡Nexata, paliwaisianë jumetaeyabiabame tatsipaebabiabijawata jiwi ayaibitsaëtoxanetonëjawabelia, bajarapaliwaisianë juya tsipaebare pamonaejawabelia caejamatabëcuene xaina Diosojawabelia, pecuenecaëjëpaewitsinua xaniawaetsia pecujarubinexa! ¡Nexata, bajarapamonae juya itorobare mataropotsia petsipaebinexa itsamonaejawabelia!
3 ¡Xamë pijinia, ajamatabëcuenesaëmëre Dioso pejumeliwaisi jiwi netsipaebaponaenexa, cato-ayapëbeje-ata, itsamonae cabejiobia-exanae-ata! ¡Jesucristo pijajiwitonëxaemë, jamatabëcuene-ewetaponaponare pacuenia ca-itoroba nexanaenexa! ¡Pacuenia itsi pexaniawajabitsaënë, bajara-itsimëre!
4 Pawajabitsaënë jitsipa pesiwajamatabëcuenebarëyajawatsi pitorobabiabinëtsi, jamatabëcuene-ewetaponapona pitorobicueniatsi pexanaenexa. Nexata, aponacajonenua itsacuenejawa pexanaenexa pijawajabitsaëcuenewecua, saicayacuene pewetaponaenexa.
5 Pamonae pijinia pecujinaejinaewi, penayacopia-ucubijawata, apopitsi tsane xua rajutsiapaebatsi pecujinaejinae matamo, itsa xaniawaetsia apocujinaejinae petocaëjëtsicueniatsi. Bajarapijinia pacuenia, xamë catoxanepana netonacuenebijawa, Dioso pecatocaëjëtsicuenia.
6 Ponë pijinia pabi pe-ubinë, bajaraponë copiaya nacueneba asaëyata. Pe-ubijawa itsa tonaweretatsi, penotsijawata pita penacuenebimatamo. ¡Bajarapacuenia pijinia, xamë-ata asaëya tonacuenebare wajatuxanenë, pecarajutsinexa netonacuenebimatamo!
7 ¡Canaëjëre mapacuenejawanëta tacatsipaebijawata! Nexata, juya wajatuxanenë cajumeyapëtaeya-exanaena bajarapaliwaisijawata.
8 Najamatabënapitabiabianame Jesucristo yabara, David-pijinë pemomoxiyajuwënënëcuene, Dioso Ponë asaëya-exana petëpaejawawecua. Bajaraponë cajena peliwaisi tsipaebabiabajë jiwijawabelia, Dioso pecapanepaenexatsi pejumexaniataejawata bajarapaliwaisi.
9 Bajarapapexaniajailiwaisi tatsipaebaponaexae daxitanacuanëjawa, nacueratsiaya ponaponajë penaneconitsiwi pejebabiabibota. Cadenamaëtonëta xanë necëbanua, pacuenia bitso pibisiacuene pexanaenë bacëbatsi. Itsiata, Jesucristo peliwaisi apocëtsicapanepaetsi. Bajaraxuata, xanë majotaje naneconitsiaponaponae-atanë, aeconoxae baja Jesucristo peliwaisi yacaëjëpapona daxitanacuanëjawa.
10 Bajaraxua tayapëtaexae, netocopiapataponae-ata bajarapa-ayapëbejejawanë, najamatabëcuenesaëtajë, pamonae Dioso nato-itapeta peyapëtaejawabelia pecapanepaejawanexa, Jesús peliwaisi pejumexaniataejawata. Bitso jitsipajë Cristo Jesús pecapanepaejawa bajarapamonae-ata, peyajawajinawanapaenexa bajaraPonë pijapinijicotia yajawa, daxita matacabijawabelianexa.
11 Paliwaisi aeconoxae jumaitsinëjitsia Jesús pijajiwi yabara, pexaniajailiwaisi cajena:
«Itsa Cristo yajawatëpatsi, nexata icatsia, nacayajawa-asaë tsaponaponae tsane.
12 Itsa najamatabëcuenesaëtsianatsi itsamonae nacabejiobia-exanae-ata Cristo peliwaisi yabara, nexata daxitacuene Cristo cobena-ewetsianatsi, pamatacabi daxitacuene ewetsiana mapanacuaje.a Itsa nayawajunuaxainaenatsi jiwijawabelia wajajumexaniataejawa bajaraPonë peliwaisi, nexata juya pijajiwitsicuene nacayawajunuaxainaenab paxa Diosojawabelia.
13 Caejamatabëcuene Pamonae pijinia pecujinaejinaewi, penayacopia-ucubijawata, apopitsi tsane xua rajutsiapaebatsi pecujinaejinae matamo, itsa xaniawaetsia apocujinaejinae petocaëjëtsicueniatsi. Bajarapijinia pacuenia, xamë catoxanepana netonacuenebijawa, Dioso pecatocaëjëtsicuenia, Dioso itsiata caejamatabëcuene xainaena pexanaenexa pacuenia baja cajena najumecapanepaeya jumaitsi, tsipaji apocuenecaëjëpaetsi saicayacuenia pexanaejawa pijacuata pejumaitsijawawecua».
Pacuenia jamatabëcuene-itsi xaniawaetsia Dioso petonacuenebinë, yabara peliwaisi
14 Paliwaisi catsipaebatsi, bajaraxua najamatabënapitsia-exanaename daxita Jesús pijajiwi. ¡Wajatuxanenë pitabarata, xaniawaetsia muxujiobare penajume-anaenotsiyaniwa xua bitso apopenamatamotsiliwaisianë yabara, tsipaji bajarapaliwaisi apojamatabëcueneyawenonae caejiwiyo-ata! Biji rajane, saya jamatabëcuenebijianaejitsipa daxita pejumetaewitsi.
15 ¡Xamë, daxita nejamatabëcuenesaëta exanaponaponare Dioso pejitsipaecuenia, pecasiwajamatabëcuenebarëyanexa! Bajarapacuenia itsa exanaponaponaename, apoxainaemë tsane xua yabara acuene-uramëjitsia Diosojawabelia pamatacabi naitajëtsianame bajaraPonë pitabarata, xaniawaetsia necujarubabiabixae pepopexaniajailiwaisi.
16 ¡Pëtsa namuxuna-ewetame pamonae cuaicuaijai tsabiabi natsiquejemaliwaisi, mapanacuapijiliwaisi, tsipaji raja bajarapaliwaisianëta jiwi jamatabëcuenematacapona pewajënaeyabelia pexanaponaenexa mapanacuapijicuenejawanëje, Dioso peliwaisiwecua!
17 Bitso cajena abeje bajarapaliwaisi. Pacuenia pewajënëtsabananajetarucaejawata ayaiwajënë banaexanapona, bajarapijinia pacuenia, petsipaebaponaeliwaisita jamatabëcuenebijianapona pejumetaewitsi. Belia, yacaëjëpapona daxitajiwijawabelia. Bajarapitsiliwaisi paebaponabeje Himeneo, Filetobeje.
18 Bajaraponëbeje wecuanatsatabeje pexaniajailiwaisiwecua. Nexata, pecujarubiliwaisita jumaitsi tsaponaebeje jiwijawabelia: «Copiarucac baja Dioso icatsia piasaëya-exanaponaejawaminexa, jiwi petëpaecujinae», jai tsaponaebeje. Bajarapaliwaisita jamatabëcuene-epatajërërëcaponabeje Dioso peliwaisiwecua. Nexata, itsamonae-ata Jesucristojawabelia pesiwanajamatabëcuenecopabijawamiwecua jamatabëcuene-epatajërërëcaeya-exanaponabeje.
19 Itsiata baitsi jane, itsajiwi-ata apocaëjëpaetsi pejumetixitsijawa Dioso peliwaisi, saicayacuenia pecujarubinexa. Pacuenia ibotoxaneto apotixitsicapanepaetsi, bajarapacuenia itsi Dioso peliwaisi, tsipaji bajarapaliwaisi tsiteca. Bajarapaliwaisijawata Dioso yaquinaeya-exana mapacueniaje: «Pepopetuxanenë cajena yapëtane pamonae pijajiwi»,d jai. Itsaliwaisijawata pijinia mapacuenia pejumaitsiliwaisiyo rucaje: «Pajiwi jumaitsi: ‘Xanë raja Cristo pijajiwitonënë,’ jai, bajarapajiwi becopata pibisiacuene pexanaejawa»,e pejailiwaisiyo.
20 Riconë pijaboxanetota jiwi pecaxaenëanënexa, xaina daxitacuenewirianëxi. Pexaniawiria waxianë, pexanaejawanë oronanitota, platananitotanua, bajaraxuanë canacuenebabiaba peyaiyataewitsijawabelia, pamatacabi siwaxainatsi petuxanewi. Juya xuanë beweliajawanë, pexanaejawanë naejawanëta, atsananitota-ata, bajaraponëxi canacuenebabiaba daxitamatacabi.
21 Bajarapacuenia pijinia, itsi Jesús pijajiwi tuatuajëta. Pajiwi xaniawaetsia najamatabëcuene-ewetaponapona pibisiacuene pexanaeyaniwa, bajarapajiwi Dioso taenatsi be-oronanitota pexanaewaxitsi, peyaiyataetaxunae perajutsinexatsi. Baitsi baja, itsa ajamatabëcuenexuirajibi, nexata pijatuxanenë tsitaxanepana pitorobinexatsi xua pexaniacuene pijatuxanenë petonacuenebinexa. Timoteo, bajaraxuata xaniawaetsia bena-ewetaponaponame pibisiacuene nexanaeyaniwa.
22 ¡Timoteo, pewëjëawi pejitsipaejamatabëcuenejawanëf pëtsa tonacopatame! ¡Biji rajane, wecuanajetabijirawaponare! ¡Casaëmëre tsaponaponae ëpexaniacuene nexanaponaponaejawa! ¡Diosojawabelia itaxutuajamatejemaya ponaponare! ¡Asiwamëre tsaponaponae itsamonae-ata! ¡Jamatabëcuenexanepanaeya ponaponare Dioso pitabarata! ¡Bajarapacuenia barë-ajamatabëcuenesaëmëre tsaponaponae, pamonae xaniawaetsia pena-ewetawanapaewi pibisiacuene pexanaeyaniwa, penawajëcabiabiwinua Diosojawabelia peyawenonaenexatsi!
23 ¡Namuxujemare natsiquejemaliwaisixi pecuaicuaijaiwi, tsipaji rabaja yapëtaneme, jiwi penajume-anaenotabiabijawa bajarapaliwaisixi yabara!
24 Jesús cajena pijajiwitonë, apobeponaponae itsamonae pebarënabijataeyabiabinëcuenia. Biji rajane, pexaniajamatabëcuene bexaina daxitajiwijawabelia. Pecuenecaëjëpaenëtsinua Dioso peliwaisi pecujarubijawa. Penajamatabëcuenecataitsinë pianaepanaejawa itsamonae jamatabëcuene-itonotabiabi-atatsi.
25 Jesús pijajiwitonë beweliajamatabëcuene nataeya bemuxujioba, pecuenexanetsinexa pamonae Dioso apopejitsipaewi-ata. Nexata belia, bajarapacuenia Dioso tocopatsipatsi bajarapamonae penajamatabëcuenepënëyorotsinexa pibisiacuene pexanaejawawecua, juya peyapëtaenexa Jesús peliwaisi pexaniajailiwaisicuene.
26 Nexata, bajarapaliwaisi pejumexaniataejawata, wecuapanepaena panajumetsënëtsiliwaisita dowathi jamatabëcuenecëbatsi, pejitsipaecuenia-ata jamatabëcuenenamatacaitorobabiabatsi. Itsiata, Jesús peliwaisi pejumexaniataejawata, bajarapamonae juya jinawanapaena Dioso pejitsipaecuenia.