Pacuenia jiwi cuene-itsijitsia itsa baja imoxoyo pewajënae nacua pewerewerecaenexa, yabara peliwaisi
3
Timoteo, xaniawaetsia beyapëtaneme pacujinae imoxoyo pewajënae tsane nacua pewerewerecaenexa, bitso piayapëbejecuene copiapatsiana daxitacuenejawabelia.
2 Bajarapamatacabita cajena, jiwi ayaibitsaëtonë tsane, asiwaya pijacuata penataewi. Nexata, nato-asiwa tsane ëbajarapamonae ayaijawa pexainaenexa. Nawajunupaebiananua saya peyaiyataenexatsi pejumetaewitsi. Be-ayaijamatabëcuenewi nataena. Bepeliwaisi namatamotsiwi nataena itsamonaewecua. Orijibia, bajarapamonae pibisiacuenia baracuaicuaijai tsane Dioso. Apojumecowënëtsi tsane paxajiwi, penajiwi-ata, pitorobicueniatsi. Apojitsipaenua tsane pexaniacuene perajutsijawa, itsamonae yawenonae-atatsi. Beweliacuenia petaewi tsane daxita Dioso pijacuene.
3 Bajarapamonae asiwaya apotae tsane itsamonae-ata. Itsa to-exanatsi, apopejitsipaecuene, aposiwajamatabëcuenewerewerecae tsane, itaxutotsoniataenejewa. Najumetsënëtsiayanua baracuaicuaijai tsabiabi tsane itsamonae. Apocaëjëpaetsi tsane penajamatabëcuenecataitsijawa, pibisiacuene pexanaeyaniwa. Pebejiobia-exanaewi tsane itsamonae itaxutobejiobiataenejewa. Bajarapamonae itoya tsane daxita xua Dioso tane pexaniacuene.a
4 Bajarapamonae canajetsiana pijabopijiwi, itsa jume, penajuajinawanapaewi-ata pitoyawitsi pecobeyabelia. Xaniawaetsia cuenecana-ëjëtsinejewa pejumaitsiwi, pexanaewi-ata. Bijiaya naëcotsiana itsamonae. Dioso apojamatabënajinae tsane. Bajarapamonae nato-asiwa tsane mapanacuapijibarëyajamatabëcuene, Dioso piasiwajawawecua.
5 Bajarapamonae cuenejëpae-ata tsane itajara Dioso bepejitsipaecuenia pexanawanapaewi, itsiata pexanaecuenejawata, nacuene-itajëtsiana Dioso apopijajiwicuene.b
6 Bajarapamonae nawecuatsatsianame, tsipaji bajarapamonaeyajuwënëwi itsamonae pijabonëjawabelia joneyabiabiana, peyamaxë-itojorobinexa powaxi copiapitabiabianatsi, pejamatabëcuenefaefaenaewi. Bajarapowaxi pibisiacuene pexanawanapaewi. Nexata, jamatabëcuene-enatsi daxita pibisiacuene pexanabiabinexa.
7 Bajarapapetiriawi picani jitsipaena petsipaebabiabinexatsi pejanaliwaisi Dioso pejumeliwaisi yabara. Itsiata baitsi jane, apotsijamatabëjonetsi tsane pepopexaniajailiwaisi, pecapanepaeliwaisinexatsi Diosojawabelia.
8 Bajayata, penajorobinëmibeje, Janes, Jambres-pijinëmibeje, cuenecaranababeje Moisés-pijinë petsita-exanaejawanë, faraón pejumecowënëtsiyaniwa Dioso pitorobicueniatsi. Bajarapacuenia pijinia, pamonae penajumetsënëtsiliwaisi pecujarubiwi cuenecaranabiana, jiwi pejumexaniataeyaniwa Dioso peliwaisi. Bajarapapebijiwi jamatabëcuenewënëca ëpibisiacuene pexanaenexa. Nawajunupaebabiabiana bepesiwanajamatabëcuenecopabiwi itajara Jesucristojawabelia.
9 Itsiata, bajarapamonae pepaebiliwaisi apo-aliwaisisaë tsane, tsipaji belia daxitajiwi cueneyapëtaenatsi bajarapamonae saya jemaliwaisi petsipaebaponaejawa, pacuenia bajayata tocopiapatatsibeje Janes, Jambres-pijinëmibeje.
Pablo pemuxujiobiliwaisi Timoteojawabelia Dioso peliwaisi yabara
10 Timoteo, xamë baja cajena yapëtaneme tatsipaebiliwaisi jiwibitsaëtoxanetojawabelia, xaniawaetsia taponaponaecuene Dioso pitabarata, caejamatabëcuene taxainaejawa Dioso tatonacuenebaponaponaenexa, xaniawaetsia ta-itaxutuajamatejemajawa-ata Dioso daxitacuene yabara. Yapëtanemenua itsamonae pacuenia taneliwaisicaranabiabijawata, tajamatabëcuenesaëjawa Dioso peliwaisi tatsipaebaponaenexa itsamonaejawabelia copatsinejewanë. Yapëtanemenua pacuenia itsamonae-ata asiwanë. Pacuenia-ata casaënë tsaponaponae jiwi liwaisi tatsipaebaponaejawa neto-ayapëbeje-ata.
11 Yapëtanemenua pacuenia itsamonae nebejiobia-exanapona, pacuenia-ata nacueratsiaponaponajë Jesucristo peliwaisi tatsipaebixae. Bajarapacuenia neto-exana Antioquía tomarata, Iconia tomarata, Listra tomarata-ata. Itsiata baitsi jane, Dioso necapanepa daxita bajarapacuenewecua.
12 Xaniajai cajena pacuenia catsipaebijitsiatsi: «Daxita pamonae jamatabëjinawanapa Dioso pejitsipaecuenia, bajarapamonae mapanacuapijiwije bejiobia-exanaponaenatsi, caejamatabëcuene pexainaexae Cristo Jesús-jawabelia», cajaitsi.
13 Itsiata baitsi jane, pibisiajamatabëcuenewi, pamonae dowathi pejamatabëcueneta jiwi yamaxë-itojorobapona, orijibia bitso pewajënaeyabelia Dioso peliwaisi wecua-itothianaponaena. Nexata, yamaxë-itojorobaponaena jiwi penajumetsënëtsiliwaisita. Pijacuata pijinia nayamaxë-itojorobiana bajarapaliwaisita.
14 ¡Timoteo, itsiata baitsi jane, xamë juya casaëmëre tsaponaponae nejumexaniataeliwaisi! Xamë baja cajena yapëtaneme pexaniajailiwaisicuene, tsipaji jamatabëcueneyapëtaneme pamonae cacujaruba bajarapaliwaisi.
15 Tsiquirinëyomëjawaweliacujinae baja cajena, yapëtaneme Dioso pejumeliwaisi. Bajarapaliwaisi cayapëtaeya-exana pecacapanepaejawanexa Diosojawabelia, nesiwanajamatabëcuenecopatsijawata Cristo Jesús-jawabelia.
16 Dioso pejumeliwaisibaxutota daxita paliwaisianë yaquinaruba, Dioso baja cajena pejumeliwaisi, tsipaji Espíritu Santo peyapëtaeya-exanaecueniatsi Dioso pijajiwi yaquina. Bajaraxuata, daxita bajarapaliwaisianë xanepana pecujarubinexa, jiwi peyapëtaenexa xua pexaniajailiwaisi. Xanepananua pecuene-itawetsinexa, pecuenexanetsinexanua jiwi apopexanepanaecuene itsa exana. Xanepananua pecuenecujarubinexa jiwi pejinawanapaenexa Dioso pejitsipaecuenia.
17 Nexata, Jesús-jawabelia pesiwanajamatabëcuenecopabiwi, bajarapaliwaisita xaniawaetsia jamatabëcuenenaweretaponaena Dioso pijacuenejawalia, pesiwanacuenecujarubicuenia xaniawaetsia pexanawanapaenexa daxita xua pexaniacuene.