4
Dioso peliwaisi bajarapacuenia wajanacato-exanaexae, Dioso, wajatuxanenë Jesucristobeje pitabarata, jamatabëcuenerewiaya ca-itorobatsi netsipaebabiabinexa bajarapaliwaisi jiwijawabelia. Yapëtanetsi baja Jesucristo pepatsijawanexatsica mapanacuayabetsicaje peyanacua-ewetsinexa. Bajarapamatacabita, naneconitsia-exanaena daxita pibisiacuene pexanaewi, pamonae piasaëtsawanapaewi, petëpaewi-ata.
2 ¡Bajaraxuata, caematacabi canacujitsia jiwi tsipaebare Dioso peliwaisi! ¡Ajamatabëcuenesaëya tsipaebaponare, paepatota jiwi jitsipa, paepatota-ata apojitsipae pecanamuxuna-ewetsijawa! Orijibia, Dioso peliwaisi necujarubijawata, caejamatabëcuene xainaeya-exanaename pecanamuxuna-ewetsiwi, cuenejëpaeya pejinawanapaenexa. Cuene-itawerenua pibisiacuene pexanaeyaniwa. ¡Bajayajebi-ata pexaniajailiwaisita muxujiobare siwajamatabëcuenecanaxanetsinejewamë, jamatabëcuenecueranaenejewamë-ata!
3 ¡Bajarapacuenia tsipaebaponare, tsipaji raja copiapatsiana jiwi apopejitsipaematacabianë penamuxuna-ewetsijawa pexaniajailiwaisi! Biji rajane, pijacuata natojaitsiana ayaibitsaëto pecujarubiwinexatsi petsimuxuxanepanaeliwaisianëtsi, Dioso pejumeliwaisiwecua. Nexata, muxunanacaetuatsiana pejitsipaeya-exanaejumenëtsi pejumetaenexa.
4 Nexata, amuxujitsibi tsane pexaniajailiwaisi pejumetaeyaniwa, juya pejumexaniataenexa saya ënatsiquejemaliwaisixi, pijasalinaiwimi peliwaisianëmi.
5 ¡Itsiata baitsi jane, xamë bajarapamonaewecua saicaya nayajiwitaeya ponaponare daxitacuenejawalia! ¡Nexata, cato-ayapëbeje-ata, itsamonae cabejiobia-exanae-ata, casaëmëre tsaponaponae newajënaeyabelia, jiwi netsipaebijawa pexanialiwaisi, pecapanepaeliwaisinexatsi Diosojawabelia! Daxita pacuenia Dioso catocopata nexanaenexa, weretsianame xaniawaetsia nenacuenebijawa.
6 Xanë baja caematacabibeje netosajina tanebeyaxuabinexa, Jesús peliwaisi tapaebaponaexae. Bajarapacuenia tanebeyaxuabijawata, betanarajutsijawaa tsane ofrendacuenia Diosojawabelia.
7 Tanebeyaxuabijawa yabara aponasiwajamatabëcuenebëjanë, tsipaji xaniawaetsia Dioso tonacuenebaponaponajë ta-asaëtsaponaponae-epato. Itsamonae netsimaxëpatabiabi-ata, tanecuenecaranatsinexa Jesús peliwaisi tatsipaebaponaeyaniwa, itsiata casaënë tsaponaponae bajarapaliwaisi tatsipaebaponaejawa. Yapijiwi-ajumesaënënua tsabiabi. Pacuenia pecujinaejinaenë petocaëjëtsitaxunaeta patajopa, bajarapacuenia pijinia, xanë-ata Dioso tanetocaëjëtsijawa ta-exanaejawanexa, weretajë baja. Apocopatsinë cajena ta-itaxutuajamatejematsaponaponaejawa Diosojawabelia.
8 Bajarapacuenia ta-exanaponaponaexae, netosajina saya wajatuxanenë Jesús xua netoxaniawaeta tanerajutsijawanexa tajamatamocuenia tatonacuenebijamatabëcuene. BajaraPonë, xaniawaetsia jiwi pijaliwaisi pecanaëjëtsinëxae, nerajutsiana pacoronajawa toxaniawaeta xaniawaetsia pejinawanapaewi, pamatacabi pijajiwi liwaisi canaëjëtsiana.b Bajarapacoronajawa ëxanë aponerajutsi tsane. Rajutsiananua daxita pamonae ajamatabëcuenesaëya wajënae-ewetawanapa pepatsijawanexatsica wajatuxanenë Jesucristo.
Pablo xuanë tocopiapataponatsi yapëtaeya-exana Timoteojawabelia
9 ¡Jaire itsiata bepijiayocuenia tanetaeyojopaenexamërena!
10 Demas, tayajawanacuenebinëmi, nexuabatabijirawa, bitso pejitsipaexae mapanacuapijicueneje, Dioso pejumeliwaisiwecua. Pona baja nexata Tesalónica tomarabelia. Tayajawanacuenebinë, Crescente, itorobajë Galacia nacuayabelia. Tito pijinia itorobajë Dalmacia nacuayabelia.
11 Caenë, Lucas, nacopata xanëjawata. Pacujinae renamë, yajawanajetarucaename Marcos, tsipaji xanënexa netoxanepana, taneyawenonaejawa Dioso tatonacuenebijawa.
12 Tíquico baja itorobajë Éfeso tomarabelia.
13 Itsa renamë tsane xanëjawaberena, Troas tomarata tajacamisajumawelia tanaxatatsijawa netopitaponaeremena. Carpo raja pijabota puenetarutajë. Tajalibrobaxutonë, itsabaxutoxinua, netopitaponaeremena. Bitso rajane, namatawenonajë tajacuyalatobaxutoxi.
14 Alejandro, cobrenanita daxitacuene pexanaenë, bitso baja cajena apotajitsipaecuene neto-exana. Itsiata baitsi jane, Dioso neyamatamotsiana tanebejiobia-exanaematamo.
15 ¡Nayajiwitaema bajaraponë, tsipaji raja bitso ajamatabëcuenesaë patanecuenecaranatsijawa patatsipaebaponaeliwaisi!
16 Pamatacabi nayajiwicuaicuaijanë majotaje, Roma tomarata, jueznë pitabarata, itsajiwi-ata aponeyawenonaeyacuaicuaijai. Daxita Jesús pijajiwi nexuabanuta. Itsiata, bajarapamonae towajëtajë Diosojawabelia, penaneconitsia-exanaeyaniwatsi tanexuabanutsijamatabëcuene.
17 Bajarapacuenia nexuabanutsi-ata, wajatuxanenë Jesucristo neyawenona. Nerajuta pesaë, xaniawaetsia tatsipaebinexa Jesús peliwaisi pamonae taneliwaisicanaëjëbiwi, apojudíowi, pejumetaenexa bajarapaliwaisi. Tanexuabanutsijawata picani netsi-ayai tanebeyaxuabinexa. Wajatuxanenë tanecapanepaejawa bajarapapiayaicuenewecua, natotaniji newëthë tanexaejawaminexawecua betanecapanepaejawa.
18 Wajatuxanenë cajena nejamatabëcueneyawenonaponaena tajamatabëcuenematatoxenetsinexa pibisiacuene ta-exanaeyaniwa, bitso pibisiacuenia tanebejiobia-exanaejawata. Orijibia, yapëtaniji tanecaponaejawanexa athëbëabetsia, bajaraPonë pewetsinacuayabetsia. Bajarapacuenia pijajiwi pewetsixae, pexaniacuenia wënëxaniatsianatsi Dioso ayaijamatabëcuene pexainaejawa daxitamatacabijawabelianexa.
Pablo penapëjiobiliwaisi
19 Nebajacobianabeje Prisca, pamona, Aquilabeje. Nebajacobiana Onesíforo pijamonae-ata.
20 Erasto nacopatajopa Corinto tomaratalia. Trófimo pijinia puenetajë Mileto tomaratalia, tsipaji awitane.
21 Najaire bepijiayo itsiata, nerenanexa emarapae pecopiajopaewajënaeya. Cajamatabënajinalia Eubulo, Pudente, Lino, Claudia-ata, daxita itsamonae Jesús pijajiwi yajawa.
22 Catojitsipatsi wajatuxanenë Jesucristo pecayajawaponaponaejawa, pecajamatabëcueneyawenonaenexa. Pacatojitsipatsinua daxita bajarajota pecayajawajinawanapaewi Dioso asiwaya papecayawenonaenexa papeca-itaxutotsoniataejamatabëcuene.