Tito
Mapabaxutoje Apóstolnë Pablo toyaquina Titojawabelia
Pablo pebajacobiliwaisi Titojawabelia
1
Xanë Pablonë, Dioso pijajiwitonënë. Jesucristo-ata pija-apóstol-nënë. Xanë baja cajena Jesucristo nitoroba tacujarubinexa Dioso pitapetsiwi,a pamonae baja siwanajamatabëcuenecopaba Jesucristojawabelia, pewajënaeyabelia pitaxutuajamatejematsaponaenexa Dioso. Cujarubaponajënua xaniawaetsia pejinawanapaenexa Dioso pitabarata, taneyapëtaeya-exanaecuenia pexaniajailiwaisi, Dioso peliwaisi.
2 Bajarapamonae-ata tatsipaebiliwaisi pejumexaniataexae, natoyapëtaena pepacuene pexainaejawanexa matacabi apopewerewerecaejawa, tsipaji Dioso apopenajumetsënëtsinë xua yabara najumecapanepaeya jumaitsi nacua pexanaewajënaeya perajutsiapaebijawanexa.
3 Nexata, aeconoxaeta baja, Dioso pecaëjëtsimatacabita, copiapata jane baja jiwi pepaebanajetarubenaenexa bajarapaliwaisi. Nexata, Dioso, wajanacacapanepaenënexa, xanë nitoroba jiwijawabelia tatsipaebinexa bajarapaliwaisi.
4 Tito, betaxënatomë tacataenë, tacatsipaebixae Jesucristo peliwaisi nejumexaniataenexa, caenëjawabelia wajanajua siwanajamatabëcuene copatsinexabeje. Catoyaquinatsi mapabaxutoje, tsipaji catojitsipatsi pexaniacuenia waxa Dioso, Jesucristo-ata, wajanacacapanepaenënexa, pecajamatabëcuenewënëtsinexa peca-asiwajamatabëcuenebeje, pecabarajamatabëxanepanaejamatabëcuene-ata jamatabëcuenexanepanaeya neponaponaenexa.
Pablo puenetanuta Tito Cretatunaeto nacuata, Dioso pijacuene petonacuenebinexa
5 Capuenetanutatsi baja cajena Cretatunaeto nacuajawata, necuenexanebaponaenexa pamonae abaxë tosajinatsi xaniawaetsia peyapëtaejawa Dioso pijacuene petonacuenebijawa. Capuenetanutatsinua neweretsinexa xua taponaewajënaeya ta-exanaejawaminexa. Ca-itorobatsinua baja cajena caetomarapijiwi canacujitsia nitapetsinexa ancianowinexa, Jesús pijajiwi pewetsiwinexa, pacuenia cayajawa najumepuenetatsi ne-exanaenexa.
6 Nitapetsijawata ancianonënexa, xanepana ponë apoxainae jiwi peyabaraneconitsijawanexatsi. Caewa pepitsinë. Pexi Jesús peliwaisi petojumexaniataenëtsi. Pexi apopeto-acujirubejenëtsi. Pitorobicuenia pexi pejumecowënëtsinëtsi.
7 Bajarapitsinë baja tsipaji tsicarucatsi Dioso pijacuene petonacuenebijawa. Bajaraxuata, itapetsianame xaniawaetsia peponaponaenë. Pianeconijibinë-ata. Be-ayaijamatabëcuenenë apopenataenë. Bepijia apopianaepanaenë. Apopejitsipaenë piapaejawa piataneranë pia-itajibinexa. Apopejitsipaenë pebejawa pewënajiwi. Apopejitsipaenë itsajiwi-ata yamaxë-itojorobiaya pewecuanacobetoxotsinexa palata.
8 Biji rajane, xanepana ponë jiwi xaniawaetsia pecopiapitabiabinë pijabota pepatsiwi. Piasiwanë daxita xua Dioso tsitapexaniacuenetsi. Xaniawaetsia copiaya pesiwacanaëjëtsinë pexanaewajënaeya. Pejamatabëcuenexanepanaenë jiwi pitabarata, Dioso pitabarata-ata. Penacuene-ewetsinë xaniawaetsia Dioso pejumeliwaisita pibisiacuene pexanaeyaniwa. Pewajënaeya pesiwanacueneweretsinëb xua tsicarucatsi pexanaejawanexa.
9 Xanepana ponë casaë tsaponaponae pejumexaniataejawa papexanialiwaisi cujarubatsi, Dioso peliwaisi, pewecuaponaeyaniwa bajarapapexaniajailiwaisi. Bajaraponë juya nexata pecuenecaëjëpaenexatsi bajarapaliwaisita bijiaya pejinawanapaewi Dioso pitabarata xaniawaetsia pemuxujiobinexa, pamonae-ata Dioso pejumeliwaisi aitothiacuenia paeba. Nexata, pexaniajailiwaisita pemuxujiobijawata, caejamatabëcuene pexainaeya-exanaenexa, juya pejumexaniataenexa Dioso.
10 Jesús pijajiwi tuatuajëta, ayaibitsaëto jinawanapa pamonae Dioso pejumeliwaisi aitothiacuenia pepaebiwi. Apopejitsipaewi pejumecowënëtsijawa pacuenia itorobatsi pewetsiwitsi. Itsamonae saya natsiquejemaliwaisi cuaicuaijai tsabiabi. Itsamonae-ata peyamaxë-itojorobiwi Jesús peliwaisi pejumexaniataejawawecua. Bajarapitsiliwaisi pexainaewi ayaibitsaëto judíowiyajuwënëwi.
11 Bajarapaliwaisi pexainaewi bejume-itawetame, tsipaji saya yamaxë-itojorobabiaya cujarubapona Dioso peliwaisiwecua. Bajarapamonae saya jiwi tsipaebapona palata pematamotsinexatsi. Nexata, peliwaisita caebopijiwi canacujitsia najamatabëcuene-epatajërërëcaeya-exanapona Dioso pitaxutuajamatejemajawawecua.
12 Cretatunaeto nacuata pejinawanapaewi yabara, itsanë, petaenëmitsi beprofetanëcuenia jumaitsi mapacueniaje: «Cretatunaeto nacuapijiwi cajena bitso penajumetsënëtsiwi. Bitso piacujirubejewi. Ayaijawa pexaeyabiabiwi. Bitso piafaetabiwinua», jai cajena bajayata bajaraponëmi.
13 Xaniajai baja cajena bajarapaliwaisi pacuenia jumaitsi bajaraponëmi. ¡Bajaraxuata, xamë, Tito, asaëyata cuene-itawere penajumetsënëtsiliwaisi pepaebiwi pecopabinexa, juya xaniawaetsia pesiwanajamatabëcuenecopabinexa Diosojawabelia!
14 ¡Cuene-itawere Jesús pijajiwi penamuxuna-ewetsiyaniwa judíowi pijasalinaiwimi pijaliwaisixi! Itawerenua pejumecowënëtsiyaniwa pacuenia itorobaponatsi pamonae nawecuacopaba pexaniajailiwaisi, Dioso peliwaisi pejumexaniataejawami.
15 Pamonae Dioso baja aneconijibia tane, Jesús peliwaisi pejumexaniataexae, ajibi itsacuenejawa xua yabara nataejitsia bepenaxuirabiwicuenia Dioso pitabarata. Itsiata, pamonae jume-aeba Jesús peliwaisi, bajarapamonaenexa daxita pexanaecuene Dioso totanetsi bepenaxuirabia-exanaejawatsi. Orijibia, pecanaëjëtsijamatabëcuene xaina ëpiabejecuene. Caeto-ata aponajamatabëxainae pexaniacuenejawa.
16 Pejumeta jumaitsi-ata: «Xanë rabaja bitso Dioso yapëtaniji», jai tsabiabi-ata, itsiata baitsi jane, pibisiacuene pexanawanapaejawata nacuene-itajëta Dioso apopeyapëtaejawa. Itoyanua Dioso. Nexata, apojumecowënëtsi pacuenia itorobatsi. Apocaëjëpaetsinua itsacuenejawayo-ata pexaniacuene pexanaenexa.