Filemón
Mapabaxutoje Apóstolnë Pablo toyaquina Filemón-jawabelia
Pablo pebajacobiliwaisi
1
Xanë Pablonë, Jesucristo pijajiwitonëxaenë, naneconitsiaponaponajë penaneconitsiwi pejebabiabibota, tapaebanajetarucaexae pexanialiwaisi Jesucristo peliwaisi. Paxanëbeje, wajabananë Timoteobeje, pacatoyaquinatsibeje mapabaxutoje. Filemón, bitso paca-asiwatsibeje patacayajawanacuenebabiabixaebeje.
2 Bajarapacuenia pabajacobajëbeje pamonae Jesús pejumexaniataewi, nijabota penacaetuatabiabiwi. Pabajacobajëbejenua wajabanawa Apia, Arquipo-ata, pajiwibeje paneyawenonabiababeje Dioso pijacuene patatonacuenebabiabijawatabeje.
3 Pexaniacuenia pacatojitsipatsi waxa Dioso, Wajatuxanenë Jesucristobeje, papecajamatabëwënëtsinexa papeca-asiwajamatabëcuene, papecabarajamatabëxanepanaejamatabëcuene-ata, jamatabëcuenexanepanaeya panenajuajinawanapaenexa.
Pablo towajëta Diosojawabelia Filemón yabara
4 Filemón, tawajëtsijawata Diosojawabelia pexaniajamatabëcuene rajutabiabajë xamë yabara, tacanajamatabënapitabiabijawata.
5 Pexaniajamatabëcuene rajutabiabajë Diosojawabelia, tacawënëliwaisitaejawata nitaxutuajamatejematsaponaponaejawa, niasiwajawanua Wajatuxanenë Jesucristo, daxita pamonae-ata bajaraPonëjawabelia pesiwanajamatabëcuenecopabiwi.
6 Towajëtabiabajënua Diosojawabelia pamonae-ata siwanajamatabëcuenecopaba Jesucristojawabelia, xamë netsipaebixae pexanialiwaisi, Cristo peliwaisi. Towajëtabiabajë bajarapamonae xaniawaetsia pewajënaeyabelia pitaxutuajamatejematsawanapaenexa Dioso, pijajiwixae peyapëtaeponaenexanua papexaniacuenejawanë exanaponaejitsia Jesucristo wajanacayawenonaejawanë.
7 Casiwajamatabëcuenebarëyatsi bitso, tsipaji cawënëliwaisitanetsi, niasiwajawa itsamonae Dioso pitapetsiwitsi, Jesús pijajiwinexa. Cawënëmuxuna najamatabëcuenesaëtatsi, tsipaji daxita Jesús pijajiwi jamatabëcuenebabataponaponame.
Pablo itoroba, Filemón xaniawaetsia pecopiapitsinexa Onésimo, itsapatajopalia
8 Bajarapacuenia Jesús pijajiwi niasiwaxae, pexaniacuene cawajëtatsi taneto-exanaenexamë. Xanë, Cristo tane-itorobinëxae, nejamatabëcuenecaëjëpa picani taca-itorobinexa xua bexaname, Dioso pecasiwabarëyanexa.
9 Itsiata, taca-asiwaxae, saya pexaniacuenia cawajëtatsi. Xanë, Pablonë, perujunënë baja. Maparucaeje naneconitsiaponaponajë penaneconitsiwi pejebabiabibota, Jesucristo pijajiwitonëxaenë.
10 Nexata, cawajëtatsi pexaniacuene taneto-exanaenexamë Onésimojawabelia. Bajaraponë, majotaje patajopa, nijajiwitonë, pecawecuanajetabijirawinë. Nexata, bajaraponë naneconitsiaponapona itsa xanë-ata naneconitsia ponaponajë penaneconitsiwi pejebabiabibota. Bajarajota, pataponaponaejawatabeje, tsipaebajë Jesucristo peliwaisi. Nexata baja, siwanajamatabëcuenecopata Jesucristojawabelia. Bajaraxuata, Onésimoa taniji taxënatocuenia
11 Bajaraponë picani copiaya xamënexa apocacueneyawenonae. Itsiata, aeconoxae waxaitsibejenexa nacacueneyawenonabeje, pesiwanajamatabëcuenecopatsixae Jesucristojawabelia.
12 Nexata, icatsia Onésimo caewëa cato-itorobaliatsi, bitso ta-asiwanë. Bajaraponë xaniawaetsia copiapitsianame, pacuenia xanë necopiapitsipame.
13 Bitso picani Onésimo asiwanë xanëjawata peponaponaejawa, taneyawenonaenexa naneconitsia taponaponaexae penaneconitsiwi pejebabiabibota, pexanialiwaisi, Jesucristo peliwaisi, jiwi tatsipaebabiabixae.
14 Itsiata baitsi jane, apojitsipaenë, copiaya xamëjawabelia cawajëtsinejewatsi, Onésimo taneyawenonaponaponaenexa. Xanë baitsi, apojitsipaenë taliwaisita taca-urabicuenia tanetsicopatsinexamë. Biji rajane, picani jitsipajë, cawajëtsinejewatsi, nijacuata tanetocopatsinexamë.
15 Belia meta, Onésimo cawecuanajetabijirawa, caematacabibeje saicaya pecawecuaponaponaenexa. Itsiata, aeconoxae penawiatsicujinae xamëjawabelia, panajuaponaponaenamebeje daxitamatacabijawabelia.
16 Itsiata, aponawiatsialia tsane nijajiwitonëcuenia. Biji rajane, patajopalia niasiwanëcuenia, nijamonaenë Cristo pejamatabëcueneta. Xanë picani bitso asiwanë Onésimo. Itsiata, xanë tasiwajawa matatoxenetsia, xamë bitso asiwamë tsane, nijajiwitonëxae, nejuyapijinëxae-ata Cristo pejamatabëcueneta.
17 Nexata, itsa netaneme wajanajuanacuenebaponaponaenëbejecuenia, bajaraponë copiapitsianame, pacuenia xanë necopiapitsipame.
18 Bajaraponë itsa catonaneconita, itsa ca-amoneyabanua, nexata xanë bajarapamatamo neyanijobianame tacamatamotsinexa.
19 Peneta raja pa-itanebërëtoyo jumaitsi: «Xanë Pablonë, camatamotsianatsi cajena», jai, xanë tajacuata tacobeta yaquinajë. Itsiata pijinia pacuenia niamoneyabame, apocato-itajëtsitsi. Xamë picani matatoxenetsia niamoneyabame Onésimo peca-amoneyabijawawecua, tacatsipaebijamatabëcuene Jesús Peliwaisi, tsipaji xanë tajamatabëcueneta siwanajamatabëcuenecopatame bajaraPonëjawabelia.
20 Xaniajainë cajena. Tajabananë, pacuenia cawajëtatsi, xaniawaetsia copiapitsianame Onésimo, Jesucristo pijajiwitonëxaemë. Bajarapacuenia itsa exanaename, bitso nejamatabëcuenebarëyaya-exanaename.
21 Catoyaquinatsi mapabaxutoje, taca-itaxutuajamatejemaxae, matatoxenetsia ne-exanaejawanexa tacawajëtsicuenia.
22 Caecuenia tawajënaeyabelia cawajëtatsi nijabota tanetoxaniawaetsinexamë, itsajota patsijitsianë itsa ponajë paxamëjawabelia. Bajayajebi patanetowajëcabiabixaemë Diosojawabelia tapatsinexa paxamëjawabelia, canaëjëtajë Dioso belia papecajumecanawiatsijawa panewajëcaecuenia.
Pablo penapëjiobiliwaisi
23 Pacabajacobalia Epafras, ponëbeje panajuaponaponajëbeje penaneconitsiwi pejebabiabibota, Jesucristo pijinia pijajiwitonëxae.
24 Pacabajacobalianua Marcos, Aristarco, Demas, Lucas-ata. Daxita bajarapamonae patanajuanacuenebiwi Dioso pijacuene.
25 Pexaniacuenia pacatojitsipatsi papecajamatabëcuenewënëtsijawa papeca-asiwajamatabëcuene Wajatuxanenë Jesucristo papecajamatabëcueneyawenonabiabinexa. Bajara-itsi tsane.