Hebreos
Mapabaxutoje Dioso pijajiwitonë toyaquina Jesús peliwaisi pejumexaniataewi, judíowijawabelia
Dioso yapëtaeya-exana pejumeliwaisi jiwijawabelia pexënato pejamatabëcueneta
1
Bajayatami, Dioso, apocaecuenejawayocuenia, napënayapëtaeya-exanabiabaa peliwaisi profetawijawabelia. Nexata juya, profetawimi, pacuenia Dioso itorobatsi, tsipaebabiaba wajasalinaiwimi, judíowijawabelia.
2 Nexata jane baja, aeconoxae, mapamatacabitaje, Dioso nacayapëtaeya-exana paliwaisi nacatoxaina wajanacayapëtaeya-exanaenexa, pexënato pejamatabëcueneta. Bajayatami, bajaraPonë exana mapanacuaje, daxitacuene yajawa. Dioso tocopatatsinua pewetsinënexa daxitacuene.
3 Nexata, pexënato nacatsitajëta paxa Dioso, papinijijamatabëcuenesaënë xaina, papexaniajamatabëcuene-ata. BajaraPonë paxa Dioso pejamatabëcuenejëpaenë. Nexata, Dioso pexënato pejumesaëta daxitanacua abaxë tsiteca xaina mapamatacabijawaberena- ataje. Wajanacasiwatëpaejawata cruzata, wajanacawecua-ajibia-exanaecujinae pibisiacuene waja-exanaeneconimi. BajaraPonë pona jane baja athëbëabetsia, pe-ecaenexa paxa Dioso pemuxuneneta, pecujuanenia, penajua-ewetsinexabeje daxitacuene.
Pacuenia Dioso pexënato bitso ayaijamatabëcuenenë ángelewi matatoxenetsia, yabara peliwaisi
4 Bajarapitsicuene pexainaexae, Dioso pexënato bitso ayaijamatabëcuenenë ángelewi matatoxenetsia. Nexata, Dioso tocopata pinijitaxunae, daxitacuene pewetsinënexa.
5 Dioso baja cajena apojumaitsi cae-ángel-nëjawabelia-ata, pacuenia jumaitsi pexënatojawabelia:
«Xamë raja taxënatomë. Xanë raja axanë»,b apojai Dioso ángel-nëjawabelia.
Dioso icatsia apojumaitsi cae-ángelnë yabara, pacuenia jumaitsi pexënato yabara:
«Xanë raja bajaraponë paxanë. Bajaraponë-ata taxënato»,c apojai Dioso ángelnë yabara.
Bajaraxuata, yapëtanetsi Dioso pexënato bitso ayaijamatabëcuenenëcuene ángelewi matatoxenetsia.
6 Bajaraxuata, pacujinae Dioso itorobijitsiatsica pepocaenë pexënato mapanacuaje penaexanaenexa, bajaraPonë jumaitsi ángelewijawabelia:
«Daxita pataja-ángelewimë, yaiyataeya panematabacabëta patonubenaename taxënato pitabarata, panewënëxaniatsinexa ayaijamatabëcuene yabara»,d jai Dioso pija-ángelewijawabelia.
7 Dioso jumaitsi ángelewi yabara mapacueniaje:
«Pacuenia jowibo bitsojina, bajarapacuenia pijinia tajajiwi, ángelewi, cuene-itsi bepijia taneliwaisicaponaenexa. Be-isotocotiata werebiabiananua daxita pamonae naneconita xanëjawaberena»,e jai Dioso ángelewi yabara.
8 Itsiata baitsi jane, Dioso pexënato yabara jumaitsi mapacueniaje:
«Diosoxaemë, neyanacua-ewetsicuene apocatocopiarucae tsane daxitamatacabijawabelianexa. Neyanacua-ewetsijawata, xaniawaetsia ewetabiabianame.
9 Bajarapacuenia exanaename, tsipaji asiwaya taename jiwi, pexaniacuene pexanawanapaewi. Cuene-itoyamënua tsane jiwi pibisiacuene pexanaejawa. Bajaraxuata, xanë, nijaDiosonë, bitso cajamatabëcuenebarëyaya-exanatsi, daxita itsamonae matatoxenetsia»,f jai Dioso pexënato yabara pejumeliwaisibaxutota.
10 Icatsia, Dioso pexënato yabara jumaitsi mapacueniaje:
«Xamë, petuxanenëmë, exaname mapanacuaje, itsa abaxë ajibi daxitacuene. Nesaëtanua exaname daxita itaboxopijicuene yajawa.
11 Daxita bajaraxua, nexanaejawa, werewerecaena. Itsiata baitsi jane, xamë apowerewerecaemë tsane daxitamatacabijawabelianexa. Daxita xamë nexanaejawa, perujujawa tsane. Pacuenia jiwi penaxatatsijawa, perujujawa banaexana, bajarapijinia itsi tsane nexanaejawa.
12 Pacuenia jiwi baquiona penaxatatsijawa, bajarapacuenia itsamatacabi xamë quionaename itaboxo, ira yajawa, pejananacua icatsia nexanaenexa. Itsiata baitsi jane, xamë tsitecaename. Apowerewerecaemë tsane»,g jai Dioso pexënato yabara pejumeliwaisibaxutota.
13 Dioso baja cajena caeto-ata ángelewiyajuwënënëjawabelia apojumaitsi mapacueniaje:
«¡Ecare abaxë tacujuanenia, daxitacuene wajanajua-ewetsinexabeje! Nijawajabitsaë abaxë copiaya wecatsiwajënaejumecowënëtsia-exanaenatsi nitorobicuenianexa»,h apojai Dioso. Biji rajane, pexënatojawabelia bajarapacuenia jumaitsi.
14 Daxita ángelewi apotaetsi waja-itaxutota. Bajarapamonae saya Dioso tonacuenebabiaba,i pacuenia itorobatsi. Nexata, itorobiana bajarapamonae peyawenonaenexa pamonae jumexaniataejitsia Cristoj peliwaisi, pecapanepaeliwaisinexatsi.