Santiago
Anciano Santiago petoyaquinaebaxuto Jesús pijajiwi, pewënajudíowijawabelia
Pebajacobiliwaisi
1
Xanë Santiagonë,a Dioso, Wajatuxanenë Jesucristobeje, pijajiwitonënë. Pacatoyaquinatsi patacabajacobinexa pajudíowimë, Israel-pijinëmi pexi doce ponëmibeje papemomoxiyajuwënëwimë, nacayajatsia panejinawanapaewi daxita nacuanëjawa, pepopanijanacuawecua.
Jesús peliwaisi pejumexaniataewi xua be-exana, itsa jamatabëyapëtane pacuene xanepana pexanaenexa
2 ¡Tajamonae, pasiwajamatabëcuenebarëyamëre, itsa pacatocopiapatapona daxitacuenewiriajawanë apopanejitsipaecuene, papecajamatabëcuene-ëjëbinexa!
3 Payapëtaneme rabaja bajaraxuanë papecatocopiapataponaejawata, panenajamatabëcuene-itajëtsinexa pane-ajamatabëcuenesaëjawa, panewajënaeyabelia Dioso pane-itaxutuajamatejematsaponaejawa. Bajarapajamatabëcuene pacajamatabëcueneyawenonaena, panenajamatabëcuenesaëtsinexa bepejiobicuenia pajinawanapae-atamë.
4 ¡Bajaraxuata, pajamatabëcuenesaëmëre tsawanapae bajayajebi, panejamatabëcuenewitsabaponaenexa Diosojawabelia! Bajarapacuenia itsa pajamatabëcueneliwaisinaweretaponaename Dioso pijacuene, nexata itsacuenejawa-ata apopacatsisajinae tsane, Dioso pejitsipaecuenia panejinawanapaenexa.
5 Paxamëyajuwënëjiwi itsa tsisajinatsi xaniawaetsia pecanaëjëtsijamatabëcuene pacuenia exanaejitsia, bewajëca Diosojawabelia, peyapëtaeya-exanaenexatsi. Nexata, Dioso rajutsianatsi pecunuajawa, wecua-asiwanejewatsi pewajëtsijawa.
6 ¡Itsiata baitsi jane, bajarapajiwi pëtsa aeba, pewajëtsijawa Diosojawabelia! Biji rajane, be-itaxutuajamatejema, peto-exanaenexatsi pewajëtsicuenia. Pajiwi, pe-aebijamatabëcuene pexainaejawata, wajëta Diosojawabelia, bajarapajiwi apocaxitajarabi tsane xua yabara wajëca. Bajarapitsijamatabëcuene pexainaejiwi jamatabëcuenejëpa manuamenepijimalataca. Pacuenia jowibo pesaëta caponabiaba malataca itsabelia bubujai, bajarapijinia jamatabëcuene-itsi pajiwi, jamatabëcuenematacaponatsi pejitsipaecuenejawabelia.
7-8 Bajarapitsijamatabëcuene pexainaejiwi, apobe-ewetsi perajutsinexatsi xua wajëca Diosojawabelia, tsipaji apoxainae caeliwaisi, xuajawabelia itaxutuajamatejemajitsia. Itsajawata, siwanajamatabëcuenecopata Diosojawabelia, itsajawata pijinia itsacuenejawabelia. Bajaraxuata, caejamatabëcuene apoxainae daxita pexanaecuenejawalia.
9 Jesús peliwaisi pejumexaniataewiyajuwënënë, apoxainae-ata pecobecowëjawayo, jiwi apoyaiyatae-atatsinua, bejamatabëcuenebarëya, Dioso petsitanajamatabëcuene-itajëtsixaetsi piasiwajawa, ayaimatamotanua pecomuatsixaetsi.
10 Pajiwi pijinia, bitso pexainaejiwi pecobecowëjawanë, bejamatabëcuenebarëya, Dioso beweliajamatabëcuenejiwi pexanaexaetsi, najëpaeya petaenexatsi itsamonae Jesús pijajiwi yajawa, tsipaji pexainaecuenemi bepijia towerewerecaenatsi. Pacuenia po̱natoxi bepijia matonowerewereca, bajarapijinia itsi tsane bitso pexainaecuene-ata.
11 Paepatota juameto tajë rucaina, icotia bitso ataju, nexata po̱natoxi tsaquena. Pematono-ata othopa. Yajawawerewerecanua bepijia pexania-itabëcuenemi. Bajarapijinia itsi tsane bitso pexainaewi. Yajawawerewerecaena pecobecowë, pecanajetsicuene-ata.
Dioso apojamatabëcuene-ëjëtsi jiwi pibisiacuene pexanaeya-exanaenexa
12 Jamatabëcuenebarëya tsane, pajiwi, najamatabëcuenesaëta, pejamatabëcuene-ëjëtsijawatatsi piayapëbejecuenejawata. Bajarapajiwi pejamatabëcuenematatoxenetsixae tsane, Dioso pitaxutuajamatejemajawata, rajutsianatsi bitso pebarëyajamatabëcuene,b pewajënaeyabelia pexainaenexa, pacuenia najumecapanepaeya rajutsiapaeba pamonae asiwatsi.
13 ¡Itsiata baitsi jane, itsa pacajamatabëcuene-ëjëta pibisiacuene pane-exanaenexa, pëtsa patsijumaxuabame Dioso, papecajamatabëcuene-ëjëtsijawa yabara, tsipaji cajena, caeto-ata Dioso apojamatabëcuene-ëjëtsi itsajiwi-ata pibisiacuene pexanaeya-exanaenexa! Itsajiwi-ata pijinia, apocuenecaëjëpaetsi pejamatabëcuene-ëjëtsinexa Dioso, pibisiacuene pexanaeya-exanaenexa.
14 Jiwi saya jamatabëcuene-ëjëtatsi, penajamatabëxainabiabicuenia pibisiacuene pexanaeya-exanaenexa. Nexata, bajarapapibisiajamatabëcuene jitsipaeya-exanaponatsi, pibisiacuene pexanaejawabelia.
15 Bajarapapibisiajamatabëcuene capitsapa pibisiacuene jiwi pexanaenexa. Pibisiacuene pexanaejawa pijinia capitsapa jiwi Diosowecua petëpaejawanexa, pacuenia Dioso tocaëjëta pibisiacuene pexanaewi.
16 ¡Tajamonae, bitso pataca-asiwawi, pëtsa panajamatabëcueneyamaxë-itojorobame bajaraxuanë yabara!
17 Dioso, baja cajena pexanaenë daxita xuanë rubena, pitayotsijawanë athëbëtatsia, nexata bajaraPonë pitaquirijamatabëcuene apoxainae. Bajaraxuata, caejamatabëcuene nacasiwanajamatabëxainabiaba ëpexaniacuene wajanacato-exanaenexa waxaitsijawaberena.
18 BajaraPonë bajarapacuenia pejitsipaexae, pexitsi naca-exana wajajumexaniataejawata pexaniajailiwaisi, Jesús peliwaisi. Nexata, apojudíowiwecua copiaya wajasiwanajamatabëcuenecopabixae Jesucristojawabelia, waxaitsi, judíowitsi, Dioso nacatane bematapijiwitsi.
Pacuenia bexanawanapatsi Dioso peliwaisi wajanaca-itorobicuenia, yabara peliwaisi
19 ¡Tajamonae, bitso pataca-asiwawi, Dioso pexi papeca-exanaexae, bepijiayo panamuxuna-ewetabiabare Dioso peliwaisi!c Juya, bepijiacueniad apobepacuaicuaijamë abaxë copiaya xaniawaetsia panatsiwajënaecanaëjëtsinejewamë. Bepijianua apobepa-anaepanaemë,
20 tsipaji jiwi pianaepanaejawata apo-exanae papexaniacuene Dioso jitsipa.
21 ¡Bajaraxuata, pacopabare daxita pibisiacuene panenajamatabëxainaejawa, pane-exanaejawanua itsamonaejawabelia! ¡Biji rajane, beweliajamatabëcuenewi nataeya, panamuxuna-ewere paliwaisi pacatsijamatabë-uba, tsipaji Dioso pejumeliwaisi papeca-itorobicuenia itsa pa-exanaename, bajarapaliwaisi pacacapanepaena Diosojawabelia!
22 Itsiata baitsi jane, apopacatoxanepanae saya ëpanenamuxuna-ewetsijawa Dioso pejumeliwaisi. Biji rajane, bepa-exanabiabamenua pacuenia Dioso pejumeliwaisibaxutota jumaitsi. Itsa panatocanaëjëtame papecasiwajamatabëcuenebarëyajawa Dioso, peliwaisi ëpanenamuxuna-ewetsijamatabëcuene, panajamatabëcueneyamaxë-itojorobame cajena.
23 Pajiwi saya jumetane Dioso pejumeliwaisi, exanaenejewa pitorobicueniatsi, bajarapajiwi jamatabëcuenejëpa ponë naitabaratane tsaxuta.
24 Tsaxuta penaitabarataejawata, naitabarayapëtane. Itsa baja wecuanapënëyorota, bepijia nacofënëta pacuenia itabarajumape-itsi.
25 Itsiata, pajiwi aponacofënëtsi Dioso pejumeliwaisi, xua jumetane, xaniawaetsia natojumecanaëjëta bajarapapexanialiwaisi. Itsa jamatabënaponapona, pexanaenexa pitorobicueniatsi bajarapacapanepaeliwaisitsi,e bajarapajiwi Dioso bitso yawenonaenatsi daxitacuenejawabelia.
26 Pajiwi natane bitso Dioso pejitsipaecuenia peponaponaejawa, itsiata itaxutojema itsa cuaicuaijai tsabiabi, bajarapajiwi saya najamatabëcueneyamaxë-itojoroba. Bajarapacuenia natae-ata, to-amatamobitsi Dioso pitabarata.
27 Xua waxa Dioso tsitapexaniacuenetsi pijajiwi pexanawanapaenexa, mapacuenejawanëje: Peyawenonaejawa tsonijiwixi, pamonajiwi pewecuatëpaewaxitsi-ata, paepatota bitso namatawenona itsacuenejawaxi, nayajiwitaeyanua pejinawanapaenexa penajamatabëcuenebijianaeyaniwa, mapanacuapijiwije pexanaejawanëta.