1 Pedro
Mapabaxutoje apóstolnë Pedro copiaya toyaquina Jesús peliwaisi pejumexaniataewijawabelia
Pedro pebajacobiliwaisi
1
7Xanë, Pedronë, Jesucristo pija-apóstolnënë, nitoroba jiwijawabelia tatsipaebaponaenexa Jesucristo peliwaisi. Pacatoyaquinatsi mapabaxutoje paxamë, Jesús peliwaisi panejumexaniataewi, itsatomaranëjawa nacayajatsia panejinawanapaewi panijatomara, Jerusalén-tomarawecua.a Bajaraxuata, pajinawanapame:b Ponto nacuajawa, Galacia nacuajawa, Capadocia nacuajawa, Asia nacuajawa, Bitinia nacuajawa-ata.
2 Waxa Dioso baja cajena bajayata tajëwelia, wajanaexanaewajënaeya-ata, paca-itapeta paxamë papijajiwinexamë. Orijibia, Espíritu Santo pejamatabëcueneta pacatsata Jesucristo papijajiwinexamë, pane-exanawanapaenexa papecatojitsipaecuenia. Pacawecua-ajibia-exananua daxita pibisiacuene pane-exanaeneconimi Jesucristo pejanata, papecasiwatëpaejawata.c Bajarapacuenia papecato-exanaexae, pacatojitsipatsi panewajënaeyabelia ayaicuenia Dioso asiwayad papecayawenonaejawa papeca-itaxutotsoniataexae, jamatabëcuenexanepanaeyanua panejinawanapaenexa.
Pamonae, Jesucristo peliwaisi pejumexaniataewi, copia-ewetawanapa Dioso perajutsinexatsi matacabi apopewerewerecaejawa
3 Nacatoxanepana cajena wajawënëxaniatsijawa Dioso, Wajatuxanenë Jesucristo paxa, tsipaji pexaniacuene bitso nacato-exana. Ayaicuenia wajanacabejiobiataexae, nacarajuta pejanajamatabëcuene wajaxainaenexa. Nexata, Dioso penamatacotsia-exanaexae Jesucristo petëpaejawawecua, waxaitsi-ata itaxutuajamatejemaya copia-ewetawanapatsi bajarapacuenia Dioso wajanacato-exanaenexa.
4 Nexata, xua Dioso nacarajutsiapaeba athëbëtatsia, bajaraxua cajena pepopexaniawiriajawa tsane, apopiabejejawanexa, apopewerewerecaejawanexanua.
5 Nexata, xaniawaetsia wajapitsinexa xua Dioso nacatoxaniawaeta athëbëtatsia, wajanacarajutsijawanexa, bajaraPonë pesaëta naca-ewetaponapona waja-asaëtsawanapae-epato mapanacuataje, waja-itaxutuajamatejemaxae Jesucristojawabelia. Nexata, pamatacabi mapanacuaje werewerecaena, matapania jane baja, pepacuene yapëtaenatsi, pacapanepaecuenee Dioso nacatoxaniawaeta athëbëtatsia.
6 ¡Daxita bajarapacuenia Dioso papecato-exanaexae, pasiwajamatabëcuenebarëyamëre tsawanapae! ¡Aeconoxae abaxë mapamatacabitaje panejinawanapae-epato nawitsia pacatocopiapataponae-ata xuanë pacajamatabëcuenebejiobia-exanapona,
7 tsipaji bajaraxuanë papecajamatabëcuene-ëjëtsijawataf Dioso canacueneba, papecajamatabëcueneyapëtaenexa pepacuene panejumexaniataejawa pane-itaxutuajamatejemajawa Jesucristojawabelia! Wajanacajamatabëcuene-ëjëtsijawa, itsa jamatabëcuenematatoxenetatsi waja-itaxutuajamatejemaxae Jesucristojawabelia, bajarapajamatabëcuene bitso namatamota pepopexania-oronaniwecua. Oronani, mapanacuapijijawa-ata, matatoxenetsia petonamatamotsinexatsi, jiwi baseta isotota, pewecuatsatsinexa xuanë piabejejawanë, penacopatsinexa ë-oronanijawa. Bajarapacuenia pijinia, Dioso canacueneba wajanacajamatabëcuene-ëjëtsijawanë, wajanacawejamatabëcuenexuabinexa waja-aebijamatabëcuene, penacopatsinexa ëwaja-itaxutuajamatejemajawa Jesucristojawabelia. Nexata, bajarapacuenia pane-itaxutuajamatejemaxae Jesucristojawabelia, pamatacabi Wajatuxanenë Jesucristo patsianica, Dioso pacasiwajamatabëcuenebarëya tsane. Pexaniacuenia pacawënëxaniatsiananua bajaraxua yabara. Daxitajiwinua pacayaiyataena.
8 Paxamë Jesucristo apopatae-atamë, abaxë itsiata pa-asiwamë. Pasiwanajamatabëcuenecopabamenua bajaraponëjawabelia. Bajarapacuenia pane-asiwaxae Jesucristo, bitso pasiwajamatabëcuenebarëyamë tsawanapae. Ayaicuenia panesiwabarëyaxae, pacato-acuenebi xaniawaetsia panenawajunupaebicapanepaejawa itsamonaejawabelia,
9 tsipaji baja paxainawanapame pexaniacuenia Dioso papecacapanepaejawa, papecananeconitsia-exanaejawaminexawecua, panesiwanajamatabëcuenecopabixae Jesucristojawabelia.
10 Xua paxamë paxainawanapame baja, bajayatami profetawi, bajayajebi liwaisijaitapona, peyapëtaenexa bajarapacapanepaecuene yabara. Nexata baja, profetawi itsa yapëtane pacuenia Dioso pijajiwi capanepaejitsia, tajëwelia wajunupaebapona jiwijawabelia, pacuenia, Cristo pejamatabëcueneta, Dioso itaxutotsoniataeya jiwi capanepaejitsia.
11 Bajarapaliwaisi canaëjëtsiaya peyorobaponaejawata, profetawimi pijacuata nayanijobapona. «¿Depamatacabijawa copiapatsiana? ¿Depitsicuenia meta tsane? ¿Depajiwi yabara jumaitsi bajaraxua?», jamatabëcuenejai tsaponae, penayanijobijawata. Nexata, Espíritu Santo tajëwelia bajarapajamatabëcuene yabara, yapëtaeya-exanaponatsi pacuenia itsamonae Cristo bejiobia-exanaejitsiatsi pebeyaxuabijawatatsi, pacuenia-ata Cristo piasaëya-exanaecujinaetsi petëpaejawawecua, athëbëabetsia caponaejitsiatsi, pe-ecaenexa paxa Dioso pemuxunenetatsia.
12 Itsiata baitsi jane, bajarapaprofetawimi Dioso yapëtaeya-exanatsi paliwaisi yaquinapona, apopetaejawanexa bajarapamonaemi. Biji rajane, yapëtaeya-exanatsi, pewënamuto bexëajawabelia pecopiapatsijawanexa. Nexata, waxaitsi, mapamatacabi wajajinawanapaewi matapania jane baja, tanetsi pacuenia tajëwelia Cristo yabara wajunupaebapona profetawimi. Nexata baja, paxamë bajarapaliwaisi itsamonae pacatsipaeba Espíritu Santo pesaëta papecacapanepaeliwaisinexa. Cristo athëbëwetsica itorobica Espíritu Santo, pejamatabëcueneyawenonaenexa bajarapamonae, papecatsipaebinexa. Jesús peliwaisi bitso pexanialiwaisixae, ángelewi-ata xaniawaetsia naitaxutocaeweta, peyapëtaenexa pacuenia tocopiapatsijitsiatsi jiwijawabelia bajarapaliwaisi.
Dioso nacajunata xaniawaetsia wajatojinawanapaenexa
13 Paneyapëtaexae xua Cristo pacato-exana, panecopia-ewetawanapaexaenua Dioso pexaniacuenia papecato-exanaejawanexa Jesús pepatsimatacabita, xaniawaetsia patojinawanapaename Dioso. ¡Nexata, panajamatabëcuenewerere, pane-exanaenexa daxita xua Dioso pacatocopata! Panajamatabëcuenecataitsianamenua, pibisiacuene pane-exanaeyaniwa.
14 ¡Pajumecowënëtawanapare Dioso! ¡Pëtsa panajamatabëxainame panenatojitsipaecuenia pibisiacuene pane-exanaenexa, pacuenia pa-exanawanapame pamatacabi abaxë Dioso apopayapëtaemë, tsipaji pacopia-ewetawanapame Dioso papecacapanepaejawanexa, papeca-itaxutotsoniataexae!
15 ¡Nexata, xaniawaetsia saya pajinawanapare, pibisiacuene pa-exanaenejewamë, tsipaji raja Dioso, ponë pacajunata papijajiwinexamë, pepopianeconijibinë! Pibisiacuene baja cajena caeto-ata apopexanaenë.
16 Bajaraxua yabara, Dioso pejumeliwaisibaxutota jumaitsi mapacueniaje: «¡Aneconijibia pajinawanapare, pibisiacuene pa-exanaenejewamë, tsipaji raja Xanë ta-aneconijibinë tsaponaponae!»,g jai Dioso pejumeliwaisibaxutota.
17 Paxamë itsa panawajëcabiabame, «Axa», pajamë tsabiabi Diosojawabelia. Nexata, yaiyataeya bepatojinawanapame bajaraPonë pitabarata, daxita panejinawanapae-epato mapanacuataje. ¡Pëtsa panacofënëtame pacuenia bajaraPonë cuenecanaëjëtsiana najëpaeya daxita jiwi pexanaecuene, ayaijamatabëcuenewi, beweliajamatabëcuenewi-ata, peyapëtaenexa paneconiwajëto xainapona caejiwi canacujitsia!
18 ¡Bajarapacuenia yaiyataeya pajinawanapare, tsipaji paxamë Dioso pacacapanepa baja piamatamobicuenia panejinawanapaejawamiwecua, pitsijamatabëcuene xainawanapa panijasalinaiwimi! Nexata, papecacapanepaenexa Dioso matamota panijaneconi ayaimatamota. Apopacacomuatsi baja cajena pewerewerecaematamojawanëta, pacuenia oro, palata-ata.
19 Biji rajane, Dioso pacacomuata Cristo pijanata, bitso penamatamotsijawa, apopewerewerecaematamojawata. BajaraPonë pacasiwatëpa panijaneconi yabara, Dioso Ponë tane bepija-oveja.h BajaraPonë pianeconijibinë Dioso pitabarata. Apoxainae-ata xua yabara Dioso tsita-abejejitsiatsi.
20 Bajayatami, Dioso mapanacuaje pexanaewajënaeya-ata, Dioso itapeta Cristo, papecasiwatëpaenexa. Belia jane baja, mapamatacabitaje Cristo patsica papecasiwatëpaenexa.
21 Itsiata baitsi jane, Cristo petëpaecujinae, acueyabimatacabita Dioso icatsia asaëya-exana. Athëbëtatsia, paxa Dioso pecujuanenia, ecaeya-exanatsi Cristo, ayaijamatabëcuenenëxae. Nexata, Jesucristo papecasiwatëpaenexa, pasiwanajamatabëcuenecopabame Diosojawabelia. Pacopia-ewetawanapamenua, papecarajutsinexa matacabi apopewerewerecaejawa.
22 Nexata baja, aeconoxae paxamë panejumecowënëtawanapaexae pexaniajailiwaisi, Jesucristo peliwaisi, bajarapaliwaisi pejamatabëcueneta, Dioso pacawecua-ajibia-exana panijaneconimi. Nexata, pacacuenecaëjëpa xaniawaetsia pane-asiwanexa payamaxë-itojorobinejewamë itsamonae-ata, Diosojawabelia pesiwanajamatabëcuenecopabiwi. Bajarapacuenia nexata, asaëyata namata-enetsia bepana-asiwamë tsawanapae, xaniajaiya daxita panejamatabë-ëthëtowetsina.
23 Bajarapacuenia pa-exanaename, tsipaji pejanajamatabëcuene paxainame, bajarapaliwaisita panenaexanaexae bepapejananaexanaenacuetoyomë. Itsiata baitsi jane, bajarapapejanajamatabëcuene apopaxainaemë panijamonaejiwibeje pejamatabëcueneta. Biji rajane, Dioso pejumeliwaisi, apopewerewerecaeliwaisi, panejumexaniataexae, bajarapaliwaisi pejamatabëcueneta pejanajamatabëcuene baja paxainame.
24 Yapëtanetsi bajaraxua, tsipaji Dioso pejumeliwaisi apopewerewerecaejawanexa yabara, Dioso pejumeliwaisibaxutota jumaitsi mapacueniaje:
«Pacuenia wayafopijipo̱na bepijia tsaquena, petsaquenaecujinae tëpa, bajarapijinia saya itsi jiwi-ata. Bepijia tëpa. Pacuenia pexaniamatono bepijia tsaquena, nexata othopa, bajarapijinia saya jiwi jamatabëcuene-itsi. Xua yabara itsamonae ayaijamatabëcuenewi tanetsi, bajaraxua bepijiayo werewereca.
25 Itsiata baitsi jane, Dioso pejumeliwaisi apowerewerecaei tsane daxitamatacabijawabelianexa», jai Dioso pejumeliwaisibaxutota.
Bajarapaliwaisi raja Jesús peliwaisi apopewerewerecaeliwaisi, itsamonae baja pacatsipaeba, papecacapanepaeliwaisinexa.