Pemuxujiobiliwaisi pecobecowë pexainaewi
5
¡Pamonae bitso panexainaewi, panenamuxuna-ewere mapaliwaisije! Panatsinuema bitso ayaijumeta, panabejiobitsicuene yabara pataewanapaejitsiamë, pataewanapaejitsiamë. Dioso raja juya pacacuenecanawiatsiana, itsamonae panebejiobia-exanaejamatabëcuene.
2 Nexata, panexainaecuene, panexaniawaetsijawami, pacatotsabanaena. Pexaniawiriajawanë, panenaxatabijawanëmi-ata, merawipijisonotoxia pacato-ucubaxaena.
3 Panijapalatanëanë, oronanitonëanë-ata, pacatotasibenaenatsi, bajayajebi panexaniawaetsixae. Nexata, bajarapatasibijawatsi pacacuene-itajëtsiana panenaneconitsijawa Diosojawabelia,b apopaneyawenonaexae itsamonae. Orijibia, xuanë panajumajebaponame panexaniawaetsinexa, bajaraxuanë-ata pacacuene-itajëtsiana panenaneconitsijawa Diosojawabelia.
4 ¡Panejumetaema! Pamatamo paxamë yamaxë-itojorobiaya pawecua-asiwamë, panematamotsiyaniwa papecatonacuenebiwi, bajarapamatamo pacacuene-itajëtsiana panenaneconitsijawa Diosojawabelia. Dioso, Ponë piacuenesaënë daxitawecua, jumetanenua papecayanijobaponaejawa pijamatamo, pamonae pa-amoneyabame, papecatonacuenebijamatabëcuene panijapabianëjawata. Bajaraxuata, pananeconitame bajaraPonëjawabelia.
5 Bajarapacuenia pane-exanabiabixae, mapanacuataje picani panatsitajinawanapame xaniawaetsia. Pacabarëyamë tsawanapae panexainaecuene. Pa-exanawanapame panejitsipaecuenia. Pacuenia vacamonae jamatejema nasitapona pexaeponaejawata, yapëtaenejewa penasitsicujinae pebeyaxuabijawanexatsi, bajarapacuenia pijinia, paxamë-ata panatonotaponame panexainaejawanë, pacanaëjëtsinejewamë Dioso papecananeconitsia-exanaejawanexa, bitso panenaneconitsixae bajaraPonëjawabelia. Imoxoyo baja pewajënae bajarapamatacabi.
6 Orijibia, jiwi aponaneconitsi-ata, pananeconitsia-exanabiabame, pabeyaxuababiabamenua. Bajarapacuenia pa-exanabiabame pamonaejawabelia, apopecuenecaëjëpaewitsi, papecanayajiwi-itawetsinexa.
Pacuenia Jesús pijajiwi jamatabëcuene-ewetawanapa icatsia petuxanenë pepatsijawanexatsica, yabara peliwaisi
7 ¡Itsiata baitsi jane, paxamë patajamonaemë, bajarapacuenia pibisiacuene pacato-exanae-ata, pajamatabëcuenesaëmëre tsawanapae tsane panecopia-ewetawanapaejawa Wajatuxanenë matapania icatsia pepatsimatacabitsicajawabelianexa! ¡Panecopia-ewetawanapaejawata, pëtsa bitso pajamatabëcuenebëjamë, itsamonae papecabejiobia-exanaejawa yabara! Pacuenia pabi penacuenebinë wajënae-eweta emamatacabianë, petoxaniabinexatsi pe-ubijawanë. Pe-ubiweretsicujinaenua, bajayajebi pijinia ajamatabëcuenesaëya ewetaponapona, petonaweretsijawabelianexatsi.
8 Bajarapacuenia pijinia, paxamë-ata, bajayajebi itsamonae pibisiacuene paca-exanae-ata, pajamatabëcuenesaëmë tsane. ¡Pëtsa pajamatabëcuenefaefaename, tsipaji rabaja imoxoyo pewajënae tsaponae Wajatuxanenë pepatsinexatsica, penaneconitsia-exanaenexa bajarapamonae!
9 ¡Tajamonae, Jesús peliwaisi panejumexaniataewi, pëtsa namata-enetsia panabaracuaicuaijamë ..pane-exanaecuenejawanë yabara, Diosojawabelia panenaneconitsiyaniwa, tsipaji rabaja Jesucristo, wajanacaneconicanaëjëtsinë, imoxoyo baja pewajënae tsaponae pepatsijawanexatsica, penaneconitsia-exanaenexa pijaneconi pexainaewi!
10 ¡Tajamonae, pacanaëjëre profetawi pacuenia pacatsitanacuene-itajëta! Bajarapamonaemi bajayajebi bejiobia-exanae-atatsi, ajamatabëcuenesaë tsawanapae, Dioso pejumeliwaisi pepaebaponaejawa, itsajamatabëcuene xainaenejewa.
11 Yapëtanetsi pacuenia Dioso siwajamatabëcuenebarëya tsabiabi pajiwi siwa-ajamatabëcuenesaëtsi pitaxutuajamatejemaxae bajaraPonë, bajayajebi bejiobicueneta ponaponae-ata. Pawënëliwaisitaneme rabaja, pacuenia bajayata Job-pijinë, ayaicuenia bejiobicueneta ponaponae-ata, itsiata ajamatabëcuenesaë pitaxutuajamatejemajawa Diosojawabelia. Nexata, bajarapacuenia bajayajebi peponaponaecujinae, Dioso bitso pexaniacuenia yawenonatsi, tsipaji jiwi asiwaya pitaxutotsoniataenë.
12 Tajamonae, patacatsipaebiliwaisianëwecua, matatoxenetsia mapaliwaisije pajumecowënëtsianame. Itsa pacuaicuaijamë itsamonaejawabelia pexaniajailiwaisi, caeliwaisi pacuaicuaijamë tsabiabi tsane. ¡Pëtsa Dioso pewënë, athëbëpijicuene, irapijicuene-ata,c pacacuaicuaijamë itsamonae papecajumexaniataenexa! ¡Nexata, itsa pacayanijoba itsacuenejawayo yabara, rowialia pajumaitsimëre pacuenia panajamatabëxainame! ¡Itsa pajejamëjitsia: «je», pajamëre! ¡Itsa «jume», pajamëjitsia: «jume», pajamëre rowialia! ¡Bajarapacuenia paxaniajamëre tsabiabi, panenaneconitsiyaniwa Diosojawabelia!
Itsapemuxujiobiliwaisianë
13 Pajiwi, paxamëyajuwënëjiwi, tocopiapatatsi piayapëbejecuene, bajarapajiwi wajëtsi Diosojawabelia, peyawenonaenexatsi. Pajiwi pijinia barëyaya ponapona, tonaxëanae Diosojawabelia, pewënëxaniatsinexa ayaijamatabëcuenenë yabara.
14 Pajiwi pijinia awitane, junatsi ancianowi, Jesús pijajiwi pewetsiwi, petowajëtsinexatsi Diosojawabelia. Nexata, ancianowi piawitanejiwi aceiterata perabëcalirabiana, Wajatuxanenë pewënëta.
15 Petowajëcaewi itsa itaxutuajamatejema Diosojawabelia, nexata piawitanejiwi Dioso jamatejemaya-exanaenatsi. Bajarapajiwi itsa awitane, pibisiacuene pexanaexae, Dioso siwajamatabëcuenecaewianatsi pijaneconimi.
16 ¡Bajaraxuata, namata-enetsia panawecuapaebare xua yabara pananeconitame Diosojawabelia! ¡Nexata, namata-enetsia panatowajëre Diosojawabelia papecajamatejemaya-exanaenexa! Ponë, xaniawaetsia peponaponaenë Dioso pitabarata, daxita pejamatabë-ëthëtojawawetsina itsa wajëta, jumenamatamota Diosojawabelia. Ayaicuenia Dioso pexaniacuene to-exanaenatsi.
17 Bajarapacuenia exana profeta Elías.d Bajaraponë bewaxaitsijamatabëcuenenëmi-ata, itsiata asaëyata itsa wajëta Diosojawabelia ema pejopaeyaniwa, nexata acueyabi pawaibeje epatua ema apojopae. Nexata, daxita bajarapanacuapijiwi bitso janibo.
18 Bajaraxuacujinae, icatsia asaëyata Elías wajëta Diosojawabelia, ema pejopaenexa. Nexata icatsia, ema jopa. Ira icatsia capitsapa pexaejawanexa. Bajarapacuenia waxaitsi-ata asaëyata bewajëtatsi Diosojawabelia, cuene-aebinejewatsi.
Pacuenia bejamatabëcueneyawenonatsi pamonae Jesús pijajiwiyajuwënëwi, pibisiacuene itsa exana, yabara peliwaisi
19 Tajamonae, paxamëyajuwënëjiwi itsa pexaniajailiwaisi, Dioso pejumeliwaisiwecua najamatabëcuenebijianaejitsipa, nexata pajiwi liwaisixaneta penajamatabëcuenebijianaejiwimi, bitso pexaniacuene exana.
20 Bepayapëtaneme mapacueneje. Pajiwi, penajamatabëcuenebijianaejiwimi icatsia caewëarena najamatabëcuenepënëyorotsia-exana pibisiacuene pexanaejawamiwecua, bajarapajiwi jamatabëcueneyawenona, penaxuabiyaniwa pibisianacuayabelia. Jamatabëcueneyawenonanua Dioso pewecua-ajibia-exanaenexatsi nawitsia pibisiacuene pexanaeneconimi.