Mapanacuapijijamatabëcuene pexainaewi pejinawanapaecuene
4
¿Payapëtaneme tsaja xua yabara paxamëyajuwënëwi namata-enetsia najume-anaenotabiaba, penabara-anaepanabiabinexa? Bajarapacuenia bajarapamonae exanabiaba, tsipaji pejitsipaejamatabëcuene jamatabëcuenematacaponabiabatsi pibisiacuene pexanaenexa.
2 Bajaraxuata, paxamë itsa pajitsipame itsacuenejawa panexainaenexa, itsiata itsa apopacacaëjëpae panepitsinexa, nexata pexainaewi jamatabëpayabarabeyabiabame. Itsa pacobecaëbabiabame itsamonae pexainaejawa, itsiata itsa apopacacaëjëpae panepitsinexa, nexata pexainaewi jamatabëpayabarabeyabiabame, panepitsinexa pecobecowë. Paxamë apopaxainaemë panejitsipaecuene, tsipaji apopawajëcabiabimë Diosojawabelia, papecarajutsinexa.
3 Orijibia, pawajëcabiabi-atamë Diosojawabelia, itsiata apopacarajutabiabi xua pawajëcame, tsipaji yajawa pawajëcabiabame pibisiajamatabëcuene, panecabarëyanexa ëpanenatojitsipaecuenia.
4 Caejamatabëcuene apopanexainaewi cajena Diosojawabelia. Biji rajane, caejamatabëcuene paxainame mapanacuapijicuenejawabelia. ¿Apopayapëtaemë tsaja, bajarapajamatabëcuene yabara Dioso bepapijawajabitsaëmë panenaexanaejawa? ¡Xaniajanë cajena! Pajiwi rabaja mapanacuapijicuene bitso jitsipa, bajarapajiwi Dioso bepijawajabitsaëjiwi naexana.
5 Bajaraxua yabara Dioso pejumeliwaisibaxutota jumaitsi mapacueniaje: «Dioso ayaicuenia naca-asiwa. Wajanacajamatabëcuene-asiwaxae, nacatsijamatabë-ecaeya-exana Espíritu Santo,a caejamatabëcuene wajaxainaeyaniwa mapanacuapijicuenejawalia. Biji rajane, nacajitsipaeya-exana ëDioso waja-asiwanexa daxitacuenewecua», jai Dioso pejumeliwaisibaxutota.
6 Itsiata baitsi jane, Dioso asiwaya nacayawenona, wajanajamatabëcuenecataitsinexa pibisiacuene waja-exanaeyaniwa. Wajanaca-asiwacuene yabara, Dioso pejumeliwaisibaxutota jumaitsi mapacueniaje: «Dioso asiwaya yawenona pamonae beweliajamatabëcuenewi natane. Pamonae pijinia be-ayaijamatabëcuenewi natane, Dioso apojitsipae peyawenonaejawa», jai Dioso pejumeliwaisibaxutota.
7 ¡Bajaraxuata, Dioso jamatabëcuene-ewetsiaya pajinawanapare, beweliajamatabëcuenewi nataeya pane-exanawanapaenexa, pacuenia Dioso pacatojitsipa! ¡Pajamatabëcuenesaëmëre dowathiwecua! Nexata, pacawecuanajetabijirawiana.
8 ¡Pajaire caejamatabëcuene panexainaejawa Diosojawabelia! Nexata, Dioso caejamatabëcuene xainaena papecayawenonaenexa. ¡Paxamë pibisiacuene pane-exanaewi, pacopabare baja bajarapacuene! ¡Paxamë anijajamatabëcuenebeje panexainaewi, caejamatabëcuene paxainare Diosojawabelia! ¡Pëtsa baja, pibisiajamatabëcuene yajawa pajinawanapame!
9 ¡Pibisiacuene pane-exanaeneconi yabara, bitso panatsinajamatabëxainare! ¡Bitso paya-auramërenua! ¡Pëtsa payabarëyamë!
10 ¡Beweliajamatabëcuenewi panataema Dioso pitabarata! Nexata, bajaraPonë juya pacatocopatsianab itsamonae papecayaiyataenexa.
Pibisiacuenia apobebaracuaicuaijaitsi itsamonae Jesús pijajiwi
11 ¡Tajamonae, panenajuajumexaniataewi Jesús peliwaisi, pëtsa pibisiacuenia namata-enetsia panabaracuaicuaijamë! Pajiwi, itsamonae pijaneconi yabara pibisiacuenia baracuaicuaijai pexanaejawawecua pematatsënëa, itsa jume, tocaëjëta Dioso penaneconitsia-exanaejawanexatsi pijaneconi yabara, bajarapajiwi naneconita Diosojawabelia. Bajarapacuenia itsa pa-exaname, pibisiacuenia pabaracuaicuaijamë paliwaisi Dioso nacatocopata wajajumecowënëtsinexa. Baitsi, paliwaisi pacatsicaruca picani panejumecowënëtabiabinexa, bajarapacuenia apopa-exanaemë. Caranata, bepanenaneconitsia-exanaewi panataneme, bajarapaliwaisi apopejumecowënëtsiwijawabelia.
12 Caenë raja Dioso bajarapajamatabëcuenebeje pexainaenë. BajaraPonë wajanacatonajumecopatsinë paliwaisi bejumecowënëtatsi. BajaraPonë raja wajanacaneconicanaëjëtsinënua, wajanacayapëtaeya-exanaenexa itsa nacananeconitsia-exanaejitsia wajaneconijamatabëcuene. Itsa jume, itsa nacacapanepaejitsia, aneconijibia wajanacataexae. Bajaraxuata, Dioso apopacatocopatsi paxamë itsamonae yabara panejumaitsinexa mapacueniaje: «Bajarapamonae Diosowecua naxuabiana, pibisiacuene pexanaexae», panejainexa.
Pacuenia itsajiwi-ata aponatsiwajënaeyapëtae, pacuene merawia pitsijawata tocopiapatsijitsiatsi, yabara peliwaisi
13 ¡Panenamuxuna-ewere paxamë, ayaijamatabëcuenewi nataeya panejumaitsitsabiabiwi!: «Ajena, itsa jume, pepacuene jane baja merawia, paponaenajë bajarapatomarabelia. Bajarajotalia caewai panacuenebianajë palata patanacanabinexa», panejaitsabiabiwi.
14 Bajarapacuenia apopacatoxanepanae panejumaitsijawa, tsipaji raja apopanatsiwajënaeyapëtaemë xua pacatocopiapatsijitsia merawia pitsijawata. Caenë Dioso yapëtane bajaraxua. Wajajinawanapae-epatoyo, saya tsiquirimatacabiyota jinawanapatsi wajatëpaenexa. Pacuenia bajayacunua nojobo pitsapa, cae-epatoyonexa saya. Xuacujinae, icatsia ajibi baja. Bajarasaya itsitsi waxaitsi.
15 Nexata, saya bepajumaitsimë: «Itsa Dioso panetocopatsiana abaxë pata-asaëtsawanapaenexa, pajinawanapaenajë. Bajarapacuenia pa-exanaenajënua. Itsa jume, itsacuenia pa-exanaenajë», bepajamë saya.
16 Itsiata baitsi jane, paxamë saya be-ayaijamatabëcuenewi panataeyabiabame Diosowecua, panenatocaëjëbijawata xua pa-exanaejitsiamë. Bajarapacuenia ayaijamatabëcuenewi panenataejawa, bitso abeje.
17 Pajiwi yapëtae-ata pacuenia picani bexana, itsiata itsa apo-exanae, bajarapajiwi pibisiacuene exana Dioso pitabarata.