Pacuenia itsi waja-ebarëto, yabara peliwaisi
3
¡Tajamonae, panayajiwitaema! Apopacatoxanepanae ayaibitsaëto panenaexanaponaejawa Dioso peliwaisi panecujarubiwinexa. Paxamë payapëtaneme Dioso, daxitajiwi matatoxenetsia, bitso ayaicuenia penaneconitsia-exanaejawanexa pamonae bijiaya cujaruba Dioso peliwaisi.
2 Daxitatsi waxaitsi itsajawata banacajumejemaba, pibisiacuenia wajacuaicuaijainexa, pacuenia picani apobecuaicuaijaitsi. Nexata, pajiwi pibisiacuenia apocuaicuaijai, caëjëpatsinua penajamatabëcuenesaëtsinexa daxita pibisiacuene pexanaeyaniwa. Bajarapajiwi jamatabëcuenenawereta baja Diosojawabelia.
3 Caballo tsicuiboxatatatsi freno, wajawësimuxufetsinexa itsabelia jitsipatsi. Nexata, freno caballowecua tsiquirijawayo-ata, itsiata caëjëpa caballo wajawësimuxufetsinexa, itsabelia jitsipatsi wajaponaenexa.
4 Bajarapijinia itsi barco-ata. Pinijimo-ata, jowibo ayai-atanua, itsiata petabufetaicaenë, tsiquiritenapayota barcotabufe cajënapona, itsabelia jamatabëpona peponaenexa.
5 Bajarapijinia itsi tsiquiri-isotoyo-ata. Itsa tajua, naexana ayai-isoto, petajuenexa piniji-unu-ata. Waja-ebarëto-ata bajarapitsicuene xaina. Tsiquirijawayo-ata picani, itsiata caëjëpatsi pecuaicuaijainexa ayailiwaisi.
6 Waja-ebarëto cajena cuenejëpa pacuenia isoto ayai, tsipaji wënëca pibisiajumenë, wajajamatabëcuenebijianaenexa itsamonaejawabelia. Nexata, waja-ebarëtota bitso pibisiacuene exanatsi, daxita wajaperabëtota waja-exanaejawawecua. Belia, wajacuaicuaijaijawata daxita jiwitsi najamatabëcuenebijianatsi. Wajajumecowënëtsixae dowathi wajanaca-itorobicuenia, pibisiacuenia wajacuaicuaijainexa, natobijianatsi wajaponaponae-epato.
7 ¡Pacanaëjëre mapacueneje!: Jiwi caëjëpatsi penaitajuania-exanaenexa daxitawiria dajubiyajuwënëwi, unupijiwi, pepunaewi, pecotobëxëta pejinawanapaewi, manuamenepijidujuai-ata. Itsamonae bajarapacuenia naitajuania-exana baja, pejumecowënëtsinexatsi.
8 Itsiata baitsi jane, itsajiwi-ata apocaëjëpaetsi pena-ebarëto-itawetsinexa, pejumejemabijawatsi pibisiacuenia pecuaicuaijaijawa pecopatsinexa. Waja-ebarëto cajena bitso abeje. Aponacacuenecaëjëpae wajanajumecataitsinexa. Nexata, pacuenia jomo pijaveneno xaina pebeyaxuabinexa, bajarapijinia itsi waja-ebarëto. Pibisiajumenë xaina, jiwi wajajamatabëcuenebijianaenexa.
9 Waja-ebarëtota, itsajawata pexaniacuenia wënëxaniatatsi waxa Dioso. Itsajawata pijinia, pibisiacuenia cuaicuaijaitsi wajawënajiwijawabelia, Dioso nacuenecataeya pexanaewitsi.
10 Cae-ebarëtota pexaniacuenia wënëxaniatatsi Diosojawabelia. Pibisiacuenia cuaicuaijaitsinua wajawënajiwijawabelia. Tajamonae, apobe-exanaetsi cajena bajarapacuenia. Caecuaicuaijaicuene bexainatsi.
11 ¡Pacanaëjëre mapacueneje!: Mera pepitsapaemëthëatsina pitsapaina caera, pexaniara. Apopitsapae pexaniara, piatsaxara yajawa.
12 Bajarapijinia itsi pe-ubijawa-ata. Higueranaejawawerena apopitsapae saicayacuai. Uvanaejawawerena-ata apopitsapae saicayacuai. ¡Jume cajena! Bajarapijinia itsi mera pepitsapaemëthë. Caejawatsina apopitsapae pexaniara, piatsaxaraa yajawa. Bajarapacuenia pijinia, waja-ebarëtota apobecuaicuaijaitsi pexaniajumenë, pibisiajumenë-ata.
Xua be-exana pamonae Dioso peyapëtaeya-exanaecueniatsi jinawanapa
13 Itsa paxamë xaniawaetsia pajumeyapëtaneme Dioso pejumeliwaisi, nexata itsamonae pexaniacuene bepatsita-exanawanapame, beweliajamatabëcuenewi nataeya, pacuenia nacacujaruba Dioso pejumeliwaisi wajajinawanapaenexa.
14 Itsiata baitsi jane, itsa paxainame panecueneca-ëbijamatabëcuene itsamonae pecuene yabara, itsa pajitsipabiabamenua jiwi pane-ewetsiwi papeca-exanaenexa itsamonaewecua, panajamatabëcuene-itajëtame apopanexainaejawa Dioso papecayapëtaeya-exanaejamatabëcuene, pexaniajailiwaisita. Nexata, apopaxainaemënua xua yabara be-ayaijamatabëcuenejiwi panataejitsiamë itsamonaewecua,
15 tsipaji payapëtaejamatabëcuene paxainame apopitsapae Diosojawawerena. Biji rajane, pacanaëjëtame mapanacuapijiwije pecanaëjëtsicuenia. Itsa jume, dowathi papeca-itorobicuenia panajamatabëxainame. Itsa jume, paxamë panejamatabëcueneta, panajamatabëxainame bajarapacuenia.
16 Itsajota jiwi cuenecaëba itsamonae, itsa jitsipabiabanua jiwi pewetsiwinexa pexanaenexatsi, bajarajota nexata jiwi najamatabëcuenejëpaeya aponajuajinawanapae. Daxitacuene pibisiacuene-ata exanawanapa.
17 Itsiata baitsi jane, pamonae canaëjëta Dioso peyapëtaeya-exanaecueniatsi, bajarapamonae, daxitawecua, ëpexaniacuene exanawanapa. Aponamaxëwanitsi. Pexaniacuenia yawenonabiaba itsamonae. Pijacuata aponasiwanajamatabëxainae. Biji rajane, siwanajamatabëxainabiaba itsamonae pejitsipaecuene. Itaxutotsoniatane itsamonae-ata. Pexaniacuene exana. Aponajamatabëcuene-epatajërërëcae. Apoyamaxë-itojorobi itsamonae-ata. Pamonae bajarapitsicuenejawanë exanawanapa, Dioso peyapëtaeya-exanaecuenetsi pecanaëjëtsiwi.
18 Pajiwi nabarajamatabëcuenexanepanaeya-exanaena namata-enetsia penaitoyawi-ata, xaniawaetsia penajuajinawanapaenexa, bajarapajiwi Dioso yawenonaenatsi jamatabëcuenexanepanaeya peponaponaenexa. Pexaniacuene-ata to-exanaenatsi.