Jesús pijajiwi najëpaeya jamatabëcuenexanepanaeya namata-enetsia benatane
2
¡Tajamonae, najëpaeya namata-enetsia panataema, panenajuasiwanajamatabëcuenecopabixae ayaijamatabëcuenenë Wajatuxanenë Jesucristojawabelia! ¡Pëtsa itsamonae bijiaya pataneme!
2 Bajaraxuata panenacaetuatsijawata, itsa napatsipa pecobecowë pexainaenë, pexaniajawa penaxatatsinë, oro anillo penacobexatatsinë, bajarapaepatota pijinia itsa napatsipa bepejiobinë, peruju-esetoyo penaxatatsinë, ¿detsa pacuenia pacopiapitsipame bajarapitsinëbeje?
3 ¿Najëpaeya meta pacopiapitsipame? Itsa jume, caenë meta xaniawaetsia pacopiapitsipame, pexaniajawa penaxatatsinë. Pa-ecaeya-exanaejitsipame pexaniajawata. Ponë bepejiobinë, juya apopacopiapitsimë tsipae xaniawaetsia. Saya panucaeya-exanaejitsipame. Itsa jume, pa-ecaeya-exanaejitsipame meta irata.
4 Bajarapacuenia itsa pa-exanaejitsipame, pexaniacuene apopa-exanaemë tsipae, tsipaji najëpaeya bajaraponëbeje apopataemë Dioso pitabarata. Caenë pecobecowë pexainaenëxae, payaiyataejitsipame. Itsanë saya, bepejiobinëxae, bijiaya pataejitsipame. Nexata, bajarapacuenia itsa pa-exanaejitsipame, bijiaya pacanaëjëtsipame.
5 Tajamonae, bitso pataca-asiwawi, bepayapëtaneme mapaliwaisije. Pamonae bepejiobiwi mapanacuataje, Dioso baja cajenaitapetatsi itsamonaewecua ayaijawa pexainaewinexa pitaxutuajamatejemajamatabëcuene Diosojawabelia. Nexata, bajarapamonae tocopatsianatsi Cristo pebarë-ewetsinexatsi daxitacuene, pacuenia baja najumecapanepaeya jumaitsi Dioso, pijajiwi, piasiwawitsi yabara.
6 Dioso bitso pexainaewicuenia tae-atatsi, paxamë juya bijiaya pataeyabiabame bepejiobiwi. Pamonae pijinia pecobecowë pexainaewi, Dioso apopejitsipaewi, asiwaya pataeyabiabame. Itsiata, bajarapamonae bitso pexainaewi naexanapona paxamë papecawecuanaxainaeyabaponaexae. Pacaneconitabiabanua juez-monaejawabelia, papecananeconitsia-exanaenexa.
7 Bajarapamonae pibisiacuenia Cristo wënëcacuaicuaijai tsabiabinua, Ponë pewënëtaa panawënërubame papijajiwixaemë.
8 Dioso pejumeliwaisibaxutota jumaitsi mapacueniaje: «¡Asiwamëre itsamonae-ata pacuenia xamë nijacuata nasiwamë!», jai. Bajarapaliwaisi pexanialiwaisi bitso, daxitaliwaisianë matatoxenetsia. Nexata, bajarapaliwaisi pepacuene itsa pajumecowënëtsianame, pexaniacuene pa-exanaename.
9 Itsiata, itsa payaiyataejitsipame itsajiwi, itsamonaewecua, nexata pibisiacuene pa-exanaejitsipame, tsipaji najëpaeya apopataemë tsipae daxitajiwi Dioso papeca-itorobicuenia.
10 ¡Pëtsa panacofënëtame mapaliwaisije! Pajiwi jumecowënëtaponaponae-ata Dioso penajumecopatsiliwaisi Moisés-pijinëta, itsiata caeliwaisiyo apopejumecowënëtsijamatabëcuene, daxitaliwaisi apobepejumecowënëtsijiwi Dioso pitabarata. Nexata, naneconita Diosojawabelia.
11 Bajarapacuenia naneconita, tsipaji caenë Dioso jumaitsi: «¡Panenapitsijiwibeje pëtsa panawecuajaitamebeje itsajiwi!», jai. Itsaliwaisi pijinia jumaitsi: «¡Pëtsa beyaxuabame jiwitonë!», jai. Bajaraxuata, ponë apojaitsi-ata itsawa pijawawecua, itsiata itsa beyaxuaba jiwitonë, Dioso tanetsi daxita penajumecopatsiliwaisi Moisés-pijinëta apopejumecowënëtsijawa.
12 Nexata, Jesucristo papeca-itorobicueniab bepa-exanawanapame, bepacuaicuaijamënua tsawanapae itsamonaejawabelia, tsipaji paxamë payapëtaneme Dioso papecaneconicanaëjëtsijawanexa, paliwaisita pacacapanepa.
13 Nexata, pamonae itaxutotsoniataenejewac naneconitsia-exana itsajiwijawabelia, juya bajarapajiwi itaxutotsoniataenejewatsi naneconitsia-exanaenatsi, pamatacabi Dioso daxitajiwi neconicanaëjëtsiana pijaneconi yabara. Itsiata baitsi jane, pamonae itaxutotsoniatane itsamonae-ata, bajarapamonae wecuapanepaena Dioso penaneconitsia-exanaejawaminexatsi.
Pamonae siwanajamatabëcuenecopaba Jesucristojawabelia, nacuenenaitajëta pexaniacuene pexanaejawata
14 Tajamonae, ¿detsa xua yabara tonamatamotatsi jiwi pejumaitsijawa: «Xanë raja siwanajamatabëcuenecopatajë Jesucristojawabelia», pejaijawa?, itsa apo-exanawanapaed pexaniacuene itsamonaejawabelia, pacuenia Jesús exanaponapona. Bajarapacuenia saya itsa jumaitsi pecuaibota, exanaenejewa pexaniacuene, bajarapajiwi Dioso apocapanepaetsi tsane.
15 Belia meta, itsajiwi, Jesús pijajiwiyajuwënëjiwi, bitso namatawenonaejitsipa penaxatatsijawa, pexaejawa-ata.
16 Itsiata, paxamëyajuwënëjiwi jumaitsi tsipae bajarapajiwijawabelia: «¡Xaniawaetsia baja ponare! Dioso cayawenonae, nenaxatatsijawanexa, ne-aqueyaniwa. Carajutsinua nexaejawanexa-ata, nepenejawabelia», jai tsipae bajarapajiwijawabelia. Bajarapacuenia asiwaya jumaitsi-ata, rajutsinejewa penamatawenonaejawa, apojumenamatamotsi tsipae, tsipaji bajarapajiwiyo tsiteca yajawanacopata penamatawenonaecuene.
17 Bajarapijinia itsi Jesucristojawabelia wajasiwanajamatabëcuenecopatsijawa. Pexaniacuene itsa apoto-exanaetsi itsamonaejawabelia, jumaitsi-atatsi: «Xanë siwanajamatabëcuenecopatajë Jesucristojawabelia», jai-atatsi, nexata apojumenamatamotsitsi. Cuenejëpatsi saya petëpaenë, pexaniacuene itsa apoto-exanaetsi penamatawenonaejiwiyojawabelia.
18 Itsajiwi jumaitsi tsipae: «Xanë raja siwanajamatabëcuenecopatajë Jesucristojawabelia», jai tsipae. Itsiata, pexaniacuene apoto-exanae itsamonaejawabelia. Itsajiwi pijinia jumaitsi tsipae: «Xanë raja pexaniacuene exanabiabajë itsamonaejawabelia», jai tsipae. Itsiata, aposiwanajamatabëcuenecopatsi Jesucristojawabelia. Bajarapacuenia pejumaitsiwijawabelia, jumaitsinë tsipae mapacueniaje: «¡Itsa cacuenecaëjëpa, netsitajëre pepacuene nesiwanajamatabëcuenecopatsijawa Jesucristojawabelia, pexaniacuene to-exanaenejewamë itsamonaejawabelia! Xanë juya catsitajëtsianatsi pepacuene tasiwanajamatabëcuenecopatsijawa Jesucristojawabelia, pexaniacuene tato-exanaejawata itsamonaejawabelia», janë tsipae.
19 Xamë rabaja jumaitsimë nejumexaniataejawa caenë Dioso peponaponaejawa yabara. Xanepana rabaja picani pacuenia jumaitsimë. Dowathimonae-ata rabaja jumexaniatane bajarapaliwaisi. Bajarapacuenia jumexaniatae-ata, pexaniacuene apopexanaexae. Nexata, pecajunawi neconecojai, tsipaji yapëtane caenë Dioso penaneconitsia-exanaejawanexatsi. Nexata, xamë cuenejëpame bajarapamonae, itsa saya jumexaniataneme Dioso peponaponaejawa, pexaniacuene to-exanaenejewamë itsamonaejawabelia.
20 Niajamatabëcuenecowëbinë cajena. Beyapëtaneme mapacueneje. Pajiwi jumaitsi-ata: «Xanë raja Dioso pejitsipaecuene exanaponaponajë. Siwanajamatabëcuenecopatajënua Jesucristojawabelia», jai-ata picani, itsiata pexaniacuene yajawa itsa apoto-exanae itsamonaejawabelia, pacuenia Dioso naca-itoroba, bajarapajiwi ajumematamobi penawajunupaebijawa pesiwanajamatabëcuenecopatsijawa yabara Jesucristojawabelia.
21 ¡Pacanaëjëre! Bajayata, wajasalinainëmi Abraham-pijinë Dioso aneconijibia apotaetsi, ëpejumexaniataejawa yabara. Biji rajane, najamatabëcuene-itajëta pexanaejawata Dioso pitorobicueniatsi, pacujinae nacoxibuata pexënato, Isaac, altar-jumata, petajuitsinexa ofrendacuenia Diosojawabelia.
22 Bajarapacuenia pe-exanaejawata, Abraham-pijinë najamatabëcuene-itajëta pejumexaniataejawa Dioso. Itajëtanua apopetosajinaejawatsi itsajawa, xaniawaetsia pitaxutuajamatejemajawanexa Dioso.
23 Bajaraxuata, Dioso pejumeliwaisibaxutota jumaitsi Abraham-pijinë yabara mapacueniaje: «Abraham-pijinë jumexaniatane pacuenia Dioso najumecapanepaeya jumaitsitsi. Nexata, Dioso aneconijibia tanetsi», jai baja cajena Dioso pejumeliwaisibaxutota. Nexata, bajaraponë yabara jiwi jumaitsi tsabiabi: «Abraham raja Dioso piasiwanëtsi», jai tsabiabi.
24 Nexata baja, paxamë payapëtaneme mapacueneje. Dioso aneconijibia tane jiwi itsa yajawa-exana pacuenia itorobatsi, pitaxutuajamatejemajawa yajawa Dioso. Baitsi, ëpejumexaniataejamatabëcueneta aneconijibia apotaetsi.
25 Bajarapacuenia pijinia, bajayata, Dioso aneconijibia tane Rahab-pijiwami, penaperabëcanajetabiabiwami-ata, pibisiacuene pewitota pexanabiabinexa. Bajarapowami pejumexaniataexaee Dioso peyawenonaejawanexa Israel-pijinë pemomoxi, pexaniacuenia copiapita Israel-pijinë pemomobeje, jiwi peya-enebinëbeje, wajabitsaë pexanaenexa bajarapatomarapijiwimijawabelia. Orijibia, yawenona bajaraponëbeje, peponaenexabeje saicaya namutua, pijawajabitsaë pebeyaxuabiyaniwatsibeje. Bajarapacuenia Rahab-pijiwami pexaniacuene pexanaexae, Dioso aneconijibia tanetsi.
26 Canaëjëtsianatsi mapacueneje: Wajaperabëto baja cajena namatawenona pejumali waja-aperabësaënexa. Itsiata, itsa ajumalijibi, tëpa baja. Bajarapacuenia itsi waja-itaxutuajamatejemajawa Diosojawabelia. Itsa apo-exanaetsi pexaniacuene, wajayawenonaenexa itsamonaejawabelia, waja-itaxutuajamatejemajawa bepetëpaejawa, Dioso pitabarata.