2
¡Paneyapëtaexae apopewerewerecaejawanexa Jesús peliwaisi, pacopabare baja daxita pibisiacuene pane-exanabiabijawa itsamonaejawabelia, itsamonae paneyamaxë-itojorobabiabijawa-ata! Pacopabare yamaxë-itojorobiaya panenayabaracuaicuaijaitsabiabijawa bepexaniajamatabëcuenewi papecataenexa itsamonae. Pacopabarenua itsamonae panecueneca-ëbabiabijawa, panebaracuaicuaijaitsabiabijawa-ata pibisiacuenia.
2 ¡Biji rajane, pacuenia pejananaexanaenacueto bitso bajitsipa mitobarëmene piapaenexa, bajarapacuenia pijinia, paxamë bitso pajitsipare Dioso pejumeliwaisi! Bajarapaliwaisi baja cajena, bewajaxaejawa tanetsi wajajamatabë-ëthëtonexa. Nexata, bajarapaliwaisi itsa palebabiabianame, pewajënaeyabelia pacatsijamatabëcuenewitsabaponaena. Nexata, bajarapaliwaisi pejamatabëcueneta Dioso pacajamatabëcuenenaweretsia-exanaena, xaniawaetsia panejinawanapaenexa Dioso papecatojitsipaecuenia, papecacapanepaexae.
3 Bajarapacuenia pa-exanawanapaename, tsipaji pepacuene pajamatabëcueneyapëtaneme baja Wajatuxanenë pexaniajamatabëcuenenëcuene.
Pacuenia iboto apowerewerecae mapanacuataje, bajarapacuenia pijinia Cristo apopewerewerecaenë tsane daxitamatacabijawabelianexa
4 ¡Wajatuxanenë pexaniajamatabëcuenenëxae, nexata pana-imoxoyore bajaraponëjawabelia, tsipaji pepopitawanë tsaponaponae! Nexata, Dioso itapeta pexënato bepexaniawiria penamatamotsi-iboto. Itapetanua bepenamataxainae-ibotonexa.a Pacuenia bajayatami Dioso pijatemplobo penacuenebiwi naitaxutojematabuata bajarapitsi-ibotomi, copiaya pecanacuenebi-ibotonexami, petsita-abejexaetsi, bajarapacuenia pijinia, mapanacuapijiwije naitaxutojemata Cristo. Apo-asiwanua bajaraPonë.
5 Pacuenia Cristo aitawa tsaponaponae, bajarapacuenia paxamë-ata pajamatabëcuene-aitawamë tsawanapae Dioso pitabarata. Nexata, Dioso pacacanacueneba be-ibotoxicuenia,b Cristo yajawa, pexananutsinexa bepijabo panejamatabëcuenejawata, pataxunaeta ponapona bajaraPonë, bepijatemplobo. Orijibia, paxamë paca-itapetanua sacerdotewicuenia, bajarapatemplobojawata panetonacuenebiwinexa, bajarajota pexaniajamatabëcuenejawanë panerajutaponaenexa ofrendacuenia,c xuanë Dioso siwajamatabëcuenebarëyajitsia.
6 Nexata, tajëwelia Dioso pejumeliwaisibaxutota Cristo yabara jumaitsi mapacueniaje:
«Ta-itapetsinë netoponaponaena Jerusalénd tomarata. Bajaraponë copiaya bepecanacuenebi-ibototsi tsane. Ta-itapetsinë bepexanianamatamotsi-ibotonua tsane. Nexata, pajiwi siwanajamatabëcuenecopatsiana bajaraPonëjawabelia, aponacueratsi tsane»,e jai bajarapacuenia Dioso pejumeliwaisibaxutota tajëwelia Cristo yabara.
7 Bajaraxuata paxamë, Cristojawabelia panesiwanajamatabëcuenecopabiwi, bajaraponë pacatonamatamota pane-asiwanexa. Itsiata baitsi jane, pamonae Cristojawabelia aposiwanajamatabëcuenecopabi, bajarapamonae Cristo tane bepiabeje-ibotocuenia, bepefirapanucae-exanae-iboto tsanucae jiwi, peneconitsixaetsi apopesiwanajamatabëcuenecopabixae bajaraponëjawabelia. Bajaraxuata, copiapata pacuenia Dioso pejumeliwaisibaxutota tajëwelia najumecapanepaeya jumaitsi Cristo yabara:
«Pa-iboto itsamonae bo-exanaewi, petsita-abejexaetsi, naitaxutojematabuata, bajarapa-iboto itsamonaenexa tonamatamotatsi, pecanacuenebinexa copiaya pebuatsi-ibotonexa boyenepanatotsotota»,f jai Dioso pejumeliwaisibaxutota tajëwelia pamonae yabara Cristojawabelia siwanajamatabëcuenecopabijitsia.
8 Bajarapacuenia pijinia, itsataxunaeta, Dioso pejumeliwaisibaxutota, pamonae Cristojawabelia apopesiwanajamatabëcuenecopabiwinexa yabara jumaitsi mapacueniaje:
«Bajarapa-iboto itsamonae firapecaeya-exanaenatsi.g Bajarapa-iboto pijinia itsamonae jopaeya-exanaenatsih», jai Cristo yabara.
Bajarapamonae apopejumexaniataexae Jesús peliwaisi, Dioso tocaëjëta penaneconitsia-exanaejawanexa, bepenaxuabia-exanae-ibotonexatsi.i
Dioso pijajiwi yabara peliwaisi
9 Itsiata, paxamë Dioso apopapecananeconitsia-exanaewinexa. Dioso baja cajena nacaemonaecuenia paca-itapeta papijajiwinexamë. Dioso, pepopewetsinë, paca-itapeta papijasacerdotewinexamë, paneyapëtaeya-exanaenexa jiwijawabelia pacuenia Dioso cuene-itsi. Papeca-itapetsijawatanua pacatsata aneconijibia panejinawanapaenexa mapanacuataje, bajaraPonë pitabarata. Papijajiwixaemë, saicaya Dioso pacaxaina, panewajunupaebawanapaewinexa Dioso ayaicuene pexanaejawanë. Bajarapacuenia pawajunupaebianame itsamonaejawabelia, pacuenia bajaraPonë pacajunata panewecuapitsapaejawa pitaquirijamatabëcuene, juya panexainaenexa penaitayotsijamatabëcuene. Dioso pijapena-itayotsijamatabëcuene, bitso pexaniajawa cajena.
10 Paxamë abaxë Cristojawabelia panesiwanajamatabëcuenecopabiwajënaeya, Dioso picani apopapijajiwimë.j Itsiata, aeconoxae Dioso papijajiwimë tsawanapae. Imatanua abaxë apopanatoyapëtaemë Dioso papeca-itaxutotsoniataejawanexa.k Itsiata baitsi jane, aeconoxae papijajiwixaemë, panatoyapëtaneme baja Dioso papeca-itaxutotsoniataejawa.
Pacuenia Jesús peliwaisi pejumexaniataewi bejinawanapa, Dioso petonacuenebawanapaenexa, yabara peliwaisi
11 Tajamonae, bitso pataca-asiwawi, ayaicuenia pacawajëtatsi panepata-othopaewi cae-epatoyocuenia panejinawanapaenexa mapanacuataje. ¡Panataema caecuenia Dioso pijanacuatatsia bepanejinawanapaewi, pane-exanaeyaniwa daxita picani papibisiacuene jamatabëpa-exaname; papibisiajamatabëcuenejawanë jaita papecajamatabëcuene-amoneyabinexa!
12 ¡Paxamë xaniawaetsia patsitajinawanapare, pamonae Dioso apopeyapëtaewi tuatuajëta, itsajota pajinawanapame! Maparucaeje bajarapamonae pacabaracuaicuaijai, bepibisiacuene pane-exanaewi, papecacuenetaexae. Itsiata, pamatacabil Dioso tocanaëjëtsiana daxita jiwi pijaneconi, bajarapamonae matapania yapëtaena pexaniacuene pane-exanawanapaejawa. Nexata, wënëxaniatsiana Diosojawabelia, pexaniacuene pexanaponaponaenë yabara.
Jesús peliwaisi pejumexaniataewi yaiyataeya bejumecowënëta nacua pewetsiwi
13 ¡Payaiyataema, pajumecowënërenua,m pacuenia paca-itoroba, pamonae daxita nacuajawa pewetsiwi, itsajiwi-ata pebaracuaicuaijaiyaniwa Wajatuxanenë Jesucristo! ¡Bajarapacuenia pijinia, pajumecowënëre ponë, pepopewetsinë, panijanacuata daxita pewetsiwiwecua!
14 ¡Bajarapacuenia pajumecowënëre papecayanacua-ewetsiwi, tsipaji pepopewetsinë tocopata bajarapamonae, penaneconitsia-exanaenexa pibisiacuene pexanaewi, yaiyataeya-ata pewajunupaebinexatsi, pexaniacuene pexanawanapaewi!
15 Bajarapacuenia Dioso pacatojitsipa, xaniawaetsia panetsita-exanawanapaenexa pexaniacuene, panemoya-exanaenexa pamonae pacabaracuaicuaijai pibisiacuene bepane-exanawanapaewi. Bajarapamonae apopeyapëtaexae Jesús peliwaisi, jemaliwaisicuenian pacabaracuaicuaijai.
16 Paxamë, Jesucristojawabelia panesiwanajamatabëcuenecopabiwi, bajaraponë baja panijatuxanenë pa-exaname, panejumecowënëtabiabinexa daxita pewetsiwi papeca-itorobicuenewecua. ¡Nexata, Dioso papijajiwixaemë pejitsipaecuenia pa-exanawanapare! ¡Paxainae-atamë papeca-itorobiwi mapanacuataje, pëtsa pa-exanameo Dioso apopejitsipaecuene, paca-itorobi-atap pibisiacuene pane-exanaenexa!
17 ¡Biji rajane, daxitajiwi yaiyataeya pajinawanapare! ¡Pa-asiwamëre daxita Jesucristojawabelia panenajuasiwanajamatabëcuenecopabiwi! ¡Dioso yaiyataeya pacujunaware! ¡Payaiyataemanua pepopapecayanacua-ewetsinë!
Amoneya petonacuenebiwi pijatuxanewi bejumecowënëta pijatuxanenë, bejiobia-exanae-atatsi pesiwanajamatabëcuenecopabixae Cristojawabelia
18 ¡Paxamë itsamonae amoneya panetonacuenebawanapaewi, pajumeyaiyataeyabiabare pacuenia paca-itorobabiaba panijatuxanewi! ¡Pa-exanawanapare pacuenia paca-itorobabiaba panijatuxanewi, pexaniajamatabëcuenewi, itsa jume, piajamatabëcuenebejewi-ata!
19 Nexata, panijatuxanenë piajamatabëcuenebejenë panetonacuenebijawata itsa pacabejiobia-exana, xaniawaetsia patonacuenebi-atamë,q bajaraxua yabara Dioso pacasiwajamatabëcuenebarëya tsane.
20 Itsiata, bijiaya panetonacuenebixae, itsa pacabejiobia-exanaejitsipa, bajaraxua yabara Dioso apopacasiwajamatabëcuenebarëya tsipae. Itsiata, pexaniacuenia patonacuenebi-atamë, itsa pacabejiobia-exanaejitsipa, bajaraxua yabara Dioso pacasiwajamatabëcuenebarëya.r
21 Bajaraxua yabara Dioso pacajunata, papecabejiobia-exanaenexa, pexaniacuene pa-exanawanapae-atamë. Bajarapacuenia itsa pacabejiobia-exanaena, Cristo pacuenejëpaename, tsipaji bajaraPonë-ata bejiobia-exanatsi papecasiwatëpaejawata, pexaniacuene pexanabiabinë-ata.
22 Yapëtanetsi baja cajena pacuenia Cristo, caeto-ata pibisiacuene apo-exanae. Apoyamaxë-itojorobi cajena itsajiwiyojawabelia-ata.
23 Paepatota anaeyacuenia bijatanetsi, anaeyacuenia juya apojumecanawiatsi. Paepatota bejiobia-exanatsi, cuenecanawiatsiaya aponayamatamotsiapaebi. Biji rajane, Cristo tocopata Dioso pecobeyabelia, pebejiobia-exanaewitsi penaneconitsia-exanaenexa pijaneconijamatabëcuene, tsipaji Dioso jiwi pijaneconi xaniawaetsia petocanaëjëtsinë.s
24 Cristo baja tsijumaxuabatsi waxaitsi pibisiacuene waja-exanaeneconi, pijaneconi bepexainaenëcuenia itsa nacasiwatëpa cruzata.t Bajarapacuenia Cristo itsa nacato-exana, bewajanacayajawatëpae pibisiacuene waja-exanaejawamiwecua, bajarapacuenia jamatejema wajajinawanapaenexa wajawajënaeyabelia Dioso pejitsipaecuenia. Cristo nacasiwawajënërubatsiu wajanacajamatabëcuenexaniawaetsinexa pibisiajamatabëcuenewecua, xaniawaetsia wajajinawanapaenexav Dioso pitabarata.
25 Baitsi, waxaitsi picani Diosowecua naxuabiaya jinawanapatsi, pacuenia oveja, pewetsinëtsiwecua naxuabiaya jinawanapa. Itsiata baitsi jane, aeconoxae baja nawiabatsi Cristojawaberena, ponë, wajanaca-ewetsinë pija-ovejawitsicuenia,w wajanacajamatabëcuene-ewetaponaponaenënexa.