Penacojiobiwi pijaliwaisi
Petiriawi pijaliwaisi
3
¡Paxamë papetiriawimë, Jesucristo panesiwanajamatabëcuenecopabiwi, pacaewamë canacujitsia, pane-amonaa jumecowënëtsiaya pajinawanapare! Bajarapacuenia itsa pajumecowënëtawanapaename pane-amonajiwi, itsa abaxë jume-aeba Jesús peliwaisi, papecacuenetaejawata belia bajaraponë-ata siwanajamatabëcuenecopatsiana Jesús-jawabelia, apopatsipaebi-atamë Jesús peliwaisi.
2 Nexata, pane-amonajiwi papecacuenetaejawata pexaniacuenia panetsitajinawanapaejawa, yaiyataeya-ata panetsitajinawanapaejawa Dioso pitabarata, nexata bajaraponë belia siwanajamatabëcuenecopatsiana Jesucristojawabelia.
3 ¡Papetiriawimë, pëtsa panasiwanajamatabëxainame naniawelia panenaitabëtsijawa yabara, pexaniawacuenia papecataenexa! Dioso pexaniawacuenia apopacatae, saya pexaniacuenia panenamatafaratsixae, panenaperabë-itabëtsixae oronanitota pexanaejawanëta, panenaxatabixae-ata bitso pexaniawirianaxatabijawanë.
4 ¡Biji rajane, panasiwanajamatabëxainare bëpënëa panenajamatabëcuene-itabëtsijawa, pexaniawacuenia papecataenexa Dioso! ¡Nexata, apopewerewerecaejamatabëcuenejawanëta, panajamatabëcuene-itabëre mapacueniaje!: Asiwaya panetaejamatabëcuene itsamonaejawabelia, panesiwanajamatabëcataitsijamatabëcuene itsamonaejawabelia paca-itsacueniabi-ata. Bajarapajamatabëcuenebeje Dioso bitso tsitanamatamotatsi daxitajamatabëcuenianëwecua, panenajamatabëcuene-itabëtsinexa, pexaniawacuenia papecataenexa.
5 Bajarapacuenia pijinia, najamatabëcuene-itabëtabiaba bajayatami, papetiriawi Dioso pejitsipaecuenia exanawanapa. Bajarapamonaemi itaxutuajamatejema Diosojawabelia. Yaiyataeyanua jumecowënëtawanapa pamonajiwi.
6 Bajarapacuenia bajayatami Sarapijiwami najamatabëcuene-itabëta. Pamona, Abraham-pijinë, jumecowënëtsia ponapona. Nexata, itsa junata pamona «Tajatuxanenë», jai tsabiabi pamonajawabelia. Nexata, paxamë papetiriawimë pacuenejëpaename Sarapijiwami, itsa pa-exanawanapaename Dioso pejitsipaecuenia, itsa apopacujunawimënua tsane xua pane-amonajiwi pacato-exanaejitsia, Dioso pejitsipaecuenia pane-exanawanapaexae. Bajarapacuenia itsa pa-exanawanapaename, Sarapijiwami bepapexënatowaximëb tsane.
Pebijiwi pijaliwaisi
7 ¡Paxamë papebijiwimë, Jesucristojawabelia panesiwanajamatabëcuenecopabiwi, pacuenia panijawajiwi pacayaiyatane, bajarapacuenia pijinia, xaniawaetsiac yaiyataeya pabarëjinawanapare panijawajiwi! Payapëtaneme rabaja beweliajamatabëcuenesaë pexainaewicuene. ¡Bajarapacuenia payaiyataema, tsipaji bajarapamonae-ata yajawa Dioso pacarajutsiana matacabi apopewerewerecaejawa! ¡Bajarapacuenia xaniawaetsia pabarëjinawanapare panijawajiwi, caejamatabëcuene panenajuaxainaenexabeje, papecacuenecaranatsiyaniwad panenawajëcaejawa Diosojawabelia!
Daxita Jesucristojawabelia pesiwanajamatabëcuenecopabiwi pijaliwaisi
8 Pecopiarucaeliwaisita, jitsipajë padaxitamë patacamuxujiobijawa mapacueniaje: ¡Najamatabëcuenejëpaeya pajinawanapare! ¡Nasiwaya panajamatabëcueneyanabare namata-enetsia, nacaemonaecuenia itsacuene itsa pacatocopiapata! ¡Naitaxutotsoniataeyanua pajinawanapare! ¡Beweliajamatabëcuenewinua nataeya pajinawanapare!
9 ¡Nexata, itsajiwi pibisiacuene itsa paca-exana, pëtsa pacuenecanawiatame! ¡Pibisiacuenia itsa pacabijatanenua, pëtsa anaeya pajumecanawiatame! ¡Pamonae pijinia pibisiacuene pacato-exana, anaeya pacabijatanenua, patowajëre Diosojawabelia pexaniacuenia peyawenonaenexatsi, tsipaji raja Dioso paxamë pacajunata papijajiwinexamë, pexaniacuenia papecayawenonabiabinexa!
10 Bajarapacuene yabara Dioso pejumeliwaisibaxutota jumaitsi mapacueniaje:
«Pajiwi jitsipa bajayajebi piasaëtsaponaponaejawa, pejamatabëcuenebarëyatsaponaponaejawanua, bajarapajiwi bena-ebarëto-eweta pibisialiwaisi pecuaicuaijaiyaniwa, penajumetsënëtsiyaniwa-ata.
11 Nawecuacopatsi daxita pibisiacuene pexanabiabijawa, exanaponaponae pexaniacuene. Jaitsi, aliwaisijibia peponaponaenexa pewajënaeyabelia,
12 tsipaji raja Dioso naitaxutocaeweta pewetsinexa pexaniacuene pexanaewi. BajaraPonë namuxuna-ewetanua penawajëtsijawatsi. Itsiata baitsi jane, Dioso cuene-ataejitsibi pibisiacuene pexanawanapaewi. Naneconitsia-exanabiabanua»,e jai Dioso pejumeliwaisibaxutota.
Jesús pijajiwi apobenasiwajamatabëcuenebëjai pebejiobia-exanaejawatsi Jesús pejamatabëcueneta
13 Paxamë payapëtaneme mapacueneje: Pamonae ajamatabëcuenesaë tsawanapae pexaniacuene pexanawanapaejawa, bajarapamonae juya pibisiacuenia apocuenecanawiatsitsi, pexaniacuene pexanaejawa yabara.
14 Itsiata, belia paxamë itsamonae pacabejiobia-exanaejitsipa, xaniawaetsia pajinawanapae-atamë. Bajarapacuenia itsa pacatocopiapata, bitso pajamatabëcuenebarëyamë tsane,f tsipaji raja Dioso pexaniacuene pacato-exanaena bajarapacuene yabara. ¡Pëtsa pacujunawame bajarapamonae! ¡Pëtsa panasiwajamatabëcuenebëjamënua, papecabejiobia-exanaejawa yabara!
15 ¡Biji rajane, panejamatabë-ëthëtojawawetsina yaiyataeya pajumecowënëre panijatuxanenë Cristo! Orijibia, panajamatabëcueneweretawanaparenua, xaniawaetsia panejumecanawiatsinexa itsajiwi itsa pacayanijoba pane-itaxutuajamatejemajawa yabara Cristo.
16 ¡Itsiata baitsi jane, yaiyataeya, beweliajamatabëcuenewi nataeya, pajumecanawiare xaniawaetsia! ¡Cristo papijajiwixaemë, xaniawaetsia patsitajinawanapare, Dioso pitabarata aneconijibia panejinawanapaejawa! Nexata, itsamonae najumetsënëtsiaya pacabaracuaicuaijai tsabiabi-ata tsane, bajarapamonae belia najumecopabiana. Naurabiananua papecabaracuaicuaijaitsabiabijawa.
17 Bajarapacuenia itsa Dioso pacatocopatsipa, itsamonae papecabejiobia-exanaenexa, matatoxenetsia bitso xanepana papecabejiobia-exanaejawag pexaniacuene pane-exanaejawa yabara, papecabejiobia-exanaejawawecua pibisiacuene pane-exanaejamatabëcuene.
18 Bajarapacuenia cajena Cristo, pexaniacuene pexanaenë-ata, bejiobia-exanatsi wajanacasiwatëpaejawata. Caeto rabaja nacasiwatëpa. Nexata, pematatsënëa aponacasiwatëpae tsane. Bajaraponë caeto-ata pibisiacuene apo-exanae, itsiata bejiobia-exanatsi waxaitsi pibisiacuene waja-exanaeneconi yabara, wajanacacapanepaenexa Diosojawabelia. Peperabëtomi baja picani tëpa. Itsiata baitsi jane, pepopejamatabëcuene Espíritu Santo icatsia asaëya-exanatsi.
19 Nexata, petëpae-epato Espíritu Santo yawenona Cristo pejamatabëcuene peponaenexa petëpaewimi pejamatabëcuenexih pejinawanapaenacuayabelia, panacuata Dioso tocopata naneconitsiaya pejinawanapaenexa. Nexata, tsipaeba xua yabara tëpa,
20 pamonaemi bajayata apojumecowënëtsi Noépijinë peponaponaematacabita. Nexata, Noépijinë, abaxë itsa nacuenebapona pinijibarcoxaneto, Dioso picani bajayajebi jiwi jamatabëcuene-eweta, Noé petsipaebiliwaisi pejumexaniataenexatsi. Itsiata baitsi jane, apojumecowënëtsitsi. Saya ocho pajiwiyobeje, Noépijinë, pijamonae yajawa, bajarapamota Dioso capanepatsi, mapanacuaje pebubutsijawawecua. Bajarapamera pejamatabëcueneta, Noébana capanepatsi.
21 Dioso itsa capanepa Noébana bajarapamerata, bajaraxua nacatocuenecatane wajanacabautizabijawa. Wajanacabautizabijawata, najamatabëcuene-itajëtatsi Dioso wajanacacapanepaejawa wajanacananeconitsia-exanaejawaminexawecua, pacuenia bajayatami, capanepatsi bajarapa-ochopajiwiyobeje jiwi penaneconitsia-exanaejawa bajarapamerata. Aponacabautizabi baja cajena saya wajanacaperabëquiatsinexa. Biji rajane, nacabautizaba, wajanajamatabëcuene-itajëtsinexa Dioso wajanacajamatabëcuenequiatsijawa, aneconijibia wajanacataexae Cristo wajanacasiwatëpaejamatabëcueneta. Nexata, yapëtanetsi pexaniajaicuene Dioso wajanacajamatabëcuenequiatsijawa, tsipaji Jesucristo wajanacasiwatëpaecujinae, icatsia Dioso asaëya-exanatsi. Yapëtanetsinua pepacuene Dioso wajanacacapanepaejawanexa, Cristo wajanacasiwatëpaexae.
22 Nexata, piasaëya-exanaecujinaetsi pona jane baja, athëbëabetsia, pe-ecaenexa paxa Dioso pecujuanenia. Nexata, maparucaeje Dioso tocopata Jesucristo penamatacaitorobinënexa. Bajaraxuata, daxita Dioso pija-ángelewi, pamonae-ata dowathiwi,i penamatacaitorobisaë pexainaewi, daxita bajarapamonae jamatabëcuene-ewetawanapa Cristo penematacaitorobijawatsi.