Asaëyata betonacuenebawanapatsi Dioso, mapanacuapijiwije nacabejiobia-exanae-ata
4
Cristo abaxë itsa ponapona mapanacuataje, itsamonae bejiobia-exanae-atatsi, penawixaetaenexa peperabëtota, itsiata tsitecaeya Dioso pejitsipaecuenia exanaponapona. ¡Bajarapijinia paxamë-ata pajamatabëcuene-itsimëre tsawanapae papecabejiobia-exanaejawanexa yabara, tsipaji pajiwi bejiobia-exanatsi penawixaetaenexa peperabëtota pexaniacuene pexanaexae, bajarapajiwi baja nawecuacopata pibisiacuene pexanaejawa!
2 Bajarapacuenia pibisiacuene penawecuacopatsixae, peponaponae-epato pewajënaeyabelia exanaponaponaena ëDioso pejitsipaecuenia. Copata baja pijacuata penajamatabëxainaecuenia pexanabiabijawa.
3 Bajayata, picani paxamë-ata bajarapacuenia bitso pibisiacuene pa-exanawanapame, pacuenia aeconoxae exanawanapa pamonae Dioso apopeyapëtaewi. Jesucristojawabelia panesiwanajamatabëcuenecopabiwajënaeya, paxamë-ata najamatabëcuenecataitsinejewa panewitota pibisiacuene pa-exanawanapame. Pasiwanajamatabëxainabiabame pibisiacuene pane-exanaejawa. Panijabonëjawa, pane-exanaefiestanëjawa-ata, paitajibimë tsabiabi, itsajota apocaewiria pibisiacuenejawanë pa-exanabiabame. Asiwaya pasiwanajamatabëcuenecopatabiabamenua jumapecataeya pexanaenëanëjawabelia, xuanë Dioso tane pepopitoyajawanë. Itsiata baitsi jane, aeconoxae daxita bajarapacuene pacopabame baja.
4 Aeconoxae baja bajarapacuenejawanë panecopabixae, nexata apopanajua-exanawanapaemë, bitso papibisiacuenejawanë picani panajua-exanabiabame. Bajaraxuata, bajarapamonae pacacuene-itothiatane. Nexata, pibisiacuenia pacabaracuaicuaijai tsabiabinua.
5 Itsiata baitsi jane, bajarapamonae itsamatacabi Dioso pitabarata nubenaena,a penawajunupaebinexa pijaneconi. BajaraPonë raja tocanaëjëtsiana pijaneconi pexainaewi, pamonae abaxë asaë tsawanapae, pamonae-ata petëpaewi, penaneconitsia-exanaenexa.
6 Bajaraxuata, Cristo tsipaebab baja pexanialiwaisi petëpaewimi pejinawanapaenacuajawabelia. Nexata, pamonae mapanacuapijiwije beyejebatsi pitaxutuajamatejemaxae Diosojawabelia, tëpae-ata,c jamatabëcuene-asaë tsawanapae daxitamatacabijawabelia, Dioso pejamatabëcueneta.
Pacuenia Cristo pijajiwi bejinawanapa itsa baja imoxoyo pewerewerecaejawa mapanacuaje, yabara peliwaisi
Jesús pijajiwi namata-enetsia penayawenonaecuene
7 Tajamonae, imoxoyo rabaja pewajënae daxitacuene peyajawawerewerecaenexa mapanacuaje. ¡Bajaraxuata, nacuenexaniawaetsiaya pajinawanapare pibisiacuene pa-exanaenejewamë, najamatabëcuene-ewetsiaya xaniawaetsia panejinawanapaenexa Dioso pejitsipaecuenia! Panajamatabëcuenesaëtawanaparenua namata-enetsia panenajuawajëcabiabinexa Diosojawabelia.
8 Daxita pane-exanaejawawecua, matatoxenetsia pacatoxanepana namata-enetsia panena-asiwatsawanapaenexa, tsipaji itsa asiwatsi itsajiwi-ata, nexata pibisiacuene naca-exanabiabi-ata, bajarapajiwi siwajamatabëcuenecaewatsi.
9 ¡Namata-enetsia xaniawaetsia panacopiapire panijaboyaberena, jamatabëcuenexanepanaeya! ¡Nexata, papecatopatsijiwi penamatawenonaejawata parajure pexaejawa! ¡Bajarapacuenia patsicopare pataxunaeta majitsijitsia, itsajamatabëcuene paxainaenejewamë bajarapajiwijawabelia!
10 ¡Pacaejiwimë canacujitsia, Dioso saicayacuenia papecajamatabëcuenecaëjëpaeya-exanaexae, bajarapajamatabëcuene xaniawaetsia patocanacuenebawanapare, namata-enetsia panenajamatabëcueneyawenonaejawata!
11 Nexata, pajiwi paeba Dioso peliwaisi jiwibitsaëtojawata, bajarapajiwi tsipaebi Dioso pejamatabëcuenecaëjëpaeya-exanaecueniatsi. Pajiwi pijinia yawenona itsamonae, bajarapajiwi yawenonae Dioso pejamatabëcuenecaëjëpaeya-exanaecueniatsi. ¡Daxita xua pa-exaname Jesucristo pejamatabëcuene, bajaraxua pa-exanare jiwi peyaiyataenexa Dioso, tsipaji daxita jiwi toxanepanatsi Dioso yaiyataeya pewënëxaniatsijawa ayaijamatabëcuenenë yabara, piacuenesaënë yabara-ata daxitamatacabijawabelianexa! Bajara-itsi tsane.
Jesucristojawabelia pesiwanajamatabëcuenecopabiwi bejamatabëcuenebarëya tsawanapae, itsamonae bejiobia-exanaponae-atatsi
12 Tajamonae, bitso pataca-asiwawi, maparucaeje itsamonae pacabejiobia-exanapona, Cristo papijajiwixaemë. ¡Bajaraxua yabara pëtsa pajamatabëcuenenabenajacame! ¡Pëtsa panatocanaëjëtamenua papecatocopiapatsijawa pitothiacuenia! Bajarapacuene pacatocopiapata papecajamatabëcuene-ëjëtsijawa,d papecajamatabëcueneyapëtaenexa pepacuene panesiwanajamatabëcuenecopabijawa Diosojawabelia.
13 ¡Nexata, papecabejiobia-exanaponaejawa yabara panasiwajamatabëcuenebarëyamëre tsawanapae, tsipaji Cristo-ata bejiobia-exanatsi pacuenia paxamë pacabejiobia-exanapona maparucaeje! Nexata, pamatacabi pataename Cristo peyajawapatsijawatsica pijapeniweniwenaecotia, ayaicuenia pasiwajamatabëcuenebarëyamë tsane.
14 ¡Bajaraxuata, bitso pajamatabëcuenebarëyamëre pibisiacuenia itsamonae itsa pacabijatane, Cristo peliwaisi panejumexaniataexae, tsipaji raja paepatota itsamonae pacabijatane, ayaijamatabëcuenenë Espíritu Santo, ponë pacayajawaponapona, ayaicuenia pacayawenonaena!
15 Bajaraxuata, paxamëyajuwënënë apobebejiobia-exanaetsi, jiwibenëxae, penacobetoxotsinëxae, liwaisi itsamonae petsi-exanaenëxae, bajarapacuenia-ata itsamonae pijaliwaisijawabelia penacajonenëxae.
16 ¡Biji rajane, itsa pacabejiobia-exana Jesucristojawabelia panesiwanajamatabëcuenecopabixae, pëtsa panaca-auramë! ¡Juya, pexaniajamatabëcuene parajure Diosojawabelia, Jesucristo papijajiwimëcuene paneyapëtaexae!
17 Yapëtanetsi baja pewajënaeya paliwaisi pacatsipaebatsi, nacua imoxoyo pewajënae pecopiarucaematacabinexa yabara, pecopiapatsijawa jane baja, tsipaji itsamonae nacabejiobia-exanapona, Jesús pijajiwixaetsi. Bajarapacuenia nacato-exana, Dioso wajanacatocanaëjëtsinexae waja-exanawanapaecuenejawanë, wajanacacopabia-exanaenexanua pibisiacuene waja-exanaejawa. Nexata, bajarapacuenia itsa nacatocopiapata waxaitsi, Jesucristojawabelia wajasiwanajamatabëcuenecopabiwi, pamonae apopejumecowënëtsiwi Jesús peliwaisi,f pexanialiwaisi, ¿detsa pitsinabejiobitsicuene natotaena? Dioso cajena ayaicuenia naneconitsia-exanaena bajarapamonae, apopesiwanajamatabëcuenecopabixae Jesucristojawabelia.
18 Bajarapacuenia tajëwelia profetanë, wajunupaeba bajarapamonae yabara. Jumaitsi mapacueniaje:
«Pamonae pexaniacuene pexanaewi, itsa panepa tsiquirijawayota Dioso penaneconitsia-exanaejawatsiwecua,
¿Denexata pacuenia wecuapanepaena pamonae Dioso apopejumecowënëtsiwi, bitso pibisiacuene pexanawanapaewi? Bajarapamonae cajena ayaicuenia naneconitsia-exanaenatsi»,g jai profetanë.
19 ¡Nexata, paxamë itsamonae itsa pacabejiobia-exanapona Dioso papecatojitsipaecuenia, pëtsa pajamatabëcuenebëjamë! ¡Biji rajane, tsiteca panewajënaeyabelia pexaniacuene pa-exanawanapare! Pa-itaxutuajamatejemamërenua papeca-exanaenë Diosojawabelia, papecayawenonaenexa. Dioso cajena pacuenia najumecapanepaeya jumaitsi, bajarapacuenia pacato-exanaena.