Nawitsia pemuxujiobiliwaisianë
Ancianowi pewetsicuene yabara
5
Aeconoxae muxujiobiaya pacatoyaquinatsi paxamë pa-ancianowimë. Xanë-ata rabaja ancianonënë, Jesús pijajiwijawata. Xanë raja tataenë pacuenia Cristo cruzata bejiobia-exanatsi. Pamatacabi Cristo patsianica, Dioso itsa tocopatsianatsi ayaijamatabëcuenenëcuenia pewënëxaniatsinexatsi pebejiobia-exanaejawatsi yabara, xanë-ata neyajawawënëxaniatsiana.a
2 Bajarapitsijamatabëcuene tayapëtaexae, pacamuxujiobatsi mapacueniaje: ¡Pacuenia oveja pewetsiwi xaniawaetsia ba-ewetawanapa pija-ovejabitsaëto, bajarapacuenia pijinia, paxamë-ata xaniawaetsia pa-ewetawanapare Jesús pijajiwi, tsipaji raja Dioso pacatocopata bajarapamonae paneto-ewetawanapaenexa! ¡Pëtsa pato-ewetawanapame, saya papeca-itorobixae! ¡Biji rajane, cuenejitsipaeya pato-ewetawanapare Dioso pejitsipaecuenia! ¡Pëtsa pato-ewetawanapamenua, papecamatamotsijawanexa yabara! ¡Biji rajane, panejamatabë-ëthëtojawawetsina panejitsipaexae, Jesús pijajiwi xaniawaetsia pato-ewetawanapare!
3 ¡Pëtsa bepapijatuxanewimë panataneme, pane-itorobabiabinexa pamonae pa-ewetawanapame! ¡Biji rajane, xaniawaetsia patsitajinawanapare, pacuenia patojitsipame bajarapamonae pejinawanapaenexa!
4 Nexata, pamatacabi Cristo patsianica daxita pijajiwi pewetsiwi pepopenamatacaitorobinë, bajaraPonë paxamë papecabarë-ewetsiwi pacarajutsiana bitso pexaniawiriacoronajawa, apopiabejejawanexa daxitamatacabijawabelia, xua yabara jiwi pacayaiyataejitsia pexaniacuenia paneto-ewetawanapaexae.
Daxita pamo nae penacaetuatsiwi Jesús pewënëta pecuene yabara
5 Paxamë pijinia papewëjëawimë pacamuxujiobatsi mapacueniaje: ¡Yaiyataeya pajumecowënëreb pacuenia ancianowi paca-itoroba! Daxita paxamë, Jesús papijajiwimë, namata-enetsia panayawenonabiabianame, beweliajamatabëcuenewi nataeya, tsipaji raja Dioso pejumeliwaisibaxutota jumaitsi mapacueniaje:
«Dioso aponacuenecajitsipae peyawenonaejawa pamonae ayaijamatabëcuenewi penataewi. Itsiata baitsi jane, Dioso pexaniajamatabëcueneta yawenona pamonae beweliajamatabëcuenewi penataewi»,c jai Dioso pejumeliwaisibaxutota.
6 ¡Bajarapacuenia Dioso pexanaexae, beweliajamatabëcuenewi nataeya pajinawanapare Dioso piacuenesaënë pitabarata! Nexata, bajaraPonë ayaijamatabëcuenewi paca-exanaena pa-ayaijamatabëcuenewimë, papecatocaëjëtsimatacabita.
7 ¡Orijibia, daxita panejamatabëcuenebëjaijawa, pacopare! ¡Biji rajane, panajamatabëcuenerajure Dioso, papecayawenonaenexa! Nexata, bajaraPonë papeca-asiwaxae pacayawenonaenad daxitacuene xua picani pasiwajamatabëcuenebëjamë.
8 ¡Nayajiwitaeya pajinawanapare, jamatabëcuene-aitatsacaeya panijawajabitsaënë dowathiwecua, papecajamatabëcueneyamaxë-itojorobiyaniwa! Pacuenia newëthë jemata pinijijumeta xërëjai perëcëtabinexa dajubi pewetsijiwitsiwecua, bajarapacuenia exana jamatejema pewaetabinexa ponë beyaxuabijitsiae bajarajamatabëcuene-itsi dowathi. Aeconoxaeta, jaitaponapona pajiwi jamatabëcueneyamaxë-itojorobijitsia, pejunawiacaejawata.
9 ¡Paepatota dowathi pacajamatabëcuenejaita, papecayamaxë-itojorobinexa, pajamatabëcuenesaëmëre pane-itaxutuajamatejemajawa Diosojawabelia! Payapëtaneme rabaja pacuenia daxitajawa itsamonae-ata, Jesús peliwaisi pejumexaniataewi, bejiobia-exanaponatsi dowathi pejamatabëcueneta, pacuenia paxamë-ata pacatocopiapatapona.
10 Itsiata baitsi jane, saya cae-epatoyonexaf pacabejiobia-exanaena. Bajaraxuacujinae, Dioso pacajamatabëcueneliwaisinaweretsia-exanaena pijacuenejawata. Pacajamatabëcuene-asaëya-exanaena. Pacarajutsiananua caejamatabëcuene panexainaenexa Diosojawabelia. Bajarapacuenia Dioso pacato-exanaena, tsipaji Dioso asiwaya wajanacayawenonaenë tsaponaponae. Nacajunatanua athëbëtatsia, pijapeniweniwenaenacuatatsia, wajanacayajawaponaponaenexa, Jesucristo pejamatabëcueneta. Bajarapacuenianua wajanacayajawaxainaenexag Cristota peyaiyataecuenetsi daxitamatacabijawabelianexa.
11 Dioso baja xaina daxita penamatacaitorobisaë, peyanacua-ewetsinexa daxitamatacabijawabelia. Bajara-itsi tsane.
Pedro penapëjiobicuene yabara
12 Mapaliwaisije yaquinaeya-exanajë wajamonaenë Silvano, paliwaisi pacato-itorobijitsiatsilia. Bajaraponë taniji bepanacaepijinënëbeje, Jesús peliwaisi pejumexaniataexae. Xaniawaetsia ponaponanua bajarapaliwaisita.
Pacatoyaquinatsi mapabaxutoje, patacamuxujiobinexa, patacajamatabëcuene-asaëya-exanaenexanua Diosojawabelia. Pacayapëtaeya-exanatsinua pacuenia Dioso pacajamatabëcuene-itajëtabiaba bitso pane-asiwajawa, bitso pexaniacuenejawanë papecato-exanaejawata. ¡Bajaraxuata, itsamonae pacabejiobia-exanabiabi-ata, pajamatabëcuenesaëmëre tsawanapae, paneyapëtaexae baja Dioso bitso papeca-asiwajawa!
13 Pamonae jinawanapa Babilonia tomarata, Jesús pijajiwi, pacabajacobalia. Bajarapamonae Dioso itapetatsi Jesús pijajiwinexa, pacuenia paxamë-ata paca-itapeta. Marcos, ponë betaxënatocuenia tataenë, bajaraponë-ata pacabajacobalia.
14 ¡Tajamonae, panenacopiapitabiabijawata, namata-enetsia na-asiwaya panabajacobare bepanacaemonaemëcuenia, panenajuasiwanajamatabëcuenecopabixae Jesucristojawabelia!
Pacatojitsipatsi daxita paxamë, jamatabëcuenexanepanaeya panenajuajinawanapaenexa Jesucristo papijajiwixaemë. Bajara-itsi tsane.