Jesús pijajiwi xuanë bexanawanapa, Dioso pesiwajamatabëcuenebarëyanexatsi
13
¡Pëtsa pacopabame namata-enetsia panena-asiwatsawanapaejawa, Jesucristojawabelia panenajuasiwanajamatabëcuenecopabiwi!
2 ¡Pëtsa panacofënëtame xaniawaetsia panecopiapitabiabijawa apopaneyapëtaewi-ata, pamonae pata panijaboyaberena! Bajayata, itsamonae bajarapacuenia xaniawaetsia jiwi pecopiapitabiabiwi, xaniawaetsia copiapita ángelewi,a apoyapëtae-ata ángelewicuene.
3 ¡Panajamatabënapitabiabare pamonae jebatsi penaneconitsiwi pejebabiabibota, Jesucristojawabelia pesiwanajamatabëcuenecopabixae! ¡Paxamë-ata, bajarapamonae yajawa, bepanenajuananeconitsiwi panataema! ¡Bajarapacuenia pijinia, pamonae-ata bejiobia-exanatsi Dioso pejumeliwaisi yabara, pajamatabëcueneyawenonare! ¡Panataemanua bepapecayajawabejiobia-exanaewi!
4 Daxitajiwi beyaiyatane penacojiobijiwi. Pajiwibeje baja napitabeje, apobenawecuanamatayajitsibeje. Pebi apobejaitsi itsawa pijawawecua. Petiriwa pijinia apobejaitsi itsanë pamonawecua, tsipaji Dioso naneconitsia-exanaena bajarapitsipibisiacuene pexanaewi.
5 ¡Pëtsa bitso panajamatabëcuene-enaeyabame palata panejitsipaejawa! ¡Biji rajane, pasiwajamatabëcuenebarëyamëre saya xuayowajëto paxainame, tsipaji Dioso najumecapanepaeya jumaitsi mapacueniaje!: «Apopacacopatsitsi tsane patacayajawaponaponaejawa», jai Dioso.
6 Bajaraxuata, itaxutuajamatejemaya Dioso yabara namata-enetsia najumaitsitsi tsane mapacueniaje:
«Dioso cajena wajanacayawenonaenë. Nexata, apojunawitsi tsane, itsajiwi naca-itsacueniabijitsia-ata», najaitsi tsane waxaitsi namata-enetsia.
7 ¡Pacuenenajamatabënapitabiabare pacuenia bajayata pacatsitajinawanapa pamonaemi pacatsipaebawanapa Dioso pejumeliwaisi! Bajarapamonaemi Jesucristojawabelia pesiwanajamatabëcuenecopabijawaweliacujinae, xaniawaetsia jinawanapa, Dioso pitabarata. ¡Bajarapacuenia paxamë-ata Dioso pitabarata xaniawaetsia pajinawanapare, matapania panetëpaejawabelianexa!
8 Jesucristo raja caejamatabëcuene pexainaponaponaenë. Itsajamatabëcuene apoxainae epatua. Pamatacabibeje ponapona, pewajënaeyabelia-ata daxitamatacabijawabelianexa, caejamatabëcuene xainaponaponaena.
9 ¡Bajaraxuata, pëtsa pajumexaniataneme itsaliwaisi Jesús peliwaisiwecua! Bajarapapitothialiwaisianë aponacajamatabëcueneyawenonae itsacuenejawayo-ata. Biji rajane saya, caranata Dioso wajanaca-itaxutotsoniataejawawecua, juya nacajamatabëcuene-enaeyabia-exana, xua xanepana wajaxaenexa, xua-ata nacajani-itaweta wajaxaeyaniwa. ¡Bajaraxuata, pajamatabëcuenesaëmëre tsawanapae Dioso aneconijibia papecataejawa Jesucristo pejamatabëcueneta, pacuenia nacayapëtaeya-exana Jesús peliwaisi!
10 Waxaitsi wajasiwanajamatabëcuenecopabiwi Jesucristojawabelia, yapëtanetsi Dioso aneconijibia wajanacataejawa, Jesucristo pejamatabëcueneta. Itsiata, pamonae tsiteca casaë Dioso aneconijibia petaejawanexatsi, ëperujuliwaisimi, Dioso penajumecopatsiliwaisi Moisés-pijinëta, pejumecowënëtsijawata, jamatabëcuenenawëxaniabiaya canaëjëta. Bajarapitsijamatabëcuene penajamatabëxainaewi, Dioso aneconijibia apotae tsane,b tsipaji jume-aeba Jesús peliwaisi.
11 Sacerdotewi pepopenamatacaitorobinë dajubinë wësinepecaucuta pebeyaxuabinexa. Nexata, waxiyota pejanacaewetsicujinae, cajoneyabiaba Dioso pijacarpaboxaneto-ënëabelia, Pepopeyaiyataetaxunae-ënëabelia, pataxunaeta Dioso ponapona. Bajarapayatu-ucutsijawa-ënëta, Dioso pijabaula pebocaejawa, sacerdotenë dajubinë pejanata jumatsicababiaba, Dioso pesiwajamatabëcuenecaewinexa pebara-anaepanaejawami, jiwi pibisiacuene pexanabiabineconi. Nexata, bajarapadajubinë pewi sacerdotenë tajuitabiaba, tomarapënëyabelia.
12 Bajaraxuata, Jesús-ata Jerusalén tomarapënëyabelia beyaxuabatsi pebejiobia-exanaecueniatsi. Nexata, daxita pamonae jumexaniatane Jesús pesiwatëpaejawatsi, Dioso wecua-ajibia-exanatsi pibisiacuene pexanaeneconimi, Jesús pejana pejamatabëcueneta.
13 Bajaraxuata, pacuenia naca-itoroba perujuliwaisi, becopabatsi waja-exanaejawami, Dioso aneconijibia wajanacataejawanexa. Biji rajane, aneconijibia wajanacataenexa, besiwanajamatabëcuenecopatatsi Jesús-jawabelia. Nexata, pacuenia Jesús pia-uracuenia beyaxuabatsi tajë tomarawecua,c bitso pijaneconi pexainaenëcuenia, bajarapacuenia pijinia waxaitsi-ata benacopatatsi itsamonae wajanacabejiobia-exanaenexa, Jesús pijajiwixaetsi.
14 Apobenasiwabëjaitsi xua nacato-exana mapanacuapijiwije, Jesús pijajiwixaetsi, tsipaji mapanacuataje apowajajinawanapaewinexa. Biji rajane, abaxë wajënae-ewetawanapatsi athëbëtatsia pe-ecaetomara, itsabetsia patsijitsiatsi, wajajinawanapaenexa daxitamatacabijawabelia.
15 Bajaraxuata, nacabejiobia-exanae-ata, pexaniacuenia bewënëxaniatabiabatsi Dioso, Jesucristo wajanacasiwatëpaexae. Bajarapacuenia wajajumaitsabiabijawa Diosojawabelia, nexata, taena ofrendacuenia bewajarajutaponaejawa.
16 ¡Pëtsa panacofënëtamenua pexaniacuene paneto-exanawanapaejawa itsamonaejawabelia, paneyawenonaejawa-ata penamatawenonaewi! Bajarapacuenia itsa pa-exanawanapaename, bajaraxua pacatotaenanua ofrendacuenia bepanerajutaponaejawa. Nexata, Dioso pacasiwajamatabëcuenebarëya tsane.
17 ¡Pamonae Dioso tocopatatsi papeca-ewetsiwinexa, Jesús peliwaisi panejumexaniataexae, ancianowi, itsamonae-ata, xua paca-itoroba, pajumecowënëtabiabare! Bajarapamonae yapëtanenua pacuenia Diosojawabelia naneconitsipa, xaniawaetsia itsa apopaca-ewetsi. Itsa pajumecowënëtabiabianame papeca-itorobicuenia, nexata papeca-ewetsiwi jamatabëcueneyawenonaeya pajinawanapaename. Pacasiwajamatabëcuenebarëyanua tsane papeca-ewetawanapaejawa yabara. Paxamë itsa apopajumecowënëtsimë tsipae, nexata papeca-ewetsiwi pacasiwajamatabëcuenebëjai tsipae. To-acuenebitsinua tsipae papecajamatabëcueneyawenonaenexa, xaniawaetsia panejinawanapaenexa Dioso pejitsipaecuenia.
18 Panetowajëtaponaename Diosojawabelia, pataneyawenonaenexa pejitsipaecuenia patajinawanapaenexa. Itsiata, apopanatoyapëtaenë xua yabara Diosojawabelia, jiwijawabelia-ata, pananeconitsipajë. Bajarapacuenia patawajënaeyabelia pajitsipajë Dioso pitabarata aneconijibia patajinawanapaenexa.
19 Panetowajëtaponaenamenua Diosojawabelia patanetocopatsinexa bepijia pataponaenexa paxamëjawabelia, patacataenexa.
Penapëjiobiliwaisianë
20-21 Pacatojitsipatsi, Dioso wajanacajamatabëcuenexanepanaeya-exanaenë, papecajamatabëcueneyawenonaenexa pejitsipaecuenia panejinawanapaejawa. Jesucristo wajanacasiwatëpaecujinae, icatsia asaëya-exanatsi. Bajaraxuata, yapëtanetsi pexaniajaicuene Dioso athëbëabetsia wajanacacapanepaejawanexa daxitamatacabijawabelia. Yapëtanetsinua Jesús pijajiwi, xaniawaetsia pewetsinë, pacuenia oveja pewetsinë xaniawaetsia ewetaponapona. ¡Jesucristo bitso ayaijamatabëcuenenë tsaponaponae daxitamatacabijawabelianexa! Bajara-itsi tsane.
22 Tajamonae, paca-itorobatsi xaniawaetsia panenamuxuna-ewetsinexa paliwaisi pacatoyaquinatsi mapabaxutotaje. Tsiquiriliwaisiyo saya pacatoyaquinatsi patacamuxujiobinexa, panewajënaeyabelia pane-ajamatabëcuenesaënexa Diosojawabelia.
23 Pexanialiwaisiyo pacatoyaquinaliatsi, patacatsipaebinexa mapacueneje. Wajabananë Timoteo rabaja pitsapa penaneconitsiwi pejebabiabibowecua. Itsa bepijiayo patsiarena xanëjawaberena, nexata paxamëjawabelia barëponaenajë.