Biajamatabëcuenesaë tsawanapaetsi wajawajënaeyabelia Dioso waja-itaxutuajamatejemajawa, itsamonae nacabejiobia-exanae-ata
12
Pamonae yabara pacatoyaquinatsi, wënëliwaisitanetsi baja xaniawaetsia pitaxutuajamatejemajawa Diosojawabelia, peyawenonaenexatsi, itsamonae bejiobia-exanae-atatsi bajaraxua yabara. Nexata, waxaitsi bemuxunanajamatabëcuenesaëtatsi waja-itaxutuajamatejemajawa, Dioso wajanacayawenonaenexa. Pacuenia penayacopia-ucubiwi najonabiaba daxita piarewejawanë, xuanë cuenecaranatsijitsiatsi tajëjawawelia penucajopaenexa, bajarapacuenia pijinia benawecua-itoyatsi pibisiacuene waja-exanaeyaniwa, daxita xua-ata nacacuenecaranatsijitsia, Dioso wajanacatojitsipaecuenia wajawajënaeyabelia xaniawaetsia wajajinawanapaeyaniwa.
2 Jesús raja wajanacatomatamotsinë daxita wajaneconimi, Dioso aneconijibia wajanacataenexa. Pacuenia penayacopia-ucubiwi jamatabëcuene-enatsi itsabelia tocaëjëtatsi copiaya pepatsinexa, bajarapacuenia pijinia waxaitsi-ata benacajamatabëcuenecaëjëtatsi xaniawaetsia waja-itaxutuajamatejemajawa Jesucristojawabelia, tsipaji bajaraponë petaxuxuabinë, wajanacajamatabëcuenewitsabia-exanaenë-ata waja-itaxutuajamatejemajawanexa Dioso. Bajaraponë nacatsitanacuene-itajëtanua pacuenia itaxutuajamatejemajitsiatsi Diosojawabelia, itsamonae nacabejiobia-exanabiabi-ata. Yapëtanetsi Jesús itsamonae capocaponae-atatsi, bejiobia-exanae-atatsinua, apocopatsi pitaxutuajamatejemajawa paxa Diosojawabelia. Biji rajane, nacopata pebeyaxuabinexatsi cruzata, tsipaji natsiwajënaeyapëtane pejamatabëcuenebarëyajawanexa, paxa Diosojawatatsia. Aeconoxae baja nexata, Jesús athëbëtatsia eca tronowënëjawata Dioso pemuxuneneta, pecujuanenia, penajua-ewetsinexabeje daxitacuene.
3 ¡Panejamatabëcuenefaefaenaeyaniwa Jesús-jawabelia pane-itaxutuajamatejemajawa, panecueranaeyaniwanua Dioso panetonacuenebijawa, pacanaëjëre pacuenia Jesús ajamatabëcuenesaë tsaponaponae, pibisiacuene pexanaewi pinijicuenia bejiobia-exanae-atatsi! Bajarapacuenia panecanaëjëtsijawata, paca-ajamatabëcuenesaëya-exanaena Diosojawabelia, itsamonae pacabejiobia-exanae-ata.
4 Bajarapacuenia panajamatabëcuenesaëtawanapae-atamë, pibisiacuene pane-exanaeyaniwa, itsiata abaxë pibisiacuene pexanaewi apopacayajuwënëbeyaxuabi, pacuenia Jesús beyaxuabatsi.
5 Paxamë cowë panacofënëtame Dioso papecamuxujiobiliwaisi, papecajamatabëcuene-asaëya-exanaejawa, papeximëcuenia papecataexae. Dioso pexi pecuenexanetsijawa yabara, pijaneconi pexainaewi, pejumeliwaisibaxutota jumaitsi mapacueniaje:
«¡Paxamë pataximë, pëtsa beweliacuenia pataneme Dioso papecacujarubiliwaisi, papecacuenexanetsinexa! ¡Pëtsa pajamatabëcuenefaefaenamenua, itsa anaeya pacacuene-itaweta panenaneconitsixae!
6 Dioso pamonae asiwa, cuenexanetabiaba penaneconitsia-exanaecuenia. Pamonae pijinia pexi, cuenexanetabiaba peconitsicuenia»,a jai Dioso pejumeliwaisibaxutota.
7 Nexata, bajarapacuenia Dioso itsa pacacuenexaneta, bajaraxua pacato-exana papeximëcuenia papecataexae. Jiwi-ata baja cajena pexi bawitsatanajetaruca cuenexanebiaya.
8 Dioso itsa apopacananeconitsia-exanae tsipae papecacuenexanetsinexa, pananeconitsi-atamë, peneta Dioso papeximëcuenia apopacatae tsipae, tsipaji daxita pamonae pexi cuenexanetabiaba. Bajaraxuata, itsa apopacacuenexanetsi, peneta Dioso pacatane paxamë pane-axa apopanexainaewi.
9 Waxaitsi abaxë pamatacabi pejewaxitsi, waxajiwi mapanacuataje cuenexanetsiaya banacaconita. Bajarapacuenia waxajiwi yaiyatanetsi. Bajaraxuata, waxaitsi, Dioso pexitsi, bitsoyo bejumecowënëtatsi, beyaiyatanetsinua, waxa Dioso, ponë eca athëbëtatsia, wajanacarajutsinexa matacabi apopewerewerecaejawa.
10 Itsa abaxë pejewaxitsi, waxajiwi mapanacuataje, wajanacawitsatsi-epato banacaconita, wajanacacuenexanetsinexa, tsipaji waxajiwi nacatojitsipa, pejitsipaecuenia xaniawaetsia wajatojinawanapaenexa. Itsiata baitsi jane, waxa Dioso itsa nacananeconitsia-exana, wajanacacuenexanetsinexa, bajaraxua nacatopexaniacuene waxaitsinexa, waxajiwi wajanacacuenexanetsijawawecua. Bajarapacuenia nacato-exana, tsipaji jitsipa wajanacajamatabëcueneyawenonaejawa, wajacopabinexanua pibisiacuene waja-exanaejawa. Nexata, pacuenia Dioso pianeconijibinë jamatabëcuene-itsi, bajarawaxaitsi-ata wajajamatabëcuene-itsinexa.
11 Paepatota waxa Dioso nacananeconitsia-exana wajanacacuenexanetsijawata, bajaraxua aposiwajamatabëcuenebarëyatsi. Nacatsi-atane saya. Itsiata baitsi jane, wajanacacuenexanetsicujinae, itsa copatsianatsi pibisiacuene waja-exanaejawami, juya pexaniacuene exanawanapaenatsi. Jamatabëcuenebarëyayanua, xaniawaetsia jinawanapaenatsi.
12 ¡Dioso papecananeconitsia-exanaeyaniwa, pacopabare baja panejamatabëcuenecueranaejawami, tsipaji saya paxamë pacuenejëpame pamonae penayacopia-ucubiwi bepijia pecueranaewi namuto-epatua, pemaxëfaefaenaewi, pesicueranaewinua! ¡Nexata, panewajënaeyabelia panajamatabëcuenesaëtaponare, tsipaji baja, pa-itaxutuajamatejemamë Diosojawabelia, papecayawenonaenexa!
13 ¡Pacuenia penayacopia-ucubiwi rowia pona, namutowecua toquetsinejewa, xaniawaetsia pepatsinexa itsabelia tocaëjëtatsi, bajarapacuenia pijinia pëtsa paxamë pajumexaniataneme itsaliwaisi Dioso pejumeliwaisiwecua! ¡Ëpexaniajailiwaisi, Dioso pejumeliwaisi, panewajënaeyabelia pajumecowënëtawanapare, xaniawaetsia pejitsipaecuenia panejinawanapaenexa! Nexata, itsamonae Jesús peliwaisi pejumexaniataewi, pamonae abaxë apo-ajamatabëcuenesaë Diosojawabelia, paca-itaxutua ajamatabëcuenesaë tsaponae tsane, pejumexaniataeyaniwa itsaliwaisi Dioso peliwaisiwecua.
Pacuenia tsi-ayaitsi tsane pajiwi namuxujemata Dioso pejumeliwaisi, yabara peliwaisi
14 ¡Daxitajiwijawabelia pexaniajamatabëcuene patoxainare! Nexata, aneconijibia pajinawanapaename Dioso pitabarata, tsipaji raja pajiwi aneconijibia apoponaponae tsane Dioso pitabarata, Dioso apoyajawaponaponae tsane.
15 ¡Xania baja panayajiwitaema! ¡Pëtsa pacuenecopatame itsajiwi, paxamëyajuwënëjiwi, pewecuajopaeyaniwa Dioso pitaxutotsoniataejawatsi, Jesucristo pejamatabëcueneta, juya pejumecowënëtsinexa perujuliwaisi! Pacuenia piatsaxa-ënëboto daxitamera bijianaejitsipa, bajarapajamatabëcuene-itsi tsipae caenë-ata, paxamëyajuwënënë, pibisiacuene itsa exanaejitsipa. Belia pacajamatabëcuenebijianaejitsipa padaxitamë, saicayaliwaisi pejumexaniataexae Jesús peliwaisiwecua.
16 ¡Panayajiwitaemanua paxamëyajuwënëjiwi, panecuenejëpaeyaniwa Esaúpijinëmi.b Bajaraponë pibisiacuene exana, bijiaya petaejawatac Dioso najumecapanepaeya peyawenonapaebijawaminexatsi matapijinëxae! Biji rajane, bitso piajanijawata, pejuyapijinëjawabelia canajetaxuaba xua picani canacopatsijitsia Dioso pejamatabëcueneta, caepexaejawa pejamatabëcuenetaa.
17 Payapëtaneme baja mapacueneje. Bajarapacuenia pecanajetaxuabicujinae, icatsia itsamatacabijawabelia, Esaúpijinë picani paxa itoroba, Diosojawabelia petowajëtsinexatsi, Dioso peyawenonabiabinexatsi paxa pewënamuto. Itsiata baitsi jane, paxa apojumejejaitsi. Nexata, Esaúpijinë bitso nua, pejuyapijinë petocopatsixae xua picani Dioso yawenonabiabijitsiatsi. Itsiata baja, acuenebi pexanaejawa.
18 Paxamë baja cajena apopa-imoxoyotsimë Sinaítsutojawabelia, mapanacuataje pe-ecaejawa, panenajamatabëcuene-itajëtsinexa Diosojawabelia paneyaiyataejawa, pacuenia exana bajayata Israel-pijinë pemomoxi. Pacujinae bajarapamonaemi pata, itawetatsi pejayatsiyaniwa bajarapa-ibotsutotabuyaberena. Tanenua bajarapatsutojumata be-isotocotia, bitso pitaquiri-itarërëbojawa, ayaijowiboxaneto-ata.
19 Jumetaenubena penajumetsijawa trompeta, Dioso-ata pecuaicuaijaijawatsica athëbëwetsica bajarapamonaejawabetsica. Nexata, bajarapamonaemi, bitso pecajunawi, wajëca Diosojawabelia, pecuaicuaijaijawa pejumetaeyaniwa pematatsënëa.
20 Bajarapacuenia apojitsipae pejumetaejawa, tsipaji bitso jumecujunawa Dioso pejumaitsijawatsicatsi mapacueniaje: «Pajiwi, dajubi-ata, ponaena mapatsutoyenepanajawaje, pabeyaxuabianame panetseconaejawata ibotonëta, itsa jume, panecacuatsijawata becuererebonëta», pejaijawatsica athëbëwetsica.
21 Daxita xua tane, xua jumetanenua yabara, Israel-pijinë pemomoxi pecajunawi bitso neconecojai. Moisés-pijinë-ata jumaitsi: «Xanë-ata rabaja tacajunawi, bitso neconecojanë», jai.
22 Paxamë apopa-imoxoyotsimë-ata Sinaítsutojawabelia, itsiata baitsi jane, Diosojawabelia panesiwanajamatabëcuenecopabixae, pacatocopata baja panepatsinexa Sión-tsutojawabetsia,d patsutota eca Dioso pijatomara, Jerusalén tomarata. Bajarapatomaratatsia eca Dioso, piasaëtsaponaponaenë. Yajawaponapona ayaibitsaëtoxaneto ángelewi, miles pa-ángel-nëbeje, pexaniacuenia pecuenewënëxaniatsiwitsi.
23 BItsamonae, Jesús pijajiwi, copiaya pepatsiwi y payajawanacaetuatsianame Dioso pijanacuatatsia, pewënëyaquinarubiwitsi bajarapatomaratatsia. Panacaetuatsianame Dioso pitabarata, Ponë jiwi pijaneconi petocanaëjëtsinë, penaneconitsia-exanaenexa daxita pamonae pijaneconi pexainaewi. Payajawanacaetuatsianamenua pamonaemi tëpa, Diosojawabelia pepuapesiwanajamatabëcuenecopabiwi, pamonae Dioso pepacuene aneconijibia-exanatsi, pijanacuatatsia pepatsicujinae.
24 Panacaetuatsianamenua Jesús pitabarata, Ponë pejamatabëcueneta Dioso aneconijibia nacatane. BajaraPonë nacayapëtaeya-exananuae pejanacuenia Dioso wajanacanajumeliwaisicajonejawa. Bajayata Abel-pijinë, ponë beyaxuabatsi, xanepana picani itsanë peyamatamobeyaxuabinexatsi. Itsiata baitsi jane, pamatacabi Jesús beyaxuabatsi cruzata, itsajiwi-ata aponajamatabëxainae peyamatamobeyaxuabinexatsi. Biji rajane, Dioso aneconijibia tane daxita pamonae siwanajamatabëcuenecopaba Jesús-jawabelia. Bajaraxuata, pajana wecuarunatsi Jesús wajanacasiwatëpaejawata, bitso pexaniajawa Abel-pijinë pejanawecua, irata pecayajatsijawa, pebeyaxuabijawatatsi. Baitsi, Abel-pijinë pejanacayajatsijawatatsi, Dioso petaejawata najamatabëxainaf peyamatamotsinexa pebeyaxuabinëtsi. Juya, Jesús pejanarunaejawata, Dioso petaejawata najamatabëxaina jiwi aneconijibia petaejawa.
25-26 ¡Panayajiwitaema panejume-ataejitsibiyaniwa xua Dioso pacacuene-itaweta, Jesús pejamatabëcueneta, tsipaji bajayata Israel-pijinë pemomoxi itsa apojumecowënëtsi xua Dioso cuene-itawetatsi, Moisés-pijinë pejamatabëcueneta, apowecuapanepae Dioso penaneconitsia-exanaejawatsi! Bajarapamatacabita, Dioso athëbëwetsica pecuaicuaijaijawata Sinaítsutojumawetsica, ira jëabia-exana pejumeta. Waxaitsi-ata bitsoyo Dioso nacananeconitsia-exanaejitsipa, itsa apojumecowënëtsitsi Ponë nacajunata athëbëwetsica. Bajaraxua yabara, Dioso tajëwelia najumecapanepaeya jumaitsi mapacueniaje: «Itsamatacabi icatsia ira najëabia-exanaenajë, itaboxo yajawa», jai Dioso.
27 Bajarapacuenia Dioso itsa jumaitsi, tajëwelia baja nacayapëtaeya-exana pewerewerecaeya-exanaenexa daxita pexanaejawami mapanacuataje. Itsiata, Dioso pejumeliwaisi,g pijatomara-ata, apowerewerecae tsane, tsipaji bajaraxuanë acuenebi piajibia-exanaejawa.
28 Pexaniajamatabëcuene berajutatsi Diosojawabelia, tsipaji pexaniacuenia naca-ewetsiana pijanacuatatsia, daxitamatacabijawabelianexa. Bajaraxua apowerewerecae tsane. Wajasiwajamatabëcuenebarëyaxae bajaraxua yabara, asiwaya tonacuenebianatsi Dioso. Yaiyataeya wajajamatabë-ëthëtowetsina wënëxaniatsianatsinua, bajaraPonë wajanacasiwajamatabëcuenebarëyanexa.
29 Pacuenia isoto petajuenajetarucaejawata wayafo, werebiaba daxita piabejejawa, bajarapijinia pacuenia Dioso werebiabiana daxita xua tsitapibisiacuenetsi pijajiwi pexanaejawa, ëpejitsipaecuenia jiwi pejinawanapaenexa. Bajaraxuata, apobejume-ataejitsibitsi wajanacacuene-itawetsijumenë.