Pamonaemi bajayata yawenonatsi, pitaxutuajamatejemaxae Diosojawabelia
11
Pajiwi xaina pitaxutuajamatejemajawa Dioso, bajarapajiwi jumexaniatane. Xaniajaiya copia-ewetaponapona Dioso pejumaitsicuenia peto-exanaejawanexatsi, apotae-ata abaxë xua copia-ewetaponapona. Apocuene-aebinua peto-exanaejawanexatsi.
2 Bajarapacuenia bajayata wajasalinaiwimi pitaxutuajamatejemaxae Diosojawabelia, siwajamatabëcuenebarëyatsi.
3 Waxaitsi, wajajumexaniataexae Dioso, yapëtanetsi pexaniajaicuene nacua pexanaejawa pejumeta, daxitacuene yajawa. Daxita xua aeconoxae waja-itaxutota tanetsi, apowajataecapanepaejawanëta, Dioso baja cajena exana bajaraxuanë.
4 Bajayatami, Abel-pijinë pesiwanajamatabëcuenecopatsixae Diosojawabelia,a capata pexaniajawa Caín-pijinëwecua, rajutsiaya petajuitsinexa Diosojawabelia pijaneconijamatabëcuene. Bajaraxuata, Dioso siwajamatabëcuenebarëyatsi. Wajunupaebatsinua pianeconijibinëcuene. Nexata, Abel-pijinëmi, bajayatami tëpae-ata, itsiata mapamatacabijawaberena-ataje wënëliwaisitaeponatsi pesiwanajamatabëcuenecopatsijawa Diosojawabelia. Bajarapacuenia nacacujaruba waxaitsi-ata waja-itaxutuajamatejemanexa Dioso.
5 Bajayata, Enoc-pijinë-ata siwanajamatabëcuenecopata Diosojawabelia. Bajaraxuata, tëpaenejewa Dioso caponatsib athëbëabetsia. Jemata pitajarabatsi. Nexata, itsamonae jaitsi-ata, itsiata apocaxitajarabitsi. Dioso, pejumeliwaisibaxutota, nacayapëtaeya-exana pacuenia siwajamatabëcuenebarëyatsi Enoc-pijinë, pepitsiwajënaeyatsi. Nexata, Dioso pesiwajamatabëcuenebarëyaxaetsi, yapëtanetsi Enoc-pijinë pesiwanajamatabëcuenecopatsijawa Diosojawabelia.
6 Baitsi, pajiwi aposiwanajamatabëcuenecopatsi Diosojawabelia, acuenebi pesiwajamatabëcuenebarëyajawanexatsi. Pajiwi jitsipa caejamatabëcuene pexainaejawa Diosojawabelia, copiaya bejumexaniatane Dioso piasaëtsaponaponaenëcuene, pexaniacuenia peyawenonaenexatsinua, pamonae jaita pexaniajaijamatabëcueneta.
7 Bajayata, Noépijinëmi jumexaniatane Dioso, xua tajëwelia yapëtaeya-exanatsi, mapa-iraje pebubutsia-exanaejawanexa. Nexata, abaxë apotae-ata mapa-irataje pebubutsijawa, Dioso pitorobicueniatsi exana pinijibarcoxaneto,c pebarëpanepaenexa pijamonae pebubutsijawawecua. Bajarapacuenia Noépijinë pejumexaniataexae Dioso, pijamonae yajawa capanepatsi. Bajaraponë canacopatanua Dioso aneconijibia petaejawatsi. Itsiata, mapanacuapijiwije Dioso naneconitsia-exanatsi, pejume-aebixae Noépijinë pepaebijawa Dioso peliwaisi.
8 Bajayata, Abraham-pijinëmi-ata pitaxutuajamatejemaxae Dioso, jumexaniatane peto-exanaenexatsi najumecapanepaeya pejumaitsicueniatsi. Nexata, Dioso itsa itorobatsi pewecuapitsapaenexa pijanacuami,d jumecowënëta baja. Nexata baja, pitsapa, aponatsiwajënaeyapëtae-ata panacuata patsijitsia, pona panacuayabelia Dioso rajutsiapaebatsi.
9 Panacuata Abraham-pijinë Dioso patsia-exanatsi, itsiata pepopijabo apo-exanae, peponaponaebonexa. Biji rajane saya, bepepatsinëcuenia ponapona carpabota, caematacabibejenexa, Dioso rajutsiapaebi-atatsi pepopija-iranexa. Bajarapacuenia pijinia, ponaponabeje pexënato, Isaac, pemomo, Jacob-ata, Dioso rajutsiapaebi-atatsibeje bajarapanacua pemomoxi pecanacopabinexa.
10 Bajarapacuenia Abraham-pijinë bajayajebi carpabota ponapona, tsipaji abaxë itaxutuajamatejemaya wajënae-ewetaponapona, pecaponaenexatsi athëbëabetsia, Dioso pexanaetomarabetsia, apopewerewerecaetomarabetsia. Bajarapatomaratatsia ponaponaejitsia daxitamatacabijawabelia.
11 Bajarapijinia pacuenia, Abraham-pijinë pijawami, Sara-pijiwa, pitaxutuajamatejemaxae Diosojawabelia, mawecowa-ata picani, Dioso caëjëpaeya-exanatsi penacoxitsijawa. Nexata, bitso pepuaperujuwa-ata, pexënato xainae Abraham-pijinëjawabelia, pejumexaniataexae Dioso peto-exanaejawanexatsi, najumecapanepaeya pejumaitsicueniatsi.
12 Bajarapacuenia pijinia, Abraham-pijinë, bitso pepuaperujunë, itsa baja imoxoyo pewajënae petëpaejawanexa, pexënato xaina. Nexata, Abraham-pijinë pewënamuto pemomoxibitsaëto baja tsaponae. Aponamata-ëjëtsicapanepaetsi, tsipaji nawita pacuenia athëbëtatsia, itaboxota perubenaetulupu, pacuenia-ata manuamenepijitajetabo-atsapërë. ¡Bitso cajena, Abraham-pijinë pemomoxi nawita!
13 Daxita pamonaemi yabara pacatowajunupaebatsi, tëpa baja, pitsinejewa xua Dioso najumecapanepaeya jumaitsitsi, perajutsinexatsi. Tajëwelia natoyapëtane xuanë Dioso rajutsijitsiatsi, pepacuene pexainaejawanexa. Nexata, jamatabëcuenebarëyaya namata-enetsia najumaitsi tsabiabi: «Mara panacuataje pepacuene apojinawanapaetsi tsane daxitamatacabijawabelianexa. Waxaitsi saya caematacabibeje wajanapatsiwicuenia wajanajinawanapaewi», najai tsabiabi bajarapamonaemi.
14 Bajarapacuenia namata-enetsia penajumaitsitsabiabixae, tsitanajamatabëcuene-itajëtawanapa itsamonaejawabelia pewetawanapaejawa athëbëabetsia Dioso pecaponaejawanexatsi, bajarajotatsia jane baja, pejinawanapaenexa daxitamatacabijawabelia.
15 Bajarapamonaemi aponajamatabëxainawanapae, caewëalia icatsia penawiabinexa pijanacuamijawabelia. Itsa bajarapacuenia najamatabëxainaejitsipa, nexata peneta nawiabijitsipa.
16 Biji rajane, bajarapamonaemi najamatabëxainawanapa peponaenexa athëbëabetsia, matatoxenetsia pexanianacuajawabetsia. Bajarapacuenia penajamatabëxainawanapaexae, Dioso siwajamatabëcuenebarëyatsi. Bajaraxuata, Dioso aponawënëca-ura itsamonae pejumaitsijawa: «Bajarapamonae raja pijaDioso», pejaijawatsi, tsipaji tsiwajënaeweretatsi baja pepopexaniatomara, peyajawajinawanapaenexatsi.
17-18 Copiaya Dioso tajëwelia najumecapanepaeya jumaitsi Abraham-pijinëjawabelia, pexënato Isaac pexainaejawanexa. Yapëtaeya-exanatsinua ayaibitsaëtoxaneto pemomoxi penaexanaponaejawanexa, Isaac pejamatabëcueneta. Itsamatacabijawabelia, icatsia Abraham-pijinë Dioso itorobatsi penacoxibeyaxuabinexaf picani, pejamatabëcuene-ëjëtsinexatsi. Nexata, Abraham-pijinë pejumexaniataexae pexainaejawanexa ayaibitsaëto pemomoxi, Isaac pejamatabëcueneta, nexata xainae-ata caenë pexënato, buata altar-jumata, penacoxibeyaxuabinexa, rajutsiaya petajuitsinexa Diosojawabelia.
19 Bajarapacuenia exana, tsipaji jumexaniatane Dioso najumecapanepaeya pejumaitsicueniatsi peto-exanaejawanexatsi, Isaac pejamatabëcueneta. Nexata, yapëtane pacuenia pexënato itsa beyaxuabijitsipa, «Dioso baja cajena caëjëpatsi Isaac icatsia piasaëya-exanaejawanexatsi», pejamatabëjaijawa.
20 Bajayata, Isaac-pijinë-ata, Abraham-pijinë pexënato, jumexaniatane Dioso najumecapanepaeya pejumaitsicueniatsi peto-exanaejawanexatsi. Nexata, itsa baja perujunë, tajëwelia najumecapanepaeya cuenewajunupaeba pexënatobeje, Jacob, Esaúbejejawabelia, Dioso pexaniacuenia peyawenonabiabinexatsibeje.
21 Jacob-pijinë-ata jumexaniatane Dioso najumecapanepaeya pejumaitsicueniatsi peto-exanaejawanexatsi. Nexata, pamatacabi Jacob-pijinë perujunë, itsa baja nayapëtane petëpaejawanexa, tajëwelia najumecapanepaeya cuenewajunupaeba pemomobeje, Josépijinë pexënatobejejawabelia, caenë canacujitsia, Dioso pexaniacuenia peyawenonabiabinexatsibeje. Bajarapacuenia pejumaitsicujinae, Jacob-pijinë pijanaebo-upita nayaëtanucaeya, yaiyataeya wajëtanuca Diosojawabelia.
22 Bajayata, Josépijinë-ata jumexaniatane Dioso, Israel-pijinë pemomoxi Canaán nacua perajutsijawanexatsi, bajarapanacuata pejinawanapaenexa. Nexata, pamatacabi Egipto nacuata daxita pijamonae barëponapona, tajëwelia wajunupaebag bajarapamonaejawabelia, Dioso pecapitsapaejawanexatsi Egipto nacuawecua. Orijibia, petëpaewajënae najumepueneta pijamonae pesicaponaenexatsi, pamatacabita bajarapamonae pitsapa, peponaenexa Dioso perajutsiapaebinacuajawabelia.
23 Bajayata, Moisés-pijinë paxapijinë, penapijiwa-ata, itaxutuajamatejemabeje Diosojawabelia, peyawenonaejawanexatsibeje. Nexata, pexënatonëyo itsa xainabeje, Moisés-nexa jane baja, penaexanaecujinae matayatsiah caponaponabeje acueyabi pajuametobeje. Bajarapacuenia exanabeje, tsipaji bitso tsitapexanianëyotsibeje.i Bajarapacujinaeta, faraón-pijinë, Egipto nacua pepopewetsinë, itoroba Israel-pijinë pemomoxi pecoxibeyaxuabaponaenexa, pebinëxi paepatota naexana. Itsiata, bajarapajiwibeje apojumecujunawibeje faraón pitorobiliwaisi, tsipaji itaxutuajamatejemabeje Diosojawabelia, peyawenonaenexatsibeje.
24 Bajarapacuenia pijinia, Moisés-pijinë-ata itaxutuajamatejema Diosojawabelia, peyawenonaenexatsi. Nexata, itsa baja penaweretsinë tsaponae, apojitsipajopae Egipto nacua pewetsinë pexënatoyo bepexënatocuenia petaejawatsi, bajarapowa witsatsi-atatsi.
25 Biji rajane, siwanajamatabëcuenewereta, peyajawabejiobia-exanaejawatsi pijamonae, Israel-pijinë pemomoxi, pejamatabëcueneyawenonaenexa. Bajarapacuenia tsitapexaniacuenetsi bitso nabejiobitsiaya peponaponaejawa, penasiwajamatabëcuenebarëyajawawecua pibisiacuene pexanaponaejawa, xua saya cae-epatoyonexa.
26 Bajarapacuenia pesiwanajamatabëcueneweretsixae, Moisés-pijinë nacopata pebejiobia-exanaenexatsi, pacuenia Cristo-ata bejiobia-exanatsi mapanacuataje, Dioso pejitsipaecuene pexanaponaponaexae. Bajaraponë bitso asiwaya tane xua Dioso rajutsiapaebatsi athëbëtatsia, daxita Egipto nacuapijiwi pexainaecuene matatoxenetsia.
27 Nexata baja, Moisés-pijinë pejumexaniataexae Dioso najumecapanepaeya pejumaitsicueniatsi peto-exanaejawanexatsi, Egipto nacuawecua pitsapa. Nexata, Egipto nacua pepopewetsinë bara-anaepanae-atatsi, apocujunawi. Biji rajane, pewajënaeyabelia ajamatabëcuenesaë tsanajetarucae, pacuenia Dioso itorobatsi pexanaenexa. Bajaraponë najetaruca bepetaenëcuenia Dioso, ponë apowajataecapanepaenë waja-itaxutota. Aponawiatsi pecowëyabelia, tsipaji yapëtane Dioso bitso piasaënëcuene Egipto nacua pepopewetsinë matatoxenetsia.
28 Moisés-pijinë, pejumexaniataexae Dioso, najumecapanepaeya pejumaitsicueniatsi pecapanepaenexatsi, itoroba daxita pijamonae penacuenebijawa Pascuafiesta.j Bajaraxuata, itoroba bajarapamonae pijabobaupanë, caebaupa canacujitsia, pemuxunenetsicabinexa ovejajanata. Ángelnë itsa najetaruca, petowerebiabiyaniwatsi pebinacuetoxi, matapijinëxi.
29 Nexata, pamatacabi Moisés-pijinë barëpitsapa pijamonae Egipto nacuawerena, bajarapanacuapijiwi picani barajinatsi, pebeyejebinexatsi. Bajarapamatacabi, Moisés-pijinë, pijamonae yajawa, najuasiwanajamatabëcuenecopaba Diosojawabelia peyawenonaenexatsi. Nexata, ayaicuenia yawenonatsi. Bajaraxuata, nicaba Rojo manuamenetuatuajëalia,k bepetsewi-irajawalia. Itsiata baitsi jane, Egipto nacuapijiwi, paepatota nicabarubenapona bajarapatsewijawalia, mera baja icatsia caewëarena awajubua tsaxuabi. Bubuna baja nexata pamonae pëbarajina Israel-pijinë pemomoxi.
30 Israel-pijinë pemomoxi pesiwanajamatabëcuenecopabixae Diosojawabelia, peyawenonaenexatsi, pitorobicueniatsi Jericó tomara matatoyorotsia najetarubena siete pamatacabibeje. Nexata, sietematacabita jane baja, papitayaë-ibopanaxaneto Jericó tomarapijiwi exananuta pijatomara matatoyorotsia, penayajiwicaranatsinexa pijawajabitsaëwecua, bajarapayacaranatsijawaxanetomi jopaica,l Israel-pijinë pemomoxi pesiwanajamatabëcuenecopabixae Diosojawabelia.
31 Bajayata, Rahab-pijiwa, Jericó tomarata peponaponaewa, pibisiacuene pewitota pexanabiabiwa. Bajarapowa pesiwanajamatabëcuenecopatsixae Diosojawabelia, peyawenonaenexatsi, pamatacabi Israel-pijinë pemomoxi itoroba anijanëbeje peya-enabanajetarucaenexabeje Jericó tomara, bajarapowa pexaniacuenia bajaraponëbeje copiapitam pijabota. Bajaraxuata, Israel-pijinë pemomoxi petsimaxëpatsimatacabi apoyajawabeyaxuabi, daxita apopejumecowënëtsiwi Dioso, Jericó tomarata pejinawanapaewi.
32 Necuenecaëjëpa picani ayaibitsaëto tawajunupaebinexa, Diosojawabelia pesiwanajamatabëcuenecopabiwi yabara. Itsiata, aponecuenecaëjëpae patacatoyaquinaenexa, tsipaji bitso netopinijiliwaisi tsipae mapamonaemi peliwaisianëje: Gedeón-pijinë,n Barac-pijinë,o Sansón-pijinë,p Jeftépijinë,q David-pijinë,r Samuel-pijinë,s itsamonae-ata, profetawimi.
33 Daxita bajarapamonaemi itaxutuajamatejema Diosojawabelia, peyawenonaenexatsi. Nexata, Dioso yawenonaponatsi pinijicuenejawanë pexanaenexa. Bajaraxuata, bajarapamonaemiyajuwënëwi itsa nawajabitsaëtabuatapona itsanacuanëpijiwijawabelia, werebiabapona, Dioso peyawenonaexaetsi. Itsamonae pijinia pijanacuanëjawa pijajiwi pewetsijawata, xaniawaetsia ewetabiaba, penaneconitsia-exanaenexa daxita pibisiacuene pexanaewi. Itsamonae pijinia Dioso yawenonatsi tajëwelia najumecapanepaeya pejumaitsicueniatsi. Itsamonae pijinia wecuacuaibo-acatatsi newëthëmonaet pebeyaxuabiyaniwatsi, Dioso peyawenonaexaetsi.
34 Itsamonae pijinia, bajarapamonaeyajuwënëwi, xuabi-atatsi piniji-isotualia,u itsiata apotajuetsi, Dioso peyawenonaexaetsi. Itsamonae pijinia jamatabëbeyaxuabi-atatsi espadata, wecuapanepa, Dioso peyawenonaexaetsi. Pamonae pijinia apo-aitatsaca picani penawajabitsaëtsinexa, bajarapamonae-ata bitso baja pitatsacawi naexanapona, wajabitsaë pexanabuataponaejawata, Dioso peyawenonaexaetsi. Nexata, bajarapamonae pijawajabitsaë cuene-amoneyaba. Wecuarëcëpecatsi. Daxita bajarapamonaemi Dioso yawenonatsi, pitaxutuajamatejemaxae bajaraPonëjawabelia.
35 Bajayata pijinia, itsamonae petiriawi, pesiwanajamatabëcuenecopabixae Diosojawabelia peyawenonaenexatsi, itsa coxitëpa, Dioso icatsia to-asaëya-exanabiabatsi.v
Itsiata, itsamonae, Diosojawabelia pesiwanajamatabëcuenecopabiwiyajuwënëwi, tëpa pebejiobia-exanaejawatatsi. Yapëtane picani pecopatsijawanexatsi pebejiobia-exanaejawatsi, itsa nawecuacopatsipa Diosojawabelia pesiwanajamatabëcuenecopabijawa. Bajarapacuenia exanae-atatsi, apocopabi, tsipaji jamatabëjumaitsi tsawanapae: «Mapanacuataje taponaponaejawa matatoxenetsia, bitso jitsipajë matacabi apopewerewerecaejawa Dioso tanerajutsinexa», jamatabëjai tsawanapae bajarapamonae.
36 Itsamonae pijinia Diosojawabelia pesiwanajamatabëcuenecopabixae, pijanacuapijiwi capocaponabiabatsi. Jumatitibabeyabiabatsinua penaneconitsiwi pejumaconitabiabimacata. Cadenamaëtota cëbejebabiabatsi. Penaneconitsiwi pejebabiabibota jebabiabatsi.
37 Itsamonae pijinia ibotonëta saya tseconabiabatsi, pebeyaxuabinexatsi. Itsamonae pijinia petëpaenexa, epacaucubatsi sierrata. Itsamonae pijinia jamatabëcuene-ëjëbatsi, pecopabinexa Diosojawabelia pesiwanajamatabëcuenecopabijawa. Itsamonae pijinia espadata beyejebatsi. Itsamonae pijinia pijabowecua capitsapatsi. Nexata, jinarutabiaba daxitajawa, xainaenejewa itsajota jinawanapaejitsia. Bajaraxuata, pebejiobiwicuenia naxatababiaba ovejaboco, chivoboco-ata, apopexainaexae itsacuenejawayo. Barajinabiabatsi. Bitso cajena bejiobia-exanabiabatsinua.
38 Bajarapamonaemi jinaruta petusatonacuanëjawa, petsutonënacuanëjawa-ata. Pitajanitonëjawa perubenaewajuanë jaitabiaba, merawi pemajitabiabinexa. Bajarapacuenia bajarapamonae jinawanapae-ata, Dioso bitso asiwatsi, tsipaji apocopabi pesiwanajamatabëcuenecopabijawa bajaraponëjawabelia, bejiobia-exanabiabi-atatsi bajaraxua yabara. Bajaraxuata, toxanepanatsi picani Dioso pecapanepaenexa piasiwawi, juya penaneconitsia-exanaenexa mapanacuapijiwije, bajarapitsipibisiacuene pexanawanapaewi piasiwawijawabelia.
39 Daxita bajarapamonaemi apopecopabixae pitaxutuajamatejemajawa Diosojawabelia, jiwi bejiobia-exanae-atatsi, Dioso siwajamatabëcuenebarëyatsi. Itsiata, bajarapamonaemi piasaëtsawanapae-epato apopitsi abaxë, xua Dioso najumecapanepaeya rajutsiapaebatsi.
40 Dioso caecuenia aporajutsi daxita xua najumecapanepaeya rajutsiapaebatsi. Biji rajane, abaxë ewetawanapaeya-exanatsi, tsipaji Dioso aponajamatabëxainae ëbajarapamonaejawabelia perajutsinexa bajaraxua. Waxaitsi-ata mapamatacabita wajajinawanapaewi, bajarapamonae yajawa, Dioso jamatabënacarajuta bajarapapexaniacuene, aneconijibia wajanacataejawanexa, Cristo pejamatabëcueneta.