Sacerdotewi xua exanabiaba Dioso penajumecopatsiliwaisi Moisés-pijinë pitorobicueniatsi, pesaë apoxainae jiwi pijaneconi pewecua-ajibia-exanaenexa
10
Paliwaisi bajayata Dioso najumecopata Moisés-pijinëta, tajëwelia Dioso cuene-itajëta papexaniacuene Cristo nacato-exanaejitsia. Nexata, xua sacerdotewi exanawanapa, bajarapaliwaisi pitorobicueniatsi, saya pecuene-itajëtsijawanë. Bajaraxuata, acuenebi pewecua-ajibia-exanaejawa jiwi pijaneconi, caewai canacujitsia, dajubinë beyaxuabaponae-ata, rajutsiaya petajuitsinexa Diosojawabelia. Cristo wajanacasiwatëpaejawa saëmatatoxeneta bajarapacuenecataejawanë, tsipaji bajaraponë pepacuene nacawecua-ajibia-exana wajaneconimi.
2 Xua bajayata sacerdotewi exanabiaba jiwi pijaneconi yabara, pepacuene Dioso itsa wecua-ajibia-exanaejitsipatsi pibisiacuene pexanaeneconi, nexata bajarapamonae apoyanajamatabëxainae tsipae pijaneconi. Itsa aneconijibi tsipae Dioso pitabarata, pematatsënëa dajubinë apobeyaxuababiabi tsipae, pijaneconi yabara. Caeto saya, tajuitsipa dajubinë altar-jumata rajutsiaya Diosojawabelia.
3 Itsiata baitsi jane, bajarapacuenia, caewai canacujitsia pexanaejawata, apowecua-ajibia-exanae jiwi pijaneconi. Biji rajane saya, pewajënaeyabelia tsiteca pijaneconi yanajamatabëxainapona.
4 Bajaraxuata, yapëtanetsi pacuenia jiwi beyaxuababiabi-ata toro, chivo-ata, bajarapajana apocaëjëpaetsi pijaneconi pepacuene pewecua-ajibia-exanaenexatsi.
5 Bajaraxuata, Cristo pepatsicujinaetsica mapanacuayabetsicaje, paxa Diosojawabelia jumaitsi mapacueniaje:
«Xamë apo-itajitsipaemë jiwi ofrendajawanë pecarajutabiabijawa, dajubi-ata tajuitsiaya pecarajutabiabijawa. Bajaraxuata, xanë nitorobimica jiwicuenia tanaexanaenexa mapanacuataje, jiwiperabëto taxainaenexa,a mapanacuapijiwije tasiwatëpaenexa pijaneconi yabara.
6 Aposiwajamatabëcuenebarëyamë picani jiwi petajuitsijawa dajubi daxitanë altar-jumata pijaneconijamatabëcuene, nesiwajamatabëcuenecaewinexa pijaneconimi.
7 Bajaraxuata, xanë baja cajumaitsitsi: ‘Manucajëje, tacato-exanaenexa xamë, Diosomë, nejitsipaecuenia, tasiwatëpaejawanexa nijajiwi, pacuenia xamë tajëwelia nejumeliwaisibaxutota jumaitsimë’»,b jai Cristo, paxa Diosojawabelia.
8 Yapëtanetsi pecopiarucaeya-exanaejawanexa perujucuenemi, tsipaji Cristo copiaya jumaitsi mapacueniaje: «Taxa Diosomë, apo-itajitsipaemë, aposiwajamatabëcuenebarëyamënua, jiwi ofrendajawanë pecarajutabiabijawa, dajubi-ata tajuitsiaya pecarajutabiabijawa, jiwi petajuitsijawanua dajubi daxitanë altar-jumata pijaneconijamatabëcuene, nesiwajamatabëcuenecaewinexa pijaneconimi», jai Cristo. Bajarapacuenia jumaitsi, Dioso tonajumecopatsi-ata Moisés-pijinëta, bajaraxuanë jiwi pexanaenexa.
9 Yapëtanetsinua pejanacuene penacopatsijawanexa, tsipaji Cristo cotocaewijawa jumaitsi mapacueniaje: «Bajarajane manucajëje, tacato-exanaenexa pacuenia jitsipame, jiwi pijaneconi yabara»,c jai. Nexata, bajarapacuenia pejumaitsijawata, yapëtanetsi pecopiarucaeya-exanaejawanexa sacerdotewi dajubi petajuitabiabijawa altar-jumata, jiwi pijaneconi yabara, wajanacasiwatëpaejawata cruzata wajaneconijamatabëcuene. Yapëtanetsinua copiayapijicuenemi pecowëta, penacopatsijawanexa pejana-exanaecuene.
10 Cristo, paxa Dioso petojitsipaecueniatsi pexanaexae, caeto, nacopata pebeyaxuabinexatsi, wajanacasiwatëpaenexa cruzata, wajanacawecua-ajibia-exanaenexa pibisiacuene waja-exanaeneconimi, daxita mapanacuapijiwitsije.
11 Xaniajai. Copiayami petonajumecopatsicueniatsi, sacerdotewi, caematacabi canacujitsia, altar-jumata dajubi rajutsiaya tajuitabiaba Diosojawabelia, jiwi pijaneconijamatabëcuene. Itsiata baitsi jane, bajarapacuenia napëna-exanabiabi-ata,d Dioso pepacuene apowecua-ajibia-exanae jiwi pibisiacuene pexanaeneconi.
12 Bajarapacuenia Cristo apo-exanae. Biji rajane, caeto, nacopata pebeyaxuabinexatsi, wajanacaneconimatamotsinexa pibisiacuene waja-exanaeneconimi, daxitamatacabijawabelia. Bajaraxuacujinae, pona athëbëtatsia, pe-ecaenexa paxa Dioso, pemuxuneneta, penajua-ewetsinexabeje daxitacuene.
13 Bajarajotatsia Cristo abaxë jamatabëcuene-eweteca, pijawajabitsaë paxa Dioso copiaya petsiwajënaejamatabëcuene-amoneyabinexatsi, bajarapamonae pitorobicuenia pejumecowënëtsinexatsi.
14 Bajarapacuenia Cristo, caeto, baja penacopatsixae wajanacasiwatëpaenexa, bajarapaliwaisi wajajumexaniataewi, Dioso nacawecua-ajibia-exana pibisiacuene waja-exanaeneconimi, daxitamatacabijawabelianexa.
15 Espíritu Santo tajëwelia nacayapëtaeya-exana pexaniajaicuene, Cristo baja, caeto, wajanacasiwatëpaejawanexa. Bajaraxua yabara Dioso pejumeliwaisibaxutota tajëwelia jumaitsi mapacueniaje:
16 «Pecopiarucaecujinae copiayapijiliwaisimi, pejanacuenia najumecapanepaeya najumeliwaisicajonenajë tajajiwijawabelia. Bajarapacuenia ta-exanaejawata, jumaitsinë tsane mapacueniaje: ‘Pacaejiwimë canacujitsia, panejamatabë-ëthëtota pacatsijamatabëcuenerutsianatsi tajaliwaisi. Pacaejiwimë canacujitsia, bajarapaliwaisi pacajamatabëcuenematacaponaena patanejumecowënëtsinexamë.
17 »Caeto-ata aponajamatabënapitsinë baja tsane daxita pijaneconi’»,e jai Dioso tajëwelia pijajiwi yabara.
18 Bajarapacuenia Cristo pejamatabëcueneta Dioso pepacuene wajanacawecua-ajibia-exanaexae pibisiacuene waja-exanaeneconimi, nexata pematatsënëa baja, aponamatawenonaetsi dajubi wajatajuitsijawa, wajaneconijamatabëcuene.
Pacuenia wajajamatabëcueneta imoxoyotsijitsiatsi Dioso, yabara peliwaisi
19 Tajamonae, aeconoxae baja, caejamatabëcuene xainatsi Diosojawabelia, Jesucristo wajanacasiwatëpaexae.f Nexata, Jesucristo pejamatabëcueneta, xainatsi baja ajunawijibiag wajajonejawa Dioso Pepopeyaiyataetaxunaeta, wajawajëtsinexa.
20 Cruzata wajanacasiwatëpaexae,h Jesucristo nacato-exana pejananamuto, wajanacajamatabëcuene-aitawaya-exanaenamuto. Nexata, wajanacasiwatëpaejawata nacawecua-ajibia-exana wajanacayacaranatsijawami, waja-imoxoyotsiyaniwa Dioso. Nexata, aeconoxaeta xainatsi baja, wajapatabiabinexa Dioso Pepopeyaiyataetaxunaejawata, wajawajëcaenexa.
21 Orijibia, xainatsi baja Jesucristo, sacerdotewi pepopenamatacaitorobinë, wajanacatonacuenebaponaponaenë Dioso pijatabernáculobota pijanacuatatsia.
22 Bajarapacuenia wajaxainaexae wajanacatocuaicuaijainë Diosojawabelia, itsajamatabëcuene xainaenejewatsi, itaxutuajamatejemaya imoxoyotsianatsi Dioso. Apocujunawitsinua, tsipaji baja Dioso bewajanacajamatabëcuenetsicabiwi Cristo pejanata, wajanacawecua-ajibia-exanaenexa pibisiacuene waja-exanaeneconimi. Bajarapacuenia naca-ajamatabëcuenexuirajibia-exana baja. Wajanacabautizabijawata,i bewajanacaperabëquiatsiwi-ata piaxuirajibimerata.j
23 Dioso caejamatabëcuene pexainaenëxae, najumecapanepaeya pejumaitsicuenia pexanabiabinexa, wajawajënaeyabelia asaëyata copia-ewetawanapaenatsi, jume-aebinejewatsi, Dioso wajanacato-exanaenexa najumecapanepaeya pejumaitsicuenia.
24 Orijibia, namata-enetsia nayawenonaenatsi, wajanajamatabëcuene-asaëya-exanaenexa wajanasiwajawa, pexaniacuene-ata wajanato-exanabiabijawa.
25 Bajaraxuata,k apobecopabitsi wajanajuanacaetuatabiabijawa Cristo pijajiwitsi, pacuenia itsamonae waxaitsiyajuwënëwi exanapona. Biji rajane, benacaetuatatsi, namata-enetsia wajanajamatabëcuene-asaëya-exanaponaenexa, Dioso pejitsipaecuenia wajajinawanapaenexa, tsipaji baja imoxoyo pewajënae Wajatuxanenë icatsia pepatsijawanexatsica.
Dioso naneconitsia-exanaejitsia jiwi, piajamatabëcuenetajaxae pejumexaniataeyaniwa Jesús peliwaisi
26 Waxaitsi wajapuayapëtae pexaniajailiwaisi, tsiteca wajawajënaeyabelia pibisiacuene itsa exanaponaejitsipatsi, wajajume-aebixael Cristo wajanacasiwatëpaejawa, nexata nacato-acuenebi tsipae, Dioso wajanacawecua-ajibia-exanaenexa pibisiacuene waja-exanaeneconi.
27 Biji rajane, saya copia-ewetawanapaejitsipatsi pinijicuenia Dioso ëwajanacayajawananeconitsia-exanaejawanexa, pamatacabi pijawajabitsaë naneconitsia-exanaena piniji-isotojawabelia, pewerebiabinexa.
28 Bajayata, pajiwi apojumecowënëtsi paliwaisi Dioso najumecopata Moisés-pijinëta, itoroba pebeyaxuabinexatsi itaxutotsoniataenejewa. Bajaraxuata, pijacuata pecuenetaewitsi, anijajiwibeje, itsa jume, acueyabi pajiwibeje-ata, itsa wajunupaebatsi penaneconitsijawa, beyaxuabatsi pijaneconi yabara.
29 Bajarapacuenia itsa naneconitsia-exana pamonae apopejumecowënëtsiwi Dioso penajumecopatsiliwaisi Moisés-pijinëta, matatoxenetsia nexata, pinijicuenia naneconitsia-exanaejitsia pamonae jume-aeba Cristo pesiwatëpaejawatsi, bajarapapexanialiwaisi pejumetaecujinae. Bajarapamonae bepiamatamobicujiru tane Dioso pexënato pesiwatëpaejawatsi. Benatsiquejemacuenia tanenua Espíritu Santo piasiwajawatsi. Bajaraxuata, toxanepanatsi Dioso ayaicuenia penaneconitsia-exanaejawa, Dioso penajumecopatsiliwaisi Moisés-pijinëta apopejumecowënëtsiwiwecua.
30 Yapëtanetsi baja cajena Dioso pejumaitsijawa mapacueniaje: «Pamonae apotajitsipaecuene exanapona, bajarapamonae xanë naneconitsia-exanaenajë», pejaijawa. Jumaitsinua Dioso mapacueniaje: «Xanë, Diosonënë, tocanaëjëtsianajë tajajiwi pexanaecuene, tananeconitsia-exanaenexa pijaneconi pexainaewi», jainua.
31 Tajamonae, piasaëtsaponaponaenë Dioso bitso piayaicuenejawata, naneconitsia-exanaena pijaneconi pexainaewi. ¡Nexata, xania baja tsane panejume-aebijawa!
32 ¡Biji rajane, panajamatabënapire pacuenia pajamatabëcuene-itsimë tsawanapae, pamatacabi ajena pasiwanajamatabëcuenecopabame Cristojawabelia! Bajarapamatacabi pajamatabëcuenesaëmë tsawanapae, panejumexaniataejawa Wajatuxanenë Jesucristo peliwaisi, itsamonae ayaicuenia pacabejiobia-exanae-ata bajarapaliwaisi yabara.
33 Itsajawata papeca-itoyawi, jiwi ayaibitsaëto pitabarata, pacacapocapo̱na. Pacabejiobia-exananua. Itsajawata pijinia, pamonae papecayajuwënëbejiobia-exanaewitsi pajamatabëcueneyawenoname.
34 Orijibia, pa-itaxutotsoniataneme pamonae jebatsi penaneconitsiwi pejebabiabibota, Dioso pejumeliwaisi yabara. Paxamë, Jesús papijajiwixaemë, itsamonae pacawecuanota panija-iranëmi, panecobecowëjawaximi yajawa. Itsiata pajamatabëcuenebarëyamë, tsipaji payapëtaneme xua Dioso pacatoxaina athëbëtatsia papecarajutsinexa, bitso pexaniacuenejawa papecawecuanotsijawanëwecua. Xua Dioso pacarajutsiana, apopewerewerecaejawanexa daxitamatacabijawabelia.
35 ¡Bajaraxuata, pëtsa pacopabame pane-itaxutuajamatejemajawa Dioso papecayawenonaejawanexa, tsipaji cajena, athëbëtatsia xaina ayaicuenejawa papecarajutsijawanexa, pane-itaxutuajamatejemajamatabëcuene!
36 Bajaraxua panepitsiwajënaeya, panamatawenoname pane-ajamatabëcuenesaëjawa panewajënaeyabelia, itsamonae pacabejiobia-exanae-ata pane-itaxutuajamatejemajawa yabara Dioso.
37 ¡Pa-ajamatabëcuenesaëmëre tsawanapae, tsipaji Cristo icatsia patsianica! Bajaraxua yabara, Dioso pejumeliwaisibaxutota tajëwelia jumaitsi mapacueniaje:
«Bepijia patsianica, ponë patsiapaebitsica. Apocuenenajematsi tsane pepatsinexa.
38 Pajiwi tajitsipaecuenia ponapona, nitaxutuajamatejema tsaponaponae,m bejiobia-exanae-atatsi. Itsiata, pajiwi newecuanawiatsiana pecowëyabelia, aposiwajamatabëcuenebarëyanë tsane», jai Dioso pejumeliwaisibaxutota.
39 Itsiata baitsi jane, waxaitsi wajacowëyabelia Diosowecua aponawiabi tsanetsi, Diosowecua wajanaxuabiyaniwa. Biji rajane, waxaitsi siwanajamatabëcuenecopabatsi Diosojawabelia ëwajanacacapanepaejawabelianexa.