Bajayata jiwi beyaxuababiabi-ata dajubinë pijaneconi yabara, bajarapadajubijana aponeconi-iquinaecapanepaetsi, paneconi xaina Diosojawabelia
9
Bajayata, copiaya Dioso najumeliwaisicajunua Israel-pijinë pemomoxijawabelia, paliwaisi tonajumecopata Moisés-pijinëta. Bajarapaliwaisita, itorobatsi bajarapamonae pexanetsinexa Dioso pijacarpaboxaneto, tabernáculobo,a pabota nawajëcabiabijitsia Diosojawabelia. Itsajotanua sacerdotewi tonacuenebawanapaejitsia Dioso pijacuene.
2 Itsa baja wereteta Dioso pijacarpaboxaneto, bajarapabo-ënë yatu-ucuta ayaipapaëbërëpanata, anija-ënëbeje pexanaenexa. Penamataxainae-ënëtuatuajë pewënë Dioso Peyaiyataetaxunae.b Bajarajota nuta candelabrojawa,c pitayotanucaenexa. Nutanua mesayo-ata,d pan-jawanë pejebabiabinexa bajarapajumata, Dioso pitabarata.
3 Cotocaewi pa-ënëtuatuajë, pewënë Dioso Pepopeyaiyataetaxunaee itsataxunaenëwecua.
4 Bajarapa-ënëyatu-ucutsijawatuatuajëta nuca orojawata pexanae-altar-jawa,f itsajota tajuitabiaba petuxujuwi-inciensojawanë Diosojawabelia. Bocanua Dioso penajumeliwaisixaniawaetsibaula.g Bajarapabaula naniawelia jumaxatata orojawata, piënëjawalia-ata. Bajarapa-ënëtuatuajëta nuca oronanitota pexanaebotellabë, pewënëtsijawa manájawa.h Bocanua Aarón-pijinëmi pijanaeboyo, pebaxujuwanucaenaebo,i pitajëtsinexa Dioso pitapetsinëtsicuene. Bocabejenua pa-ibopanatabejej najumeliwaisiyaquina Dioso jiwi pitawetsiliwaisianë, penajumeliwaisicajonejawa Israel-pijinë pemomoxijawabelia.
5 Dioso pijabaulamatapajumawereca nuta anijanëbeje, jumapecataeya oronanijawata pexananutsiquerubinenëbeje,k Dioso pijapeniweniwenaecotia pitajëtsinëbeje. Bajaraponëbeje be-ángelenëbeje, pecorofeto pexainaenëbeje. Pecorofetotanua matatsënëcaranatanucabeje baula matapajumawereca. Bajarapamatapa pewënë Dioso jiwi pitaxutotsoniataetaxunae.l Itsiata aeconoxae, aponecuenecaëjëpae caejawa canacujitsia patacatoyaquinaponaenexa pajamatabëcueneliwaisi xainapona daxita bajaraxuanë.
6 Bajarapacuenia Dioso pijacarpaboxaneto peweretsicujinae, daxita xua-ata xaina bajarapabo-ënëtuatuajë, nexata sacerdotewi joneyabiaba caematacabi canacujitsia bajarapabojawabelia penamataxainae-ënëtuatuajëtatsina, penacuenebinexa Dioso pijacuene petonajumecopatsicueniatsi.
7 Itsiata, cotocaewi-ënëtuatuajëjawabereca, caenë, sacerdotewi pepopenamatacaitorobinë, joneyabiaba, caeto caewai canacujitsia. Pejonejawata, cajoneyabiaba dajubijana, pejumatsicababiabinexa bajarapabaulamatapa. Bajarapacuenia jumatsicaba bajaraponë pijaneconi yabara, itsamonae yabara-ata, pibisiacuene pexanaeneconi Dioso pesiwajamatabëcuenecaewinexatsi, papibisiacuene exana natoyapëtaenejewa penaneconitsia-exanaejawanexatsi.
8 Bajarapapitawetsiliwaisianëta, Espíritu Santo nacayapëtaeya-exana pacuenia daxitajiwi apocuenecopatsitsi, pejonejawanexa Dioso Pepopeyaiyataetaxunaejawabereca, itsa abaxë sacerdotewi nacuenebawanapa Dioso pijacarpaboxanetota. Dioso baja piajibia-exanaecujinae bajarapacuenemi, matapania jiwi cuenecaëjëpaenatsi pejonenexa Dioso Pepopeyaiyataetaxunaejawabelia,m pijacuata pewajëtsinexa Diosojawabelia.
9 Daxita xua exana bajayata sacerdotewi jiwi pijaneconi yabara, bajaraxuanë saya nacatocuenecatane xua ajena mapamatacabijawaberena Cristo nacato-exana. Bajayata, jiwi dajubi beyabiaba, rajutsiaya petajuitsinexa Diosojawabelia pijaneconijamatabëcuene. Waxaitsi itsiata baja, yapëtanetsi bajarapacuenia jiwi pexanaejawata, penacuerotsijawa, tsipaji pepacuene apowecua-ajibia-exanaetsi pijaneconimi. Tsiteca saya pijaperujujamatabëcuene yajawajinawanapa.
10 Bajaraxuanë apocuenecaëjëpaetsi jiwi pijaneconi pewecua-ajibia-exanaejawatsi, tsipaji apojamatabëcueneyawenonae xaniawaetsia pejinawanapaenexa Dioso pitabarata. Biji rajane, saya cuene-itorobatsi pena-ewetsinexa xaniawaetsia itsacuenejawanë pexanaejawata. Nexata, itorobatsi xuanë xaejitsia, xua apaejitsianua, xuanë quiatsijitsia, xua yabara-ata naperabëquiatsijitsia. Bajarapacuenia itorobatsi pejumecowënëtawanapaenexa abaxë Cristo pepatsiwajënaeyatsica. Itsiata baitsi jane, Cristo pepatsicujinaetsica, Dioso jane baja, bajarapaliwaisimi copiarucaeya-exana pejanaliwaisita.
Cristo wajanacasiwatëpaejawata, pepacuene naca-aneconijibia-exana, daxita pibisiacuene waja-exanaeneconimi
11 Cristo jane baja patsica, sacerdotewi pepopenamatacaitorobinë penaexanaenexa daxitamatacabijawabelia. Nexata, daxita papexaniacuene natotaewanapatsi maparucaeje, bajarapacuenia nacatocopiapata bajaraPonë pejamatabëcueneta, tsipaji wajanacatocuaicuaijainë Diosojawabelia. Cristo baja, pona athëbëabetsia, penacuenebinexa peposacerdotenëcuenia Dioso pijatabernáculobojawatatsia. Bajarapabo bitso pexaniabo jiwi pexanaebo matatoxenetsia mapanacuataje, tsipaji Dioso saicaya pexanaebo, mapanacuapijijawanëta apopecanacuenebibo.
12 Bajarapatabernáculobota, penacuenebijawata Cristo itsa junua Dioso Pepopeyaiyataetaxunaejawabelia, apocajoneyabiabi chivojana, torojana-ata, jiwi pijaneconi yabara. Biji rajane, Cristo, caeto, pijacuata najanacajunua, caecuenia daxitajiwitsi wajanacaneconimatamotsinexa, Dioso wajanacacapanepaenexa daxitamatacabijawabelia.
13 Bajayata, Israel-pijinë pemomoxi pacujinae nacopaba bepenaxuirabiwi Dioso pitabarata, bajarapamonae abaxë apotocopatabiabitsi penajuanacaetuatabiabinexa Dioso pewënëta. Nexata, sacerdotenë pewecua-ajibia-exanaenexa bajarapanaxuirabicuenemi, matatsicababiaba chivojanata, torojanata, pamera-ata matajërëata becerro pesorowaton petajuitsi-ipumanata. Nexata jane baja, bajarapacuenia peto-exanaecujinae, matapania tocopatatsi penajuanacaetuatsinexa Dioso pewënëta.
14 Bajarapacuenia dajubijana itsa wecua-ajibia-exana jiwi bepenaxuirabicuenemi Dioso pitabarata, bitso biji Cristo pejana pepacuene nacawecua-ajibia-exana baja bajarapacuenemi. Dajubinë pejana matatoxenetsia Cristo wajanacasiwatëpaejawa bitso caëjëpatsi wajanacayawenonaenexa, Dioso aneconijibia wajanacataenexa. Espíritu Santo, ponë apopewerewerecaenë daxitamatacabijawabelianexa, Cristo yawenonatsi. Nexata, Cristo ponë pepopianeconijibinë, Dioso pitabarata, nacopata pebeyaxuabinexatsi, wajanacasiwatëpaenexa. Bajarapajanata pepacuene nacawecua-ajibia-exana baja pibisiacuene waja-exanaeneconimi, xua yabara picani Diosowecua naxuabiaya jinawanapatsi. Bajarapacuenia Cristo wajanacato-exanaexae, tonacuenebawanapatsi piasaëtsaponaponaenë Dioso.
15 Bajarapacuenia Jesucristo penacopatsixae, daxitajiwi peneconimatamotsinexa, Dioso pejanacuenia najumeliwaisicajunua jiwijawabelia, aneconijibia petaenexa, Cristo pejamatabëcueneta. Nexata, Jesucristo jiwi pesiwatëpaejawata, neconimatamota baja, daxita paneconimi xaina, apopejumecowënëtsicapanepaexae paliwaisi copiaya Dioso najumeliwaisicajunua bajarapamonaejawabelia. Bajaraxuata, daxita pamonae Dioso junata pejanacuenia penajumeliwaisicajonenexa, rajutsianatsi matacabi apopewerewerecaejawa, najumecapanepaeya pejumaitsicuenia.
16-17 Bajarapapejananajumeliwaisicajonejawa, cuenejëpa paliwaisi itsajiwi petëpaewajënae, yaquina pecobecowë yabara, pijamonae peyapëtaenexa pacuenia, caejiwi canacujitsia, pitaponaejitsia pewënamuto. Itsiata baitsi jane, abaxë itsa asaë tsaponaponae pecobecowë pexainaejiwi, ajumematamobi abaxë bajarapaliwaisi. Matapania baja, itsa tëpa pecobecowë pexainaejiwi, jumenamatamota jane baja bajarapaliwaisi. Nexata jane baja, xanepana pijamonae penatsicobetsanaenexa pacuenia petëpaejiwi yaquina, petëpaewajënaeya pecobecowë yabara.
18 Bajarapijinia itsi paperujuliwaisimi bajayata Dioso najumecopata Moisés-pijinëta, Israel-pijinë pemomoxi pejumecowënëtawanapaenexa. Jumenamatamotapona Israel-pijinë pemomoxi dajubi pebeyabiabixae, rajutsiaya petajuitsinexa Diosojawabelia. Baitsi, dajubi janarunaeya itsa apotëpae tsipae, ajumematamobi tsipae perujunajumecajoneliwaisimi.
19 Bajaraxuata, bajayata Moisés-pijinë copiaya tsipaeba daxitajiwijawabelia, daxita paliwaisi Dioso najumecopata pejumecowënëtawanapaenexa. Bajarapacuenia petsipaebiweretsicujinae, nexata pita hisopowiria naeboxi, pepacëtetsicunuyo petsobialanamaëtota. Bajaraxuacujinae, bajarapacunuyo Moisés-pijinë jabuta merata, becerrojana, chivojananua, peyajawamatajërëabijanarata. Nexata, tsicaba pabaxutota itanerubena paliwaisi Dioso najumecopata Moisés-pijinëta. Bajaraxuacujinae, daxitajiwi matatsicabapona.
20 Bajarapacuenia jiwi pematatsicabaponaejawata, Moisés-pijinë jumaitsi tsaponae: «Marapajana jumenamatamotsia-exanao paliwaisi Dioso najumecajunua ajena, wajajumecowënëtawanapaenexa», jai Moisés-pijinë jiwijawabelia.
21 Bajaraxuacujinae, icatsia Moisés-pijinë tsicabaponapona Dioso pijacarpaboxaneto, daxita xua canacuenebabiaba bajarapabo-ënëtuatuajëta, xua-ata xaina pecanacuenebinexa Dioso pijacuene.
22 Paliwaisi Dioso najumecopata Moisés-pijinëta, itoroba dajubinë pejanata daxitacuene petsicabinexa, Dioso axuirajibia petaenexa, jiwi-ata bepenaxuirabicuenemi pewecua-ajibia-exanaenexatsi. Nacayapëtaeya-exananua pacuenia dajubinë janarunaenejewa petëpaejawata, Dioso acuenebi aneconijibia petaejawa pijaneconi pexainaewi.
Pacuenia Cristo nacopata pebeyaxuabinexatsi mapanacuapijiwije pijaneconi pewecua-ajibia-exanaenexa, yabara peliwaisi
23 Mapanacuataje, patabernáculobo xaina bajayata, daxita xuanë-ata xaina pecanacuenebinexa, bajarapitsicuenejawanë xaina athëbëtatsia, Dioso pijanacuatatsia. Daxita bajarapitsicuenejëpaejawanë, bajayata Moisés-pijinë dajubinëjanata tsicabaponapona, aneconijibia penacopatsinexa, Dioso pitabarata. Itsiata baitsi jane, athëbëpijicuenejawanë namatawenona penamatamotsijana dajubijanawecua. Bajaraxuata, Cristo nacopata janarunaeya pebeyaxuabinexatsi, bajarapajana pejamatabëcueneta Dioso pewecua-ajibia-exanaenexa mapanacuapijiwije pibisiacuene pexanaeneconi. Cristo cajena bitso jananamatamota Dioso pitabarata, dajubinë pejana matatoxenetsia.
24 Cristo baja cajena wajanacasiwatëpaecujinae, pejana apocajone mapanacuataje pexanaetabernáculobojawabelia, tsipaji bajarapabo cuenecatane saya pacuenia Dioso pepopijabo itsi. Biji rajane, Cristo pona athëbëabetsia wajanacatocuaicuaijainexa Diosojawabelia.
25 Bajayatami, sacerdotewi pepopenamatacaitorobinë, caewai canacujitsia, cajoneyabiaba dajubinë pejana Dioso Pepopeyaiyataetaxunaejawabelia, Dioso pesiwajamatabëcuenecaewinexa jiwi pijaneconimi. Bajarapacuenia Cristo apo-exanabiabi, caewai canacujitsia. Biji rajane, caeto, nacopata pebeyaxuabinexatsi wajanacasiwatëpaenexa, aneconijibia Dioso wajanacataenexa.
26 Cristo pejana itsa aponamatamotsi tsipae dajubijanawecua, nexata Dioso mapanacuaje pexanaejawaweliacujinae, Cristo nawitsia nacopataponaejitsipa pebeyaxuabinexatsi, jiwi pijaneconi yabara. Itsiata baitsi jane, itsa baja copiapata pecopiarucaenexa perujuliwaisimi, Cristo, caeto, nacopata pebeyaxuabinexatsi, jiwi pijaneconi yabara. Icatsia baja, bajarapacuenia apo-exanae tsane. Bajarapacuenia wajanacasiwatëpaexae, nacawecua-ajibia-exana pibisiacuene waja-exanaeneconimi daxitamatacabijawabelianexa.
27 Daxitajiwi caeto tëpaponaena. Bajaraxuacujinae jane baja, Dioso naneconitsia-exanaponaena daxita pamonae pijaneconi pexainaewi.
28 Bajarapacuenia pijinia, Cristo, caeto, nacopata pebeyaxuabinexatsi, pesiwatëpaenexa ayaibitsaëtoxaneto, pibisiacuene pexanaeneconi pewecua-ajibia-exanaenexa. Bajaraxuacujinae, Cristo baja pona athëbëabetsia. Itsiata baitsi jane, cotocaewijawa pacujinae patsianica, aposiwatëpae tsane jiwi pibisiacuene pexanaeneconi yabara. Saya baja nacasiwapatsianica, wajawajënae-ewetawanapaewi wajanacacaponaenexa athëbëabetsia.