Cristo tonacuenebaponapona pijajiwi sacerdotewi pepopenamatacaitorobinëcuenia, Dioso pitabarata
8
Paliwaisi yabara pacatsipaebatsi, bitso penamatamotsijawa, baja tsipaji, xainatsi Cristo, sacerdotewi pepopenamatacaitorobinë, wajanacatocuaicuaijainënexa Diosojawabelia. Bajaraponë ecaeya-exanatsi penamatamotsitaxunaeta athëbëtatsia, Dioso ayaijamatabëcuenenë pemuxuneneta, pecujuanenia, penajua-ewetsinexabeje daxitacuene.
2 Bajarajotatsia jane baja, aeconoxae Cristo nacueneba peposacerdotenëcuenia, Dioso pepopijatabernáculobo-ënëta, Dioso pijacuata penato-exanaebo. Jiwi apopexanaetabernáculobo.
3 Daxita pamonae sacerdotewi pepopenamatacaitorobiwi, tocopatatsi perajutabiabinexa ofrenda Diosojawabelia, dajubi-ata pebeyabiabinexa, rajutsiaya petajuitsinexa Diosojawabelia, pesiwajamatabëcaewinexa jiwi pijaneconi. Bajaraxuata, Jesucristo-ata, xaina xua rajutsijitsiaa Diosojawabelia jiwi pijaneconi yabara. Pijacuata nacopata pebeyaxuabinexatsi, pematamotsinexa jiwi pijaneconi.
4 Itsa abaxë Jesucristo, mapamatacabi-ata ponaponaejitsipa mapanacuataje, aposacerdotenë tsipae. Aponacuenebinua tsipae sacerdotenëcuenia, tsipaji jinawanapaejitsipa itsamonae, dajubi pebeyabiabiwinexa, rajutsiaya petajuitsinexa Diosojawabelia, Moisés-pijinë pitorobicueniatsi.
5 Itsiata, xua exanawanapa bajarapamonae, bajaraxua cuenecatane saya xua Jesucristo athëbëtatsia exanaponapona Dioso pepopijatabernáculobo-ënëta. Bajaraxuata, pamatacabi Dioso itoroba Moisés-pijinë, itoroba mapanacuaje pexanaenexa Dioso pijacarpaboxaneto, tabernáculobonexa. Moisés-pijinëjawabelia Dioso jumaitsi mapacueniaje: «¡Xania baja taename! Exanaename daxita cuenejëpaeya, pacuenia taneme tacatsitajëtsijawata petsutojumata», jai Dioso. Bajaraxuata, mapamatacabijawaberena-ataje sacerdotewi templobota exanapona daxita pacuenia Moisés-pijinë Dioso tsitajëtatsi petsutojumata.
6 Itsiata baitsi jane, Cristo, ponë xainatsi sacerdotewi pepopenamatacaitorobinënexa, xua Dioso athëbëtatsia tocopatatsi wajanacatonacuenebinexa, bajaraxua bitso ayaijamatabëcuene, bajayata sacerdotewi xua Dioso tonacuenebawanapa mapanacuataje matatoxenetsia. Orijibia, Cristo canacueneba pejanaliwaisi Dioso penajumecopatsiliwaisiwecua Moisés-pijinëta. Bajarapapejanaliwaisita Dioso najumecapanepaeya nacanajumeliwaisicajunua aneconijibia wajanacataenexa, apojumecowënëtsicapanepae-atatsi Dioso penajumecopatsiliwaisi Moisés-pijinëta. Pepacuene baja, Cristo pejamatabëcueneta, Dioso nacawecua-ajibia-exana wajaneconimi, aneconijibia wajanacataenexa. Bajarapacuene, bitso xanepana, paliwaisi copiaya Dioso najumecopata Moisés-pijinëta, matatoxenetsia.
7 Itsa baja xanepanaejitsipa copiaya paliwaisi Dioso najumeliwaisicajunua Israel-pijinë pemomoxijawabelia, aneconijibia petaejawanexatsi, pejumecowënëtawanapaejawata paliwaisi najumecopata Moisés-pijinëta, nexata baja icatsia cotocaewi itsaliwaisi Dioso najumecapanepaeya aponacatonajumecopatsi tsipae, xua yabara aneconijibia nacataejitsia.
8 Israel-pijinë pemomoxi, xaniawaetsia apopejumecowënëtawanapaexae paliwaisi bajayata Dioso najumecopata Moisés-pijinëta, Dioso tajëwelia najumecapanepaeya jumaitsi pejumeliwaisibaxutota mapacueniaje:
«Jumaitsi raja pepopetuxanenë Dioso: ‘Itsamatacabijawabelia icatsia najumecapanepaeya najumeliwaisicajonenajë Israel nacuapijiwijawabelia, Judá nacuapijiwijawabelia-ata, pejanaliwaisi pejumecowënëtawanapaenexa.
9 »’Bajarapapejanaliwaisi apocuenejëpae tsane paliwaisi najumecajunuajë bajarapamonae pijasalinaiwimijawabelia tayawenonabiabinexa, pamatacabi bajayata matacarenanë Egipto nacuawerena. Itsiata, bajarapamonaemi apopejumecowënëtsixae tanenajumeliwaisicajonecuenia, copatajë baja bajarapamonaemi tayawenonaejawa’», jai pepopetuxanenë Dioso.
10 Orijibia, jumaitsi Dioso:
«Nexata, paliwaisi pejanacuenia najumeliwaisicajonenajë Israel-pijinë pemomoxijawabelia, mapaliwaisicueniaje: Caejiwi canacujitsia, tajumeliwaisi yapëtaeya-exanaponaenajë, pacuenia netojinawanapaejitsia. Bajarapaliwaisi tsijamatabërubianajënua, betayaquinaecuenia pejamatabë-ëthëtota. Nexata, bajarapamonae bajarapaliwaisi jamatabëcuenematacaponaenatsi, tajitsipaecuenia pejinawanapaenexa. Nexata, bajarapamonae pijaDiosonënë tsane, tajajiwinua tsane.
11 »Bajarapacuenia tatsijamatabërubixae, nexata itsajiwi-ata aponamatawenonae tsane pecujarubinexatsi pijamonaeyajuwënënë tajumeliwaisi. Itsajiwi-ata bajarapamatacabi itsanëjawabelia, pijamonaenëjawabelia-ata, apojumaitsi tsane: ‘Xamë-ata beyapëtaneme Dioso,’ apojai tsane, tsipaji baja, daxitajiwi neyapëtaena, beweliajamatabëcuenewi, ayaijamatabëcuenewi-ata.
12 »Xanë baja daxita tajajiwi pibisiacuene pexanaeneconimi, wecua-ajibia-exanaenajë. Aponajamatabënapitsinë tsane bajarapapibisiacuenemi»,b jai pepopetuxanenë Dioso pejumeliwaisibaxutota, bajayata tajëwelia Israel-pijinë pemomoxi yabara.
13 Bajarapacuenia Dioso pejumaitsixae, pejanacuenia penajumeliwaisicajonejawanexa waxaitsijawaberena, nacayapëtaeya-exana pacuenia baja ajumematamobi paliwaisimi copiaya Dioso najumecapanepaeya jumaitsi judíowi pijasalinaiwimijawabelia. Nexata, pacuenia mapanacuapijicuene ajibi tsaponae, bajara-itsi bajarapaliwaisimi. Werewerecapona baja.