Jesús raja sacerdote pepopenamatacaitorobinë tsaponaponae, pecuenecowëya Melquisedec bajayatami
7
Bajayatami, Melquisedec pewetsinë tsaponaponae Salem tomarata. Bajaraponëmi sacerdotenë-ata, jiwi petocuaicuaijainexa, pepo-ayaijamatabëcuenenë Diosojawabelia. Nexata, pamatacabi Abraham-pijinë barënawiatanajetarucarena pijajiwi wajabitsaë, pewerebiabicujinae itsanacuanë pewetsiwi pebarënawajabitsaëtsijawata, bajarapamatacabi, Melquisedec pitsapa pecopiapitsinexa Abraham-pijinë pebarënawiatsinë. Melquisedec pecopiapitsijawata, cuenewajunupaeba Abraham-pijinë pebarënawiatsinë. Melquisedec pecopiapitsijawata, cuenewajunupaeba Abraham-pijinë, Dioso pexaniacuenia peyawenonaejawanexatsi.
2 Nexata, Abraham-pijinë pijawajabitsaë pewerebiabiwimi pecobecowë penotsijawanë, canajetaruca. Bajaraxuayajuwënëjawanë rajutapona ofrendacuenia caejawa, diez xuabejeyajuwënëjawa, Melquisedec-jawabelia. «Melquisedec», itsa jai hebreojumeta: «Dioso pitabarata aneconijibia xaniawaetsia peyanacua-ewetsinë», pejaijume. «Salem tomara pewetsinë», itsa jai hebreojumeta: «Jamatabëcuenexanepanaeya peyanacua-ewetsinë», pejaijume.
3 Melquisedec yabara, Dioso pejumeliwaisibaxutota aponacayapëtaeya-exanae pexainaejawa paxa, pena, pamojiwimi-ata. Bajarapacuenia aponacayapëtaeya-exanaenua penaexanaejawa, petëpaejawa-ata yabara. Pacuenia daxitamatacabijawabelia Dioso pexënato jiwi petocuaicuaijainënexa Diosojawabelia, bajarapijinia cuene-itsi Melquisedec.
4 Nexata, beyapëtanetsi pacuenia Melquisedec bitso ayaijamatabëcuenenë, wajasalinainëmi Abraham-pijinë matatoxenetsia. Bajaraxuata, Abraham-pijinë ayaijamatabëcuenenëmi-ata, ofrenda rajuta Melquisedec-jawabelia. Baitsi, pamatacabi Abraham-pijinë canajetaruca pijawajabitsaë pecobecowëjawanëmi, pewerebiabicujinae bajarapamonaemi, bajaraxuanëyajuwënëjawanë ofrendacuenia rajutapona caejawa, diez xuabejeyajuwënëjawa, Melquisedec-jawabelia.
5 Bajayatami, paliwaisi Dioso najumecopata Moisés-pijinëjawabelia, bajarapaliwaisi yapëtaeya-exana pacuenia itsamonae, Levípijinë pemomoxiyajuwënëwi, canacopabijitsia sacerdotecuene. Nexata, daxita israelitawi caenë, Abraham-pijinë, pemomoxi-ata, Dioso tocopata bajarapasacerdotewi pecanacopabinexa daxita xua israelitawi rajutapona ofrendacuenia pexainaeyajuwënëjawanë, caejawa, diez xuabejeyajuwënëjawa.
6 Melquisedec picani Levípijinë apopemomo. Itsiata, Melquisedec ayaijamatabëcuenenëxae, Abraham-pijinë rajutatsi pexainaeyajuwënëjawanë ofrendacuenia caejawa, diez xuabejeyajuwënëjawa, tsipaji Melquisedec sacerdotenëxae, cuenewajunupaeba Dioso pexaniacuenia peyawenonaejawanexatsi.
7 Pajiwi cuenewajunupaeba Dioso pexaniacuenia peyawenonaejawanexatsi, bajarapajiwi ayaijamatabëcuenejiwi Dioso pitabarata, pecuenewajunupaebijiwiyo matatoxenetsia. Daxita baja cajena yapëtanetsi bajarapacuene.
8 Maparucaeje, Leví pemomoxi, pamonae pitapona xuanë jiwi rajutapona, caejawa, diez xuabejeyajuwënëjawa, bajarapamonae tëpapona pacuenia daxitajiwi. Itsiata baitsi jane, Dioso pejumeliwaisibaxutota Melquisedec yabara jumaitsi abaxë mapamatacabita-ataje piasaëtsaponaponaejawa,a tsiteca jiwi petocuaicuaijainënexa Diosojawabelia.
9-10 Nexata, pacujinae Abraham-pijinë bajayatami rajuta caejawa, diez xuabejeyajuwënëjawa Melquisedec-jawabelia, Abraham-pijinë pijasalinainëxae, bepeyajawarajutsi bajarapa-ofrenda daxita Leví pemomoxi, pamonae sacerdotewi. Nexata, bajarapamonae aponaexanae-ata abaxë, bajayatami Abraham-pijinë daxitanexa yaiyataeya ofrenda rajuta Melquisedec-jawabelia, itsa pitsapa jamatejema pecopiapitsinexatsi.
11 Pamatacabi itapeta Aarón-pijinë, pexi-ata, Levípijinë pemomoxiyajuwënëwi, sacerdotewinexa, bajarapamatacabijawa pijinia, Dioso tonajumecopata Moisés-pijinëta, paliwaisi canacuenebijitsia sacerdotewi, judíowi pejumecowënëtsiliwaisinexa. Nexata, bajarapasacerdotewi bajarapaliwaisita itsa cuenecaëjëpatsi pianeconijibia-exanaejawa jiwi, Dioso apo-itorobitsica tsipae Cristo, sacerdotenënexa. Bajaraponë sacerdotewi apopepopenamatacaitorobinë cae-epatoyonexa, pacuenia cuene-itsi Aarón-pijinë, pemomoxi-ata; biji rajane, daxitamatacabijawabelianexa. Nexata, cuenejëpa pacuenia Melquisedec cuene-itsi.
12 Nexata, Dioso itapetsi-ata Cristo sacerdotewi pepopenamatacaitorobinënexa, apopecuenejëpaexae Aarón-pijinë, yajawacopatatsi pejanaliwaisi Dioso penajumecopatsiliwaisiwecua Moisés-pijinëta, Cristo pijajiwinexa.
13 Ponë yabara pacatoyaquinatsi, Wajatuxanenë, Jesucristo raja. Bajaraponë Levípijinë apopemomo. Biji rajane, saicaya itsapemomoxibitsaëtota penaitajëtsinë, pamonae caeto-ata sacerdotecuene apopena-exanaewi, apopenacuenebiwinua altar-jawata.
14 Wajatuxanenë itsa naexana mapanacuataje, daxitajiwi baja cajena yapëtane penaexanaejawa Judápijinë pemomoyota. Yapëtanenua pacuenia bajayata Moisés-pijinë apowajunupaebi Judápijinë pemomoxibitsaëtoyajuwënënë, sacerdotenë penaexanaejawanexa.
15 Orijibia, waxaitsi, xaniawaetsia jane baja, yapëtanetsi pepatsijawa itsawiria sacerdotenë, Levípijinë pemomoxiwecua, tsipaji Cristo, peposacerdotenë pacuenia Melquisedec cuene-itsi.
16 Cristo aponaexanae peposacerdotenë, Levípijinë pemomoxiyajuwënënëxae, pacuenia bajayata itoroba Dioso penajumecopatsiliwaisi Moisés-pijinëta. Biji rajane, Dioso exana Cristo peposacerdotenë, piasaëtsaponaponaenëxae daxitamatacabijawabelianexa.
17 Dioso baja cajena pejumeliwaisibaxutota tajëwelia jumaitsi pexënato yabara mapacueniaje:
«Xamë raja peposacerdotenëmë tsane daxitamatacabijawabelianexa. Pacuenia Melquisedec jamatabëcuene-itsi, bajarajamatabëcuene-itsimë tsane»,b jai baja cajena tajëwelia Dioso pejumeliwaisibaxutota.
18-19 Nexata baja, paliwaisimi copiaya Dioso najumecopata Moisés-pijinëta jiwi pejumecowënëtsinexa, Dioso baja copiarucaeya-exana, tsipaji bajarapaliwaisimi apocaëjëpaetsi jiwi pewecua-ajibia-exanaenexatsi pibisiacuene pexanaeneconi. Nexata, paliwaisi aeconoxae Dioso nacatocopata, Cristo pejamatabëcueneta, xanepana bitso bajarapaliwaisimi matatoxenetsia. Bajarapapejanaliwaisi wajajumexaniataexae, yapëtanetsi Dioso aneconijibia wajanacataejawa, Cristo pejamatabëcueneta. Nexata, Cristojawabelia waja-itaxutuajamatejemaxae, nacacuenecaëjëpa waja-imoxoyotsijawac Diosojawabelia.
20 Yapëtanetsi Cristo penamatamotsisacerdotenë, tsipaji Dioso baja cajena tajëwelia najumecapanepaeya jumaitsi Cristo peposacerdotenë pexanaenexatsi, jiwi petocuaicuaijainexa Diosojawabelia daxitamatacabijawabelia. Dioso bajarapacuenia itsiata apoyabarajumaitsi, pamonaemi bajayata copiaya exanaponatsi sacerdotewi, Cristo pewajënaeya.
21 Itsiata baitsi jane, tajëwelia Dioso pejumeliwaisibaxutota, najumecapanepaeya jumaitsi Cristo yabara mapacueniaje:
«Dioso baja cajena jumaitsi pexaniajaicuenia pexanaenexa, itsajamatabëcuene epatua apopexainaejawanexa pejumaitsijawawecua. Pexënatojawabelia jumaitsi mapacueniaje: ‘Xamë baja cajena peposacerdotenëmë tsane daxitamatacabijawabelianexa. Pacuenia Melquisedec jamatabëcuene-itsi, bajarajamatabëcuene-itsimë tsane’»,d jai Dioso pejumeliwaisibaxutota pexënato yabara.
22 Bajarapacuenia tajëwelia Dioso najumecapanepaeya pejumaitsixae Cristo yabara, nexata yapëtanetsi xua Cristo nacato-exana, bitso pexaniajawa paliwaisimi copiaya Dioso najumecopata Moisés-pijinëta matatoxenetsia.
23 Copiaya, pamonaemi sacerdotewi, petëpaponaexae exanaponatsi ayaibitsaëto, tsipaji apocaëjëpaetsi pewetsinexa daxitamatacabijawabelia.
24 Itsiata baitsi jane, Jesús apotëpae tsane. Peposacerdotenë tsaponaponae tsane daxitamatacabijawabelianexa. BajaraPonëcujinae baja, icatsia itsanë apo-exanaetsi tsane peposacerdotenë.
25 Cristo peposacerdotenëtsaponaponaexae daxitamatacabijawabelianexa, nexata petocuaicuaijainë tsaponaponae Diosojawabelia, pamonae imoxoyota Dioso, bajaraPonë pejamatabëcueneta. Pamonae siwanajamatabëcuenecopaba Cristojawabelia, Dioso wecua-ajibia-exanatsi pijaneconi, aneconijibia petaenexatsi daxitamatacabijawabelia.
26 Cristo cajena Dioso pejamatabëcuenejëpaenë. Itsaneconi-ata apopexainaenë. Apoxainaenua itsacuenejawayo-ata xua yabara Dioso bijiaya taejitsiatsi. Maparucaeje, Dioso tsatatsi pibisiacuene pexanaewiwecua, juya pe-ecaeya-exanaenexatsi athëbëtatsia, Dioso pepopijanacuayabetsia. Bajarapitsicuene pexainaenë bitso namatawenonatsi sacerdotewi pepopenamatacaitorobinënexa.
27 Orijibia, Cristo apocuenejëpae itsamonae sacerdotewi pepopenamatacaitorobiwi, pacuenia exanabiaba, caematacabi canacujitsia, dajubi pebeyabiabinexa, Dioso pesiwajamatabëcuenecaewia-exanaenexa pijaneconi yabara. Bajarapamonae copiaya natobeyaxuababiaba dajubi, petajuitsinexa Diosojawabelia pijaneconi yabara. Xuacujinae, itsamonae bajarapacuenia-ata to-exanabiaba pijaneconi yabara. Bajarapacuenia Cristo apo-exanae. Biji rajane, bajaraPonë caeto nacopata pebeyaxuabinexatsi, caecuenia pematamotsinexa daxitajiwi pibisiacuene pexanaeneconimi, daxitamatacabijawabelianexa.
28 Bajayata, paliwaisi Dioso najumecopata Moisés-pijinëta, tocopata mapanacuapijiwije sacerdotewi pepopenamatacaitorobiwi penaexanaenexa. Apocuenecaëjëpae-atatsinua pejinawanapaejawa pibisiacuene exanaenejewa. Itsiata baitsi jane, bajaraxuacujinae, Dioso najumecapanepaeya pexaniajaijumeta itapeta Pexënato, sacerdotewi pepopenamatacaitorobinë penaexanaenexa, daxitamatacabijawabelia. BajaraPonë pepopianeconijibinë Dioso pitabarata, tsipaji caeto-ata pibisiacuene apo-exanae.