6
1-2 Waxaitsi baja becopabatsi mito piapaenacuetoxi wajajamatabëcuenejëpaejawa, Dioso peliwaisi wajacanaëjëtsicuene yabara. Biji rajane, wajawajënaeyabelia bejamatabëcueneliwaisinaweretaponatsi Dioso pijacuene wajatonacuenebanawanapaexae. Bajaraxuata, aponamatawenonaetsi baja pematatsënëa wajanajumenotsijawa, Cristo peliwaisi yabara, jiwi pewecuanajamatabëcuenepënëyorobijawa pexanaecuenemi,a juya pesiwanajamatabëcuenecopabinexa Diosojawabelia, aneconijibia petaenexatsi, jiwi penabautizabicueneb yabara-ata. Aponamatawenonaetsi icatsia wajanacacujarubijawa xua yabara ancianowi tsimatanacobebuatabiaba,c jiwi petowajëtsijawata, Dioso icatsia piasaëya-exanaejawanexa jiwi petëpaecujinae, pacuenia-ata naneconitsia-exanaejitsia daxita pijaneconi pexainaewi. Bajarapaliwaisianë baja jumexaniatanetsi a̱jena̱ siwanajamatabëcuenecopabatsi Cristojawabelia.
3 Dioso itsa nacatocopataponaena, wajawajënaeyabelia jamatabëcuenewitsabaponaenatsi, pacuenia Dioso nacatojitsipa.
4 Itsamonae baja picani, Dioso peliwaisi jamatabëcuene-itayotatsi. Nexata, jumexaniatane baja picani Cristo peliwaisi, Dioso pecapanepaenexatsi. Espíritu Santo-ata baja picani tsijamatabë-ecatsi.
5 Yapëtanenua baja picani, pacuenia Dioso pejumeliwaisi bitso xanepana, pacuenia-ata taejitsia Dioso pinijicuene pexanaejawa, pamatacabi pejananacua exanaena.
6 Bajarapamonae, yapëtae-ata bajarapapexaniacuenejawanë Dioso peto-exanaejawatsi, itsa nawecuacopaba copiaya Cristo peliwaisi pejumexaniataejawami, nexata to-acuenebi tsipaetsi icatsiad pejanacuenia penajamatabëcuenepënëyorotsinexa Cristojawabelia. Bajarapacuenia itsa exanaejitsipa, najamatabëcuene-itajëtsipa apopeyaiyataejawa Dioso pexënato, tsipaji bepejanacuenia pebeyaxuabijawa tsipae cruzata pijaneconi yabara.
7 Jiwijamatabëcuene, irapijicuene-ata, najëpaeya, Dioso pexaniacuenia cueneyawenonatsibeje. Dioso pexaniacuenia ema runaeya-exanabiaba irajumawereca pesucuetsinexa. Pe-irasucuetsijawata pe-ubijawa nawitsia capitsipabiaba pexaniabanacale, nexata pe-ubinë siwajamatabëcuenebarëya tsabiabi.
8 Itsiata, bajarapa-ira itsa capitsapabiaba piabejejawanë, pe-ejuwijawanë, apoxanepanae itsacuenejawayonexa-ata. Nexata, bajarapa-irata penacuenebinë tocaëjëta petajuitsinexa, piajibia-exanaenexa piabejejawanë. Bajarapacuenia pijinia, Dioso cuene-ajibia-exanaena pamonae capitsapabiaba apopejitsipaecuenejawanë, yapëtae-ata pexaniacuenia peyawenonaejawatsi Cristo pejamatabëcueneta.
9 Tajamonae, bitso pataca-asiwawi, bajarapacuenia pacatoyaquinae-atatsi apopanejitsipaejumenë, yapëtaniji Dioso pejitsipaecuene pane-exanaejawa, panesiwanajamatabëcuenecopabixae Cristojawabelia. Pacuenejëpame baitsi copiayabitsaëto, pamonae Diosonexa pexaniacuene to-exanabiaba.
10 Nexata, Dioso ëpexaniacuene pexanabiabinëxae, aponacofënëtsi tsane papexaniacuene baja pa-exaname, paneyawenonaejawata Cristo pijajiwijawabelia, panenajamatabëcuene-itajëtsinexa pane-asiwajawa bajaraPonë. Bajarapacuenia abaxë payawenonaponame tsiteca bajarapamonae.
11 Ayaicuenia pacatojitsipatsi, pacaejiwimë canacujitsia, panewajënaeyabelia pexaniacuene Dioso paneto-exanabiabinexa, panenajamatabëcuene-itajëtsinexa panecopia-ewetawanapaejawa pexaniacuene papecato-exanaenexa najumecapanepaeya pejumaitsicuenia.
12 Apopacatojitsipaetsi paneyabara-afaetabijawa Diosojawabelia pane-itaxutuajamatejemajawa. Biji rajane, pacatojitsipatsi pane-ajamatabëcuenesaënexa, pacuenia itsamonae ajamatabëcuenesaë bajayajebi pesiwanajamatabëcuenecopatsijawa Diosojawabelia, pepitsinexa xua najumecapanepaeya jumaitsitsi perajutsinexatsi.
Xua Dioso najumecapanepaeya jumaitsi, pepacuene exanaena
13-14 Pamatacabita Dioso najumeliwaisicajunua Abraham-pijinëjawabelia peyawenonaenexa, jumaitsi mapacueniaje: «Xanë, Diosonë, najumecapanepaeya cajumaitsitsi tacayawenonabiabinexa, ayaijawa necobecowë nexainaenexa, ayaibitsaëtoxaneto nemomoxi-ata», jai Dioso. Bajarapacuenia Dioso nawënëcacuaicuaijai,e tsipaji baja ajibi pematatsënëa itsanë, matatoxenetsia ayaijamatabëcuenenë bajaraPonëwecua, penaneconitsia-exanaenexatsi, itsa apo-exanae tsipae pejumaitsicuenia.
15 Abraham-pijinë bajayajebi Dioso jamatabëcuene-ewetsiaponapona. Nexata jane baja, belia rajutatsi pacuenia najumecapanepaeya jumaitsitsi.
16 Mapanacuapijiwije, pecuaicuaijaijawata, canacuenebabiaba Dioso pewënë, itsa jume, itsanë peyaiyataenëtsi pewënë-ata, pejumexaniataenexatsi itsamonae xua jumaitsi peto-exanaejawanexa. Nexata, bajarapacuenia itsa jumaitsi, acuenebi itsajiwi-ata pejume-aebijawa, tsipaji pejumaitsinë natocaëjëta Dioso penaneconitsia-exanaejawanexatsi, itsa apo-exanae pejumaitsicuenia.
17 Bajaraxuata, Dioso pacujinae najumecapanepaeya jumaitsi jiwi peyawenonaenexa, nawënëcacuaicuaijai peto-exanaejawanexa. Bajarapacuenia jumaitsi, tsipaji jamatabëyapëtaeya-exana bajarapamonaejawabelia pepacuene peto-exanaejawanexa, najamatabëcueneliwaisi-epatajërëtsinejewa.
18 Bajaraxuata, yapëtanetsi Dioso anijacuenebeje canacueneba pejumaitsijawa pexaniajaijawanexa. Caejawa Dioso nawënëcacuaicuaijai. Itsajawanua najumecapanepaeya pejumaitsijawa pexanaejawanexa. Dioso caeto-ata apopenajumetsënëtsinë,f wajanacato-exanaejawanexa. Bajarapacuenebeje yabara Dioso apopenaliwaisixanetsinë. Bajaraxuata, waxaitsi apobejamatabëcuenebëjaitsi. Be-itaxutuajamatejematsi tsaponae Dioso, wajanacato-exanaenexa pacuenia baja bajayata tajëwelia najumecapanepaeya jumaitsi.
19 Bajarapacuenia itaxutuajamatejemaya wajacopia-ewetawanapaejawa, Dioso najumecapanepaeya wajanacato-exanaenexa pejumaitsicuenia, cuenejëpa jera pecëtarutsinaebo. Pacuenia naebojawabelia pecëtarutsijera, acuenebi peponaejawa itsajawabelia, bajarapacuenia waja-itaxutuajamatejemacujinae Cristojawabelia, bajaraPonë aponacajamatabëcuenecopatsi itsacuenejawabelia wajasiwanajamatabëcuenecopatsiyaniwa. Cristo wajanacasiwatëpaecujinae, pona athëbëabetsia, pe-ecaenexa Dioso pemuxuneneta,g wajanacatocuaicuaijainexa sacerdotewi pepopenamatacaitorobinëcuenia Diosojawabelia. Bajaraxuata, ajamatabëcuenesaëtsi tsawanapae Dioso waja-itaxutuajamatejemajawa.
20 Jesús athëbëabetsia wajawajënaeyabetsia pona, wajanacato-exanarutsinexatsia namuto Diosojawabetsia. Bajarajotatsia exanatsi sacerdotewi pepopenamatacaitorobinë, pacuenia bajayatami cuene-itsi Melquisedec, jiwi petocuaicuaijainexa Diosojawabelia daxitamatacabijawabelia.