5
Dioso itapetabiaba sacerdotewituatuajëta, caenë pepopenamatacaitorobinënexa, bajaraponë daxitajiwi petocuaicuaijaitsabiabinexa Diosojawabelia. Nexata, xuanë jiwi capatabiaba ofrendacuenia perajutsijawanexa, bajaraponë juya rajutabiaba Diosojawabelia. Padajubinë-ata capatabiaba pijaneconijamatabëcuene, bajaraponë juya totajuitabiaba altar-jumata Diosojawabelia, pesiwajamatabëcuenecaewinexatsi pibisiacuene pexanaeneconimi.
2 Nexata, sacerdotewi pepopenamatacaitorobinë jiwitonëxae, caëjëpatsi dowathi pejamatabëcuene-ëjëtsinexatsi pibisiacuene pexanaenexa, pacuenia daxitajiwi. Bajaraxuata, cuenecaëjëpatsi asiwaya pitaxutotsoniataenexa pamonae dowathi jamatabëcuene-ëjëtatsi, pibisiacuene pexanaenexa.
3 Orijibia, sacerdotewi pepopenamatacaitorobinë pibisiacuene itsa exana, tsicarucatsi pijacuata pecapatsijawa pijadajubinë saicaya,a pijaneconijamatabëcuene petajuitsinexa Diosojawabelia. Pacuenia itsamonae yabara to-exanabiaba, bajarapacuenia pijacuata nato-exanabiaba, Dioso pesiwajamatabëcuenecaewinexatsi pijaneconimi.
4 Itsanë-ata pijacuata sacerdotewi pepopenamatacaitorobinënexa aponaexanae, daxitajiwi petocuaicuaijainexa Diosojawabelia, peyaiyataenexatsinua. Biji rajane, sacerdotewiyajuwënënë, caenë, Dioso itapetatsi sacerdotewi pepopenamatacaitorobinënexa, pacuenia bajayata Aarón-pijinë-ata Dioso itapetatsi sacerdotewi pepopenamatacaitorobinënexa. Nexata, bajayata Aarón-pijinë-ata daxitajiwi yaiyatanetsi.
5 Bajara-icatsia itsi Cristo-ata. Pijacuata apona-itapetsi sacerdotewi pepopenamatacaitorobinënexa, wajanacatocuaicuaijainexa Diosojawabelia. Biji rajane, Dioso itapetatsi sacerdotewi pepopenamatacaitorobinënexa, daxitajiwi peyaiyataenexatsi. Dioso peyapëtaeya-exanaenexa Cristo pitapetsijawa, copiaya jumaitsi mapacueniaje:
«Xamë raja taxënatomë. Ajenacujinae canawajunupaebatsi axanëcuene»,b jai Dioso.
6 Orijibia itsabaxutota, Dioso pejumeliwaisibaxutota, jumaitsi mapacueniaje:
«Xamë raja sacerdotewi peponenamatacaitorobinë tsane daxitamatacabijawabelianexa. Pacuenia Melquisedec jamatabëcuene-itsi, bajarajamatabëcuene-itsimë tsane»,c jai Dioso pexënatojawabelia.
7 Cristo abaxë itsa ponapona mapanacuataje, pinijijumeta ya-itaxutonueya napënawajëta Diosojawabelia, petëpaejawawecua pecapanepaenexatsi. Itsiata, Cristo nacaeweta paxa Diosojawabelia, peto-exanaenexatsi pejitsipaecuenia. Bajaraxuata, xaniawaetsia Dioso jumetanetsi, pejamatabëcueneyawenonaenexatsi.
8 Cristo, Dioso pexënato, ayaijamatabëcuenenë-ata, itsiata paxa jumecowënëta. Nexata, pijacuata nacopata pebejiobia-exanaenexatsi pacuenia Dioso tojitsipatsi, apojitsipae-ata picani petëpaejawanexa. Bajarapanabejiobitsijamatabëcuene natoyapëtane pejumecowënëtsijawa paxa Dioso.
9 Bajarapacuenia pejumecowënëtsixae petëpaejawabelianexa, paxa Dioso cuene-itajëtatsi pecuenecaëjëpaejawatsi sacerdotewi pepopenamatacaitorobinë penaexanaenexa. Naexananua pecapanepaenënexa daxita pamonae jumecowënëtawanapatsi pacuenia itorobatsi. Nexata, bajarapamonae Dioso rajutsianatsi matacabi apopewerewerecaejawa.
10 Dioso baja cajena, itapetatsi Cristo sacerdotewi pepopenamatacaitorobinënexa, jiwi petocuaicuaijainexa Diosojawabelia, pacuenia bajayata cuene-itsi Melquisedec.
Pamonae Cristojawabelia siwanajamatabëcuenecopaba pewajënaeyabelia jamatabëcueneliwaisi naweretapona Dioso pijacuene petonacuenebaponaexae
11 Xainajë picani ayailiwaisi patacatsipaebinexa, paneyapëtaenexa xua yabara Cristo, Melquisedec-beje nacuenejëpabeje. Itsiata baitsi jane, ayapëbeje patacajumeyapëtaeya-exanaenexa bajarapaliwaisi. Pacuenia pejewaxi be-axayo bayapëtaepona wajacujarubijawa, bajarapajamatabëcuene-itsimë.
12 Bajayajebi baja picani, Cristojawabelia pasiwanajamatabëcuenecopabame. Bajaraxuata, juya baja picani, bepatsipaebaponame itsamonaejawabelia Dioso peliwaisi, bajarapamonae pejamatabëcueneliwaisinaweretaponaenexa Dioso pijacuenejawata. Itsiata baitsi jane, abaxë panamatawenoname icatsia papecatsipaebinexa bajarapaliwaisi, peyapëxanepanaeliwaisianë, Dioso peliwaisiyajuwënëjawanë, paliwaisianë copiaya pacatsipaebatsi, apopanejumeyapëtaexae. Paxamë apopanejamatabëcuenenaweretsixae, nexata pacuenia pejewaxinacuetoxi ëmitobarëmene apa, apoxae abaxë pexaejawa, bajarapajamatabëcuene-itsimë.Paliwaisianë baitsi ajumeyapëbeje, apopacacaëjëpae orijibia panejumeyapëtaenexa.
13 Pamonae abaxë namatawenona petsipaebinexatsi peyapëxanepanaeliwaisixi, Dioso pejumeliwaisi, bajarapamonae cuenejëpa bemitopiapaenacuetoxi. Bajarapamonae abaxë apojumeyapëtae xaniawaetsia pacuenia Dioso aneconijibia tane jiwi.
14 Pacuenia penaweretsiwi pijacuata xane pexaejawa, bajarajamatabëcuene-itsi pamonae pejamatabëcuenewitsabiwi Diosojawabelia. Nexata, canacuenebabiaba Dioso peliwaisi, penato-itapetaponaenexa xua pexaniacuene pexanaenexa, xua-ata pibisiacuene pexanaeyaniwa.