4
Dioso baja cajena, ira rajutsiapaeba panijasalinaiwimijawabelia,a penacuera-ewetsinexa, ayaicuenia pejinarutsicujinae nacueratsiaya. Bajarapijinia pacuenia, maparucae-ataje Dioso tsiteca jamatabëcuene-ewetaponapona, perajutsinexa Dioso pijapenacuera-ewetsijamatabëcueneb pitaxutuajamatejemawitsijawabelia, bajarapacuenia bajarapamonae penawecuacopabinexa pejamatabëcuene-enabiabijawamitsi, Dioso aneconijibia petaejawanexatsi. Bajaraxuata, caejiwi canacujitsia, bejumexaniatane perajutsijawanexatsi bajarapanacuera-ewetsicuene, jamatabëcuenexanepanaeya pejinawanapaenexa, Dioso pitabarata. Bajarapanacuera-ewetsicuene yabara paxamëyajuwënëwi netsita cuene-aebawanapa. Bajaraxuata, bajarapamonae junawiaya jinawanapa, Dioso pitabarata.
2 Pacuenia bajayatami, pexanialiwaisi tsipaeba panijasalinaiwimijawabelia, bajarapacuenia waxaitsi-ata baja jumetanetsi pexanialiwaisi wajanacacapanepaeliwaisinexa. Itsiata baitsi jane, panijasalinaiwimi apotoxanepanaetsi bajarapaliwaisi pecapanepaenexatsi, tsipaji apojumexaniatae xua jumaitsitsi.
3 Itsiata, waxaitsi, wajajumexaniataewi bajarapapexanialiwaisi, Dioso nacatocaëjëta wajajamatabëcuenenacuera-ewetawanapaenexa. Itsiata, pamonae apojumexaniatae bajarapapexanialiwaisi, bajarapamonae yabara Dioso bajayata jumaitsi mapacueniaje:
«Tabara-anaepanaexae apotanejumexaniataewijawabelia, najumecapanepaeya jumaitsinë: ‘Bajarapamonae apojone tsane penacuera-ewetsinexa, panacua picani toxaniawaetajë, jamatabëcuenebarëyaya pejinawanapaenexa,’ janë»,c jai Dioso.
Xaniajai, Dioso wemaxënacuera-eweta baja, daxitacuene pexanaeweretsicujinae, nacua pexanaematacabita.
4 Bajaraxua yabara itsaliwaisijawata Dioso pejumeliwaisibaxutota nacayapëtaeya-exana mapacueniaje:
«Siete matacabita, Dioso peweretsixae daxita pexanaejawa, bajarapamatacabita wemaxënacuera-eweta»,d jai Dioso pejumeliwaisibaxutota.
5 Icatsia, Dioso pijapenacuera-ewetsijawa yabara, itsaliwaisijawata Dioso pejumeliwaisibaxutota jumaitsi mapacueniaje:
«Bajarapamonae apojone tsane penacuera-ewetsinexa, panacua picani toxaniawaetajë, jamatabëcuenebarëyaya pejinawanapaenexa»,e jai Dioso pejumeliwaisibaxutota.
6 Copiaya pejumetaewi bajarapapexanialiwaisi, apojone panacuajawabelia Dioso toxaniawaetatsi, penacuera-ewetsinexa, ajamatabëcuenetajaya pecuene-aebixae Dioso peyawenonaejawanexatsi. Itsiata baitsi jane, Dioso tsiteca jamatabëcuene-ewetapona, perajutsinexa pejumexaniataewitsijawabelia penacuera-ewetsijamatabëcuene.
7 Dioso itsiata, itapeta itsamatacabi jiwi pexainaejawanexa bajarapanacuera-ewetsijamatabëcuene. Bajaraxua yabara, bexëajawabelia David-pijinëjawabelia Dioso pejumaitsijawa nacayapëtaeya-exana. Bajaraponë juya tajëwelia wajunupaeba pacuenia itsamonae Dioso pijapenacuera-ewetsijamatabëcuene pexainaejawanexa ajena mapamatacabitaje. Jumaitsi mapacueniaje:
«¡Ajena mapamatacabi itsa pajumetaneme Dioso pejume papecajunatsijawata, pëtsa panamuxujematame panejamatabëcuenetajaxae!»,f jai David-pijinë tajëwelia.
8 Bajayata, Josuépijinë matacanajetaruca israelitawi petusatonacuajawawerena, pebarëpatsinexa Dioso panacuajawata tsipaebatsi, nacuera-ewetsiaya pejinawanapaenexa. Peneta, Josuépijinë pepacuene, bajarapanacuata, itsa rajutsipatsi Dioso pijapenacuera-ewetsijamatabëcuene, pematatsënëa Dioso apowajunupaebi tsipae, itsapenacuera-ewetsijamatabëcuene pexainaejawanexa.
9 Bajaraxuata yapëtanetsi panacuera-ewetsijawa sajina Dioso pijajiwi pexainaejawanexa, Israel-pijinë pemomoxi penacuera-ewetsinacuamiwecua.
10 Pajiwi caxitajaraba apopexainaejawami Dioso pijapenacuera-ewetsijamatabëcuene, matapania jane baja wemaxënacuera-ewetag pexanaponaponaecuene, xua yabara Dioso aneconijibia taejitsiatsi. Bajarapijinia pacuenia, bajayatami Dioso-ata wemaxënacuera-eweta daxita pexanaecuene, nacua pexanaeweretsicujinae.
11 Bajayatami, itsamonae israelitawi apojone panacuajawabelia picani Dioso toxaniawaetatsi penacuera-ewetsinexa, pecuene-aebixae bajaraPonë peyawenonaejawanexatsi. Wajacuenejëpaeyaniwa pecuene-aebiwi Dioso, benajamatabëcuenesaëtatsi wajajumexaniataejawa Dioso pepacuene wajanacarajutsijawa baja bajarapanacuera-ewetsijamatabëcuene.
12 Dioso cajena pejumeliwaisi xaina bitso piasaëjamatabëcuene. Xainanua bitso pesaë. Nexata, caëjëpatsi ayaicuene pexanaenexa pejumesaëta. Bitso pexuijailiwaisinua, anijabarëneniabeje pexuijai-espada matatoxenetsia. Pacuenia jiwi espadata caucubijitsipa petsatsinexa pesi penamataropobijawanë, bëpënëa perubenaepesitoxi-ata, bajara-itsi Dioso peliwaisi. Nexata, bajarapaliwaisi wajajumetaejawata, bëpënëajawabelia nacatsijamatabëjunua, petsatsinexa wajajamatabëcuene, wajacanaëjëtsicuenebeje,h wajanacayapëtaeya-exanaenexa pacuenia Dioso pitabarata bëpënëa jamatabëcuene-itsitsi wajanajamatabëxainaecuene.
13 Xua raja Dioso pecobecowëjawa apocuenecaëjëpae pewecuanamatayatsijawatsi. Bajaraxuata, waxaitsi aponacacaëjëpae Dioso wajawecuanamatayabinexa itsacuenejawayo-ata. Bajaraponë tane daxita xua exanatsi. Nexata, itsamatacabi nawajunupaebianatsi daxita waja-exanaecuenemi bajaraPonëjawabelia, wajanacayapëtaeya-exanaenexa itsa tsitapexaniacuenetsi, itsa jume, tsitapibisiacuenetsi.
Cristo raja asiwaya wajanacatocuaicuaijainë Diosojawabelia, sacerdotewi pepopenamatacaitorobinëcuenia
14 Jesús baja cajena Dioso pexënato. BajaraPonë baja pona Diosojawabetsia. Nexata, nuca paxa Dioso pitabarata, wajanacatocuaicuaijainexa sacerdotewi pepopenamatacaitorobinëcuenia, bajarapacuenia wajanacayawenonabiabinexa. Bajaraxuata, waxaitsi becasaëtsawanapaetsi Diosojawabelia waja-itaxutuajamatejemajawa, xua yabara nawajunupaebabiabatsi itsamonaejawabelia.
15 Jesús, baja cajena wajanacatocuaicuaijainë Diosojawabelia, sacerdotewi pepopenamatacaitorobinëcuenia. Wajajamatabëcuenefaefaenaejawa wajanacayapëtaexae, asiwaya nacayawenonabiaba, pepodowathi wajanacajamatabëcuene-ëjëtsijawata, tsipaji Jesús-ata, abaxë itsa ponapona mapanacuataje, jamatabëcuene-ëjëtatsi dowathi. Itsiata baitsi jane, Jesús caeto-ata pibisiacuene apo-exanae.
16 Jesús paxa Dioso pitabarata penucaexae, wajanacatocuaicuaijainexa, bajaraxuata itaxutuajamatejemaya ajumejunawijibia wajacuata benawajëtatsi Diosojawabelia, wajanacayawenonaenexa. Nexata, Dioso asiwaya wajanaca-itaxutotsoniataexae, nacayawenonaena wajanamatawenonaejawata.