Pacuenia Cristo bitso ayaijamatabëcuenenë Moisés-pijinëwecua, yabara peliwaisi
3
¡Tajamonae, Dioso papecajunatsiwi papijajiwinexamë, xaniawaetsia pacanaëjëre Cristo Jesús yabara! Bajaraponë Dioso nacato-itorobica apóstol-nëcuenia, wajanacatsipaebinexa Dioso pejumeliwaisi. Itapetatsinua, sacerdotewi pepopenamatacaitorobinëcuenia wajanacatocuaicuaijainënexa Diosojawabelia, wajanawajunupaebixae wajasiwanajamatabëcuenecopabijawa Cristojawabelia.
2 Pacuenia bajayatami, Moisés-pijinë daxita Dioso pijajiwi to-ewetabiaba Dioso pitorobicueniatsi, bajarapijinia pacuenia Cristo-ata xaniajaiya naca-eweta Dioso pijajiwitsi, Dioso pitorobicueniatsi.
3-4 Nexata, pacuenia bo pexanaenë ayaijamatabëcuene penacuenebibowecua, bajarapapijinia pacuenia Cristo, daxitacuene pexanaenëxae, ayaijamatabëcuenenë Moisés-pijinëwecua. Pacuenia caebo canacujitsia xaina pexanaenëtsi, bajarapijinia pacuenia caebitsaëto canacujitsia xaina petotaxuxuabinëtsi. Nexata, Cristo jiwi pecapanepaenëxae, taxuxuaba pejanabitsaëto, Dioso pijajiwinexa. Bajaraxuata, Dioso, daxitacuene pexanaenë, tocopata pexënato, Cristo, daxitawecua ayaijamatabëcuenenë petaenexatsi.
5 Xaniajai. Bajayata, Moisés-pijinë baja cajena, Dioso pijajiwitonëxae, xaniawaetsia to-eweta daxita Dioso pijajiwi. Nexata, bajarapamonaejawabelia tajëwelia wajunupaebabiaba pacuenia itsamatacabijawabelia Dioso jumaitsijitsia pijajiwijawabelia.
6 Itsiata, Cristo, Dioso pexënatoxae, xaniawaetsia naca-ewetaponapona paxa Dioso pijajiwixaetsi. Yapëtanetsi Dioso pijajiwitsi, xaniajaiya itsa siwanajamatabëcuenecopabatsi Cristojawabelia. Itsa jamatabëcuenebarëyaya copia-ewetawanapatsinua Dioso wajanacato-exanaejawanexa, najumecapanepaeya wajanacayawenonaeyapaebijawa, Cristo pejamatabëcueneta.
Dioso pijajiwi apobe-ajamatabëcuenetaja, pecuene-aebinexa Dioso peyawenonaejawanexatsi
7 Wajacuene-aebiyaniwa Cristo ayaijamatabëcuenenëcuene, Moisés-pijinë, ángelewi-ata matatoxenetsia, Espíritu Santo jumaitsi Dioso pejumeliwaisibaxutota mapacueniaje:
«¡Ajena, mapamatacabitaje, itsa pajumetaneme pacuenia Dioso jumaitsi, pëtsa pajamatabëcuenetajamë panejumecowënëtsinexa,
8 pacuenia bajayata panijasalinaiwimia ajamatabëcuenetaja! Bajarapamonaemi, pamatacabi petusatonacuata jinawanapa, apojitsipae pexanaenexa pacuenia Dioso itorobatsi».
Bajarapacuenia bajayajebi jamatabëcuene-ëjëba Dioso,b peyapëtaenexa itsa pepacuene naneconitsia-exanaejitsiatsi.
9 »Cuarenta picani pawaibeje, Dioso tsita-exanaponatsi ayaicuene pexanaejawanë, peyawenonabiabinexatsi. Itsiata, petusatonacuata panijasalinaiwimi jamatabë-itonotabiaba Dioso, tsipaji apojumecowënëtabiabi pacuenia itorobatsi.
10 »Bajaraxuata, Dioso bara-anaepana panijasalinaiwimijawabelia. Nexata, najumecapanepaeya jumaitsi: ‘Najamatabëxainabiaba saya ëpibisiacuene pexanawanapaenexa. Apojitsipae pejinawanapaenexa pacuenia picani tojitsipajë,’ jai Dioso.
11 »Nexata, Dioso bitso pebara-anaepanaexae panijasalinaiwimijawabelia, najumecapanepaeya jumaitsi: ‘Bajarapamonae apojone tsane, jamatabëcuenebarëyaya pejinawanapaenexa, panacua picani toxaniawaetajë, penacuera-ewetsinexa pejinarutsicuenewecua,’ jai Dioso»,c jai Espíritu Santo panijasalinaiwimi yabara, Dioso pejumeliwaisibaxutota.
12 ¡Bajaraxuata tajamonae, xania panayajiwitaema! ¡Pëtsa, pibisiajamatabëcuene panejamatabëcuenewënëcaexae, pacuene-aebame Dioso, daxitamatacabijawabelianexa piasaëtsaponaponaenë, papecayawenonaejawanexa, bajarapa-aebijamatabëcuene papecatsatsia-exanaeyaniwa Diosowecua, juya panesiwanajamatabëcuenecopabinexa itsacuenejawabelia!
13 ¡Bajarapacuenia pane-exanaeyaniwa, namata-enetsia panajamatabëcueneyawenonare caematacabi canacujitsia, panecasaëtsawanapaenexa Dioso pane-itaxutuajamatejemajawa, paepatowajëto Dioso nacatocaëjëta wajasiwanajamatabëcuenecopatsinexa Cristojawabelia! Bajarapacuenia namata-enetsia pa-exanaename, caejiwi-ata paxamëyajuwënëjiwi piajamatabëcuenetajayaniwa, pibisiacuene pexanaponaponaeyaniwa.
14 Pacueneta copiaya siwanajamatabëcuenecopabatsi Cristojawabelia, itsa tsitecawanapaenanatsi wajatëpaematacabijawabelianexa, papexaniacuene xainatsid Cristo pejamatabëcueneta, aponacatocopiarucae tsane.
15 Bajarapapexaniacuene panewecua-ajamatabëcuenetajayaniwa, Dioso pejumeliwaisibaxutota jumaitsi mapacueniaje:
«¡Ajena, mapamatacabije, itsa pajumetaneme Dioso papecajumaitsijawa, pëtsa pajamatabëcuenetajamë, pacuenia bajayata panijasalinaiwimi petusatonacuata ajamatabëcuenetaja!»,e jai Dioso pejumeliwaisibaxutota Israel-pijinë pemomoxi yabara, pamatacabita cuene-aeba Dioso peyawenonaejawanexatsi.
16 ¿Detsa pamonae, bajayata bajarapacuenia jumetae-ata Dioso pejumaitsijawatsi, itsiata apojumecowënëtsi? Baitsi, pamonaemi bajayata Moisés-pijinë barënajetaruca Egipto nacuawerena.
17 ¿ Detsa jane pamonaemijawabelia Dioso bara-anaepana cuarenta pawaibeje? Pamonaemi pibisiacuene exana petusatonacuata. Nexata, daxita bajarapamonaemi pijaneconi yatëpa bajarapanacuata.
18 ¿Detsa jane pamonaemijawabelia Dioso najumecapanepaeya jumaitsi: «Apopajonemë tsane panenacuera-ewetsinexa panacuata pacatoxaniawaetatsi, jamatabëcuenebarëyaya panejinawanapaenexa», jai? Bajarapacuenia Dioso jumaitsi apopejumecowënëtsiwitsijawabelia.
19 Nexata, yapëtanetsi panijasalinaiwimi apopejonejawa panacuajawabelia Dioso toxaniawaetatsi, penacuera-ewetsinexa,f pecuene-aebixae peyawenonaejawanexatsi.