Cristo peliwaisi, pexaniajailiwaisi, apobenamuxujematsitsi Dioso wajanacacapanepaeliwaisinexa
2
Dioso pexënato, pewetsixae daxitacuene, xaniawaetsia benamuxuna-ewetatsi wajanacatsipaebiliwaisi.a Bitso baja cajena, pexaniajailiwaisi nacatsipaeba. Nexata, wajawajënaeyabelia asaëyata bejumexaniataewanapatsi, itsamatacabijawabelia-ata, bajarapaliwaisiwecua caewëalia wajajopaeyaniwa wajacuenemijawabelia.
2 Bajayata, paliwaisi Dioso najumecopata Moisés-pijinëta, bajarapaliwaisi najumeliwaisi-itoroba ángelewita. Bajarapaliwaisi xaina pitorobisaë. Nexata, pamonae pitorobicueniatsi apojumecowënëtsi bajarapaliwaisi, bajarapaneconiwajëtota Dioso naneconitsia-exanaponatsi.
3 Nexata, Dioso itsa naneconitsia-exana pamonae apopejumecowënëtsiwi pepaebiliwaisi, bitsoyo biji matatoxenetsia Dioso nacananeconitsia-exanaena, itsa namuxujematatsi Pexënato wajanacayapëtaeya-exanaeliwaisi, wajanacacapanepaeliwaisinexa. Wajatuxanenë, Cristo, baja cajena, copiaya petsipaebinë pacuenia Dioso capanepaejitsia daxitajiwi penaneconitsia-exanaejawanexawecua. Yapëtanetsi pexaniajaijawa bajarapaliwaisi, tsipaji pamonae jumetane Cristo pepaebijawa, juya nacayapëtaeya-exana pexaniajailiwaisicuene.
4 Orijibia, Dioso pesaëta cuenecaëjëpaeya-exanatsi wajanacatsipaebiwi, petsita-exanaponaenexa pinijicuene pexanaejawanë, jiwi pejamatabëcuenenabenajacaeya-exanaejawanënua. Tocopatanua Espíritu Santo, caejiwitsi canacujitsia, wajanacajamatabëcuenecaëjëpaeya-exanaponaenexa, pacuenia Dioso nacatojitsipa. Daxita bajaraxuanë yabara yapëtanetsi pexaniajaijawa Cristo pepaebiliwaisi.
Pacuenia baja Cristo naexana bejiwitonëcuenia, yabara peliwaisi
5 Papejananacua yabara pacatsipaebatsi, Dioso baja itsa exanaena, apotocopatsi tsane ángelewi pewetsinexa. Biji rajane, tocopatsiana itsanëb pewetsinexa.
6 Bajaraxua yabara, Dioso pejumeliwaisibaxutota tajëwelia jumaitsi jiwi ayaijamatabëcuenewic pexanaenexatsi ángelewi matatoxenetsia. Jumaitsi mapacueniaje:
«Diosomë, jiwi matatoxenetsia bitso ayaijamatabëcuenenë-atamë, ¿detsa xuajitsia bajarapamonae jamatabënajiname newetsinexa?
7 Jiwi itsa exaname, beweliajamatabëcuenewi exaname ángelewiwecua. Itsiata baitsi jane, bajarapitsiwi-ata, ayaijamatabëcuenewi exaname, peyaiyataewinexatsi. Nexata, tocopatame daxita necobecowë pewetsinexa.
8 Tocopatamenua pejamatabëcuenematatoxenetsinexa daxitacuene nexanaejawa»,d jai Dioso pejumeliwaisibaxutota jiwi yabara.
Nexata, Dioso itsa tocopatsiana daxitacuene pexanaejawa jiwi pewetsinexa, itsacuenejawayo-ata apowecuacopatsi tsane. Itsiata baitsi jane, abaxë daxita bajaraxua apotaetsi waja-itaxutota jiwi pewetsijawa.
9 Pajiwitonë yabara pacatsipaebatsi, Cristo raja. Dioso mapanacuapijiwije bitso piasiwaxae, to-itorobica pexënato, pesiwatëpaenexa jiwi pijaneconi yabara. Nexata, pamatacabi bejiwitonëcuenia naexana mapanacuataje, bajaraponë-ata ángelewiwecua beweliajamatabëcuenenë picani. Itsiata baitsi jane, Dioso ayaijamatabëcuenenë exanatsi daxitawecua, athëbëtatsia pe-ecaenexa paxa Dioso pemuxuneneta, penajua-ewetsinexabeje daxitacuene.
10 Dioso baja cajena daxitacuene nato-exana bajaraponënexa. Dioso pexanaecujinae, pejamatabëcueneta daxitacuene tsiteca xanepana mapamatacabijawaberena-ataje. Dioso petsitaxanepanaexaetsi, canaëjëta pamonae pexi exana Cristo pejamatabëcueneta, ayaijamatabëcuene penajuaxainaewinexa. Bajaraxuata, Dioso tocopata Cristo cruzata ayaicuenia bepejiobia-exanaenexatsi, bajarapacuenia pecapanepaenexa daxita pamonae siwanajamatabëcuenecopaba bajaraPonëjawabelia, peyajawaponaponaenexa Dioso pijapeniweniwenaenacuatatsia. Dioso cana-ëjëta Cristo, pexaniamatacaponaenë penaexanaenexa mapanacuapijiwije pecapanepaejawabelia.
11 Bajarapacuenia pexanaejawata, Cristo, jiwi pijaneconi wecua-ajibia-exana, pamonae- ata aneconijibia-exanatsi, nacaemonae naexana, tsipaji cae-axapijiwi naexana, Cristo yajawa. Bajaraxuata, Cristo, Dioso pexënato, apo-ajume-ura: «Tajuyapijiwi raja», pejaijawa, pamonae baja aneconijibia-exanatsi.
12 Cristo pijajiwi yabara pejumaitsijawanexa, Dioso pejumeliwaisibaxutota tajëwelia jumaitsi mapacueniaje:
«Taxa Diosomë, tajuyapijiwijawabelia cawajunupaebianatsi. Nexata, daxita bajarapamonae tabarënacaetuatsijawata, xamënexa catonaxëanaenatsi, ayaijamatabëcuene tacarajutsinexa»,e jai Dioso pejumeliwaisibaxutota.
13 Cristo icatsia pejumaitsijawanexa pijajiwi yabara, Dioso pejumeliwaisibaxutota tajëwelia jumaitsi mapacueniaje:
«Xanë-ata siwanajamatabëcuenecopatsianajë taxa Diosojawabelia taneyawenonaenexa, pacuenia siwanajamatabëcuenecopaba tajuyapijiwi»,f jai Dioso pejumeliwaisibaxutota.
Cristo icatsia pijajiwi yabara pejumaitsijawanexa, Dioso pejumeliwaisibaxutota tajëwelia jumaitsi mapacueniaje:
«Yajawaponaponajë baja mapamonaeje, Dioso pexi, tanetocopatsiwi ta-ewetsinexa», jai Dioso pejumeliwaisibaxutota.
14 Waxaitsi, Dioso pexitsi, mapanacuaje wajajinawanapaewi, wajaperabëto wajaxainaewinua, bajaraxuata, Cristo jiwitonëcuenia naexana mapanacuataje, jiwiperabëto pexainaenexa. Cristo, jiwiperabëto pexainaenëxae, caëjëpatsi pebeyaxuabinexatsi wajanacasiwatëpaenexa. Nexata, petëpaejawata cuenesaëmatatoxeneta pepodowathi, ponë xaina picani petëpaejamatabëcuenesaë. Bajaraxuata, jiwi tëpae-ata tsane, icatsia asaë tsane petëpaejawawecua, Cristo pejamatabëcueneta.
15 BajaraPonë pecuenesaëmatatoxenetsixae pepodowathi, nacawecua-ajibia-exana baja wajacujunawabiabijawami wajatëpaejawa, xua picani nacajamatabëcuenematatoxeneta, junawiaya wajajinawanapaenexa.
16 Cristo apopatsitsica mapanacuayabetsicaje, ángelewi peyawenonaenexa. Biji rajane, patsica peyawenonaenexa Abraham-pijinë pepopemomoxi,g pamonae Diosojawabelia siwanajamatabëcuenecopaba, pacuenia Abraham-pijinë siwanajamatabëcuenecopata.
17 Cristo pepatsixaetsica jiwi peyawenonaenexa, nexata toxanepanatsi peponaponaejawa cuenejëpaeyah daxitacuenejawalia, pamonaetsi naca-exanaejitsia pejuyapijiwitsi. BajaraPonë, sacerdotewi pepopenamatacaitorobinëcuenia xaniajaiya nacayapijiwinacuenebaponapona, Dioso pitabarata. Cuenecaëjëpatsinua asiwaya wajanacatocuaicuaijainexa Diosojawabelia, wajanaca-itaxutotsoniataexae. Jiwitonë penaexanaexae, wajanacasiwatëpaejawata Dioso nacawecua-ajibia-exana pibisiacuene waja-exanaeneconimi.
18 Jiwi daxitacuene cuenejëpaeya peponaponaexae, Cristo bejiobia-exanatsi. Jamatabëcuene-ëjëtatsinua pepodowathi, pibisiacuene pexanaeya-exanaenexatsi. Bajaraxuata, cuenecaëjëpatsi juya pejamatabëcueneyawenonaenexa pijajiwi, dowathi pejamatabëcuene-ëjëtsiwitsi.