Xuanë exanawanapaejitsia Jesús peliwaisi pejumexaniataewi
3
Jesús pijajiwi, Cretatunaetota pejinawanapaewi, najamatabënapitsia-exanaename yaiyataeya pejumecowënëtsinexa daxita pamonae peyanacua-ewetsiwi pitorobiliwaisi. Itorobianamenua bajarapamonae jitsipaeya pexanaenexa daxita xua pexaniacuene.
2 Muxujiobabiabianame itsajiwi-ata pibisiacuenia pebaracuaicuaijaiyaniwa, itsaliwaisi-ata yabara anaeya penajumecanawiabiyaniwa. Biji rajane, pexaniajamatabëcueneta namata-enetsia benabarëcuaicuaijai tsawanapae beweliajamatabëcuenewi nataeya.
3 Copiayami, waxaitsi itsa abaxë aposiwanajamatabëcuenecopabitsi Jesucristojawabelia, jemacuenia jinawanapatsi. Apo-exanawanapaetsi pacuenia Dioso naca-itoroba, wajanacayanacua-ewetsiwi-ata. Naxuabiaya saya jinawanapatsi Dioso pejumeliwaisiwecua. Wajaperujujamatabëcuene nacajamatabëcuene namatacaitorobabiaba, pejitsipaecuenia wajanaca-exanaeya-exanaenexa pibisiacuenejawanë. Pibisiacuene bitso exanawanapatsi itsamonaejawabelia. Itsamonae cuenecaëbabiabatsi. Daxitatsi namata-enetsia naitoya tsabiabitsi.
4 Bajarawaja-itsiwimi-ata, itsiata Dioso, wajanacacapanepaenënexa, nacayapëtaeya-exana wajanaca-itaxutotsoniataecuene, wajanaca-asiwacuene-ata daxitatsi mapanacuapijiwitsije.
5 Nexata, Dioso wajanaca-itaxutotsoniataejamatabëcuene nacacapanepa baja wajaneconiwecua. Nacajamatabëcuenequiatanua, itsacuenejawayo-ata to-exanaenejewatsi, asiwaya wajanacataenexa. Espíritu Santo pejamatabëcueneta pejanacuenia nacajamatabëcuene-aitawaya-exana.
6 Dioso baja cajena ayaicuenia wajanacayawenonaenexa, Espíritu Santo nacato-itorobica wajanacatsijamatabë-ecaeya-exanaenexa, Jesucristo, wajanacacapanepaenë, pejamatabëcueneta.
7 Dioso wajanaca-itaxutotsoniataexae, aneconijibia nacatane Jesucristo pejamatabëcueneta. Nexata, Espíritu Santo nacato-itorobica wajanacatsijamatabëcuene-ecaenexa, wajanacayapëtaeya-exanaenexa pepacujiru wajaxainaejawanexa matacabi apopewerewerecaejawa, xua copia-ewetawanapatsi.
8 Daxita baja paliwaisi pacatoyaquinatsi, pexaniajailiwaisi cajena. Nexata, jitsipajë ajumesaëya jiwi netsipaebaponaenexa bajarapaliwaisi, pamonae Diosojawabelia pesiwanajamatabëcuenecopabiwi, pejamatabëcuene-enaenexatsi ëpexaniacuene pexanaejawa. Bajarapaliwaisi-ata bitso pexanialiwaisi, jiwi pejamatabëcueneyawenonaeliwaisitsi.
9 Itsiata necujarubijawata, nawecua-itawetsianame saya jema natsiquejemaliwaisixi itsamonae pecabarëcuaicuaijaiyaniwa, pacuenia judíowi pijamonaemi pewënëxi yabara,a Dioso penajumecopatsiliwaisi Moisés-pijinëta yabara-ata, bajarapaliwaisianë yabara anaeya pecajumenotsiyaniwa. Bajarapacuenia pecabarëcuaicuaijaijawa apoxanepanae, tsipaji jiwi apojamatabëcueneyawenonae itsacuenejawayonexa-ata.
10 Pajiwi peliwaisita nawecuanatsanaeya-exanaponab Jesús pijajiwi, jume-itawetsianame caeto, anijatobeje-ata. Nexata, itsa apocopatsi tsane necuene-itawetsicujinae, rowialia pacapitsapaeya-exanaename Jesús pijajiwiwecua.
11 Yapëtaneme rabaja mapacueneje. Ponë peneta copata pexaniajailiwaisi pejumexaniataejawami, najamatabëcuenebijiana pibisiacuene pexanaexae. Nexata, bajaraponë pijacuata naneconita Diosojawabelia.
Pablo pematatsënëa itsaliwaisi to-itoroba Titojawabelia
12 Pacujinae cato-itorobialiatsi Artemas, itsa jume, Tíquico, bajaraponë itsa patsialia xamëjawabelia, nexata xamë bepijia renamë tsane xanëjawaberena. Nacaxitajarabianatsibeje Nicópolis tomarata, tsipaji bajarapatomarata natocaëjëtajë taponaponaenexa daxita emarapae.
13 Itsa baja pacawecuaponaena abogadonë Zenas, Apolos-beje, yawenonaename pacuenia namatawenonaenabeje pijanamutobejenexa, itsacuenejawayo-ata petosajinaeyaniwatsibeje penajetarucaejawatabeje namutua.
14 Cujarubianamenua pamonae, Jesús peliwaisi wajanajuajumexaniataewi, pexaniacuenia peyawenonabiabinexa pamonae pepacuene namatawenona. Bajarapacuenia itsa exanawanapaena, nacopabiana pexaniacuene pexanawanapaewi.
Pablo penapëjiobiliwaisi
15 Daxita pamonae yajawaponaponajë, cajamatabënajinalia. Pajamatabënajinaliajë daxita pamonae patane-asiwawi, patanajuasiwanajamatabëcuenecopabiwi Diosojawabelia. Pacatojitsipatsi Dioso asiwaya papecayawenonaponaejawa papeca-itaxutotsoniataexae.