Pablo papexanialiwaisi itoroba Tito jiwijawabelia petsipaebaponaenexa
2
Tito, xamë baja cajena juya cujarubabiabianame Jesús pijajiwijawabelia, ëpexaniajailiwaisi, xaniawaetsia pejinawanapaenexa.
2 Nexata, cujarubianame perujupebijiwi penajamatabëcuenerewiabinexa, xaniawaetsia pejinawanapaenexa jiwi peyaiyataenexatsi, penajamatabëcuenecataitsinexa pibisiacuene pexanaeyaniwa. Cujarubianamenua pexaniajailiwaisi, Jesús peliwaisi, xaniawaetsia pejumexaniataenexa, asiwaya-ata petaenexa, itsamonae penajamatabëcuenesaëtsinexa piayapëbejecuenejawanë tocopiapatsi-atatsi Dioso pitaxutuajamatejemajawa yabara.
3 Bajarapijinia pacuenia, cujarubianamenua perujupetiriawi jamatabëcuenerewiaya pejinawanapaenexa Dioso pitabarata, pibisiacuenia itsamonae pebaracuaicuaijaiyaniwa, pia-itajibitsabiabiyaniwanua. Biji rajane, bajarapapetiriawi pexaniacuene betsita-exanawanapa pejanapetiriawijawabelia.
4 Becujarubanua pecowëpijipetiriawi xaniawaetsia pamonajiwi piasiwanexa, penacoxi-asiwanexanua.
5 Jamatabëcuenecujarubiana xaniawaetsia pesiwanajamatabë-exanaenexa xua exanaejitsia, xaniawaetsia pena-ewetsinexa-ata liwaisi penatsixainaeyaniwa. Jamatabëcuene cujarubiana xaniawaetsia pesiwacanaëjëtsinexa xua exanaejitsia, xaniawaetsia pena-ewetsinexa-ata liwaisi penatsixainaeyaniwa. Bajarapaliwaisita, xaniawaetsia itsa jinawanapaena, itsajiwi-ata pibisiacuenia Dioso pejumeliwaisi apobaracuaicuaijai tsane.
6 Bajarapacuenia pijinia, cujarubianame pewëjëawi xaniawaetsia pesiwacanaëjëtsinexa xua exanaejitsia, pibisiacuene pexanaeyaniwa.
7 ¡Xamë pijinia itsamonae pecacuenepitsinexa, xaniawaetsia tsitanacuene-itajëtaponaponare ëpexaniacuene ne-exanaponaponaejawata jiwi pitabarata! Necujarubijawatanua, netsipaebiliwaisi, ne-exanaecuenemibeje, xaniajaiya benajëpabeje. Tsipaebabiabianame pexaniajailiwaisi nenajamatabëcuenerewiabinëcuenia.
8 Necujarubijawatanua pexaniajailiwaisi, tsipaebabiabianame mataropotsinejewamë itsaliwaisi. Bajarapacuenia itsa cujarubabiabianame, itsajiwi-ata apoxainae tsane xua yabara xaniajaiya cabaracuaicuaijaijitsia. Nexata, aura tsane, bajarapaliwaisi pecajumetaejawata.
9 Pamonae amoneya petonacuenebabiabiwi, muxujiobabiabianame jamatabëcuene-ewetsiaya pejinawanapaenexa pijatuxanenë, pejumecowënëtsinexanua pacuenia itorobatsi, pesiwajamatabëcuenebarëyanexatsi. ¡Pëtsa bajarapamonae nacuenecaranata itsaliwaisita pejejaiyaniwa!
10 ¡Pëtsa tonacobetoxota pijatuxanenë pijajawa! Biji rajane, xaniawaetsia betonacuenebabiaba, petsitanajamatabëcuene-itajëtsinexa caejamatabëcuene pexainaenë xua itorobatsi pexanaenexa. Bajarapacuenia itsa exanaena, nexata daxitajiwi yapëtaena Dioso, wajanacacapanepaenë, peliwaisi pexaniacuenejawa.
11 Dioso baja cajena nacayapëtaeya-exana wajanaca-itaxutotsoniataejawa, penajamatabëcuene-itajëtsijawata pejitsipaejawa wajanacacapanepaejawanexa daxitanacuapijiwitsi.
12 Nexata, bajarapacuenia Dioso nacacujaruba wajacopabinexa pibisiacuene waja-exanaejawami, wajajitsipaeyaniwanua mapanacuapijipibisiacuenejawanë, wajacabarëya yaniwa. Dioso rajane jitsipa mapanacuataje nayajiwitaeya wajajinawanapaenexa pibisiacuene waja-exanaeyaniwa. Nexata, jinawanapaenatsi wajanajamatabëcuenerewiabiwicuenia, wajajamatabëcuenexanepanaewicuenia jiwi pitabarata, Dioso pitabarata-ata, waja-exanawanapaewicuenia-ata Dioso pejitsipaecuenia.
13 Bajarapacuenia, paepatojebi abaxë Jesucristo copia-ewetawanapatsi, xaniawaetsia bejinawanapatsi, icatsia pecaëjëtsimatacabita pepatsimatacabijawabelia. Nexata, siwajamatabëcuenebarëyatsi tsane pamatacabi wajaDioso, ayaijamatabëcuenenë, wajanacacapanepaenë-ata, Jesucristo, icatsia yajawapatsianica pijapeniweniwenaecotia.
14 Bajaraponë pijacuata nacaeweta pebeyaxuabinexatsi, wajanacasiwatëpaenexa waxaitsi yabara. Nexata, Jesucristo pebeyaxuabijawatatsi, pijanata nacacomuata pibisiacuene waja-exanaeneconiwecua. Pepocuene nacawecua-ajibia-exana baja bajarapaneconimi. Bajarapacuenia pijajiwitsi naca-exana. Nacajitsipaeya-exananua ëpexaniacuene wajato-exanaenexa.
15 Bajarapacuenia asaëyata daxita muxujiobaponaename. Cuene-itawetsianamenua, nejamatabëcuenebabatsinexa bajarapamonae. Bajarapacuenia exanaponaename, Dioso pecatocopatsixae bajarapanamatacaitorobisaë. ¡Pëtsa nacopatame itsajiwi-ata bijiaya pecataenexa!