6
Pamonae amoneya itsamonae tonacuenebawanapa, Jesús peliwaisi itsa pejumexaniataewi, yaiyataeya tonacuenebi pijatuxanenë, pesiwajamatabëcuenebarëyanexatsi. Nexata, pijatuxanenë Dioso pibisiacuenia apobaracuaicuaijai tsane, paliwaisi-ata waxaitsi tsipaebaponatsi, Jesús peliwaisi.
2 Pamonae amoneya tonacuenebawanapa pijatuxanenë, itsa Jesús peliwaisi pejumexaniataenë, apobecopabawanapae pejumecowënëtsijawa pijatuxanenë, penajuajumexaniataexae Jesús peliwaisi. Biji rajane, asaëya xaniawaetsia tonacuenebi pijatuxanenë, tsipaji raja Jesús peliwaisi pejumexaniataenë yawenonaeya tonacuenebawanapa pena-ewetsijawanexa. ¡Bajarapaliwaisi tsipaebaponare! Itorobarenua bajarapacuenia pexanawanapaenexa.
Pamonae bepexaniajailiwaisi itajara pecujarubiwi siwabëjai tsabiabi palata yabara
3 Belia, itsamatacabijawabelia pacacujarubijitsipa itsamonae apopejëpaeliwaisi wajatuxanenë Jesucristo peliwaisi, panejinawanapaenexa saicaya Dioso pejitsipaejawawecua.
4 Bajarapacuenia pecujarubiwi, cueneyapëtanetsi be-ayaijamatabëcuenewi itajara penataewi. Itsiata, xaniawaetsia apoyapëtae xua yabara cujaruba. Bajarapamonae pecujarubiliwaisianëjawata, capitsapabiaba jiwi penajume-anaeyanotsijawa natsiquejemajawanë yabara. Apopebarënajamatabëcuenejëpaexae, capitsapabiabanua jiwi pianaepanaejamatabëcuene, pecueneca-ëbijamatabëcuene-ata. Nexata, Jesús pijajiwi pibisiacuenia nabijataeyabiaba. Itsamonae bijiaya cuenecanaëjëta xua yabara picani apoto-exanaetsi.
5 Bajarapamonae piajamatabëcuenebejexae, anaeya namata-enetsia najumenotabiaba. Apoyapëtaenua pexaniajailiwaisi Cristo yabara, jiwi petsipaebinexa. Bajarapacuenia tsipaebapona, ayaijawa palata pepitabiabinexa. ¡Bajarapitsiwi xamë nayajiwitsare, necuenejëpaeyaniwa!
6 Yapëtanetsi cajena bitso penamatamotsijawa palatawecua, wajajinawanapaejawa Dioso pejitsipaecuenia, itsa siwajamatabëcuenebarëyatsi xuayowajëto Dioso nacatocopata, wajaxainaenexa mapanacuataje.
7 Pamatacabi waxaitsi naexanatsi mapanacuataje, itsacuenejawayo-ata apocapatsitsi. Pamatacabi pijinia tëpaenatsi, apocaponae tsanetsi itsacuenejawayo-ata mapanacuapijicueneje.
8 Bajaraxuata, itsa xainatsi wajaxaejawa, wajanaxatabijawa-ata, besiwajamatabëcuenebarëyatsi.
9 Itsiata baitsi jane, pamonae siwanajamatabëxaina ëpexainaejawanexa, bajarapamonae dowathi jamatabëcuenecëtatsi, pecobeca-ëbijamatabëcueneta, pitajitsipaejamatabëcuenetanua. Nexata, pibisiacuene exana palata pepitsinexa. Jamatabëcuenebijianatsi. Nexata, bajarapamonae Diosowecua naxuabiaya jinawanapa.
10 Pamonae bitso jitsipa palata ayaijawa pexainaejawa, tsijamatabëcuenepitsapatsi pibisiacuene pexanaenexa. Itsamonae ayaijawa palata pejitsipaexae, nawecuacopaba pejumexaniataejawa Dioso pejumeliwaisi. Nexata, bajarapajamatabëcuene bëpënëa bitso yajamatabëcuenebëjai.
Pablo pecopiarutsimuxujiobiliwaisi Timoteojawabelia
11 Timoteo, xamë Dioso pijajiwitonëmë. ¡Nawecuatsare daxita bajaraxuanë, jiwi palata pejitsipaejamatabëcuene, saicayaliwaisi nejumexaniataeyaniwanua Dioso peliwaisiwecua! ¡Biji jane, ajamatabëcuenesaëmëre maxuanë nexanaenexaje!: Dioso pejitsipaecuenia neponaponaejawa, niasiwajawa Dioso, itsamonae-ata, itaxutuajamatejemaya Diosojawabelia neponaponaejawa, bajayajebi niajamatabëcuenesaëtsaponaponaejawa, catocopiapataponae-ata pecato-ayapëbejejawanë, beweliajamatabëcuenenë nataeya neponaponaejawanua.
12 ¡Daxita pecacuenecaranabijawanë Dioso pejitsipaecuenia neponaponaeyaniwa, wecua-ajamatabëcuenesaëmëre, nitaxutuajamatejemajawata Diosojawabelia, nepitsijawabelia matacabi apopewerewerecaejawa! Pamatacabi nawajunupaebame, ayaibitsaëtoxaneto pitabarata, nejumexaniataejawa Jesús peliwaisi, Dioso cajunata pecarajutsinexa matacabi apopewerewerecaejawa.
13 Ca-itorobatsi mapacueniaje Dioso pitabarata, Ponë piasaëjamatabëcuene perajutsinë daxitacuenejawabelia, Jesucristo pitabarata-ata, Ponë ajumejunawijibia nawajunupaeba pexaniajailiwaisita Poncio Pilato pitabarata.
14 Ca-itorobatsi xaniawaetsia nejumecowënëtaponaponaenexa pacuenia catonajumecopatsi, wajatuxanenë Jesucristo icatsia pepatsimatacabitsicajawabelianexa. Nexata, itsajiwi-ata apoxainae tsane xua yabara cacuenebaracuaicuaijaijitsia.
15 Cristo icatsia patsianica Dioso pecaëjëtsimatacabita. Pexaniacuenia wënëxaniatsianatsi mapacueniaje:
Caenë Dioso bitso ayaijamatabëcuenenë daxitanacuanë pewetsiwiwecua.
16 Caenë Dioso apotëpae tsane daxita matacabijawabelianexa.
BajaraPonë yacotia peponaponaenë. Bajaraxuata, itsajiwi-ata acuenebi pimoxoyotsijawa, petaejawanua Dioso.
Daxitamatacabi Dioso pijajiwi yaiyatanetsi. ¡Dioso cajena ayaijamatabëcuenenë daxitamatacabijawabelianexa! ¡Bajara-itsi tsane!
17 ¡Pamonae bitso pexainaewi mapanacuapijicueneje, muxujiobare be-ayaijamatabëcuenewi penataeyaniwa, pitaxutuajamatejemayaniwanua pijapalata pena-ewetsinexa, tsipaji saya jemata pewerewerecaejawa! ¡Biji rajane, itorobare pitaxutuajamatejemanexa Diosojawabelia, Ponë piasaëtsaponaponaenë! BajaraPonë raja wajanacarajutsinë nawitsiacuenia daxita wajanamatawenonaejawanë, wajacabarëyatsawanapaenexa.
18 Itorobarenua pexaniacuene peto-exanabiabinexa itsamonaejawabelia itsamonaejawabelia, penaexanaenexa bitso pexainaewi bajarapapexaniacuene pexanaejawanë. Toxanepanatsinua penajamatabëcueneweretsijawa perajutsinexa, petsicobetsanaponaenexa, pexainaeyajuwënëjawanë.a
19 Bajarapacuenia peyawenonaexae itsamonae mapanacuataje, Dioso juya athëbëtatsia tobuataponaenatsi pepacuene penamatamotsijawanë pexainaejawanexa, pepopitawajamatabëcuene pexainaenexanuab daxitamatacabijawabelia.
20 ¡Timoteo, exanaponaponare daxita xua Dioso catocopata nexanaenexa! ¡Pëtsa namuxuna-ewetame pamonae bitso pecuaicuaijaiwi saya mapanacuapijicuene yabaraje, natsiquejemaliwaisixi pecuaicuaijaiwi, penajumetsënëtsiliwaisi petsipaebaponaewi-ata! Bajarapamonae tsipaebapona itajara pepacuene bepexaniajailiwaisi. Itsiata, cajena apopexaniajailiwaisi.
21 Itsamonae bajarapaliwaisi pejumexaniataexae, nawecuacopaba Dioso peliwaisi pejumexaniataejawami.
Pacatojitsipatsi Dioso asiwaya pecayawenonaejawa ayaicuenia peca-itaxutotsoniataejamatabëcuene.