Pablo muxujioba Timoteo pacuenia caebitsaëto canacujitsia liwaisi yawenonaejitsia, Jesús pijajiwituatuajëta
5
¡Pëtsa ajumesaëya cuene-itaweta pamonae newajënaeyapijiwi! ¡Biji rajane, be-axacuenia xaniawaetsia yaiyataeya muxujiobare! ¡Necowëpijiwi pijinia, benejuyapijiwicuenia muxujiobare!
2 ¡Petiriawi-ata, newajënaeyapijiwi, be-enacuenia muxujiobare! ¡Necowëpijiwaxi pijinia, benejuyapijiwaxicuenia muxujiobare, itsajamatabëcuene bëpënëa pibisiacuene siwanajamatabëxainaenejewamë!
3 ¡Pamonajiwi pewecuatëpaewaxitsi, Jesús pijajiwiyajuwënëwaxi, yaiyataeya yawenonare, itsa apoxainae pijamonae peyawenonaenexatsi!
4 Itsiata baitsi jane, itsa xaina pexi, pemomoxi-ata, bajarapamonae xanepana pewetsinexatsi. Bajarapacuenia betaxuxuaba peyawenonaecuene pijamonaejawata, pewetsijamatabëcuenetsi juya peyawenonaenexa paxa, pena, pamo, pacue-ata. Bajarapacuenia itsa exana, bitso pexaniacuene. Nexata, Dioso barëyataenatsi.
5 Powa, pamona pewecuatëpaewatsi, pepopenamatawenonaewa, itsa apoxainae itsajiwi-ata pewetsinexatsi, nexata be-itaxutuajamatejema tsaponaponae Dioso peyawenonaenexatsi. Nawajëtabiabi Diosojawabelia matacabita, merawi-ata.
6 Itsiata baitsi jane, powa, pamona pewecuatëpaewatsi, penatojitsipaecuenia itsa exanaponapona penabarëyaya-exanaenexa nacuenecataitsinejewa, Dioso bajarapowa tanetsi bepejamatabëcuenetëpaewa, asaë tsaponaponae-ata.
7 ¡Bajarapacuenia itorobare Jesús pijajiwi xaniawaetsia pijamonae peyawenonaenexa penamatawenonaecuene, itsajiwi-ata pebaracuaicuaijaiyaniwatsi bajaraxua yabara!
8 Pajiwi, Jesús pijajiwiyajuwënëjiwi, xaniawaetsia itsa apoyawenonae pijamonae, pijabopijiwi-ata, penamatawenonaejiwi, bajarapajiwi apo-exanae Jesús peliwaisi pejumexaniataewicuenia. Biji rajane, bitso ajamatabëcuenebeje Jesús peliwaisi pejume-aebijiwi matatoxenetsia.
9 Petiriwa sesenta pawaibeje pexainaewa, caeto penacojiobicujinae pamonajawabelia, bajaraponë pewecuatëpaecujinaetsi, xanepana pewënëyaquinarutsinexatsi pabaxutota wënëyaquinabiaba pamona pewecuatëpaewitsi. Nexata, daxita Jesús pijajiwi bajarapowa yawenonaena penamatawenonaejawanë.
10 Yawenonaena saya bajarapowa, itsa cueneyapëtanetsi pexaniacuene pexanaewacuene, pexi xaniawaetsia pewitsatsiwanua. Yawenonaenanua itsa xaniawaetsia jiwi pijabota pecopiapitsiwa, pesiwaxainaewitsi, beweliajamatabëcuene nataeya peyawenonaewa itsamonae Jesús pijajiwi penamatawenonaejawata, itsamonae-ata bepejiobicueneta pejinawanapaewinua. Bajarapitsicuene pexanaewaxi, toxanepanatsi Jesús pijajiwi peyawenonaenexa, penamatawenonaejawata.
11 ¡Itsiata baitsi jane, powa abaxë sesenta pawaibeje apopexainaewa, pëtsa wënëyaquinarutame pabaxutota wënëyaquinarubabiabame pamona pewecuatëpaewaxitsi! Bajarapitsiwaxi, nacajone-ata picani petonacuenebawanapaenexa Dioso pijacuene, belia jitsipaejitsipa icatsia penacojiobinexa. Nexata, ëpamona pexainaejawa pejitsipaejawanë jamatabëcuene-enaejitsipatsi.
12 Nexata, bajarapacuenia pijaneconi natsixainaejitsipa Diosojawabelia, apopexanawanapaexae penacajonecuenia.
13 Pematatsënëa bajarapitsiwaxi itsa cuenesajinaejitsipa, siwaxainarutsipa itsa bonëjawa. Afaetabinua tsipae. Pematatsënëa pesiwaxainarutsijawata baracuaicuaijai tsabiabi tsipae itsamonae. Jamatabë-itonotabiabijitsipa itsamonae. Xuaxi yabara-ata apobecuaicuaijaitsi, cuaicuaijai tsabiabi tsipae.
14 Bajaraxuata, muxujiobajë pamona pewecuatëpaewaxitsi, powa abaxë bitso apoperujuwa. Xanepana icatsia penacojiobinexa, pexi pexainaenexa, pijabo-ata xaniawaetsia pewetsinexa. Nexata, bajarapacuenia wajanacacuene-itoyawi-ata to-acuenebitsi tsane pebaracuaicuaijaijawatsi bajarapitsiwa.
15 Bajarapacuenia jumaitsinë, tsipaji baja itsamonae pamonajiwi pewecuatëpaewitsi nawecuacopaba baja Cristo peliwaisi, juya pexanawanapaenexa dowathi pitorobicueniatsi.
16 Petiriwa,a Jesús peliwaisi pejumexaniataewa, itsa xaina pijamonaeyajuwënëwaxi pamona pewecuatëpaewaxitsi,b nexata beyawenona penamatawenonaejawata. Bajarapapetiriawi aponamatawenonae tsane peyawenonaenexatsi daxita Jesús pijajiwi, tsipaji baja pijamonaewa ewetatsi. Nexata, Jesús pijajiwi caëjëpaejitsiatsi peyawenonaenexa pamona pewecuatëpaewitsi, pijamonae apopexainaewi.
17 Pamonae, ancianowi, xaniawaetsia ewetabiaba Jesús pijajiwi, xanepana bajarapamonae pematamotsijawa peyaiyataejamatabëcuene, perajutsijawanua penacuenebimatamo, pexaniacuenia pewetsijamatabëcuene. Itsa pepocuene Dioso peliwaisi tsipaebawanapa, cujarubawanapanua, matatoxenetsia bajarapacuenia beto-exana.
18 Bajaraxua yabara Dioso pejumeliwaisibaxutota jumaitsi mapacueniaje: «¡Pabueyu canacuenebame trigoxu pecatotanabataxuabinexa, pëtsa pumuxatatame trigoxu pexaeyaniwa! ¡Biji rajane, tocopare pexaenexa pecatotanabataxuabijawata!», jai. Itsaliwaisita pijinia jumaitsi mapacueniaje: «Penacuenebinë bematamotatsi penacuenebijamatabëcuene», jai Dioso pejumeliwaisibaxutota. Bajaraxuata, bematamotatsi ancianowi Dioso pejamatabëcueneta bitso penacuenebiwi.
19 ¡Pacujinae caejiwi paeba ancianonë pibisiacuene pexanaejawa yabara, pëtsa jumexaniataneme! Matapania itsa catsipaebiana petaewitsi anijajiwibeje, acueyabi pajiwibeje-ata, jumexaniataename.
20 ¡Nexata, ancianowiyajuwënënë tsiteca pibisiacuene itsa exanaponapona, caecuenia cuene-itawere daxita Jesús pijajiwi pitabarata! Itsamonae, ancianowi, itsa cacuenetane nitawetsijawa pibisiacuene pexanaewi, nexata cuenejunawiana pibisiacuene pexanaejawa.
21 Ca-itorobatsi Dioso, Jesucristo, Dioso penato-itapetsi-ángelewi-ata pitabarata, nexanaponaponaenexa pacuenia ca-itorobatsi. Daxita pamonae ancianowi, pibisiacuene pexanaewi, najëpaeya cuene-itawetsianame. ¡Caenë-ata pëtsa siwa-ajume-uramë necuene-itawetsijawa pibisiacuene pexanaejawa yabara!
22 Nitapetsiwajënaeya ancianonënexa, copiaya cuenecanaëjëtsianame. ¡Pëtsa itsanë-ata bepijia tsimatanacobebuatame netowajëtsinexa ancianonënexa! Bajarapacuenia itsa exanaejitsipame, bajaraponë bepijia pibisiacuene itsa exanaejitsipa, nexata itsamonae cataejitsipa pibisiacuene pexanaewi benejamatabëcueneyawenonaenë. ¡Daxita pibisiacuenewecua, xaniawaetsia naewetsiaya ponaponare!
23 Xamë raja ajamatabë-epatanemë tsabiabi. ¡Pëtsa apaeyabiabame ëpitaranae! Tsiquirivinorayo yajawa apaeyabiabianame.
24 Itsamonae pibisiacuene pexanaejawa bacueneyapëtanetsi. Bajaraxua yabara bananeconitsia-exanatsi daxitajiwi pepuacueneyapëtaetsi. Itsamonae pijinia pibisiacuene exanae-ata, bepijia apocueneyapëtaetsi. Matapania, bexëajawabelia xaniawaetsia wënëliwaisitanetsi.
25 Bajarapijinia pacuenia, itsamonae pexaniacuene pexanaejawa bepijiayo daxitajiwi cueneyapëtanetsi. Itsajawata, pexaniacuene exanae-ata, bajayajebi jiwi apocueneyapëtaetsi. Itsiata baitsi jane, bajarapamonae acuenebi nawënëmatayatsia pejinawanapaejawa. Nexata, bexëajawabelia daxitajiwi wënëliwaisitaenatsi pexaniacuene pexanaejawa.