Pablo wajëta Jesús pijajiwijawabelia, Tesalónica tomarata pejinawanapaewi, petowajëcaenexatsi Diosojawabelia
3
Tajamonae, pecopiarucaeliwaisi rabaja maje pacatoyaquinatsije. ¡Panetowajëre Diosojawabelia wajatuxanenë Jesús pejumeliwaisi bepijia peyacaëjëpaenexa daxitanacuajawa! Patowajërenua daxitajiwi yaiyataeya pejumexaniataenexa bajarapaliwaisi, pacuenia baja paxamë pajumexaniataneme.
2 Panetowajërenua Diosojawabelia, patane-ewetsinexa pibisiajamatabëcuenewiwecua, tsipaji raja daxita bajarapamonae apojitsipae Jesucristojawabelia pesiwanajamatabëcuenecopabijawa.
3 Itsiata baitsi jane, Dioso najumecapanepaeya pejumaitsicuenia pexanabiabinëxae peyawanonaejawanexa, pacacuenecaëjëpa pane-itaxutuajamatejemajawa, papecajamatabëcuene- asaëya-exanaenexa, papeca-ewetsinexa-ata dowathiwecua.
4 Bajarapacuenia Dioso papecayawenonabiabixae, paca-itaxutuajamatejematsi xaniawaetsia pane-exanawanapaejawa, panewajënaeyabelia daxita pacuenia paca-itorobatsii.
5 Pexaniacuenia pacatojitsipatsi Dioso papecayawenonaejawa, pane-asiwanexa itsamonae-ata pacuenia Dioso asiwa. Pacatojitsipatsinua Cristo papecajamatabëcueneyawenonabiabinexa, panewajënaeyabelia pane-ajamatabëcuenesaëtsawanapaenexa nabejiobitsicuenia panejinawanapaejawata.
Pemuxujiobiliwaisi: Jesús pijajiwi benatonacueneba pena-ewetsijawanexa
6 Tajamonae, wajatuxanenë Jesucristo pewënëta paca-itorobatsi. ¡Pawecuanatsare Jesús pijajiwituatuajëta, pamonae apopejitsipaewi penacuenebijawa, pena-ewetsinexa pacuenia picani pacacujarubatsi!
7 Payapëtaneme rabaja pata-exanawanapaecuene, pamatacabi panajinawanapajë paxamëjawata. Nexata, pacuenia paxanë pacatsitajinawanapatsi, bajarapacuenia bepajinawanapame. Apopafaetabinë tsawanapae.
8 Amoneya baja cajena itsajiwi-ata apopawecuaxaenë itsacuenejawayo-ata. Biji rajane, pinijicuenia matacabita, merawi-ata, panatonacuenebabiabajë, patana-ewetsinexa. Bajarapacuenia pa-exanabiabajë, itsajiwi-ata, paxamëyajuwënëwi, peto-ayapëbejeyaniwatsi patane-ewetsijawa patanajinawanapaejawata.
9 Paxamëjawata pexanialiwaisi patacatsipaebawanapaexae, wajatuxanenë picani panetocopata patacawajëtsinexa xua panamatawenonajë patanerajutsinexamë. Itsiata baitsi jane, bajarapacuenia apopa-exanaenë. Paxanë pacatsitanacuenebabiabatsi patapitaponaenexa patanamatawenonaejawanë, patanecuenetaecueniamë patanecuenejëpaenexamë, panijacueneta panena-ewetsinexa.
10 Pamatacabi abaxë panajinawanapajë paxamëjawata, pacatonajumecopatatsi piafaetabiwi yabara: «Pajiwi apojitsipae penacuenebijawa, apobenaxae», pacajaitsi baja cajena.
11 Itsiata, pawënëliwaisitaniji pacuenia itsamonae paxamëyajuwënëwi saya jinawanapa nacuenebinejewa. Bajarapamonae pina bitso cuene-enaeyababiabaa itsamonae penacuenebiyaniwa.
12 Paxamë pane-afaetabiwi, wajatuxanenë Jesucristo pewënëta paca-itorobatsi panenatonacuenebinexa, panijacuata panena-ewetsinexa. ¡Pacopabare pematatsënëa panejamatabë-itonotsijawa itsamonae!
13 ¡Tajamonae, pëtsa pajamatabëcuenecueraname pexaniacuene pane-exanawanapaejawa!
14 ¡Pajiwi aponacuenebi tsane pena-ewetsinexa, apojumecowënëtsinua tsane paliwaisi pacatoyaquinatsi mapabaxutotaje, bajarapajiwi panawecuatsare! ¡Pëtsa payajawajinawanapame! ¡Pacuenewajunupaebare piafaetabijawa yabara! Nexata, aura tsane, apopenacuenebijawa yabara.
15 ¡Itsiata baitsi jane, bajarapajiwi bepanijawajabitsaëjiwi pëtsa pataneme! ¡Xaniawaetsia pamuxujiobare panijamonaejiwicuenia, penacuenexanetsinexa!
Pablo penapëjiobiliwaisi
16 Pacatojitsipatsi wajatuxanenë, ponë pejamatabëcuenexanepanaeya-exanaenë, papecajamatabëcuenexanepanaeya-exanaenexa, xaniawaetsia panenajuajinawanapaenexa, caematacabi canacujitsia, daxitacuenejawalia-ata. Pacatojitsipatsinua wajatuxanenë papecayajawaponaponabiabinexa.
17 Xanë Pablonë, tacobeta pacatoyaquinatsi mapaliwaisiyoje patacajamatabënajinaexae. Pa-itanecuenia yaquinabiabajë daxita tayaquinaebaxutonëta, bajarapa-itanecuenia pacatoyaquinatsi mapaliwaisiyoje, paneyapëtaenexa xanë patacato-itorobicuene mapabaxutoje.
18 Pacatojitsipatsi Dioso, wajatuxanenë Jesucristobeje, asiwaya papecayawenonabiabinexabeje.