5
Tajamonae, itsiata apopanamatawenonaenë patacatoyaquinaenexa patacayapëtaeya-exanaejawa pamatacabita, paepatota-ata wajatuxanenë Jesús pepatsijawanexatsica.
2 Payapëtaneme baja cajena pamatacabi icatsia patsijitsiatsica, paepatota apowajënae-ewetawanapaetsi. Pacuenia penacobetoxotsinënexa merawi bapata itsajota apojamatabënajinaetsi, bajarapijinia pacuenia pepopetuxanenë Cristo jemata patsianica penaneconitsia-exanaenexa pijaneconi pexainaewi.
3 Pamatacabita jiwi najumaitsi tsaponae tsane: «Daxitanacuanëjawa baja cajena xanepana. Daxitajiwi xaniawaetsia jinawanapa», najai tsane, bajarapaepatota jemata tocopiapatsianatsi Dioso penaneconitsia-exanaejawanexatsi. Pacuenia petiriwa, penacoxitsiwa, jemata wixaenotatsi penacueto pewecuanaexanaenexatsi, bajarapijinia pacuenia jemata copiapatsiana Dioso penaneconitsia-exanaematacabinexa pijaneconi pexainaewi. Nexata, Cristojawabelia apopesiwanajamatabëcuenecopabiwi acuenebi tsane pewecuapanepaenexa bajarapacuene.
4 Tajamonae, paxamë itsiata apopanejamatabëcuene-itaquiriwi, pacuenia jamatabëcuene-itsi tsawanapae pamonae apopesiwanajamatabëcuenecopabiwi Cristojawabelia. Nexata, apopajamatabëcuenenabenajacaemë tsane pamatacabi wajatuxanenë Jesús icatsia patsianica. Pacuenia penacobetoxotsinë itsa pata, basiwajamatabëcuenenabenajacatsi, apopa-itsimë tsane.
5 Daxita paxamë, Jesús papijajiwimë, pexaniajailiwaisita pajamatabëcuene-itayotawanapame. Waxaitsi baja nexata, Jesús pijajiwitsi, pitaquirijamatabëcuene apoxainawanapaetsi.
6 Bajaraxuata nexata, apobejamatabëcuenemajitsitsi, pacuenia jamatabëcuene-itsi tsawanapae pamonae apopesiwanajamatabëcuenecopabiwi Cristojawabelia. Biji rajane, jamatabëcuene-aitawaya bejinawanapatsi, xaniawaetsia wajanacuene-ewetsinexa pibisiacuene waja-exanaeyaniwa.
7 Pamonae majita, merawi majitabiaba. Pamonae pitajibiwi, aitajibi tsabiabi merawi. Bajarapitsiwi xaniawaetsia aponatsiwajënaeyapëtae, xua tsi-ayaijitsiatsi.
8 Itsiata baitsi jane, waxaitsi baja pexaniajailiwaisita wajanacajamatabëcuene-itayotsiwi, nayajiwitaeya jinawanapaenatsi, pibisiacuene waja-exanaeyaniwa. Nexata, pacuenia wajabitsaënë nayajiwinaxatata piatajajawanë, bajarapacuenia waxaitsi-ata nayajiwi najamatabëcuenexatatawanapaenatsi mapacuenejawanëtaje: waja-itaxutuajamatejemajamatabëcueneta waja-itaxutuajamatejemajamatabëcueneta, waja-asiwajamatabëcueneta Dioso, wajacopia-ewetawanapaejamatabëcuenetanua Jesús pepacuene wajanacacapanepaejawa yabara. Bajarapacuenia dowathi apocuenecaëjëpaetsi tsane wajanacayamaxë-itojorobijawa, wajacuene-aebinexa Dioso.
9 Dioso itsa naca-itapeta, aponacatocanaëjëtsi wajanacananeconitsia-exanaenexaa wajaneconijamatabëcuene. Biji rajane, nacatocanaëjëta wajanacacapanepaenexa wajanacananeconitsia- exanaeyaniwa, wajatuxanenë Jesucristo pejamatabëcueneta.
10 Jesucristo baja cajena nacasiwatëpa wajanacayajawaponaponaenexa Dioso pijanacuatatsia. Nexata, icatsia itsa patsianica, nacapitsiana waja-asaëtsawanapaewi, petëpaewi-ata, wajanacayajawaponaponaenexa daxitamatacabijawabelia.
11 Bajaraxua paneyapëtaexae, namata-enetsia panewajënaeyabelia panajamatabëcuene-asaëya-exanaponaename, pacuenia pa-exanawanapame maparucaeje.
Pablo pecopiarutsi muxujiobiliwaisi
12 Tajamonae, pinijicuenia pacamuxujiobatsi paneyaiyataenexa pamonae papeca-ewetsiwi paxamë tuatuajëta. Bajarapamonae asaëyata Dioso tonacuenebawanapa papeca-ewetsinexa, papecamuxujiobinexanua Dioso peliwaisita.
13 ¡Bajarapamonae asiwaya pataema! ¡Payaiyataemanua, Dioso xaniawaetsia petonacuenebawanapaexae! ¡Paxamë pijinia, jamatabëcuenexanepanaeya panajuajinawanapare!
14 Paca-itorobatsinua panemuxujiobinexa pamonae piafaetabiwi. ¡Pajamatabëcuene-asaëya-exanare pamonae pijinia jamatabëcuenecueranawanapa! ¡Payawenonare pamonae jamatabëcuenefaefaena Dioso pejumeliwaisiwecua, peto-ayapëbejewitsi pecopabijawa pijaperujucuenemi! ¡Ajamatabëcuenesaëya, jamatabëcuenexanepanaeyanua, pamuxujiobabiabare daxita liwaisi penatsixainaewi!
15 ¡Pëtsa paxamëyajuwënëwi pibisiacuene papecato-exanaejiwi juya panamatamocuenecanawiatame pibisiacuenia! ¡Biji rajane, panatojaitaponare pexaniacueneb namata-enetsia panenato- exanawanapaenexa!
16 ¡Daxitamatacabi pajamatabëcuenebarëyamëre tsawanapae!
17 ¡Daxitamatacabi pawajëtabiabare Diosojawabelia, pacopatsinejewamë!
18 ¡Pexaniajamatabëcuene parajutabiabare Diosojawabelia daxitacuene yabara, pexaniacuenejawanë, apopanejitsipaecuenejawanë-ata yabara! Bajarapacuenia Dioso pacatojitsipa pane-exanawanapaenexa, Jesucristo papijajiwixaemë.
19 ¡Espíritu Santo papecajamatabëcuene-itorobijawa pane-exanaenexa, pëtsa pawecuanajamatabëcuene-asiwamë! Bajarapacuenia itsa pa-exanaejitsipame, bepane-itaxupaeyabi tsipae Espíritu Santo papecajitsipaeya-exanaejawa.
20 ¡Pëtsa caecuenia panamuxujematame xua Dioso pejumeliwaisianë pepaebiwi, pacayapëtaeya-exana Espíritu Santo pewënëta!
21 ¡Biji rajane, copiaya papecatsipaebiliwaisi xaniawaetsia pajumecanaëjëre Dioso pejumeliwaisita paneyapëtaenexa pexaniajaijawa! ¡Nexata, itsa xaniajai, bajarapacuenia pa-exanare!
22 ¡Itsa pijinia apoxaniajai, panayajiwitaema daxita xua pibisiacuenejawanë!
Pablo penapëjiobiliwaisi
23 Diosojawabelia pacatowajëtabiabatsi, Ponë pijajiwi pejamatabëcuenexaniawaetsinë, papecajamatabëcueneyawenonaenexa, aneconijibia panejinawanapaenexa daxitacuenejawalia. Pacatowajëtatsinua Dioso pewetsinexa panejamatabëcuene, paneperabëto-ata, pibisiacuene pane-exanaeyaniwa wajatuxanenë Jesucristo icatsia pepatsimatacabitsicajawabelianexa.
24 Yapëtaniji bajarapacuenia Dioso papecato-exanaejawanexa, tsipaji caejamatabëcuene pexainaenë pexanaenexa xua yabara pacajunata papexinexamë.
25 ¡Tajamonae, Diosojawabelia panetowajëtabiabare!
26 Asiwaya nebajacobiana daxita bajarajotalia Jesús pijajiwi.
27 Wajatuxanenë Jesús pewënëta, paca-itorobatsi panetsimuxulebinexa mapabaxutoje daxita Jesús pijajiwi pejumetaenexa.
28 Pacatojitsipatsi wajatuxanenë Jesucristo asiwaya papecayawenonabiabinexa, papeca-itaxutotsoniataejamatabëcuene. Bajara-itsi tsane.