Pacuenia Jesús pijajiwi bejinawanapa Dioso pesiwajamatabëcuenebarëyanexatsi
4
Tajamonae, imatami pacacujarubatsi Jesús pijajiwi pejinawanapaecuene yabara. Bajaraxuata, wajatuxanenë Jesús pewënëta, pinijicuenia pacamuxujiobatsi, pacajamatabëcuene-aitatsacaeya-exanatsinua, panewajënaeyabelia nacuene-ewetsiaya xaniawaetsia panejinawanapaenexa. Bajarapacuenia xaniajaiya pajinawanapae-atamë, itsiata pacatojitsipatsi, caematacabi canacujitsia, panewajënaeyabelia tsiteca bajarapacuenia panejinawanapaenexa, Dioso papecasiwajamatabëcuenebarëyanexa.
2 Paxamë baja cajena payapëtaneme paliwaisi paca-itorobatsi wajatuxanenë Jesús pejamatabëcueneta panejumecowënëtsinexa.
3 Panenajamatabëcuene-itajëtsinexa Dioso papijajiwicuenemë, bajaraPonë pacatojitsipa aneconijibia panejinawanapaenexa. Pacatojitsipanua panecopabijawa daxitawiria pibisiacuene panewitota pane-exanaejawa.a
4 ¡Nexata, paxamë, pacaejiwimë canacujitsia, panacuenecujarubare xaniawaetsia panenaperabë-ewetsijawa, pibisiacuene pane-exanaeyaniwa! Panaperabë-ewetawanaparenua, aneconijibia Dioso pitabarata, jiwi papecacueneyaiyataenexa.
5 ¡Bajaraxuata, pëtsa panacopatame panesiwanajamatabëxainaejawa pibisiacuene panewitota pane-exanaenexa, pacuenia ba-exana Dioso apopeyapëtaewi!
6 Itsajiwi-ata apoxanepanae cajena bajarapitsipibisiacuene peto-exanaejawa penajuasiwanajamatabëcuenecopabiwi Cristojawabelia. Wajatuxanenë cajena pinijicuenia naneconitsia-exanaena daxita pamonae exana bajarapacuene. Bajarapacuene yabara imata baja cajena pacatsipaebatsi, pamatacabi abaxë pajinawanapajë paxamëjawata.
7 Dioso baja cajena aponacajunatsi pibisiacuene wajawitota waja-exanawanapaenexa. Biji rajane, nacajunata aneconijibia wajajinawanapaenexa bajaraPonë pitabarata.
8 Bajaraxuata, pajiwi nawecua-itoya bajarapaliwaisi pejumecowënëtsiyaniwa, bajaraxua apoto-exanae pecuene-itawetsijiwitsijawabelia. Biji rajane, bajaraxua exana Diosojawabelia, Ponë wajanacarajutsinë Espíritu Santo.
9 Namata-enetsia panena-asiwatsawanapaejawa yabara, apopanamatawenonaenë baja pematatsënëa patacatoyaquinaejawa, tsipaji Dioso pijacujaya pacacujaruba panena-asiwanexa.
10 Nexata, pasiwamë tsawanapaenua Jesús pijajiwi, daxita pamonae jinawanapa Macedonia nacuajawa. Itsiata, icatsia paca-itorobatsi namata-enetsia orijibia panena-asiwatsawanapaenexa.
11 ¡Pacuenia baja cajena copiaya paca-itorobatsi, jamatabëcuenexanepanaeya pajinawanapare! ¡Panacuene-enaeyabare ëpanijacuene, panejamatabë-itonotsiyaniwa itsamonaejawabelia! ¡Panijacuata panatonacuenebare, panena-ewetawanapaenexa!
12 Bajarapacuenia itsa pa-exanawanapaename, nexata Jesús peliwaisi pejume-aebiwi pacayaiyataena. Apopanamatawenonaemënua tsane itsamonae panejamatabëcuene-ewetsijawa, papecarajutsinexa panenamatawenonaejawanë.
Pacuenia itsi tsane wajatuxanenë Jesús icatsia itsa patsianica
13 Tajamonae, pamonae apojamatabëcuene-ewetawanapae Cristo pepatsijawanexatsica, bitso najamatabëxainabiaba, pijamonaejiwi itsa wecuatëpatsi. Bajarapacuenia apopacatojitsipaetsi panenajamatabëxainaejawa,b itsa pacawecuatëpa Jesús peliwaisi panenajuajumexaniataejiwiyo, pacuenia banajamatabëxaina Jesús peliwaisi pejume-aebiwi. Bajaraxuata, pacatoyaquinatsi paneyapëtaenexa baja cajena pacuenia itsijitsia pamatacabi wajatuxanenë Jesús icatsia patsianica. Pitsicuene taejitsianua petëpaewi bajarapamatacabi.
14 Waxaitsi, Jesús pijajiwitsi, jumexaniatanetsi Dioso icatsia piasaëya-exanaejawa Jesús petëpaejawawecua. Bajaraxuata, yapëtanetsi pexaniajaijawa Dioso icatsia itsamatacabi piasaëya-exanaejawanexa daxita petëpaewimi, pamonae pesiwanajamatabëcuenecopabiwi Jesús-jawabelia.
15 Nexata, pacayapëtaeya-exanatsi pacuenia wajatuxanenë Jesús neyapëtaeya-exana baja. Waxaitsi, Jesús pijajiwitsi, abaxë mapanacuata waja-asaëtsawanapaewije, pamatacabi wajatuxanenë Jesús icatsia patsianica, athëbëabetsia aponamataxainaetsitsia tsane. Biji rajane, copiaya namataxainaenia pamonae tëpa pepuapesiwanajamatabëcuenecopabiwi Jesús-jawabelia.
16 Bajarapamatacabi, wajatuxanenë pijacuata patsianica athëbëwetsica pejunatsinexa pijajiwi. Nexata, itorobiana ángelewi penamatacaitorobinë pewawajainexa. Itsanë pijinia obiana Dioso pijatrompeta. Nexata, pamonae Cristojawabelia pepuapesiwanajamatabëcuenecopabiwi tëpa, bajarapamonae asaëya-exanaenatsi petëpaejawamiwecua.
17 Bajaraxuacujinae, waxaitsi, abaxë mapanacuata waja-asaëtsawanapaewije, nacacaponaenia itarërëbojawabetsia, wajanacacaetuatsinexa petëpaewimi yajawa. Nexata, caxitajarabianatsi jane baja athëbëtatsia wajatuxanenë Jesús, wajayajawajinawanapaenexa daxitamatacabijawabelianexa.
18 ¡Bajaraxua pewajënaeya, namata-enetsia panajamatabëcuenesaëya-exanaponare mapaliwaisitaje!